Shitatiko 26

Ishaki ukuzika ku Ngela naku Mbeleshemba

1Kwekalile kapande kakanene kamina mu litunga kuwezelela kukapande kakutatika kekalile ha shikati sha Abulahama. Ishaki wayile kuli Ambimeleki, mwene wa Bafwilishitina, ku Ngela. 2Nyambi ya Ngula waliholwele kuli Ishaki pe wambile ngayi, “Hinga uya ku Engepita, yikala mu litunga elye nikukutongweza ngayi wikalemo. 3#Shit 22:6-18. Yikala kuno kashikati, nikekala nobe pe nika kutandalisha, ndaba nika kupanika litunga elye nimwalyo ku bazukulyobe. Nikalama shikulupisho shiya na kulupishile tatiyobe Abulahama. 4Nikakupanika bazukulu babengi ngonehe nyenye za muyilu, kami nikabapana litunga elye nimwalyo. Matunga nimwawo hano hanci akatandalishiwa kupitila mu bazukulyobe. 5Nikamitandalisha ndaba Abulahama wanyombatalile na kulama ndayano zami na mulao wami.”

6Niho Ishaki azikile mu Ngela. 7#Shit 12:13; 20:2. Oho bantu ba kumbalila kuyo bamwipwile hali mukazendi, Ishaki wambile ngayi, “Nengi mpanzami.” Kaliha wetabilile ngayi nengi mukazendi ndaba watinine ngayi bantu ba kumuziha na kuyekako Lambeka, ndaba wengile wamuwahe shikuma. 8Oho Ishaki ekalile kuyo shikati shashitali, Ambimeleki mwene wa Bafwilishitina watilaminine mu limpananga pe wamonene Ishaki hinga abumbatila na ku zupeza Lambeka. 9Nohobene Ambimeleki wehanine Ishaki, wambile ngayi, “Mona, nka niye nengi mukazobe. Shumangani wambila ngayi nengi mpanzami?” Ishaki wambile ngayi, “Ndaba nahanganikile ngayi nikazihiwa hakwamba ngayi mukazami.”

10Ambimeleki wambile ngayi, “Kati bishini unatendele nehe kukwetu? Haya hinga umo wa bantu bami walala na mukazobe, shinga kaliha ukatuwanina mulandu ndi?” 11Ambimeleki niho atongwezele bantu nimwabo ngayi, “Muntu nimwendi wakuyandisha ou muntu hinge mukazendi, ukazihiwa.”

12Ishaki wakunine mbuto mu litunga liyo, pe mu mwaka uyo watezele byabingi shikuma kupitakana biya akunine, ndaba Nyambi ya Ngula wamutandalishile. 13Wuheti watangamine, pe wengile wakuheta shikuma. 14Bafwilishitina bamuyuvwilile mwili, ndaba wekalile na matanga amengi a bimuna bya bambelele na zingombe na bandungo babengi. 15Niho Bafwilishitina babuwile mashima nimwawo na ndoba awa bakabile bandungo batatiyendi Abulahama oho ushili wamumi.

16Niho Ambimeleki ambile kuli Ishaki ngayi, “Yanga, fuma mu litunga lyetu ndaba obe wengakale wa ngovu shikuma kutupitakana.” 17Nohobene Ishaki wafumine kuyo na kutulila mu mukulo wa Ngela, pe wekalile kuyo kashikati. 18Watatikile kami ku kabulula mashima aya akabiwile ha matena a tatiyendi Abulahama, owo bakanishile Bafwilishitina kunyima ya lufu lwendi. Ishaki wa watumbile mazina amo nehe aya atumbile tatiyendi.

19Bakamilimo ba Ishaki oho bakabile lishima mu mukulo omo bawanine mema a kaheloke. 20Balishani ba ku Ngela balyambile na balishani ba Ishaki na kwamba ngayi, “Awa mema wetu.” Niho Ishaki atumbile liya lishima ngayi, “Kulyamba.” Ndaba balyambile nendi.

21Niho kami bakamilimo ba Ishaki bakabile lishima lyamina, pe kwekalile kami ku lyamba, niho alitumbile ngayi, “Nkole.” 22Watuntukile kuyo pe wakakabile kami lishima lyamina. Kaliha kwekalile ku lyamba hanelye lishima, niho alitumbile ngayi, “Lehomboti.” Wambile ngayi, “Haya Nyambi ya Ngula unatupana ku shoboloka mu litunga, pe tukahetelamo.”

23Ishaki wakatukile na kuya ku Mbelishemba. 24Nyambi ya Ngula waliholwele kukwendi wushiku uyo pe wambile ngayi, “Ami Nyambi ya tatiyobe Abulahama. Hinga wutina, nili hamo nobe. Nikakutandalisha na kukupana bazukulu babengi ndaba ya shikulupisho shami ku mukamulimo wami Abulahama.” 25Niho Ishaki azikileko kaala ka mamanya na kulemesha Nyambi ya Ngula. Wazikileko munkungwa wendi kuyo, kami bakamilimo bendi bakabile lishima lyamina.

Kulimama mukati ka Ishaki na Ambimeleki

26 # Shit 21:22. Niho Ambimeleki afumine ku Ngela hamo na Ahuzate nkongo yendi na Fwikole mukulwane wa bakanzita bendi, bayile mu ku mona Ishaki. 27Ishaki wambile kukwabo ngayi, “Kati shumangani munezili kukwami, ndaba enu mwanzimbile kami mwantandile.”

28Bakumbwile ngayi, “Haya etu tunamono ngayi Nyambi ya Ngula uli hamo nobe, kami tukuhanganika ngayi kwikale lubeza mukatiketu. Kami tukushinga ngayi obe utukulupishe 29ngayi obe ubule kutuyandisha, nehe etu twabulile ku kuyandisha. Twekalile na nceshe kukwobe na kukuleha ngayi uye mu ku mwena. Haya obe uli na Mfuywezi za Nyambi ya Ngula.” 30Ishaki wabapingilile shimbo, pe balile na kunwa. 31Oho kwashile lumenemene muntu na muntu wakulupishile kulibeza. Niho Ishaki abashindikizile, pe bayile mu ku mwena.

32Ha mutena uyobene bakamilimo ba Ishaki bezile na kumutongweza bya lishima liya bakabile. Bambile ngayi, “Tuna wana mema.” 33Watumbile lishima ngayi, “Luhaho.” Nisho lukutumbiwila luya lukena ngayi Mbelishemba.#26:33 Penza kami 21:31.

Bakaza Ishau ba mapukwenda

34Oho Ishau ekalile na myaka makumi anaa, wayekele bakazi babili, wayekele Yundishi mwana Mbeeli wa Kahita na Mbashamati mwana Eloni wa Kahita. 35Aba bambuyama bakaluhishile nyinkalo ya Ishaki na mukazendi Lambeka.

Currently Selected:

Shitatiko 26: LLK

Highlight

Copy