Shitatiko 27

Ishaki ukutandalisha Yakobo

1Ishaki wakulumpalile na kwinga kashishitwa. Wehanine Ishau mwanendi wa mukulwane, wambile kukwendi ngayi, “Mwanami.” Ishau wakumbwile ngayi, “Ami wuno.”

2Ishaki wambile ngayi, “Ami na kulumpala kale, kami wuluno nifwe. 3Haya shimba shipando shobe sha mukunzi na mivwi, yanga mu lishaka ukanzihilemo kayamana, 4pe wuntelekele byakulya byabitobe biya na haka na kubindetela. Nikabilye, pe nikutandalishe oho shilolo nifwe.”

5Lambeka wayuvwilengako oho Ishaki ambilenga kuli mwanendi Ishau. Oho Ishau ayile mu lishaka na kuyomba kayamana ka tatiyendi, 6Lambeka wambile kuli mwanendi Yakobo ngayi, “Nayuvwunga tatiyobe hamba kuli Ishau ngayi, 7‘Ndetele kayamana na kuntelekela byakulya byabitobe. Namanisha kulya nyama nikakutandalishe ku meho a Nyambi ya Ngula oho shilolokale nifwe.’ 8Haya, mwanami, nyombatale na kutenda ebi nikwamba. 9Yanga ku litanga na kundetela bana ba bampongo babili ba kushuwa ngayi nikutelekele na kutenda byakulya ebye ahaka tatiyobe. 10Obe ukabitwala kuli tatiyobe akalye, pe ukakutandalisha oho shilolokale afwe.”

11Ngoboni Yakobo wambile kuli Lambeka mandiyendi ngayi, “Hiwulimuka ngayi Ishau wekala na wambo, ngoboni ami nenga wakulembuka lutu. 12Kampe ndi batate bakampapatila pe bakalimuka ngayi nili na ku bongeza pe nikaliletela shikuto kupitakana bitandalisho.”

13Bamandiyendi bambile ngayi, “Mwanami, ndi ukakukuta pe shikuto shikekale hahami. Tenda tuhu ngonehe eshe namba pe yanga ukandetele bampongo.” 14Niho ayile na kumuletela bana ba bampongo, pe watelekele byakulya byabitobe biya ashingile tatiyendi. 15Niho Lambeka atolele bivwalo akowezele bya Ishau byabiwahe mu litala na kubivwika Yakobo. 16Wayakile kami myayi ya bampongo ha maboko wendi naku ncingo yendi kwakulembuka. 17Pe Lambeka wapanikile Yakobo byakulya byabitobe na linkende ayohele.

18Niho Yakobo ayile kuli tatiyendi na kwamba ngayi, “Tate.” Tatiyendi wakumbwile ngayi, “Ami wuno mwanami. Kati obe yani?”

19Yakobo wambile kuli Tatiyendi ngayi, “Ami Ishau mwanobe wa mweli natende, ngonehe wantongweza. Haya yikalisha, ulye ku nyama eye nakuletele, ngayi mwanga untandalishe.”

20Ishaki wambile kuli mwanendi ngayi, “Mwanami unengi nahiti unayiwana shawanguwangu?” Yakobo wakumbwile ngayi, “Ndaba Nyambi ya Ngula, Nyambi yobe, unantandalishi ngayi niyiwane.”

21Niho Ishaki ambile kuli Yakobo ngayi, “Henyena kwakwipi ngayi nikutweshe kukupapatila mwanami. Mwa shikuma obe mwanami Ishau hinge ndi byo?” 22Yakobo wahenyenene kwakwipi na tatiyendi Ishaki, niho amupapatilile, pe wambile ngayi, “Lizu lyobe likuyuvwanika ngo lizu lya Yakobo, ngoboni maboko wobe akuyuvwanika ngo maboko a Ishau.” 23Kaliha walimukile ngayi niye Yakobo, ndaba maboko wendi ekalile na wambo ngo maboko a Ishau. Niho amutandalishile, 24niho amwipwile kami ngayi, “Kati mwa shikuma obe mwanami Ishau ndi?” Yakobo wakumbwile ngayi, “Amibene.”

25Ishaki wambile ngayi, “Ncimbileho nyama yimo. Namanisha ku lyayo, niho nikutandalishe.” Yakobo wayiletele kukwendi, kami wamuletelele waine, pe wanwine. 26Niho tatiyendi ambile kukwendi ngayi, “Henyena kuno mwanami, unzupeze.” 27#Bah 11:20. Oho ezile mu kumuzupeza Ishaki wayuvwile livumba lya bivwalo byendi, pe wamutandalishile na kwamba ngayi,

“Eli livumba lyaliwahe lya mwanami,

linengi ngo livumba lya mfuba eye

anatandalishi Nyambi ya Ngula,

28Nyambi mwanga akupane mume wakuyilu,

na kwingisha mfuba yobe wilo.

Mwanga akupane mbuto yayingi na waine.

29 # Shit 12:3. Bantu nimwabo,

bakenge bakamilimo bobe,

bantu mwanga bakalambe kumbili yobe,

obe mwanga ukenge hekulya bawushinda wobe,

pe kami bazukulya bamandiyobe,

mwanga bakalambe kumbili yobe.

Obo bakakukuta mwanga bakakutiwe,

pe obo bakakutandalisha nanibo kami bakatandale.”

Ishau ukulomba mfuywezi za Ishaki

30Ishaki oho amanishile kutandalisha Yakobo, niho Yakobo ayile. Oho ayile tuhu kunyima Ishau wezile kufuma mu kuyomba. 31Naniye kami watelekele byabitobe na kubileta kuli tatiyendi. Pe wambile ngayi, “Tate, yikalisha, ulye nyama eye nakuletele, ngayi mwanga untandalishe.”

32Ishaki wamwipwile ngayi,

“Kati obeyani?”

Ishau wakumbwile ngayi,

“Nka ami mwanobe wa mweli, Ishau.”

33Niho Ishaki atatikile kukanka shikuma pe wepwile ngayi, “Kati yaniboni ou waziha kayamana na kukaleta kukwami? Ninali oho shilolo wize. Namutandalishi mwaka, kami ukenga wakutandalishiwa mwaya myaka.”

34Oho Ishau ayuvwile mazu awa, pe walilile shikuma na kukangoka ngayi, “Tate nami ntandalishe.”

35Ishaki wambile ngayi, “Mukonzowobe unezi na kunyongeza, pe nashimbi bitandalisho byobe.”

36 # Shit 25:29-34. Ishau wambile ngayi, “Eshe shengakale shikati sha wubili sha kunyongeza. Kaliha shikukomokesha oho atumbiwi ngayi Yakobo. Washimbile likona lyami lya wukulwane, haya kami washimbakale bitandalisho byami. Kati shilolo unciyileko bitandalisho bimina ndi?”

37Ishaki wakumbwile Ishau ngayi, “Mona namwingishakale hekulyobe, kami namupana bawushinda wendi nimwabo kwinga bandungo bendi namupaniki mbuto na waine, kowa shinashalako mwanami, osho nikutwesha kukutendela.”

38 # Bah 12:17. Ishau wazaminine kulambilila kuli tatiyendi na kwamba ngayi, “Tate, kati wekala tuhu na mfuywezi yimo ndi? Nami kami tate ntandalishe.” Pe Ishau walilile shikuma.

39 # Bah 11:20. Niho Ishaki ambile ngayi,

“Wufwako kukatambula mema akufuma muyilu,

mafuba wobe afwako kukekala na wilo.

40 # Shit 36:8; 2Bamy 8:20. Pe,

ukayoya na mukwale wobe,

ngoboni ukatendela milimo mukonzo wobe,

Ngoboni noho ukamufutulukila,

pe ukashoboloka ku ngovu zendi.”

41Niho Ishau azimbile Yakobo, ndaba Yakobo washimbile bitandalisho biya byengile bya Ishau. Pe Ishau wahanganikile ngayi, “Shikati sha kulila lufu lwa batate shili hahepi, kunyima yanebye pe nikaziha Yakobo mukonzowami.”

42Ngoboni Lambeka oho ayuvwile bihanganiko bya Ishau, niho ehanine Yakobo na kumutongweza ngayi, “Yuvwa, yayiyobe Ishau uli na kukufumbila ngayi akuzihe. 43Haya mwanami, ombatala mazu wami. Yanga hahano kuli mpanzami Lambani ku Halani. 44Ukekaleko kuyo kashikati hantu wukali wa yayiyobe unatulu, 45pe ukavulama ebye unatende kukwendi. Niho nika kutumina muntu kuya mu kukuleta. Shumangani nikayawila nimwenu bana bami mutena umo?”

Ishaki ukufunzula Yakobo kuya kuli Lambani

46Lambeka wambile kuli Ishaki ngayi, “Shili na kunkola kami shinankwangishi ha bakaza ba Ishau ba Bahita. Ndi Yakobo kami ukuyeka umo wa batunkanga ku mushobo owe wa Bahita, shashiwahe shinga ami nifwe tuhu.”

Currently Selected:

Shitatiko 27: LLK

Highlight

Copy