Shitatiko 23
23
Shala ukufwa pe Abulahama ukulanda shinzimbi
1Shala wekalile na myaka 127. 2Niho afwilile mu Hembuloni mu litunga lya Kenaani, Pe Abulahama wamulilile shikuma ha lufu lwendi.
3Niho Abulahama ashiyile mwanya na mutuntu wa mukazendi, pe wayile ku Bahita. Wambile kukwabo ngayi, 4#Bah 11:9-13; Mil 7:16. “Ami nili lipukwenda kuno nazika mukati kenu. Ndandishenuko limvu kwa kufunda, ngayi nitweshe ku fundako mukazami.”
5Bahita bakumbwile Abulahama ngayi, 6“Yuvwa taha obe hekulu, etu tukukupenza ngo mukakututwaminina wa ngovu, funda mukazobe ku shinzimbi sha kupitakana wuwahe tuli nasho. Nimwetu tuku wahilila kukupana shinzimbi ngayi utweshe kumufundamo, kowa wakukukanisha.”
7Niho Abulahama akatukile kuya mu ku shintama kumbili ya Bahita, 8pe wambile kukwabo ngayi, “Ndi munetabili ngayi nifunde mukazami kuno hekulu nyepelenu kuli Efweloni mwana Zohali wa mulume, 9ngayi andandisheko Linzolongoma lya Makapela, elye lili kunkumo ya mfuba yendi. Mu nyepenu alindandishe na ndando ya nzimba kuno ku meho wenu, nohobene nitweshe kuheta limvu lya kufundanga.”
10Efweloni wekalile mukati ka Bahita, niho akumbwile Abulahama oho bahita nimwabo bayuvwako, ku mbalila ya shikungulukilo ku lipangati lya lukena ngayi, 11“Yuvwilila hekulyami, nika kupana mfuba na linzolongoma liya lilimo. Nikukupanalyo ku meho a bawushinda wami, ngayi utweshe kufundamo mukazobe.”
12Niho Abulahama ashintaminine hambili ya Bahita, 13na kwamba kuli Efweloni, bantu nimwabo hibayuvwako, ngayi, “Nikushinga ngayi uyuvwilile shiwahe, ami nikulanda mfuba nimwayo. Tambula ndando yami, pe nikafundamo mukazami.”
14Efweloni wakumbwile Abulahama ngayi, 15“Hekulyami, nyuvwilile mfuba yina fwanini mu ndando ya 400 ya muwayawaya wa shiliva. Ngoboni eshe shumangani mukatiketu ami na nobe? Fundamo mukazobe.” 16Abulahama wetabilile, pe wapanikile ndando eye ashingile Efweloni, bantu nimwabo hibayuvwako, 400 ya muwayawaya wa shiliva, kufwanikiza na shipimisho batendelenga bakakulandisha.
17Eye niyo nzila ya wuheti ou wengile wa Efweloni ku Makapela, ku mushamuko wa Mamele wafutukile kwinga wa Abulahama na kufungilako mfuba na linzolongoma elye lyekalilemo na mitondo nimwayo yamu mfuba noku kwakumina zinginza zayo. 18Bahita nimwabo aba bekalile kuyo ku shikungulukilo balimukile ngayi wuheti wa Abulahama.
19Niho Abulahama afundile mukazendi Shala mu linzolongoma lya mu mfuba ya Makapela ku mushamuko wa Hembuloni mu litunga lya Kenaani. 20Nohobene mfuba na linzolongoma lyekalilemo, obyo byengilenga bya Bahita, byafutukile kwinga wuheti wa Abulahama na limvu lya kufundangamo.
Currently Selected:
Shitatiko 23: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
