Shitatiko 22

Nyambi ukulayelela Abulahama ngayi akombelele Ishaki

1 # Bah 11:17-19. Kunyima ya matena Nyambi wezekele Abulahama, pe wambile kukwendi ngayi, “Abulahama” pe Abulahama wakumbwile ngayi, “Ami wuno Hekulu.”

2 # 2Bya 3:1. Nyambi wambile kukwendi ngayi, “Shimba mwanobe umo pele, Ishaki, ou wahaka, pe yanga ku litunga lya Moliya, ku lipili liya nikakutongweza, ukamutupule kwinga nkombela ya kuhokesha kukwami.”

3Oho kwashile lumenemene shikuma, Abulahama wacabile nkuni za kuhokeshela, pe wazitwikile ha mbongolo yendi. Washimbile Ishaki mwanendi na bakamilimo bendi babili. Wakatukile na kuya ku mbalila iya amutongwezele Nyambi. 4Ha mutena wawuhatu Abulahama wamonene mwanya uya hahatali. 5Niho Abulahama ambile ku bakamilimo bendi ngayi, “Shalenu kuno hamo na mbongolo. Ami na ndumbana twa kuya kumbili mu kulemesha, pe niho tukaboke kukwenu.”

6Abulahama watwikile mwanendi Ishaki nkuni za kuhokeshela ngoboni niyemwine washimbile mpoko na mundilo wa mashanga wakuyibikisha. Wubili wabo bayile hamo. 7Ishaki wambile kuli tatiyendi Abulahama ngayi,

“Tate”

Wakumbwile ngayi,

“Ami wuno mwanami”

Ishaki wambile ngayi,

“Nikumona tuhu mundilo na nkuni,

ngoboni mbelele wakukombelela ulikuti?”

8Abulahama wambile ngayi, “Mwanami, Nyambi niyemwine ukaliwanina mbelele wa kutenda nkombela.” Nohobene wubili wabo bapitakanishile kuya mukala wabo.

9 # Yako 2:21. Oho bakumine ku mwanya ou Nyambi amutongwezele, Abulahama wazikileko kaala ka mamanya, pe wayalileho nkuni. Wamangile Ishaki na kumulangika ha kaala ka mamanya, pe wayalileho nkuni. 10Niho Abulahama atolele mpoko ngayi amuzihe. 11Ngoboni lingeloyi lya Nyambi ya Ngula kuyilu wamwihanine ngayi, “Abulahama, Abulahama.” Pe wakumbwile ngayi, “Ami wuno Hekulu.”

12Lingeloyi lyambile ngayi, “Hinga ulemeka ndumbana, hinge kutenda shuma shimo kukwendi. Haya nalimukakale ngayi obe watina Nyambi, ndaba unashingi kukombelela mwanobe umo pele.”

13Abulahama niho ashengezelele noku noku pe wamonene shikungwe wa mbelele hinga akakatila mashengo wendi mu mapukumuna, wayileko na ku mushimba na kumukombelela kwinga nkombela ya kuhokesha mu kuhingisha muli mwanendi. 14Abulahama watumbile uya mwanya ngayi, “Nyambi ya Ngula ukuliwanina.” Kami hinge lelo bantu bakwamba ngayi, “Ha lipili lya Nyambi ya Ngula ukaliwanina.”

15Lingeloyi lya Nyambi ya Ngula lyehanine Abulahama shikati sha wubili ngayi, 16#Bah 6:13, 14. “Eshe nisho anamba Nyambi ya Ngula ngayi, ‘Na ku li beza mu lizina lyami amimwine ngayi nika kutandalisha shikuma ndaba wabula kukombelela mwanobe umo pele.’ 17#Bah 11:12. Nikukukulupisha ngayi nika kufuywela na bazukulu babengi ngonehe nyenye zili muyilu, hinge ngonehe lihekelela lya ku shibumbo sha liwate. Bazukulyobe bakashimba mapangati a bamalamo babo. 18#Mil 3:25. Kami matunga nimwawo akanyepa ngayi niwatandalishe ngonehe natandalishi bazukulyobe nimwabo, ndaba obe unombatala lizu lyami.” 19Abulahama wabokele ku bakamilimo bendi kuya abashiyile pe babokele hamo ku Mbelishemba, kuyo azikilenga.

Bazukulu ba Nahole

20Kunyima ya byuma ebye nimwabyo, Abulahama wayuvwile ngayi Milika unabelekele bana kuli yayiyendi Nahole mutanu na bahatu. 21Mazina wabo engile awa, Uzi mwanendi wa mweli na mukonzo wendi Mbuzi na Kemuwele tata Alamu, 22na Keshendi na Hazo na Pilindashi na Yindilafwi na Mbetuwele. 23Mbetuwele wengile tata Lambeka. Milika wabelekele bana babalume mutanu na bahatu kuli Nahole yaya Abulahama. 24Leuma, mukaza Nahole wakwinginina, kami wabelekele Temba na Ngahama na Tahashi na Maaka.

Currently Selected:

Shitatiko 22: LLK

Highlight

Copy