Shitatiko 12

Nyambi ukwihana Abulama

1 # Mil 7:2-3; Bah 11:8. Nyambi ya Ngula wambile kuli Abulama ngayi, “Fuma mu litunga lyobe naku bawushinda wobe naku litala lya batatiyobe mwanga uye ku litunga nika ku monesha. 2Nikakupana bazukulu babengi, omo bakenga mushobo wawunene, pe nika kutandalisha na kunenehesha lizina lyobe, ngayi mwanga ukenge wakufuyweliwa.

3 # Nga 3:8. Nikafuywela baya bakakutandalisha,

ngoboni nikakuta baya bakakukuta,

pe mumwobe nikafuywela matunga nimwao.”

4Abulama wayile hinga ekala na myaka 75 oho afumine ku Halani, ngonehe amutongwezele Nyambi ya Ngula, pe na Lote wayile nendi. 5Abulama washimbile mukazendi Shalai na Lote mwana mukonzo wendi na ntutu yabo nimwayo na bandungo aba bawanine mu Halani, pe bayile mu litunga lya Kenaani. 6Abulama wapitakanine mu litunga hantu noho akumine ku mutondo wa Oka wa ku tulila waku Mole ku Shekemu. Ha shikati shiyo ba Kenaani hinga bekala mu litunga liyo. 7#Mil 7:5; Nga 3:16. Nyambi ya Ngula waliholwele kuli Abulama pe wambile ngayi, “Nikapanika litunga elye ku bazukulyobe.” Niho Abulama azikileko kaala ka mamanya ka Nyambi ya Ngula ou waliholwele kukwendi. 8Pe watuntukile wayile ku mapili aku mushamuko waku Mbetele na kuzika ntanda yendi, mukati ka Mbetele ku mponci na Ayi ku mushamuko. Kuyo kami wakazikileko kaala ka mamanya, pe walemeshele Nyambi ya Ngula. 9Abulama watuntozokelenga kufuma mwanya wamina kuya ku mwanya wamina, wapenzeshele ku Nengembu ku mwanya wa Kenaani.

Abulama mu Engepita

10Kwekalile kapande kakanene shikuma mu Kenaani, ngoboni Abulama wayile ku mabukubuku ku Engepita, mu kwikalako kashikati. 11Oho ashingile kukiluka nginza kuya mu Engepita, wambile kuli mukazendi Shalai ngayi, “Mona, obe uli mukazi wamuwahe shikuma. 12Oho ba Engepita baka ku mona, bakamba ngayi, ‘Ou mukazendi’ pe bakanziha, ngayi mwanga bakuyeke. 13#Shit 20:2; 26:7. Batongweze ngayi uli mpanzami, pe ndaba ya nobe bafwako kukanziha ngoboni bakandeha.” 14Oho Abulama akilukile nginza ya kuya mu Engepita, ba Engepita bamonene ngayi mukazendi wengile wamuwahe shikuma. 15Oho babilolo ba ku musheke wa Fwalo bamumonene, batongwezele mwene eshe awaha, pe bamutwalile ku musheke wendi. 16Mwene wekalile na Abulama shiwahe, pe wamupanine matanga a bambelele na bampongo na zingombe na bambongolo na bandungo na makamela.

17Ngoboni Nyambi ya Ngula watumine malweli amanene hahendi naha bantu bendi bamu musheke ndaba ya Shalai mukaza Abulama. 18Niho Fwalo ehanine Abulama, pe wamwipwile ngayi, “Bishini ebye unatende kukwami? Shumangani wabulile kuntongweza ngayi mukazobe?” 19Kati shumangani wambile ngayi, “Mpanzobe na kundeha ngayi nimuyeke kwinga mukazami? Haya mukazobe owe, mushimbe yenunga.” 20Fwalo watongwezele bantu bendi ngayi bashindikize Abulama naku mututwisha mu litunga, hamo na mukazendi na byuma nimwabyo ahetele.

Currently Selected:

Shitatiko 12: LLK

Highlight

Copy