Mareka 14

1Dichi chikwasheli mafuku ayedi naŋaseka nimankendi akadi iluŋa, awakulumpi jawatupristu niansoneki hiyakukeŋakeŋa hakumukwatila namakasu kulonda amujahi; 2Muloŋa elili nawu, Bayi mumafuku achawija ku, antu akenda kaleta ipumba.

3Chadiŋiyi muBetanimwitala damukwambumba Shimona, chashakaminiyi nakudya, hikukwinza mumbanda namalasha anaradi abadika kulema wuseya, muchipunda chelola dalubanji. Hakufumpa chipunda, hakuyihuŋunwina kunamutu windi. 4Ilaŋa kwadiŋi amakwawu atiyili kutama nankashi munyichima yawu, nawu, Chanakisaŋanuwu malashawa analondidi? 5Malashawa neyi ayilandisha adi kufwika mali akubadika mumakulakaji asatu, ayinki atuzweŋi. Hiyakumunyinyita owu mumbanda. 6Ilaŋa Yesu nindi, Mulekenu kwindi, mukumukabishiladi? Naŋilili mudimu wawuwahi. 7Muloŋatuzweŋi mudi nawu mafuku ejima, honsu munakeŋeli kuyila chachiwahi mukutwesha; Ilaŋa mi hinidi nenu mafuku ejimaku. 8Yena kwindi neli mwashika Ŋovu jindi; nawayishaŋahu dehi mujimba wami nanochu chakanjiikawu. 9Nukuyileja chalala nami, kwejima kwamba kashimunawu nsaŋu yayiwahi mwahita matuŋa ejima, amba katenaŋa chaneliyi mumbandiwu kulonda kumwanuka nachu.

10Yudasi Isakaroti wahekumi nayedi, hakuya kudi awakulumpi jawatupristu kulonda akamuhani kudi wena. 11Niwena chanachitiyuwu, atiya nikuwaha, hiyakumukana kumwinka mali. Hakukeŋa hatela kumuhenena.

12Hefuku damuchimu damankendi akadi iluŋi, hajahaŋawu mukoku wapaseka, atumbanji twindi hiyakumwila nawu, Wukukeŋa tuyi kudihi, twakakuloŋesheli kwakudiila paseka? 13Hakutemesha atumbanji twindi ayedi, hakuyila nindi, Yenu muŋanda, mwakabulakani neyala nasendi nsaba yameji; mwakamulondi. 14Mwonsu mwakeŋa ilayi mwakamwili mwini itala nenu, Nkuluŋaŋa nindi, Itala dami dawenyi munukudiila paseka nawatumbanji twami didi kudihi? 15Yomwenindi wakayileja itala deneni dahewulu, mudi yuma yakupoŋomwena dehi; mwakatuloŋesheli mwenomu. 16Owu atumbanji hiyakuya, hiyakushika muŋanda, hiyakuwana mwomwayilejeliyi; aloŋesha nipaseka.

17Chikuneli melela, hakwinza nekumi nayedi. 18Chanashakamuwu nakudya, Yesu hakwila nindi, Nukuyileja chalala nami, hadi mwinenu wumu wukunfukeja, yowu tudi nakudya nindi. 19Hiyakutachika kuneŋa, hiyakumwila hamuntu hamuntu, iwu nindi, Yami tahindi? iwu nindi, Yami tahindi? 20Hakuyila nindi, Hiwumu wahekumi nayedi, yowu wudi nakutanta nanami mucheŋa. 21Muloŋa Mwana kamuntu hakuya mwomwamusonekeleluwu; ilaŋa o yihuŋu yanowu muntu wukufukeja Mwana kamuntu! Owu muntu neyi havwalikiluku mutenowu chachiwahi.

22Chadiŋi nakudyawu, hakunona dinkendi, chanakisuliyi nkisu hakudihumuna, hakuyinka nindi, Tambulenu, diwu mujimba wami. 23Hakunona lupasa, chanasakililiyi hakuyinka; hiyakunwamu wejima wawu. 24Hakuyila nindi, Diwu mashi ami achitiyaŋenu akupwekela antu amavulu. 25Nukuyileja chalala nami, hinamba kanwa cheŋi yanyikabu yamuvinyuku, chiŋa ifuku dinakanwa yayiha muwanta waNzambi.

26Chanembuwu kamina, hiyakwidika, hiyakuya kumpidi yaOliveta.

27Yesu hakuyila nindi, Mukudimboka wejima wenu; muloŋa anasoneki nawu, Nakatapa kabiŋa, ninyikoku yakapalaŋana ndu ndu. 28Ilaŋa chakansaŋulawu mudi afu, nakayanahu dehi kuŊaliliya. 29Ilaŋa Petulu hakumwila nindi, Hela ejima akudimboka, ami nehi. 30Yesu hakumwila nindi, Nukukuleja chalala nami, eyi lelu, wufuku woweniwu, hakwila ikombu kanda edi kili kayedi, wukudikalami kasatu. 31Ilana yena hakuhosha naŋovu nankashi nindi, Hela chakufwa neyi hamu, hinakadikala eyuku. Wejima wawu ahosheli mwomumu nawa.

32Hiyakushika kwatenanawu nawu kuŋesemani; hakuyila atumbanji twindi nindi, Shakamenu hanu, niyi nilombi. 33Hakuya nawaPetulu naYakoba niYowanu, hakutachika kuhayama nankashi, nikukaba nankashi. 34Hakuyila nindi, Muchima wami wunaneni chakubadika, neyi kena nifwi; shalenu hanu nakutona. 35Hakuswila kumbidi chanti, hakudinata hamaseki, hakulomba nindi, Neyi chinatwesheki, mpinji iyi yinfumi. 36Hakwila nindi, Aba, Tata, yuma yejima yinatwesheki kudeyi; nfumishili lupasilu; Ilaŋa dinu bayi chinukukenamuku, china chiwukukeneyi. 37Hakwinza, hakuyiwana namutulu, hakumwila Petulu nindi, Eyi Shimona, wudi namutulu? Hiwunatweshi kutona hela mpinji yimuku? 38Tonenu, lombenu, mubuli kwijila mukweseka. Chalala spiŋtu yinakeŋi, ilaŋa mujimba wunazeyi. 39Hakufumaku cheŋi, hakuya nakulomba, wahosheli mwomumu. 40Hakwinza, hakuyiwana cheŋi namutulu, muloŋa mesu awu aswejeli kulema, hiyelukili nimwakumwakwilaku. 41Hakwinza cheŋi kamuchisatu, hakuyila nindi, Ichi dinu kamenu kwenu munooki; chinawani dehi; mpinji yinashi ki dehi; talenu, Mwana kamuntu anamufukeji dehi kumakasa awakwanshidi. 42Nyamukenu, tuyenu; talenu wukunfukeja hadi kwakwihi.

43Hohenohu, iku wuchidi kuhosha, Yudasi wahekumi nayedi hakwinza nezaza dawantu akweti mpoku jatubali ninyitondu, anafumi kudi awakulumpi jawatupristu nikudi ansoneki nikudi awakulumpi. 44Henohu mukwakumufukeja wayileja dehi chinjikijilu chakwila nindi, Yowu nukupwepula, diyi mukukwata, mumutwalaŋa chachiwahi. 45Chanashikiyi, hohenohu enza nikudi Yesu, nindi, Eyi Rabi. Hakumupwepujola nankashi. 46Niwena amwolwela nimakasawu, amukwata nikumukwata. 47Wumu wahadi owu emenuku, hakuhola mpoku yindi yakabali, hakutapa nduŋu yakapristu muneni, kutapa kwakumuketula itu dindi. 48Yesu hakuyila nindi, Munenzi nakunkwata neyi chakukwata mukwakubuwa, nampoku jatubali nanyitondu? 49Nadiŋi nenu mutembeli nakuyileja hefuku hefuku, enu kunkwata nehi; Ilaŋa nyikanda yajila chiŋa yilumbuluki. 50Wejima wawu amushiyili, atemukili.

51Hadiŋi mukwenzi weyala wumu wayili nindi, wadiŋi wadikumbakana ihina ditooka hamujimba wamukunkulu; 52hiyakumukwata niyena, hakushiya odu ihina ditooka, hakutemuka nzekesi.

53Hiyakumutwala Yesu kudi kapristu muneni; hikukupompa chimu nayena awakulumpi jawatupristu ejima, niakulumpi niansoneki. 54Petulu hakumulondela munyima hahalehi, lwe nimuchipaŋu chakapristu muneni; hakushakama chimu naawatulama nakwota kesi muchejeji chakesi. 55Henohu awakulumpi jawatupristu nachota chejima hiyakukeŋakeŋa wunsahu wakumujaha nachu Yesu, hiyawumwenuku. 56Muloŋamavulu ashimwini wunsahu wakumutwambila, wunsahu wawu hiwatiyaŋenuku. 57Amakwawu emeni nakushimuna wunsahu wakumutwambila, 58nawu, Etu twamutiyili nakuhosha nindi, Ami nakasanda tembeli iyi yakutuŋa namakasa, nakatuŋa yacheŋi yaka kutuŋa namakasa mumafuku asatu. 59Hela chochu; wunsahu wawu hiwatiyaŋenuku. 60Kapristu muneni hakwimana mukachi, hakumwihula Yesu nindi, Eyi kwakula nehi? Wunsahu wudi nakushimunawu antu awa wunayi mudihi? 61Ilaŋa Yesu saŋa amwenenayi zo-o, kwakula nehi. Kapristu muneni hakumwihula nindi, Yeyi Kristu, Mwana kaMukwakukisulewa, tahindi? 62Yesu nindi, Yami. Mwamba kamona Mwana kamuntu nashakami kuchikasa chachidiilu chaŋovu, hakwinza namavu amwiwulu. 63Kapristu muneni hakutabula mahinindi nindi, Ayinsahu amakwawu aadi. 64Munatiyi chanatukiyi Nzambi; munatoŋojoki nenwidi? Hiyakumuhisha wejima wawu nawu nateli kufwa. 65Amakwawu hiyakutachika kumufwŋila mazeŋi, hiyakumubuta kumesu, hiyakumweta makaha, hiyakumwila nawu, Profwetaku. Niatulama hiyakumutambola nakumwetola namakasa.

66Chadiŋiyi Petulu mwishina muchipaŋu, hikukwinza wumu wahadi ayaloŋadima akapristu muneni; 67chanamoniyi Petulu wudi nakwota kesi, hakumutala nindi, Eyi nawa wadiŋi hamu naniwu Yesu kaNazareta. 68Ilaŋa yena hakudikala nindi, Chiwunahoshi ami hinachilukuku, hela kushinshikamu nehi. Hakwidika, hakuya mwikeki, ikombu edikila nikwidikila. 69Owu chaŋadima hakumumona, hakutachika cheŋi kuyileja antu emenuku nindi, Iwu diyi mwinawu. 70Ilaŋa yena hakudikalamu cheŋi. Chihanalehi chanti, antu emenuku hiyakumwila Petulu nawu, Chalala chi, yeyi mwinawu, muloŋa wukaŊaliliya. 71Ilaŋa yena hakutachika kudishiŋa nikusanyika nindi, Iwu muntu mukutena, ami kwami hinamwilukaku. 72Henohu ikombu edikila nikamuchiyedi. Petulu hakwanuka mazu amwililiyi Yesu nindi, Hakela ikombu kanda edi kili kayedi eyi wakadikalami kasatu. Chatoŋojokeliyi mwenomu hakudila.

Currently Selected:

Mareka 14: MW62

Highlight

Copy