Mareka 13
13
1Chanedikiyi mutembeli, kambanji kindi wumu hakumwila nindi, Eyi Nkuluŋaŋa, tala owu malola, ninowu matala! 2Yesu hakumwila nindi, Wunamoni awa matala amaneni? Hikwakashala ilola nidimu dakanaŋamana helola di kwawu, dakabula kunatika hesekuku.
3Chashakaminiyi hampidi yaOliveta yatalaŋana natembeli, aPetulu naYakoba naYowanu niAnderi, hiyakumwihula kwakanka wawu, 4nawu, Atuleji mwani, yumiyi yamba kamwekana mwakanyi? Hakakeŋa kumana yuma yejimiyi kwakekala chinjikijilu chanka? 5Yesu hakutachika kuyila nindi, Babalenu, akenda kayiluwaŋesha kudi muntu. 6Muloŋa antu amavulu akenza mwijina dami, akela nawu, Diyi yami; akaluwaŋesha amavulu. 7Chimwakatiya majita ninsaŋu jamajita, bayi mwakaakamaku. Yumiyi chiŋa yakashika, ilaŋa kukumisha kanda. 8Muloŋa muza wakanyamuka nakulwa namuza, wanta nawanta; kwakekala ninyitentanshi kwacheŋi nakwacheŋi; kwakaholoka nzala. Yumiyi diyi yihuŋu yakutachika.
9Ilaŋa enu babalenu enu aweni, Muloŋakayitwala muyota, akayetela nimumashikola; mwakemana kumesu awanguvulu nawanyanta hamujimba wamami, kulonda kuyilila wunsahu. 10Ninsaŋu yayiwahi chiŋa akasambila kuyishimuna kunyuza yejima. 11Chakayitwalawu nakuyihana kudi ansompeshi, bayi mwakaakamaŋahu dehi yimwakahoshaku; mwakahosha yakayinkawu kuhosha mpinji oyu, muloŋa hiyenu mwakahoshaku, Spiritu Wajila diyi wakahosha. 12Iyala wakajahisha mana kwindi, nitata yawantu wakajahisha mwanindi; anyana akanyamukila anvwali jawu, akayijahisha. 13Akayihela kudi antu ejima hansaŋu yejina dami; Ilaŋa muntu wakakakela nikunsa diyi wakahanda.
14Ilaŋa chimwakamona chishimashima chakaletesha mahembi, hichikwimana kuchabula kutelela, yowu wukutaŋa ashinshiki, henohu owu akekala muYudeya akatemukili kwawu kumapidi; 15niwakekala hewulu detala, chakasulukayi bayi eŋila nakunona chuma mwitala dinduku; 16wakekala mwiha, bayi akafunta nakunona kahuma kinduku. 17Ilaŋa o yihuŋu yakamona akekala namavumu, niakaamwisha hamafuku owu! 18Lombenu chakabuli kwikala hachila aka chamashika. 19Muloŋa hamafuku owu hakekala lukadi lwakadi kwikalaŋahu dehi, kufumisha hatachi haleŋeliyi Nzambi yuma, kushika nikulelu, hilwamba kekalaku nawa cheŋuku. 20Neyi Yehova kukehesha mafuku owu nehi, hikwakekala antu akahandaku; ilaŋa nayikehesheli hanyijimba yawatondewa atondeliyi. 21Henohu neyi hakekala muntu wakayila nindi, Talenu Kristu iwu; hela nindi, Talenu owu; bayi mwaketiyaku. 22Muloŋa hakanyamuka aKristu akutwamba, niatuprofwetu akutwamba, akamwekesha yinjikijilu nayihayamisha, kulonda nawu akaluwaŋeshi atondewa, neyi chinatwesheki. 23Kwinzenu kwenu kababalenu; talenu nayilejaŋahu dehi yuma yejima.
24Ilaŋa hamafuku akalondela lukadi olu, itaŋwa dakeyila, nikakweji hikakatoneka mwejuku, 25nitutumbwa twakaholoka mwiwulu, niŋovu jidi mumawulu jakakanka. 26Henohu akamona Mwana kamuntu hakwinza mumavu naŋovu yeneni nilubanji lwakulema. 27Henohu wakatemesha aŋelu jindi, wakapompesha indi atondewa kumpepela jiwana, kufumisha kunsa yamaseki, ndo nikunsa yewulu.
28Kwatilenu maana kuchishimu chamutondu wachikuyu. Neyi mutayi wawu wukutachika kwovwaha, hiwukusapuka mafu, enu himukwiluka nenu mayinza adi kwakwihi. 29Dichi ninenu nawa chimukumona yumiyi hiyikwinza, ilukenu nenu wudi kwakwihi, kwoku kuyisu kachi. 30Nukuyileja chalala nami, chisakichi hichakahitaku, chiŋa yuma yejimiyi yakamana. 31Iwulu niiseki akahita, Ilaŋa mazu ami hiyakahitaku.
32Ilaŋa itaŋwodu hela mpinji oyu kwosi wayilukaku, chalala hela aŋelu amwiwulu hela Mwana, chiŋa Tata. 33Babalenu, tonenu, lombenu; Muloŋa himuneluki mpinji oyuku. 34Chidi neyi muntu nayi njila yayilehi kumpata yacheŋi, nashiyi itala dindi, nenki anduŋu jindi wuchakala, ninyidimu yawu, iwu nawindi iwu nawindi, naleji mukwakuhemba chisu nindi akatoni. 35Dichi tonenu; Muloŋa himuneluki hakenza nkaka yetalaku, kwiji melela, kwiji mukachi kawufuku, kwiji hedikilaŋa ikombu, kwiji budidi; 36kuchina kwila chakenzayi chakukasumwisha hakayiwana namutulu. 37Chinukuyilenu, nayili niantu ejima, nami, Tonenu.
Currently Selected:
Mareka 13: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
