MAlaki 2
2
1Ichi dinu enu atupristu, lushimbi ilu Iwenwenu, 2Yehova wamazaza nindi, Neyi kwonti kwenu kushaku muchima, neyi kwonti kwenu kulemesha ijina dami, komana ami nukuyikunkwila ishiŋu, nukushiŋa ninkisu jenu, eŋa, najishiŋa dehi kwami, nanochu chimwabulaŋa kushaku muchima. 3Tiyenu, nukutamisha mbutu jenu hansaŋu jenu, nukuyimwaŋila tuji kumesu enu, twotuji twayimuna yenu yimwaketulaŋa, akayifumishila kumu ninenu aweni. 4Mwakeluki nenu, Nayitemesheli dehi lushimbi ilu kulonda chitiyaŋenu chami chakekali naLevi. Dimu mwanahoshiyi Yehova wamazaza. 5Chitiyaŋenu chami chinatiyaŋeni nindi, chadiŋi chawumi nakuwunda; namwinkelaŋu nami atiyi woma, ninodu wantiyili woma, hakwakama niijina dami. 6Kukanwa kindi kwadiŋi nshimbi jansaŋu yalala, kunyivumbu yindi hikwamwekeni kuheŋaku; nendeli nindi mukuwunda nakwoloka, wabalumwini antu amavulu aleka nikuluwa. 7Nyivumbu yakapristu chiŋa yihembaŋa maana, antu chiŋa ehulaŋa nshimbi kukanwa kindi; muloŋa yena diyi ntemesha yaYehova wamazaza. 8Ilaŋa enu munasenuki munjila, munadimbwishi antu amavulu munshimbi; munatamishi chitiyaŋenu chaLevi. Dimu mwanahoshiyi Yehova wamazaza. 9Chimunabuli kulama njila jami, nichimunaakami antu kumesu awu nansaŋu janshimbi, dichi chinayibalumuni dehi kwikala antu adiwulewa, akadi kulema, kumesu awantu ejima.
10Wejima wetu hitukweti tata yetu yowumuku? Hiyatuleŋeli kudi Nzambi yowumuku? Indi twadikwatilaŋadi makasu dinu, iwu nakukwatila mana kwindi makasu, iwu nakukwatila mana kwindi makasu, hitukujilola chitiyaŋenu chawankakulula jetu? 11Yuda nakwatili akwawu makasu, anashimani dehi nimuIsarela nimuYerusalema; Yuda najiloli dehi kujila kwaYehova kwakeŋa eliyi, nasumbuli dehi mwana kamukishi wakwacheŋi. 12Yehova wukufumisha mumatenti aYakoba iyala wakoŋaŋa chumichi, hela himukwakukonkama, hela himukwakwakula, hela himukwakulambula Yehova wamazaza.
13Tiyenu nawa cheŋi chimwelaŋa, mwabutaŋa kameŋa kaYehova namadilu, nakudila, nakwaboka, mwaka enzi abuli kwitŋia cheŋi himulambu wenu, mwaka enzi abuli kutiya kuwaha kuwutambula kuchikasa chenu. 14Hela chochu, enu nenu, Wukulekeladi? Muloŋa Nzambi neli dehi chinsahu chahakachi keyi naŋodeyi wahawukwenzi weyi iwuna mukwatili makasu, kutoŋa diyi mukwenu wadikata nindi, kutoŋa diyi iŋodeyi wachitiyaŋenu chiwatiyaŋeni nindi. 15Haleŋeli wumuku? Yena diyi wadiŋi nayaspiritu yashalaku. Ochu wumu wanka? Walondeli anyana akudi Nzambi. Dichi babelenu nyichima yenu, bayi hamwekana muntu wukukwatila Iŋodindi wahawukwenzi windi makasuku. 16Muloŋa Yehova, Nzambi yaIsarela, nahoshi nindi, Nsaŋu jakuseŋaŋana najitiya kutama nankashi, nahelaŋa nimuntu wajikaŋa madombu nehina dindi. Dimu mwanahoshiyi Yehova wamazaza. Dichi babelenu nyichima yenu, kulonda mubuli kukwatila aŋodi jenu makasu.
17Munamuzeyeshi Yehova namazu enu. Enu nenu, Tunamuzeyeshi hadihi? Nachina chimwahoshaŋa nenu, Antu ejima ahoshaŋa chatama anawahi kumesu aYehova; nenu, Diwu anatiyiyi kuwaha; hela chimwahoshaŋa nenu, Nzambi yawaŋaji wudi kudihi?
Currently Selected:
MAlaki 2: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
