Likezo 7

1Kapristu muneni hakwila nindi, Yumiyi yalala, tahindi? 2Yena nindi, Enu ana kwami, ninenu atata, tiyililenu. Nzambi walubanji lwakulema wamwekeni kudi nkakulula yetu Abarahama, hadiŋiyi muMesopotamiya, wuchidi kanda ashakami muHarana. 3Hakumwila nindi, Fumaku mwituŋa denu, nikudi awusoku weyi, inzaŋa mwituŋa dinakakuleja. 4Hakufuma mwituŋa dawaKaladeya, hakushakama muHarana. Kwenoku, chafwiliyi tata yindi, Nzambi hakumufumishaku nakumuleta mwituŋa dinu dimwashakama lelu. 5Hamwinkeli mwoku wuswana, chalala hela hakudatila mwendu winduku. Wakanini kumwinka dindi nawanyanindi amba kalondelamu, hachidiŋiyi kanda avwali mwana. 6Nzambi wahosheli mwakwila nindi, Anyaneyi akashakama mwituŋa dawenyi. Nindi akayiheta wuduŋu, nakuyikoŋa chatama nyaka makulakaji awana. 7Nzambi nindi, Owu muza wakayiheta nakawusompesha; nkumininaku amba kafumamu, amba kankalakela mwenamunu. 8Hakumwinka chitiyaŋenu chakwalama. Abarahama wavweli Isaka, hakumwalamisha ifuku damu chitanu nachisatu, Isaka wavweli Yakoba, Yakoba wavweli ankakulula ikumi nayedi.

9Owu ankakulula amutiyili Yosefu ichima, hiyakumulandisha kudi antu, amutweli muEjipitu. Ilaŋa Nzambi wadiŋi nindi, 10hakumupulwisha kumakabi indi ejima. Hemeniyi kumesu amwanta waEjipitu Fwaro, Nzambi hakumutiyisha Fwaro kuwaha nayena namaanindi; yena hakumubalumuna kwikala nguvulu yaEjipitu, nimukwakuhemba itala dindi dejima. 11Henohu mumpata yaEjipitu yejima nimuKenani, himukuholoka nzala; hiyakumona yihuŋu yayeni; ankakulula jetu hiyamweni yakudyaku. 12Yakoba, chanatiyiyi nawu kuEjipitu kudi tidiku, hakutemeshaku ankakulula jetu ipampa dakusambila. 13Chayiluwu kamuchiyedi hakudimwekesha kudi ana kwindi; nimuza waYosefu awiluka nikudi Fwaro. 14Yosefu hakutemesha nakutambika tata yindi Yakoba, niawusoku windi ejima, antu makumi atanu nayedi niatanu. 15Yakoba hakukunkumukila muEjipitu. Hakufwa niyena niankakulula jetu. 16Hiyakuyitwala kuShekemi nakuyikamika mwijamu ŋalandiliyi Abarahama nawuseya wasiliva kudi anyana kaHamori muShekemi.

17Chelili mwaka wamukaninuwu Abarahama kudi Nzambi hiwukuya nakushi ka, antu hiyakusweja kuvula nankashi muEjipitu. 18MuEjipitu muswana nimwanta wacheŋi wabulili kwiluka Yosefu. 19Mwantowu hakukwatila muza wetu maana, hakukoŋa ankakulula jetu chatama, hiyakunatisha anyikeki jawu, kulonda abuli kuhanda. 20Wena mwakowu diwu wavwalikili Mosi, Nzambi hakumumona himwana wawutotombu; hiyakumulelela mwitala datata yindi tukweji tusatu. 21Chanamunatuwu, mwana kaFwaro wamumbanda hakumunona, hakumulela neyi mwanindi wakudivwela. 22Hiyakumuleja Mosi mwaya maana amuEjipitu ejima; hakusweja Ŋovu nikumazu indi nikunyidimu yindi.

23Chelili nyaka yindi yakukula yinakeŋi kushika munyaka makumi awana, mumuchima windi himukwinza jakuya nakuhempula ana kwindi aIsarela. 24Chanamoniyi mwinawu wumu hiyakumukoŋa chatama, hakumwamwina, hakumutenda owu akabishiluwu, hakujaha owu kaEjipitu. 25Watoŋojokeli nindi ana kwindi akwiluka chakuyamwinawu kudi Nzambi nachikasa chindi yena, aŋa wena kuchiluka nehi. 26Chikunachi, hakuyiwana adi nakulwisha mulwawu, yena hakukeŋa kuyihumaŋesha cheŋi nindi, Enu akwetu, ivumu denu dimu, muloŋanyi mudi nakudikoŋela chatama chochichi? 27Owu wamukoŋeli mukwawu chatama hakumushinjika Mosi nindi, Nakwinki mudimu wakutuyula hela kutusompesha, hinyi? 28Keŋa wunjahi neyi chiwajaha ona kaEjipitu haloshi, tahindi? 29Mosi chanatiyiyi izu odu hakutemuka, hakushakama mwituŋa dakuMidiyani, hakuvwelaku anyana amayala ayedi.

30Chinamani nyaka makumi awana, kaŋelu hakumwekana kudi yena mwisaŋa dakumpidi yaSinayi, mumuzuzu wakesi muchiputa. 31Mosi chanachimoniyi, hakuhayama nakuchimona; hakwinza nakuswila kwakwihi, nindi atali. 32Hikukutiyakana izu daYehova nindi, Yami Nzambi yawankakulula jeyi, Nzambi yaAbarahama, niyaIsaka, niyaYakoba. Mosi hakuzaala woma, nikutwesha kutalaku nehi. 33Yehova hakumwila nindi, Subulaku nkwabilu jidi kunyendu yeyi, muloŋa hiwunemani hiiseki dajila. 34Chalala namoni chadi nakukabishawu antu ami adi muEjipitu, natiyi chakwabawu; nasuluki dehi niyipulwishi. Dichi nakeŋi kukutemesha muEjipitu.

35Yowu Mosi alekeluwu nawu, Nakwinki mudimu wakutuyula hela kutusompesha hinyi? diyi atemesheluwu kudi Nzambi ekali nyuli ninkúuli, nachikasa chayenowu kaŋelu wamwekeni kudi yena muchiputa. 36Diyi muntu wayifumishili muEjipitu chanakoŋiyi yihayamisha nayinjikijilu, nimuEjipitu, nimuKaluŋalwiji Kachinana, nimwisaŋa, nyaka makumi awana. 37Yeniwu diyi Mosi wayilili anyana kaIsarela nindi, Nzambi wakayimwekeshela kaprofwetu wahadi ana kwenu neyi ami. 38Diyi wadiŋi muchipompelu omu mwisaŋa, hamu nanowu kaŋelu wahosheli nayena kumpidi yaSinayi, ninawankakulula jetu; diyi watambwili mazu amomi atuleji etu. 39Yowu alekeluwu ankakulula jetu nawu etu kumwovwahila kwonti kwetu; hiyakumushinjika nawu tufumi; nyichima yawu hiyikufunta cheŋi kuEjipitu. 40Hiyakumwila Aroni nawu, Wutwilili akishi kulonda atwaminini kutukuyetu; yeniwu Mosi, watufumishili mwituŋa daEjipitu, hituneluki kwanayiyuku. 41Wena mafuku owu hiyakwila mwana kaŋombi, hiyakuketwila yenowu mukishi chimuna, hiyakuzaŋalala nanyidimu yakumakasawu. 42Nzambi hakubalumuka, hakuyileka kwindi, nindi apeshaŋa yileŋaleŋa yamwiwulu; neyi chasonekeluwu mumukanda wawatuprofwetu wajila nawu, Enu akwamutaŋa waIsarela, yami komana mwaketwililaŋa yimuna, mwaletelelaŋa nyilambu nyaka makumi awana muna mwisaŋa, tahindi? 43Mwakwatili kutabanaka yaMoleki, nikukatumbwa kamukishi Refwana, diwu akishi mwalumbishili kulonda kudifukula kudi wena; ami nakayitwala kwakubadika Babiloni.

44Ankakulula jetu adiŋi natabanaka yawunsahu omu mwisaŋa, yamukunjikiluwu Mosi kudi owu wahoshelaŋa nindi, hakumuleja nindi akatuŋi mwaya chifwikija chanamoniyi. 45Tabanaka yaleteluwu kudi ankakulula jetu nawa, hepililuwu hamu naYoshuwa nakutambula ituŋa dawaJentili atemwiniyi Nzambi kukuya ankakulula jetu, ndo nikumafuku aDavidi, amwenuwu kuwaha kudi Nzambi. 46Yowu walombcli kunamutuŋila Nzambi yaYakoba hakushakama. 47Ilaŋa Solomoni diyi wanamutuŋilili itala. 48Hela chochu, Mukwakubadika hashakamaŋa mwakutuŋa namakasa awantuku; 49mwomwaneliyi kaprofwetu nindi, Iwulu hiitanda dami dawanta, iseki hiitanda dakunyendu yami. Yehova nindi, Indi itala mukuntuŋilami kulonda nimoni mwakunookela, dishika hadihi? 50Yuma yejimiyi hiyayituŋali kudami nachikasa chamuku?

51Enu mwachinchika! Enu ayidima munyichima namatu! Yenu mwadikaŋaŋa naSpiritu Wajila mafuku ejima. Chelilaŋa ankakulula jenu, dichi chimwelaŋa ninenu. 52Kaprofwetu wumwodihi anabuli kukabishawu kudi ankakulula jenu? Ajahili wena ayilejelaŋahu dehi chakenzayi Mukwakuloŋa; yenowu, yenu mwabalumukili kwikala akwakumufukeja, niambanji akumujaha. 53Enu mwatambwili nshimbi jaloŋesheluwu mudi aŋelu, kujihemba nehi.

54Wena chanatiyuwu mazu owu, chiyitapa nimunyichima, hiyakumusumaŋena kumaji. 55Ilaŋa yena, wenzala dehi Spiritu Wajila, hakutala mwiwulu swi-i, hakumona lubanji lwakulema kwaNzambi, niYesu nemani kuchikasa chaNzambi chachidiilu. 56Nindi, Talenu, namoni mumawulu munenzuluki, ni mwana kamuntu nemani kuchikasa chaNzambi chachidiilu. 57Ilaŋa wena hiyakubidika naŋovu, hiyakusha nyinu mumatu awu, hiyakumulotokela namuchima wawu wumu hohu. 58Amutemuna nimuŋanda, amwasa nimalola. Ayinsahu hiyakutenteka mahinawu kunyendu yamukwenzi weyala, ijina dindi Sawulu. 59Hiyakumwasola Setefwanu malola, iku wudi nakutambika nindi, Mwanta Yesu, atambuli spiritu yami. 60Hakufukama, hakubidika chakola nindi, Eyi Mwanta ayanakeni muloŋiwu. Chanahoshiyi mwenimu akama nitulu. Sawulu wadiŋi nakwiteja chanamujahuwu.

Currently Selected:

Likezo 7: MW62

Highlight

Copy