Luka 6:27-49
Luka 6:27-49 LUE
Oloze enu muli nakwivwilila, nangumilweza ngwami, Zangenunga vaka-kole jenu, lingenunga mwamwenemwene kuli vaze vamihunga, kisulenunga vaze navamyangula, nakulombela vaze veji kumiyanjisanga. Ou mwakuveta mbanda kulikili, muhane nalikwavo nawa, kaha ou mwakutambula chikovelo chove chachisuku chahelu, kanda naumukanyisa nawa chikovelo chove chachisuku chamukachiko. Mutu himutu ou mwakulomba muhane, kaha ou mwakutambula vikumba vyove kanda umukalavyoko. Kaha muze mwasáka ngwenu vakwenu vamilingilemo, lingenu mwomumwe kuli vakiko. Nge namuzanga vaze vamizanga, namuwanyinaho ika? Mwomwo chipwe vaka-shili vazanga vaze vavazanga. Kaha nge namulinga mwamwaza kuli vaze veji kumilinganga mwamwaza, namuwanyinaho ika? Mwomwo vaka-shili nawa veji kulinganga mwomumwe. Kaha nge namukongwesa vaze munafwelela ngwenu navamihilwishila, namuwanyinaho ika? Mwomwo vaka-shili nawa veji kukongwesanga vaka-shili vakwavo nakuvahilwishila josena. Shikaho zangenunga vaka-kole jenu, lingenunga mwamwaza, kaha kongwesenunga chakuzeneka kutalilila kumihilwishila, kaha mawana akumisakwilila naakapwa amalemu, kaha namupwanga muvana vayOu alitulaho, mwomwo atwama nalikoji hali vaze vazeneka kusakwilila, navaze vavapi. Shikaho pwenunga muvaka-kutetela ngana omu apwa Senu Muka-kutetela. Kanda muwanyinanga vakwenu milongako, kuchina nayenu nawa navakamiwanyina milonga. Kanda namuhananga vakwenu milongako, kuchina nayenu nawa navakamihana milonga. Konekelenunga vakwenu, kaha nayenu nawa navakamikonekela. Hanenunga vakwenu, kaha nayenu navakamihana chesekelo chakutamo, chakujinda, chakunyukumuna, chakuzala nakuwulumuka, navakachitumbika hamahinji enu. Mwomwo chesekelo mwéji kwesekelanga vakwenu chikiko navakamyesekelaho nayenu. Avatelele nawa chishimo ngwenyi, Kapuputa mwahasa kutetekela mukwavo kapuputa numba? Kumana kaveshi kuholokela vosena vavali muwinako? Kambaji kahambakana muka-kumunangulako, oloze mutu himutu nánanguka lyehi kanawa, mwapwa nge muka-kumunangula. Unamono ngachilihi kachiswaswa kali haliso lyandumbwove, oloze mwalachi uli haliso lyove ove ivene kawauhaka muchimako. Nauhasa ngachilihi kwamba ndumbwove ngwove, Ove ndumbwami, ngwitavise ngukufumise kachiswaswa kali haliso lyove, shimbunyi mwalachi uli haliso lyove kawauhaka muchimako? Ove muka-kulyongela kwoloka, vangila kufumisa mwalachi uli haliso lyove, numbanyi uhase kumona kanawa, ufumise kachiswaswa kali haliso lyandumbwove. Mwomwo kakweshi mutondo wamwaza wema mihako yayipiko, kaha nawa, kakweshi mutondo waupi wema mihako yamwazako. Mwomwo mutondo himutondo vautachikijila kumihako yawo. Mwomwo jikuyu kavajihela kumingongako, chipwe mihako yavinyo kavayihela kuchikwatako. Mutu wamwenemwene eji kusololanga vyamwaza vyamuchisete chamwenemwene chamuchima wenyi, kaha mutu wamupi eji kusololanga vyavipi vyamuchisete chachipi chamuchima wenyi. Mwomwo ovyo vyazalilila mumuchima vikiko ahanjika mutu mukanwa kenyi. Mwomwo ika mweji kunguvulukilanga ngwenu, Ove Mwata, ove Mwata, oloze evi ngwámilweza kamwavilingako? Mutu himutu mweza kuli Ami, kaha himwevwa mazu ami nakuwalinganga, nangumilweza omu napu: Napu nge mutu átungile zuvo, afulile nakukunamisa, nakutungila hachihela chalilolwa. Kaha omu lyafumikile livaji, muta walivetele hazuvo yize, oloze kawahashile kuyinyikisako, mwomwo vayitungile kanawa. Oloze ou mwevwa mazu nakuzeneka kulingangamo, napu nge mutu átungile zuvo hamavu hakuzeneka chihela chakukola. Omu muta walivetele hayikiko, hahaze vene yashiukile, kaha yize zuvo yalyenyekele chikuma.
Bible App
Bible App for Kids
