Yowano 14

Yesu kaha Ikiye Jila yakuya kuli Ise

1Michima yenu kanda nayilizakaminangako#14:1 Chipwe ngwavo, Michima yenu kanda yikalizakaminako.. Fwelelenunga Kalunga, ngufwelelenunga nayAmi nawa#14:1 Chipwe ngwavo, Mwafwelela Kalunga, ngufwelelenunga nayAmi nawa..

2Muzuvo yaTata muli mautwamo amavulu. Nge kachapwile ngochoko, kachi ngunamilweze. Nanguya nakumilongesela chihela chenu.

3Kaha omu nanguya nakumilongesela chihela chenu, nangwiza cheka nakumitambula mwize kuli Ami Ivene, mangana kuze nangukapwanga#14:3 MuchiHelase, Mwata nalumbununa nge ali lyehi kuze, nge ngwenyi, Kuze nguli Ami. Ami, nayenu nawa mukapwengako.

4Kaha kuze nanguya Ami, jila mwayitachikiza lyehi.

5Tomase amuhulishile ngwenyi, Ove Mwata, okwo nauya katwatachikijilekoko, nyi jila natuhasa kuyitachikiza ngachilihi?

6Yesu amukumbulwile ngwenyi, Ami yami Jila, yami Muchano, yami Mwono. Mutu naumwe wauchi mweza kuli Tata kuvanga hali Ami kaha.

7 Nge mwangutachikizanga, kachi munatachikiza naTata nawa, kaha kufumisa oholili munamutachikiza, kaha munamumono.

8Fwilipu ambile ngwenyi, Ove Mwata, tulweze Iso, kaha nachitusuulwisa.

9Yesu amukumbulwile ngwenyi, Ove Fwilipu, kutala ngunashimbula chikuma nayenu ngana, kaha kumana, kawangutachikizako? Ou nangumono Ami namono Tata, nyi ngachilihi unambe ngwove, Tulweze Iso?

10Kawafwelela ngwove, Ami nguli muli Tata, kaha Tata nawa ali muli Amiko? Mazu awa ngweji kuhanjikanga Ami kuli enu kangwalihanjikilawo tuhuko, oloze Tata Ou atwama muli Ami, Ikiye azata milimo yenyi.

11Ngufwelelenu ngwenu Ami nguli muli Tata, naTata nawa ali muli Ami, mokomoko ngufwelelenu hamilimo yivene.

12Mwamuchano vene nangumilweza ngwami, Ou mwangufwelela, milimo eyi ngweji kuzatanga Ami naikiye nawa mwakayizatanga, kaha mwakazatanga milimo yakuhambakana eyi, mwomwo Ami nanguya kuli Tata.

13Kaha cheshocho namukalomba mulijina lyami nangukachilinga, mangana upahu waTata usolokele muli Ami Mwanenyi.

14Cheshocho namukangulomba mulijina lyami, Ami nangukachilinga.

Yesu mwashika kuvatumina Shipilitu Wajila

15 Nge mwanguzanga, kaha namulinganga mwaya vize ngwámilweza.

16Kaha Ami nangulomba Tata, kaha mwakamihana Muka-kumikafwa#14:16 Mokomoko ngwenyi, Muka-kumivendejeka, Lihako. mukwavo, mangana akatwamenga nayenu lika,

17Ikiye Shipilitu wamuchano, Uze kavahasa vaka-kaye kutambula mwomwo kavamumonako chipwe kumutachikiza. Enu munamutachikiza, mwomwo atwama nayenu hamwe, kaha mwakapwanga muli enu.

18Kangweshi kumiseza nge muvangingako, nangwiza kuli enu.

19 Kuchinasale katando kakandende, kaha vaka-kaye kaveshi kukangumonako, oloze enu namungumonanga. Mwomwo Ami ngwayoya, shikaho nayenu nawa namuyoyanga.

20Halikumbi lize enu namukatachikiza ngwenu, Ami nguli muli Tata, nayenu nawa muli Ami, nayAmi nawa muli enu.

21 Ou atwama muvize ngwámilweza nakuvilinganga, ikiye vene ou anguzanga. Kaha ou anguzanga navamuzanga kuli Tata, nayAmi nawa nangumuzanganga nakulisololanga kuli ikiye.

22 Yuta (keshi uze Isakalyoteko) amuhulishile ngwenyi, Ove Mwata, chinapu ngachilihi numba ulisolole kuli etu kaha, keshi kuli vaka-kayeko?

23Yesu amukumbulwile ngwenyi, weshowo anguzanga, mwalinganga mwaya mazu ami, kaha Tata mwamuzanga, kaha natwiza kuli ikiye nakutwamanga#14:23 Kalunga Setu naMwanenyi navatunga utwamo wavo hamwe namuka-kulama mazu aMwata. Tala 14:2-3. nenyi hamwe.

24Ou kanguzangako kalinga mwaya mazu amiko, kaha mazu awa muli nakwivwa kaweshi Amiko, oloze aTata angutuma.

25Evi ngunavihanjika kuli enu shimbu ngunatwame nayenu hamwe.

26Oloze Muka-kumikafwa, Shipilitu Wajila, Uze mwakatuma Tata mulijina lyami, Ikiye mwakaminangulanga vyosena, mwakamyanukisanga vyosena ngwahanjikilenga nayenu.

27Nguli nakumisela kuunda, kuunda chami nangumihanacho. Aminyi, kangweshi kumihana ngana omu veji kuhananga vaka-kayeko. Michima yenu kanda nayilizakaminangako, chipwe kwivwa woma.

28 Mwevwanga omu ngwamilwezanga ngwami, Nanguya kaha nangukeza cheka kuli enu. Nge mwanguzanga kachi munawahilila, mwomwo ngunambe ngwami, Nanguya kuli Tata, mwomwo Tata anguhambakana.

29Kaha jino, ngunamilweze shimbu kanda chisoloke, mangana omu nachikasoloka, mukafwelele.

30Kangweshi kutwalililaho kuhanjika chikuma nayenuko, mwomwo muka-kuyula vaka-kaye ali nakwiza, kaha keshi nangolo hali Amiko.

31Oloze mangana vaka-kaye vakatachikize ngwavo ngwazanga Tata, ngweji kulinganga nge omu Tata angulwezele. Katukenu, tufumenu kuno.

Currently Selected:

Yowano 14: LUE

Highlight

Copy