Yowano 13

Yesu mwasanyisa tumbaji kumahinji

1Jino shimbu kanda chiwanyino chaKuzomboka#13:1 Chiwanyino chaKuzomboka chize vavulukile hamwaka ngwavo, Paseka. chihete, Yesu hakutachikiza ngwenyi lwola lwenyi lunahete mangana afume hakaye ayenga kuli Ise, Ikiye hakuzanga venyi hakaye, avazangile palanga nakusongo.

2Shimbu vapwile nakulya, omu alingile liyavolo nengisa lyehi vishinganyeka mumuchima waYuta Isakalyote, mwanaShimona, vyakumuhana kumavoko avaka-kole,

3Yesu hakutachikiza ngwenyi Ise amusuwila vyosena, kaha afuma kuli Kalunga, kaha nawa mwaya kuli Kalunga,

4akatukile kukulya, azulile uvwalo wenyi wahelu nakuutumbika, himwanona litwayi nakulijichikalyo.

5Kaha ahingunwinyine meya halilonga lyakusanyina, himwaputuka kusanyisa tumbaji kumahinji, nakuwahunda nalitwayi lize alijichikile.

6Kaha ejile kuli Shimona Petulu, ou amuhulishile ngwenyi, Ove Mwata, unambe kungusanyisa kumahinji ami tahi?

7Yesu amukumbulwile ngwenyi, Echi nguli nakulinga Ami oholili, ove kawachitachikijileko, oloze kulutwe nachikakulumbunukila.

8Petulu amwambile ngwenyi, Kaweshi kukeza kukangusanyisa ami kumahinjiko. Yesu amukumbulwile ngwenyi, Nge kangweshi kukusanyisako, kaha kaweshi nachazano kuli Amiko.

9Shimona Petulu himwamwamba ngwenyi, Ove Mwata, keshi kumahinji ami kahako, oloze nakumavoko nakumutwe nawa.

10Yesu himwamwamba ngwenyi, Ou nasane lyehi mumujimba keshi kusaka chuma chekako, shina kusana kumahinji kaha, mwomwo natomo mwosena. Kaha enu munatomo, oloze keshi muvosenako.

11Mwomwo atachikijile uze mwakamuhana kumavoko avaka-kole, shikaho ambile ngwenyi, Kamwatomene muvosenako.

12Kaha omu akumishile kuvasanyisa kumahinji, avwalile cheka uvwalo wenyi#13:12 MuchiHelase ngwavo, hanambate cheka uvwalo wenyi nakusendavala, himwavamba ngwenyi, Echi ngunamilingila chinamilumbunukila tahi?

13Enu mweji kunguvulukanga ngwenu Muka-kunangula, ngwenu Mwata, kaha mweji kuhanjikanga kanawa, mwomwo mukiko mungwapwa.

14Kaha nge Ami nguMwata wenu, nguMuka-kunangula, ngunamisanyisa kumahinji, nayenu nawa mwatela kulisanyisa navakwenu kumahinji.

15Mwomwo ngunamisela chakutalilaho, mangana nayenu nawa mukalingenga omu ngunamilingila enu.

16Mwamuchano vene nangumilweza ngwami, Ndungo kahambakana kaka yenyiko, chipwe ou vanatumu#13:16 MuchiHelase ngwavo, Kaposetolo. keshi kuhambakana ou namutumuko.

17Nge munatachikiza vyuma evi, kaha namutokwa hakuvilinganga.

Yesu mwavalweza ou mwamuhana kumavoko avaka-kole

(Mat 26:20-25; Mako 14:17-21; Luka 22:21-23)

18Kangweshi nakumivuluka muvosenako. Ami ngunatachikiza ava ngunasakula. Oloze chapwa ngocho mangana Mazu-vasoneka-ajila atesemo ngwavo,

Ou eji kulyanga kumbolo yami nangufumbukila#13:18 MuchiHelase ngwavo, Nanguzundwila kakukunya kenyi..

19 Nguli nakumilwezacho oholili shimbu kanda chisoloke, mangana omu nachisoloka mufwelele ngwenu, Ami Ngwapwa#13:19 Hakuhanjika ngwenyi, Ami Ngwapwa, apwile nakuvasolwela UKalunga wenyi. Tala Kulovoka 3:14; Samu 90:2..

20Mwamuchano vene nangumilweza ngwami, ou mwátambula weshowo nangutuma, natambula Ami; kaha ou mwatambula Ami, natambula Uze angutuma.

21Omu Yesu ahanjikile vyuma evi, alinyengele mushipilitu yenyi nakuvalweza unjiho wenyi ngwenyi, Mwamuchano vene nangumilweza ngwami, Umwe wenu mwanguhana kumavoko avaka-kole.

22Tumbaji valitala-talile nakuhilasana ngwavo, navuluka iya?

23Kuli tumbaji twenyi kwapwile umwe asendavalile hakamwihi naYesu, uze vene vazangile kuli Yesu.

24Shimona Petulu amunyachilile ahulise Yesu ou navuluka.

25Ikiye hakusetulukila kuli Yesu amuhulishile ngwenyi, Ove Mwata, iyaze owo?

26Yesu amukumbulwile ngwenyi, Ikiye vene ou nangutachila Ami kachihanda kambolo nakumuhana. Kaha Ikiye hakutata kaze kachihanda akahanyine Yuta, mwanaShimona Isakalyote.

27Kaha omu Yuta atambwile kaze kachihanda, Satana amwingilile. Kaha Yesu amwambile ngwenyi, Ocho unajinyi kulinga chilinge washi.

28Jino kuli vaze vasendavalile kumesa naumwe wauchi atachikijile ocho amwambilile ngocho.

29Vamwe vashinganyekele ngwavo Yuta hakupwa nachikwama chajimbongo, shikaho Yesu namulweze akalande ovyo navasaka kuchiwanyino, nyi pamo namulweze ahane kamwe kuli vaka-kuhutwa.

30Kaha omu atambwile kaze kachihanda kambolo, hahaze vene alovokele. Kwapwile ufuku.

Lizangenunga navakwenu

31Omu Yuta alovokele, Yesu ambile ngwenyi, Oholili upahu waMwanamutu#13:31 Mwanamutu hilijina lyauKalunga waYesu Kulishitu chipwe shimbu kanda asemuke hakaye, ngana omu vanasoneka kuNdanyele 7:13-14. unasoloka, naupahu waKalunga nawa unasolokela muli Ikiye.

32Nge upahu waKalunga unasolokela muli Ikiye, kaha muli Ivene, Kalunga mwakasolwelamo upahu waMwanenyi, kaha linwaha mwasolola upahu wenyi.

33 Enu vana vavandende, kuchinasale katando kakandende kakupwa nayenu hamwe. Namukangutonda, kaha nge muze ngwalwezele vaYuleya ngwami, Kuze nangukaya Ami, enu kamweshi kuhasa kuyakoko, mukiko vene munangumilweza nayenu nawa oholili.

34 Nangumilweza lizu lyalihya ngwami, Lizangenunga mwenu mwenu — ngana omu ngwamizangila, nayenu nawa lizangenunga mwenu mwenu.

35 Hakiko vene vosena navatachikijila ngwavo mwapwa mutumbaji twami, nge namulizanganga mwenu mwenu.

Yesu mwalweza Petulu ngwenyi, Naungukana

(Mat 26:31-35; Mako 14:17-21; Luka 22:31-34)

36Shimona Petulu amuhulishile ngwenyi, Ove Mwata, nauya kulihi? Yesu amukumbulwile ngwenyi, Okwo nanguya, kaweshi kuhasa kungukava oholiliko, oloze naukangukava kulutwe.

37Petulu amwambile ngwenyi, Ove Mwata, nanguhonena ika kukukava oholili? Ami nangusuula mwono wami hali Ove.

38Yesu amukumbulwile ngwenyi, Kumana nausuula mwono wove hali ami? Mwamuchano nangukulweza ngwami, Shimbu kanda ndemba asanyike naukana katatu ngwove kawangutachikizako.

Currently Selected:

Yowano 13: LUE

Highlight

Copy