ROMUDENƆ 9

Luda Isarailanɔ sɛna a gbɛ̃nɔ ũ

1Matɛn yãpura o Kirisi gũmmɛ, mádi ɛ́kɛ toro. Ma laasun dì we kũ Luda Ninio se. 2Ma pɔsira kɛ̀ zɔ̃kɔ̃, ma nɛ̀sɛɛ dìgɔ̃ yakana gɔrɔ sĩnda pínki. 3Mani fɔ̃ mà wɛ́ kɛ Ludaa à ma bo Kirisi gũn, à láari kɛma ma Isaraila dakenɔ gɛ̃nɛ ũ. 4Mɔ́kɔ̃nɔn Luda ń sɛ́ a nɛ́nɔ ũ,#Bon 4:22 à a gakuri mɔ̀ńnɛ, a bàka kú kũńwo, à a doka kpàḿma, à donyĩkɛnaa dàńnɛ, à lɛ́ sɛ̀ńnɛ. 5Ò de Luda gbɛ̃ káakunɔ burinɔ ũ, akũsɔ̃ ń buri gũnn Kirisi kũ à de gbɛ̃ sĩnda pínkila bòn bisãsiri ũ. Àkũmɛ Luda kũ à kũ̀ ògɔ̃ a sáabu kpá gɔrɔ sĩnda pínki ũ. Aami.

6Adi kɛ yã kũ Luda ò lɛ̀tɛ pãnlo, zaakũ Isaraila gbɛ̃ sĩnda pínkimɛ Isaraila yãpura ũro. 7Adi kɛ Ibrahĩ buri sĩnda pínkimɛ Ibrahĩ pì nɛ́nɔ ũ Luda kĩnaaro, zaakũ Luda ò Ibrahĩnɛ à pì, Isaaku burinɔn onigɔ̃ pińnɛ a burinɔ ũ.#Naa 21:12 8Lɛmɛ adi kɛ nɛ́ kũ à ń í kũ pɔyeinaaonɔmɛ Luda nɛ́nɔ ũro, nɛ́ kũ à ń í Luda lɛ́sɛnaa musunɔmɛ buri pìnɔ ũ. 9Zaakũ Luda lɛ́ sɛ̀ à pì: Mani ɛra mà su ziki mandara'i, Sara ni nɛ́ i gɔ̃gbɛ̃ ũ.#Naa 18:10 10-12Adi kɛ abire adoro. Luda dì gbɛ̃nɔ sɛ́ lákũ a pɔyenyĩnaa bàmɛ, adi kɛ ń yãkɛna yãinlo, kũ à ń sísi yãimɛ. Lɛmɛ kũ Rɛbɛka sìkanɔ nɔ̀ɔ sì kũ ó dizi káaku Isaakuo, ari àgɔ̃ gɛ́ ń i, ari ògɔ̃ gɛ́ yã mana ke a vãni kɛ, Luda pì Rɛbɛkanɛ, a kũ à bò káaku nigɔ̃ nɛ́ ũ gbɛ̃ kpɛdenɛ.#Naa 25:23 13Lákũ ò kɛ̃̀ Luda yãn nà ò pì:

Má ye Yakubui,

Isau sɔ̃, ma gii.#Mal 1:2-3

14Óni pi deramɛɛ? Yã vãni kú Luda kĩnaan yá? Lɛnlo fá! 15Zaakũ à pì Musanɛ,

gbɛ̃ kũ á ye à sùru kɛ kãaon áni kɛo,

akũsɔ̃ gbɛ̃ kũ á ye à wɛ̃nda dɔ̃nɛn áni dɔ̃nɛ.#Bon 33:19

16A yã mɛ́ à tò Luda gbɛ̃nɔ sɛna dí bo bisãsirinɔ pɔyeinaa gãiro ke ń kokarikɛnan, à bò Luda sùru gũmmɛ. 17Zaakũ Luda ò Firi'aunanɛ a yãn à pì: Ma n ka kpatan de mà a gbãna mɔ gbɛ̃nɔnɛ n musumɛ, ò ma tɔ́ kpá andunia gũn pínki.#Bon 9:16 18Lɛmɛ gbɛ̃ kũ à ye à sùru kɛ kãaon àdi kɛ kãao lɛ, akũsɔ̃ gbɛ̃ kũ à ye à a sã gbãgbãn àdi gbãgbã.

Luda pɔfɛ̃ kũ a sùruuo

19Á gbɛ̃ke ni ma la, bɔ́yãi Luda tɛn gbɛ̃nɔ taari le dɔɔ? Dí mɛ́ ani fɔ̃ à gí Luda pɔyenyĩnaaii? 20Mɔkɔ̃n bisãsiri ina, dímɛ n ũ gbasa ǹ yã sí Ludalaa? Oro ni a bòri la à pi: Bɔ́yãi n ma bo lán dí bà yá? 21Orobori zɛ́ vĩ à oro sãde kũ a sãsario bo kũ ɛ̃ dokɔ̃nɔ kũ à tòtooroo? 22Tó Luda ye à a pɔfɛ̃ mɔńnɛ de ò a gbãna dɔ̃, akũ à mɛna zɔ̃kɔ̃ɔ kɛ̀ kũ gbɛ̃ kũ ò de à pɔfɛ̃ kipaḿma à ń kakatɛnɔ sɔ̃ bi! 23Tó à abire pìi kɛ̀, de ókɔ̃nɔ kũ à sùru kɛ̀ kũoonɔ a gakuri zɔ̃kɔ̃ dɔ̃ sɔ̃ bi, ókɔ̃nɔ kũ à gĩnakɛ à ó kɛ́kɛ de ò gɛ̃ a gakuri pìi gũnnɔ! 24Gbɛ̃ kũ Luda ń sísi à ń sɛ́ pìnɔn ó ũ. Adi kɛ Yudanɔmɛ ńtɛ̃nɛro, kũ buri pãndenɔomɛ se. 25Lákũ Luda ò annabi Osea takadan nà à pì:

Buri kũ ò de ma gbɛ̃nɔ ũronɔn mani pińnɛ ma gbɛ̃nɔ.

Buri kũ má yeńyĩronɔn manigɔ̃ yeńyĩ.

26Gu kũ Luda pìńnɛ ò de a gbɛ̃nɔ ũro,

gwen oni ń sísi Luda Wɛ̃̀ndide pì nɛ́nɔ.

27Isaya wiki lɛ̀ Isarailanɔ yã musu à pì:

Bee tó Isarailanɔn dasi

lán ísiralɛ bùsu'atɛ̃ bà,

ń kpara kũ à gɔ̃̀ mɛ́ ani bo.

28Zaakũ Dikiri ni yã kũ à ò kɛ andunia gũn,

akũsɔ̃ ani a mì dɛ zɛnaa sarimɛ.

29Lákũ Isaya gĩnakɛ à ò nà à pì:

Tó Dikiri Zĩ̀karide dí ó buri kenɔ tó yãro,

de o gɔ̃ lán Sɔdɔmudenɔ bà,

de o kɛ lán Gɔmɔradenɔ bà.

Isarailanɔ gina Kirisi baaruui

30Óni pi deramɛ sàa? Buri pãndenɔ tɛn wɛtɛ Luda tó yã bo kũńwo nnaro, akũ à tò à bò kũńwo nna. À tò yã bò kũńwo nna a náani kũ ò kɛ̀ yãi. 31Isarailanɔ sɔ̃ òtɛn wɛtɛ Luda tó yã bo kũńwo nna doka musu, akũ adi bo kũńwo nnaro. 32Bɔ́yãii? kũ ò ye Luda tó yã bo kũńwo nna ń yãkɛnaaa yãimɛ, adi kɛ a náanikɛna yãinlo. Ò gɛ̃̀ɛ sì gbɛ̀ kũ àdi ń pãtɛa 33lákũ ò kɛ̃̀ Luda yãn nà:

Ǹ gwa, matɛn gbɛ̀ kũ àdi tó ò gɛ̃̀ sí ditɛ Zaiɔ̃,

gbɛ̀si kũ àdi tó ò fu.

Wé'i ni gbɛ̃ kũ à a náani kɛ̀ kũro.

Currently Selected:

ROMUDENƆ 9: BB2005

Highlight

Copy