ROMUDENƆ 8

Zĩ̀blena kũ Luda Nini gbãnao

1Yãkpatɛ ni gbɛ̃ kũ ò kú Kirisi Yesu gũnnɔ ble doro, 2zaakũ kunna Kirisi Yesu gũn Luda Nini kũ àdi wɛ̃̀ndi kpáḿma gbãna ma bo durunna kũ gao ikon. 3Yã kũ Musa doka dí fɔ̃ à kɛ̀ro bisãsiri gbãnasarikɛ yãi, Luda kɛ̀. À a zĩda Nɛ́ zĩ̀ bisãsiri ũ lán ókɔ̃nɔ durunnadenɔ bà durunna kɛ̃ḿmana yãi, akũ à wé'i dà durunnaa a Nɛ́ mɛ̀ɛ pìi gãi, 4de yã kũ doka tɛn wɛtɛ yãpura kɛwá, ókɔ̃nɔ kũ ó dàa dì dowɛrɛ arɛ doro, sé Luda Nini. 5Gbɛ̃ kũ ń dàa dì dońnɛ arɛnɔ dì laakari dɔ ń dà yãa, gbɛ̃ kũ Luda Nini dì dońnɛ arɛnɔ dì laakari dɔ Luda Nini yãa. 6Dà donnɛna arɛ bi gamɛ. Luda Nini donnɛna arɛ bi wɛ̃̀ndi kũ aafiaaomɛ. 7Dà donnɛna arɛ bi ibɛrɛsɛna kũ Ludaoomɛ. Ade dì mì natɛ Luda dokanɛro, ani fɔ̃ sero. 8Gbɛ̃ kũ ń dàa dì dońnɛ arɛnɔ yã dì ká Ludaguro.

9Ákɔ̃nɔ sɔ̃, á dàa dì doárɛ arɛro, sé Luda Nini, tó à kú á gũn yãpura. Tó gbɛ̃ Kirisi Nini vĩ sɔ̃ro, à kun Kirisi pɔ́ ũro. 10Tó Kirisi kú á gũn, bee tó á mɛ̀ de gɛ̀ ũ durunna yãi, á nini kummɛ,#Yuh 6:63 kũ Luda tò yã bò kãáo nna yãi. 11Tó Luda kũ à Yesu bò gan Nini kú á gũn,#1Kɔ 3:16 Luda kũ à Kirisi pìi vù gan ni wɛ̃̀ndi kpá á mɛ̀ kũ à gàa pìia a Nini kũ à kú á gũn gãi.

12A yã mɛ́ à tò ma gbɛ̃nɔ, tɛna ó dàai bi tilasinlo, pɔyeinaamɛ. 13Tó á tɛ́ á dàai, áni gamɛ. Tó a á yã vãni kɛnanɔ mìi dɛ̀ kũ Luda Nini gbãnao sɔ̃, ánigɔ̃ kun. 14Gbɛ̃ kũ Luda Nini dì dońnɛ arɛnɔ mɛ́ ò Luda nɛ́nɔ ũ. 15Zaakũ nini kũ àdi tó ò zɔ̀ ble kũ vĩ̀naaoon a lèro, Luda Nini kũ à tò a gɔ̃ Luda nɛ́nɔ ũn á vĩ, akũ odì ɔ́ɔ dɔ Ludanɛ kũ a gbãnao ò pi: Baa, ó De.#Maa 14:36 16Nini pìi dì o ó nininɛ kũ Luda nɛ́nɔn ó ũ. 17Lákũ a nɛ́nɔn ó ũ nà, a túbiblerinɔn ó ũ. Luda túbiblerinɔn ó ũ, óni ble lɛɛlɛ kũ Kirisiomɛ. Tó o wari kɛ̀ kãao, ónigɔ̃ kú kãao a gakuri gũn.#Gal 4:5-7

Wɛ́dɔna Luda gakurii

18Ma è óni fɔ̃ ò gɔrɔ díkĩna wari lɛkɔ̃a kũ gakuri kũ Luda ni boowɛrɛ gupuraaro. 19Luda pɔ́kɛnanɔ sĩnda pínki wɛ́ dɔ a nɛ́nɔ bona gupuraai lakanaa sari. 20Zaakũ Luda tò a pɔ́kɛnanɔ gɛ̃̀ pãpãkɛnaa gũn pínki#Naa 3:17-19 Adi kɛ ń pɔyeinaanlo, Luda mɛ́ à kɛ̀ lɛ, de ń wɛ́dɔinaa gũn 21andunia bo yakana kũ àtɛn zɔ̀ blenɛɛ gũn, gbasa àgɔ̃ a zĩda vĩ Luda nɛ́nɔ gakuri gũn. 22Ó dɔ̃ kũ Luda pɔ́kɛnanɔ sĩnda pínki tɛn nda kũ wãwão lán nɛ́'ipɔ bà ari tera. 23Adi kɛ abiremɛ adoro, ókɔ̃nɔ kũ ó Luda Nini vĩ zɛnkpɛkɛ ũnɔ, ótɛn nda kpãni se ari Luda gɔ̃ gɛ́ ó mɛ̀ litɛ à ó sí a nɛ́nɔ ũ.#2Kɔ 5:2-5 24Luda ó sura bà de ò wɛ́ dɔ abirekũi. Pɔ́ kũ ò è kũ wɛ́o bi wɛ́dɔina yãn doro. Dí mɛ́ àdi wɛ́ dɔ pɔ́ kũ à gĩnakɛ à lèe? 25Tó ó wɛ́ dɔ pɔ́ kũ ódi leroi sɔ̃, odìgɔ̃ a dã kũ mɛnaomɛ.

26Lɛmɛ sɔ̃ Luda Nini dì kpáwái ó gbãnasarikɛ gũn, zaakũ ó aduakɛna dɔ̃ a zɛ́aro, akũ Luda Nini dì kútɛ kɛwɛrɛ Ludanɛ kũ ndana kũ a yã gɛ̃̀ onalao. 27Luda dì nɛ̀sɛ gũn e, akũsɔ̃ à a Nini laasun dɔ̃, zaakũ Luda Nini dì kútɛ kɛ Luda gbɛ̃nɔnɛ lákũ Luda yei nàmɛ. 28Ó dɔ̃ kũ yã sĩnda pínki dì bo mana gbɛ̃ kũ ò ye Ludainɔnɛ, gbɛ̃ kũ à ń sísi à ń sɛ́ lákũ àtɛn wɛtɛ nànɔ. 29Zaakũ Luda dìtɛ zaa káaku kũ gbɛ̃ kũ à gĩnakɛ à ń dɔ̃nɔ bokɔ̃a kũ a Nɛ́o, de àgɔ̃ de daudu ũ dakũna dasinɔ tɛ́. 30Gbɛ̃ kũ à ń dítɛ zaa káaku pìnɔn à ń sísi, akũ à tò yã bò kũ gbɛ̃ kũ à ń sísi pìnɔo nna, akũ à tò gbɛ̃ kũ yã bò kũńwo nna pìnɔ gɔ̃ gakuri vĩ.

Yenyĩ kũ Luda vĩ kũoo Kirisi Yesu gũn

31Óni o deramɛ yã birenɔ musuu? Lákũ Luda zɛ̀ kũoo nà, dí mɛ́ ani fɔ̃ à kpáwɛrɛɛ? 32Lákũ adi gí kũ a zĩda Nɛ́oro nà à a kpà ó pínki yãi, ani gí pɔ́ sĩnda pínki naawɛrɛ gba ũ sɔ̃i yá? 33Dí mɛ́ ani gbɛ̃ kũ Luda ń sɛ́nɔ káara kɛɛ? Luda mɛ́ àdi tò yã bò kũńwo nna. 34Dí mɛ́ ani yã daólaa? Kirisi Yesu gà, kũ à de abirekũla à ɛ̀ra à fùtɛ, à kú Luda ɔplai, àtɛn kútɛ kɛnɛwɛrɛ. 35Bɔ́ mɛ́ ani ó kɛ̃kɔ̃a kũ Kirisi yenyĩoo? Wari ke mɛ̀'ũmmana ke wɛ́tãmmana ke nà ke takasi ke kari ke fɛ̃nɛda, ń ke ni fɔ̃ yá? 36À kɛ̃na Luda yãn ò pì:

N yãi ó kú ga lɛ́i zaa kɔnkɔ ari ɔkɔsi,

òdi ó ditɛ lán sã kũ oni ń kùtu kpánɔ bà.#Zab 44:22

37Yã birenɔ gũn pínki ó de zĩ̀blerila kũ gbɛ̃ kũ à yewái gbãnao. 38Zaakũ má dɔ̃ sãnsãn kũ ga ke wɛ̃̀ndi ke malaikanɔ ke tãnanɔ ke tera yã ke zia yã ke gbãnadenɔ 39ke musu pɔ́nɔ ke zĩtɛ pɔ́nɔ ke Luda pɔ́kɛna pãndenɔ, ń ke ni fɔ̃ à ó kɛ̃kɔ̃a kũ yenyĩ kũ Luda vĩ kũoooro kunna ó Dikiri Kirisi Yesu gũn.

Currently Selected:

ROMUDENƆ 8: BB2005

Highlight

Copy