ROMUDENƆ 14

Kɔ̃ taari'enaa

1À gbɛ̃ kũ à busɛ ludanaanikɛnaa gũn sí yãkete sari. 2Gbɛ̃kenɔ ludanaanikɛnaa dì pɔ́ke tɛ̃̀ boro, akũ gbɛ̃ kũ ń ludanaanikɛna busananɔ dì nɔ̀bɔ sóro.#Kɔl 2:16 3Gbɛ̃ kũ àdi pɔ́ sĩnda pínki ble sún gbɛ̃ kũ àdi pɔ́ sĩnda pínki blero gya boro, akũsɔ̃ gbɛ̃ kũ àdi pɔ́ sĩnda pínki blero sún gbɛ̃ kũ àdi pɔ́ sĩnda pínki ble taari ero, zaakũ Luda a sìmɛ. 4Dímɛ n ũ kũ ntɛni dakenɔ zĩkɛri taari ee? Tó à fɔ̃̀ ke à fùan yá, a Dikiri yãn gwe. Ani fɔ̃, zaakũ Dikiri gbãna ni tó à fɔ̃. 5Gbɛ̃kenɔ sì kũ gɔrɔ kenɔ nna de a kenɔla, gbɛ̃ pãndenɔ sì kũ gɔrɔ sĩnda pínki lɛɛlɛmɛ. Baadi laasun gɔ̃ dokɔ̃nɔ kũ yã kũ à zɛ̀ooo. 6Gbɛ̃ kũ àdi gɔrɔ bo dì bo Dikiri yãimɛ. Gbɛ̃ kũ àdi pɔ́ sĩnda pínki ble dì ble kũ Dikiri gbãnaomɛ, à Luda sáabu kpá. Gbɛ̃ kũ àdi pɔ́ tɛ̃ dì tɛ̃ Dikiri yãimɛ, à Luda sáabu kpá. 7Gbɛ̃ke dìgɔ̃ kun a zĩda yãiro, gbɛ̃ke dì ga a zĩda yãiro. 8Tó ó kun, ó kun Dikiri pɔ́ ũmɛ, tó o ga, o ga Dikiri pɔ́ ũmɛ. Ó kunn yá, o gan yá, ó de Dikiri pɔ́ ũmɛ. 9Zaakũ Kirisi gà à vù de àgɔ̃ de gyãwãndenɔ kũ gbɛ̃ bɛ̃nɛnɔ Dikiri ũmɛ. 10Kũ ntɛni n gbɛ̃ndo taari e sɔ̃ bi? Mɔkɔ̃n sɔ̃, à kɛ̀ dera ntɛni n gbɛ̃ndo gya bo sɔ̃ɔ? Luda nigɔ̃ vutɛna a tìntinnwa, ó pínki óni bo ò zɛ a arɛ,#2Kɔ 5:10 11lákũ à kɛ̃na Luda yãn nà Dikiri pì:

Kũ ma kunnaao, gbɛ̃ sĩnda pínki ni kútɛmɛnɛ,

gbɛ̃ sĩnda pínki ni ma ludakɛna dɔ̃.

12Lɛn baadi ni a zĩda yã baba Ludanɛ lɛ.

Àsun yã kũ ani tó a gbɛ̃ndo fu kɛro

13Abire yãi òsun kɔ̃ taari e doro. Kũ ani kɔ̃ taari e, à zɛo kũ áni yã kũ ani tó à á gbɛ̃ndo fu kɛro. 14Kunna Dikiri Yesu gũn má dɔ̃ sãnsãn kũ pɔ́ble ke dìgɔ̃ gbãsĩ a zĩdaro. Ama tó gbɛ̃ dìtɛ kũ pɔ́ gbãsĩ, akũ àdigɔ̃ gbãsĩnɛ. 15Tó n n gbɛ̃ndo nɛ̀sɛɛ yàkanɛ pɔ́ kũ n blè yãi, ń yenyĩ vĩnɛro. Pɔ́ble kũ n blè yãi ǹsun gbɛ̃ kũ Kirisi gà a yãi kakatɛro. 16Àsun tó ò pɔ́ kũ a è à mana gya boárɛro, 17zaakũ kpata kũ à bò Luda kĩnaa bi pɔ́blena kũ pɔ́minaao yãnlo. Yãkɛna a zɛ́a kũ aafiaao kũ pɔnna kũ Luda Nini dì ińnɛo yãmɛ. 18Gbɛ̃ kũ àtɛn do Kirisii lán abirekũ bà yã dì ká Ludagu, akũsɔ̃ bisãsiri dì a sáabu kpá. 19Abire yãi ògɔ̃ kɔ̃ aafia wɛtɛ ògɔ̃ gbãna karakɔ̃nɛ. 20Ǹsun Luda zĩ yaka pɔ́ble yãiro. Pɔ́ble sĩnda pínki manamɛ, ama pɔ́ kũ ani tó n gbɛ̃ndo fu blena manaro. 21Nɔ̀bɔsonaan yá, wɛ̃minaan yá, yã kũ ani tó n gbɛ̃ndo fu pínki, à mana ǹ tɛ̃mɛ. 22Pɔ́ kũ ń náani kɛ̀ɛ, ǹ tó à gɔ̃nnɛ kũ Ludao. Arubarikaden gbɛ̃ kũ adi a zĩda taari e kũ pɔ́ kũ à zɛ̀oro ũ. 23Tó gbɛ̃ tɛn sika kɛ pɔ́ble kũ àtɛn blea sɔ̃, à a zĩda dà yãmmɛ, kũ adi kɔ̃ sɛ́ kũ a ludanaanikɛnaaoro yãi. Yã kũ adi kɔ̃ sɛ́ kũ gbɛ̃ ludanaanikɛnaaoro bi durunnamɛ.

Currently Selected:

ROMUDENƆ 14: BB2005

Highlight

Copy