ROMUDENƆ 1

Pɔlu fɔkpana Romudenɔa

1Makũ Pɔlu, Kirisi Yesu zɔ̀bleri, Luda ma sisi à ma dítɛ a zĩ̀ri ũ, baaru nna 2kũ à gĩnakɛ à a lɛ́ sɛ̀ a annabinɔnɛ ò kɛ̃̀ a yãn kpàri ũ. 3-4A Nɛ́ Yesu Kirisi ó Dikiri yãmɛ baaru nna pì ũ. A bisãsirikɛ gũn à bò Dauda buri gũmmɛ. A ludaninikɛ gũn a bona gan mɛ́ à mɔ̀wɛrɛ kũ gbãnao kũ Luda Nɛ́mɛ a ũ. 5Kirisi ma gba zɛ́ màgɔ̃ de a zĩ̀ri ũ buri sĩnda pínkinɛ, de ò le ò a náani kɛ ò gɔ̃ a yãmarinɔ ũ, de à tɔ́ bo. 6Á kú gbɛ̃ kũ Yesu Kirisi ń sísi à ń sɛ́nɔ tɛ́ se. 7Ma takada díkĩna kɛ̃̀árɛ, ákɔ̃nɔ Romude kũ Luda yeái à á sísi a gɔ̃ a gbɛ̃nɔ ũ pínki. Luda ó De kũ Dikiri Yesu Kirisio gbɛ̃kɛ kɛárɛ, à á gba aafia.

8Káaku gĩa ma Luda sáabu kɛ̀ Yesu Kirisi gãi á pínki yã musu, kũ á ludanaanikɛnaa dà anduniala pínki yãi. 9Tó matɛn adua kɛ gɔrɔ sĩnda pínki, á yã dì sãmaguro. Ludamɛ ma sèedade ũ. Àpiin matɛn doi kũ nɛ̀sɛ mɛ̀n doo matɛni a Nɛ́ yã baaru kpá. 10Madìgɔ̃ wɛ́ kɛa à zɛ́ kɛkɛmɛnɛ lákũ à yei nà de mà le mà su á gwa sà. 11Wɛ́sinaálɛ ni tɛni ma dɛ manamana, de mà le mà Luda Nini gba ke daágu á zĩnipɛtɛna yãi, 12de á ludanaanikɛna kũ ma pɔ́o le à ó baadi gba swɛ̃̀ɛ. 13Ma gbɛ̃nɔ, má ye àgɔ̃ dɔ̃ kũ madìgɔ̃ gɔrɔ ditɛ gɛ̃̀n baaakɔ̃ mà su á gwa,#Zĩr 19:21 de mà a zĩ gbɛ̀ e á tɛ́ lákũ ma è buri pãndenɔ tɛ́ nà, akũ ari tera mádi zɛ́ ero. 14Girikiyãmarinɔ kũ Girikiyãmarisarinɔ ń pínki, dɔ̃̀rinɔ kũ dɔ̃̀risaridenɔ ń pínki, ń yã gɔ̃̀ ma yã ũ. 15Abire yãi ma mɛ̀ɛ wã̀ mà baaru nna pì kpá ákɔ̃nɔ Romudenɔnɛ se. 16Madì wé'i kũ kũ baaru nna pì yãoro,#Maa 8:38 àkũmɛ gbãna kũ Luda dì gbɛ̃ kũ òtɛni a náani kɛnɔ sura bao ũ, atɛ̃nsa Yudanɔ, ń gbɛra buri pãndenɔ. 17Baaru nna pìi dì owɛrɛ lákũ Luda dì tó yã bo kũńwo nna nà. À de ludanaanikɛna yã ũ adomɛ, lákũ ò kɛ̃̀ Luda yãn nà ò pì: Gbɛ̃ kũ Luda tò yã bò kãao nna a náani kũ àtɛn kɛ yãi nigɔ̃ kun.

Bisãsirinɔ bi taaridenɔmɛ Luda kĩnaa

18Zaa musu Luda dì a pɔfɛ̃na kipa bisãsiri kũ ń vãnikɛna dì zɛ́ zɔ̃ yãpuranɛnɔa ń pãkpaina kũ ń vãnikɛnaao yãi. 19Yã kũ oni fɔ̃ ò dɔ̃ Luda yã musu utɛnańnɛro, Luda mɛ́ à yã pìi bòńnɛ gupuraa. 20Zaa gɔrɔ kũ à andunia kàtɛ, a gbãna kũ àdi lákaro kũ a ludakɛna kũ òdi e kũ wɛ́oro bò gupuraa a zĩnɔ gũn swáswa. A yã mɛ́ à tò bisãsirinɔ kutɛkɛna vĩro. 21Ò Luda dɔ̃, ama òdi bɛ̀ɛrɛ línɛ a zɛ́a ò a sáabu kpáro. Ń laasunnɔ kɛ̀ pã, akũ ò gɔ̃̀ gusiran ń mìsari yãi.#Ɛfe 4:17-18 22Ò ń zĩda dìtɛ ɔ̃ndɔ̃rinɔ ũ, akũ ò gɔ̃̀ yɔ̃nkɔnɔ ũ. 23Òdi kútɛ bisãsiri kũ òdi ganɔ kũ bãnɔ kũ nɔ̀bɔnɔ kũ pɔ́ kũ òdi táa o kũ kùaonɔ takanɛ Luda kũ àdi garo gɛ̃nɛ ũ.

24A yã má à tò Luda ń kpá gbãsĩkɛnaai, de ò wé'isariyã kɛ kũ kɔ̃o, lákũ òdi a ni dɛ ń nɛ̀sɛɛ gũn nà.#Zab 81:12 25Ò Luda yãpurade lilin kɛ̀ kũ ɛ́kɛo. Òdi donyĩ kɛ Luda pɔ́kɛnanɔnɛ ò dońyĩ Luda kũ à pɔ́ sĩnda pínki kɛ̀ gɛ̃nɛ ũ. Arubarikaden a ũ gɔrɔ sĩnda pínki! Aami.

26Abire yãi Luda ń kpá wé'isariyã nidɛnaaa. Bee ń nɔgbɛ̃nɔ yã kũ òdi kɛ lilin kɛ̀ kũ yã kũ òdi kɛroo. 27Lɛmɛ se gɔ̃gbɛ̃nɔ, ò yã kũ òdi kɛ kũ nɔgbɛ̃nɔo tò, òdi lukakɔ̃i. Gɔ̃gbɛ̃ kũ gɔ̃gbɛ̃o dì wé'isariyã kɛ kũ kɔ̃o, òdi a gbɛ̀ le ń zĩdaa ń sãtɛna lɛ́n. 28Lákũ odi we ò zɛ̀ kũ Luda dɔ̃naaoro nà, akũ à ń laasun kɛ̀ lɛ́kpɛrɛ, de ò yã kũ à de ò kɛronɔ kɛ. 29Yã vãni sĩnda pínki pɛ̀kɛrɛḿma: Nɛ̀sɛ pãsĩ, wãkũ, ĩnikɛna kɔ̃o, nɛ̀sɛgɔ̃ba vĩna kɔ̃o, gbɛ̃dɛnaa, fìtii, gbɛ̃blena kũ manafikikɛnaao. Kɔrɔmɔtɔdenɔmɛ ń ũ, 30gbɛ̃yakarinɔ, Luda ibɛrɛnɔ, gbɛ̃ takikɛrinɔ, yɔ̃̀gɔ̃denɔ, ĩadãrinɔ, vãni laasunlɛrinɔ, de kũ dao yãdarisarinɔ, 31mìsaridenɔ, náanisaridenɔ, gbɛ̃yãkɛrisaridenɔ, wɛ̃ndasaridenɔ. 32Ò dɔ̃ kũ Luda dìtɛ kũ yã bire taka kɛ̀rinɔ kà ò ń dɛdɛ, ama òdi zɛ kũ a kɛnanɔ adoro, òdi tɛ́ ká a kɛ̀rinɔgumɛ dɔ.

Currently Selected:

ROMUDENƆ 1: BB2005

Highlight

Copy