ZĨRINƆ 28

Pɔlu kunna Malata luan

1Kũ o í bara lè aafia, o mà luan pì tɔ́n Malata. 2Bedenɔ ó sí kũ yenyĩo manamana. Ò gbãnakɛ kpàwái, ò tɛ́ sàa lèwɛrɛ, zaakũ legũ nà manaaa, akũ ĩa bɔ̀tɛ. 3Pɔlu yàka kete kàkara à sù àtɛn ká tɛ́n, pitiko kú a gũn. Kũ tɛ́ puusu a pà, à bò à Pɔlu sò a ɔa. 4Kũ bedenɔ mlɛ̃̀ɛ pìi è dɔ a ɔa, ò pìkɔ̃nɛ: Gbɛ̃ bire bi gbɛ̃dɛriimɛ yãpura. Bee kũ à bikũ̀ í bara aafia, yãpura dí wenɛ àgɔ̃ kunlo. 5Ama Pɔlu mlɛ̃̀ɛ pìi gbã̀kɛ à dà tɛ́n, adi pɔ́ke kɛnɛro. 6Gbɛ̃nɔ wɛ́ dɔi kũ a ɔ ni ká à lɛ́tɛ à ga gwe gɔ̃̀nɔmɛ. Kũ à gìi kɛ̀, ò è pɔ́ke dí a lero, akũ ò lɛ́ lìtɛ ò pì, gbɛ̃ pì bi tãna zɔ̃kɔ̃ kemɛ.

7Gu pìi sarɛn luan gbɛ̃ zɔ̃kɔ̃ kũ òdi pinɛ Publiu bɛ kunwa. À ó dítɛ gɔrɔ aakɔ̃ à nibɔkɛnaa kɛ̀wɛrɛ kũ yenyĩo. 8Publiu de wútɛna kũ mɛ̀wãnao àtɛn bãdubãdu kɛ. Akũ Pɔlu gɛ̃̀ a kĩnaa à adua kɛ̀nɛ, à ɔ nàa à a wèrekɔ̃a. 9Kũ à kɛ̀ lɛ, luan pì gyãre kparanɔ sù a kĩnaa, akũ ò wèrekɔ̃a se. 10Ò ó kpe tà manamana. Kũ ótɛn tá, ò zànaa kɛ̀wɛrɛ dɔ.

Pɔlu kana Romu

11Ó kunna luan pìi gũn mɔ aakɔ̃ gbɛra o gɛ̃ gó'itɛ kũ à bunsirɛ blè gwen o da zɛ́n. Gó pìi bò Alɛsandaria ò sìka tãnanɔ sèedaa kɛ̀a. 12Kũ o ka Sirakusi, o gɔrɔ aakɔ̃ kɛ̀ gwe. 13Bona gwe o do í lɛ́i ari o gɛ káo Rɛgiumu. Kũ gu dɔ̀ ĩa bò gɛ̀nɔmidɔki kpa, a gɔrɔ pladen o ka Putɛɔli. 14Wɛ̃tɛ pìi gũnn o Yesudenɔ lèn. Ò pì ò sùru kɛ ò azuma do kɛ kũńwo. O kɛ̀ lɛ, akũ o da Romu zɛ́n. 15Romu Yesudenɔ ó baaruu mà, akũ ò sù daólɛ. Gbɛ̃kenɔ ó lé Apiu Ɛtɛn, gbɛ̃kenɔ sɔ̃ gu kũ òdi pi Kipakimɛn'aakɔ̃n. Kũ Pɔlu ń é, à Luda sáabu kpà a laakarii kpàtɛ.

Pɔlu waazikɛna Romu

16Kũ o ka Romu, ò Pɔlu gbà zɛ́ àgɔ̃ kun adona kũ soza kũ anigɔ̃ a dãkpão. 17Gɔrɔ aakɔ̃ gbɛra Pɔlu Yuda gbɛ̃ zɔ̃kɔ̃nɔ sìsi. Kũ ò kàkara, à pìńnɛ: Ma gbɛ̃nɔ, mádi zã Yudanɔnɛ yãkearo. Mádi bo ó dizinɔ futɛokarayãke kpɛro, akũ ò ma kũ Yurusalɛmu ò ma kpa Romudenɔa. 18Ò ma lala yãi odi yãke le ma musu kũ à kà ò ma dɛro, akũ ò ye ò ma gbarɛ. 19Akũ Yudanɔ bò ma kpɛ. Tilasi ma zɛ kũ gɛna Siza kĩnaao, adi kɛ má yã vĩ kũ ma bùsu gbɛ̃nɔnlo. 20A yã mɛ́ à tò ma á gbɛ́ka, de ò kɔ̃ e mà yã o kãáo, zaakũ gbɛ̃ kũ Isarailanɔ wɛ́ dɔi yãin ò mɔ̀ dí kàmai.

21Akũ ò pìnɛ: Ódi takada ke le à bò Yudea bùsun n yã musuro. Ó gbɛ̃ke sɔ̃ adi bo gwe à sùwɛrɛ kũ n baaru vãnioro. 22O è à mana ò yã kũ ń vĩ ma n lɛ́n, zaakũ o mà òdi donyĩzɛ pì vãni bo gu sĩnda pínkiamɛ.

23Ò gɔrɔ dìtɛkɔ̃nɛ kũ Pɔluo, akũ ò sù a kĩnaa ɔn kũ à kìpan dasidasi. À ye ò a yãzɛ dɔ̃ Yesu yã musu, akũ à nà Musa dokaa kũ annabinɔ yãnɔ, à kpata kũ à bò Luda kĩnaa yã òńnɛ à bɔ̀kɔtɛńnɛ zaa kɔnkɔ ari ɔkɔsi. 24Gbɛ̃kenɔ yã kũ àtɛn onɔ zɛ́ lè, ama gbɛ̃kenɔ gìi. 25Kũ òtɛn kɛ̃kɔ̃a kũ lɛ́kpakɔ̃ao, Pɔlu yã mɛ̀n do kàrańnɛ à pì: Yã kũ Luda Nini dà annabi Isayanɛ à ò á dizinɔnɛ bi yãpuramɛ, kũ à pì:

26Ǹ gɛ́ ǹ o gbɛ̃ kũ̀nɔnɛ,

onigɔ̃ sã kpá yãkemanaa sari,

onigɔ̃ gu gwa yãke'enaa sari.

27Ò nɛ̀sɛ vĩro de òsun ɔ̃ndɔ̃ kũro yãi,

ń sã gbãna de òsun yã maro yãi,

ń wɛ́ kukurɛna de òsun gu ero yãi,

zaakũ ò ye ò arɛ dɔma mà ń gba aafiaro.

28-29A yã mɛ́ à tò, àgɔ̃ dɔ̃ kũ Luda gbɛ̃nɔ zĩ̀ kũ surabana yão buri pãndenɔa. Mɔ́kɔ̃nɔmɛ oni sí.

30Pɔlu kɛ̀ kpɛ́ kũ àtɛn fĩna bo gũn wɛ̃̀ pla mámmam. Àdigɔ̃ gbɛ̃ kũ òdi su fàai bo kãaonɔ kũ ɔplapla ń pínki. 31À kpata kũ à bò Luda kĩnaa yã waazi kɛ̀ńnɛ à Dikiri Yesu Kirisi yã dàńnɛ kũ laakariio kpatɛna, gbɛ̃ke dí kpánɛro.

Currently Selected:

ZĨRINƆ 28: BB2005

Highlight

Copy