MAAKU 16

Yesu vunaa

(Mat 28:1-10; Luk 24:1-12; Yuh 20:1-10)

1Kámmabogɔrɔ lakanaao ɔkɔsi Mariama Magadalɛni kũ Mariama Yamisi dao kũ Salomɛo nísi gbĩ nna lù, de ò gɛ́ ò kú Yesu mɛ̀ɛa yãi. 2Azumanɛnna zĩ kɔnkɔkɔnkɔ ò bò òtɛn gɛ́ mira pì kĩnaa. 3Ò kɔ̃ là zɛ́n ò pì: Dí mɛ́ ani gbɛ̀ɛ kũ̀ gbigiri kɛ à gowɛrɛ mira lɛ́a sɔ̃ɔ? 4Zaakũ gbɛ̀ɛ pì zɔ̃kɔ̃ manamana. Kũ ò wɛ́ sɛ̀ ò gwà, akũ ò è ò gbɛ̀ɛ pì gbigiri kɛ̀ ò gò mira pì lɛ́a. 5Kũ ò gɛ̃̀ mira pìi gũn, akũ ò kɛfɛnna ke è vutɛna ɔplai à utagyaba pura dana. Akũ ò kɛ̀ gìri. 6À pìńnɛ: Àsun kɛ gìriro, Yesu Nazɛra kũ ò pà lían átɛn wɛtɛroo? À vù, à kú laro. À gu kũ ò a wùtɛn gwa, 7áni gɛ́ à o a ìbanɔnɛ kũ Pitao kũ àtɛn dońnɛ arɛ gɛna Galili. Gwen oni a en lákũ à òńnɛ nà. 8Òtɛn lukaluka, yã pìi bò ń sarɛ, akũ ò bò miran ò bàa lɛ̀. Odi yãke o gbɛ̃kenɛro kũ vĩna ń kũ yãi.

Yesu bo à suna a ìbanɔnɛ

(Mat 28:16-20; Luk 24:36-53; Yuh 20:11-23)

9Kũ Yesu fùtɛ azumanɛnna zĩ kɔnkɔkɔnkɔ, à a zĩda mɔ̀ Mariama Magadalɛninɛ káaku. Nɔgbɛ̃ pìi gũnn Yesu pɛ̀ tãna mɛ̀n supplanɔa. 10Akũ nɔgbɛ̃ pìi gɛ̀ɛ à ò gbɛ̃ kũ ò kú kãao yãnɔnɛ. Ń nɛ̀sɛɛ yakana òtɛn ɔ́ɔ dɔ. 11Kũ ò mà kũ Yesu kú kũ wɛ̃̀ndiio ari nɔgbɛ̃ pì a è kũ wɛ́o, odi síro.

12Abire gbɛra gɔrɔ kũ ń gbɛ̃nɔn planɔn tɛ́ zɛ́ gũn òtɛn gɛ́ wɛ̃tɛ gũn, à bò à sùḿma lán gbɛ̃ pãnde bà. 13Kũ ò ɛ̀ra ò sù, ò ò gbɛ̃ kparanɔnɛ, ama odi ń yã síro. 14Kũ à kɛ̀ saa à bò à sù a ìba gbɛ̃nɔn kuri awɛɛdonɔnɛ kũ òtɛn pɔ́ ble. Akũ à kpã̀kɛ̃ńyĩ ń sãgbãna yãi, zaakũ odi a náani kɛro akũsɔ̃ odi gbɛ̃ kũ ò a è à vùnɔ yã síro. 15Akũ à pìńnɛ: À gɛ́ andunia gu sĩnda pínkia à ma baaru nna kpá gbɛ̃nɔnɛ ń pínki. 16Gbɛ̃ kũ à sì akũ à da'itɛ kɛ̀ mɛ́ ani surabana le. Gbɛ̃ kũ adi sí sɔ̃ro, yã ni bo adenɛ vãni. 17Gbɛ̃ kũ ò baaruu pìi sìnɔ yãkɛnanɔn dí: Oni tãnanɔ goḿma kũ ma tɔ́o, oni yãke buri o. 18Oni mlɛ̃̀ sɛ́ kũ ɔo. Bee tó ò sɛwɛ mì, pɔ́ke ni ń lero. Oni ɔ na gyãrenɔa ò gbãna kũ.

Tana kũ Yesuo ludambɛ

(Luk 24:50-53; Zĩr 1:9-11)

19Kũ Dikiri Yesu yã òńnɛ à làka, akũ Luda a sɛ̀ à tà kãao musu, akũ à vùtɛ Luda ɔplai. 20Akũ a ìbaa pìnɔ gɛ̀ɛ ò waazi kɛ̀ gu sĩnda pínkia. Dikiri zĩ kɛ̀ kũńwo à a yã zĩni pɛ̀tɛ kũ daboyã kũ ò tɛ́inɔ.

Currently Selected:

MAAKU 16: BB2005

Highlight

Copy