LUKU 1
1
1Gbɛ̃nɔ ɔ kpà dasi, de ò yã kũ à kɛ̀ ó tɛ́ baba takada gũn zɛ́azɛa, 2lákũ gbɛ̃ kũ ò de yã pìi sèedadenɔ ũ kũ a baarukparinɔ òwɛrɛ nà zaa káaku. 3Tera sà makũ sɔ̃, lákũ ma wɛ́ pɛ̀ yã pìnɔi nà dodo zaa a naana, ma è à mana mà kɛ̃nnɛ zɛ́azɛa, ma gbɛ̃ bɛ̀ɛrɛde Tiofilu, 4de ǹ yã kũ ò dànnɛ sãnsãn dɔ̃.
Malaika gĩnakɛ à Yahaya Da'itɛkɛri ina yã'onaa
5Yudea bùsu kína Hɛrɔdu gɔrɔ sa'ori ke kun, a tɔ́n Zakari. À kú Abia sa'orinɔ gã̀a gũmmɛ. A nanɔ tɔ́n Ɛlizabɛti. Haruna burimɛ dɔ. 6Ń pla ń pínki mana Ludanɛ. Òdigɔ̃ kun taari sari, ò Dikiri doka kũ yã kũ à dìtɛnɔ kũna. 7Ama ò nɛ́ vĩro, zaakũ Ɛlizabɛti bi paramɛ, akũ ń gbɛ̃nɔn pla ń pínki zĩ kũ̀.
8Gɔrɔ kũ sa'onaa kà ń gã̀aa, Zakari mɛ́ àtɛn sa'ona Ludaa zĩ kɛ. 9Lákũ sa'orii pìnɔ dì kɛ nà, ò kàpaa kpà, akũ kàpa Zakari kũ̀ de à gɛ́ turaretiti kpata Dikiri kpɛ́n. 10Turaretitikpatana gɔrɔ pari kàkara kpɛ́lɛlɛa ń pínki, òtɛn adua kɛ. 11Akũ Dikiri malaikaa bò a sùa, à zɛ̀ turaretitikpataki ɔplai. 12Kũ Zakari a è, à kɛ̀ gìri, vĩna a kũ̀. 13Akũ malaikaa pìi pìnɛ: Ǹsun tó vĩna n kũro Zakari. Luda n wɛ́kɛ sì, n nanɔ Ɛlizabɛti ni nɛ́ i gɔ̃gbɛ̃ ũ, ǹ tɔ́ kpánɛ Yahaya. 14N pɔ ni kɛ nna, ǹ yáa dɔ, gbɛ̃nɔ ni pɔnna kɛ a ina yã musu dasi, 15zaakũ anigɔ̃ de Dikirinɛ gbɛ̃ zɔ̃kɔ̃ ũmɛ. Ani wɛ̃ ke í gbãna ke miro, Luda Nini nigɔ̃ kúa zaa a da gbɛrɛmmɛ. 16Ani tó Isarailanɔ arɛ dɔ Dikiri ń Ludaa dasi, 17ani do Dikirinɛ arɛ kũ Luda Nini gbãna kũ Iliasu vĩ yão. Ani tó denɔ lɛ́ kɛ do kũ ń nɛ́nɔ, ani tó sãyãmarisaridenɔ gbɛ̃ mananɔ ɔ̃ndɔ̃ sɛ́. Ani tó gbɛ̃nɔ gɔ̃ kú soru gũn Dikirinɛ.
18Akũ Zakari pì malaikaa pìinɛ: Deran mani yã pì yãpura dɔ̃ɔ? Zaakũ mare zĩkũnaan ma ũ, akũ ma nanɔ zĩ kũ̀ dɔ. 19Akũ malaikaa pìi wèa à pì: Makũmɛ Gibirilu ũ, madìgɔ̃ zɛna Luda arɛ. Àkũ mɛ́ à ma zĩ mà yã pì onnɛ, mà baaru nna pì kpánnɛ. 20Ǹ ma, n nɛ́nɛ ni natɛ, ĩni fɔ̃ ǹ yã oro ari yã pì gɛ́ kɛo, kũ ńdi ma yã kũ ani kɛ a gɔrɔa síro yãi. 21Gɔrɔ kũ̀a sɔ̃ òtɛn Zakari dã. A gìkɛnaa Luda kpɛ́n bò ń sarɛ. 22Kũ à bò, adi fɔ̃ à yã ò kũńworo, akũ ò dɔ̃̀ kũ à wɛ́gupu è Luda kpɛ́n. Lákũ a nɛ́nɛ nàtɛ nà, akũ àtɛn yã ońnɛ kũ ɔo. 23Kũ Zakari sa'ogɔrɔ pàpa, akũ à tà bɛ. 24Abire gbɛra a nanɔ Ɛlizabɛti nɔ̀ɔ sì, akũ à a zĩda ùtɛ ari mɔ sɔɔro à pì: 25Dikiri yã dí kɛ̀mɛnɛ, à ma wɛ̃nda gwà, à ma bo wé'iyãn.
Malaika gĩnakɛ à Yesu ina yã'onaa
26A mɔ suddode gũn Luda malaika Gibirilu zĩ̀ Galili lakutu kũ òdi pi Nazɛra gũn. 27À gɛ̀ɛ nɔkpare bũnu kũ a tɔ́n Mariama kĩnaa. À gɔ̃kpamma vĩ Dauda buri ũ. A tɔ́n Yusufu. 28Kũ malaikaa pìi gɛ̃̀ a kĩnaa, à pìnɛ: Fɔɔ arubarikade! Dikiri kú kũnwo. 29Mariama bídi kɛ̀ manamana yã pìia, à laasun lɛ̀ à pì: Fɔɔ bire mì de deraa? 30Akũ malaikaa pìi pìnɛ:
Mariama, ǹsun tó vĩna n kũro,
zaakũ Luda gbɛ̃kɛ kɛ̀nnɛmɛ.
31Ǹ ma! Ĩni nɔ̀ sí ǹ nɛ́ i gɔ̃gbɛ̃ ũ,
ǹ tɔ́ kpánɛ Yesu.
32Anigɔ̃ de gbɛ̃ zɔ̃kɔ̃ ũ,
oni a sísi Luda Musude Nɛ́.
Dikiri Luda ni a ká
a dizi Dauda kpatan,
33anigɔ̃ kí ble Yakubu burinɔa gɔrɔ sĩnda pínki,
a kíblena nigɔ̃ lakana vĩro.
34Akũ Mariama pì malaikaa pìinɛ: Mádi gɔ̃gbɛ̃ dɔ̃ zikiro, abirekũ ni sí kɛ deraa? 35Malaikaa wèa à pì:
Luda Nini ni summa,
Luda Musude gbãna ni danla.
Abire yãi nɛ́ kũ ĩni i pì kunna nigɔ̃ adona,
oni a sísi Luda Nɛ́.
36N danɛ Ɛlizabɛti nɛ́gɔ̃gbɛ̃ nɔ̀sina se a zĩkũnaa gũn. Nɔgbɛ̃ kũ ò dìtɛ para ũ pì kú kũ nɔ̀ mɔ suddoo tera. 37Zaakũ Luda kĩnaan pɔ́ sĩnda pínki dì sí kɛn. 38Akũ Mariama pì: Dikiri zɔ̀bleriin ma ũ. À kɛmɛnɛ lákũ n ò nà. Akũ malaikaa pìi tà à a tòn.
Mariama gɛna Ɛlizabɛti kĩnaa
39Gɔrɔ kũ̀a Mariama fùtɛ à gɛ̀ɛ lakutu kũ à kú Yudea bùsu gusĩsĩden gɔ̃̀nɔ. 40À gɛ̀ɛ Zakari bɛa, akũ à fɔ kpà Ɛlizabɛtia. 41Kũ Ɛlizabɛti Mariama fɔɔ pìi mà, a nɛ́ vĩ̀ a gbɛrɛ gũn, akũ Luda Nini sù Ɛlizabɛtia, 42à wiki gbãna lɛ̀ à pì: Arubarikademɛ n ũ de nɔgbɛ̃ sĩnda pínkila. Arubarikaden nɛ́ kũ à kú n gbɛrɛn ũ dɔ. 43Bɔ́n ma ũ, kũ ma Dikiri da sù ma gwaa? 44Gɔrɔ kũ ma n fɔkpammanaa mà dé, nɛ́ kũ à kú ma gbɛrɛn vĩ̀ kũ pɔnnaomɛ. 45Arubarikademɛ n ũ, mɔkɔ̃n kũ n yã kũ Dikiri ònnɛ sì, kũ ani kɛ.
Mariama Dikiri tɔ́ sɛna lei
46Akũ Mariama pì:
Matɛn Dikiri tɔ́ sɛ́ lei ma swɛ̃̀ɛ gũn,
47ma pɔ tɛn kɛ nna
Luda ma Surabariia,
48zaakũ à ma yã dà,
makũ a zɔ̀bleri kũ mádi ká pɔ́ke ũro.
Zaa tera ari gɔrɔ sĩnda pínki oni pimɛnɛ arubarikademɛ,
49zaakũ Luda gbãnade yã zɔ̃kɔ̃ɔ kɛ̀mɛnɛ.
A tɔ́ kú adona.
50Àdi wɛ̃nda dɔ̃ gbɛ̃ kũ òdi a vĩna kɛnɔnɛ
ari ń buria.
51À a gã̀a pòro, à a gbãna mɔ̀ńnɛ,
à zĩdabirinɔ fã̀kɔ̃a kũ ń laasunnɔ.
52À gbãnadenɔ bò kpatan,
à talakanɔ sɛ̀ lei.
53À pɔ mananɔ kpà nàdɛrinɔa ò kã̀,
ama à ɔgɔdenɔ gbàrɛ ɔkori.
54À kpà a zɔ̀bleri Isarailanɔi,
ń yã dí sãaguro.
55À wɛ̃nda dɔ̃̀ Ibrahĩnɛ kũ a buri pìnɔ
lákũ à ò ó dizinɔnɛ nà.
56Mariama vùtɛ kũ Ɛlizabɛtio lán mɔ aakɔ̃ bà, akũ à ɛ̀ra bɛ.
Yahaya Da'itɛkɛri inaa
57Ɛlizabɛti nɛ́'igɔrɔ kà, akũ à nɛ́ ì gɔ̃gbɛ̃ ũ. 58Kũ a fárandidenɔ kũ a danɛnɔ mà lákũ Dikiri a wɛ̃nda gwà nà, ò pɔnna kɛ̀ kãao. 59A gɔrɔ sɔraakɔ̃de zĩ ò sù tɔ̃̀ zɔ̃ nɛ́ pìinɛ, de ò a de Zakari tɔ́ kpánɛ, 60akũ a da pì: Oi! Oni a sísi Yahayamɛ. 61Ò pìnɛ: Gbɛ̃ke kú n danɛnɔ tɛ́ kũ à tɔ́ bire vĩro. 62Akũ ò yã ò a denɛ kũ ɔo, de ò dɔ̃ deran à ye ò tɔ́ kpánɛ nà. 63Zakari anlo gbɛ̀ka, akũ à kɛ̃̀a: A tɔ́n Yahaya. Yã pìi bò ń sarɛ ń pínki. 64Gwe gɔ̃̀nɔ a nɛ́nɛ sɛ̀ lei, à lɛ́ bò àtɛn yã o, àtɛn Luda sáabu kpá. 65Akũ vĩna ń fárandidenɔ kũ̀ ń pínki, akũ Yudea bùsu gusĩsĩde gbɛ̃nɔ tɛn yã pì o ń pínki. 66Akũ gbɛ̃ kũ ò yã pìi mànɔ kũna ń nɛ̀sɛɛ gũn ò pì: Bɔ́n nɛ́ pì nigɔ̃ de a ũ ziaa? Zaakũ Dikiri ɔ kúa.
Zakari annabikɛyã'onaa
67Luda Nini sù a de Zakaria, akũ à annabikɛyã ò à pì:
68Ò Dikiri Isarailanɔ Luda sáabu kpá!
À sù à a gbɛ̃nɔ bò.
69À Surabari gbãnade bòwɛrɛ
a zɔ̀bleri Dauda buri tɛ́,
70lákũ à ò a annabinɔ gãi nà zaa gìkɛna.
71Ò pì ani ó sí ó ibɛrɛnɔa,
ani ó bo gbɛ̃ kũ ò zã̀ógu pìnɔ ɔĩ.
72Lɛmɛ à ó dizinɔ wɛ̃nda gwà lɛ,
a bàka kunna kũńwo yã dí sãaguro.
73À la dà ó dizi Ibrahĩnɛ
74à pì áni ó bo ó ibɛrɛnɔ ɔĩ,
áni ó gba zɛ́ ò doarɛ vĩna sari,
75de ó kunna gɔ̃nɛ adona gbɛ̃ mananɔ ũ
ari ó wɛ̃̀ndi lɛ́n.
76Mɔkɔ̃n sɔ̃ ma nɛ́,
oni n sísi Luda Musude annabii,
zaakũ mɔkɔ̃n mɛ́ ĩni do Dikirinɛ arɛ ǹ zɛ́ kɛkɛnɛ.
77Ĩni tó a gbɛ̃nɔ dɔ̃ lákũ ani ń sura ba nà,
lákũ ani ń durunnanɔ kɛ̃ḿma nà.
78Zaakũ ó Luda sùru vĩ,
bonaa musu ani su ó gwa lán gudɔnaa bà,
79de à gu pu gbɛ̃ kũ ò kú gusira gũnnɔnɛ
kũ gbɛ̃ kũ ò kú ga lɛ́inɔ,
de à ó gbá da aafia zɛ́n.
80Nɛ́ pì zɔ̃kɔ̃ kũ̀, à gɔ̃̀ kãgbãnade ũ. A kú gbárannan ari gɔrɔ kũ à bò Isarailanɔnɛ gupuraa.
Currently Selected:
LUKU 1: BB2005
Highlight
Share
Copy
Want to have your highlights saved across all your devices? Sign up or sign in
Bisã Bible © SIM International, 2005.
