MAAKU 14

Lɛ́kpakũsũna Yesui

(Mat 26:1-5; Luk 22:1-2; Yuh 11:45-53)

1Vĩnla dikpɛ kũ Burodi Futɛnasari dikpɛo gɔ̃̀ gɔrɔ pla, akũ sa'orikinɔ kũ ludayãdannɛrinɔ tɛn zɛ́ wɛtɛ kũ ɔ̃ndɔ̃o ò Yesu kũ ò dɛ. 2Zaakũ ò pì: Òsun kɛ dikpɛ zĩro, de gbɛ̃nɔ sún zuka káro yãi.

Nísi gbĩ nna kuna Yesu mìia

(Mat 26:6-13; Yuh 12:1-8)

3Gɔrɔ kũ Yesu kú Bɛtani, Simɔ kusu bɛa, àtɛn pɔ́ ble gɛngɛsɛkɛna, akũ nɔgbɛ̃ ke nài a lo fítinna kũ nísi gbĩ nna buri mana ɔgɔde kú a gũn kũna. Akũ à lo pì wakaa ɛ̀, à nísi pìi kù Yesu mìia. 4Gbɛ̃kenɔ kú gwe, ń pɔ fùtɛ ò pì: Bɔ́mɛ nísi pì laalasekɛna ũu? 5Oni fɔ̃ ò yía de andurufu wàa do kpɛ́ basɔɔrola ò a ɔgɔ kpá takasidenɔa. Akũ ò lɛ́fɔtɔ kpà nɔgbɛ̃ pìii. 6Akũ Yesu pì: À a tó gwe. Bɔ́ yã mɛ́ à tò átɛn wari dɔaa? À zĩ mana kɛ̀mɛnɛmɛ. 7Takasidenɔ nigɔ̃ kú kãáo gɔrɔ sĩnda pínki, gɔrɔ kũ á yei, áni fɔ̃ à kɛńnɛ. Makũ sɔ̃ manigɔ̃ kú kãáo gɔrɔ sĩnda pínkiro. 8À kɛ̀ a gbãna lɛ́mmɛ, à gĩnakɛ à nísi kù ma mɛ̀ɛa de à ma gɛ̀ kɛomɛ. 9Yãpuran matɛn oárɛ, gu kũ òtɛni ma baaru nna waazi kɛn andunia gũn pínki, onigɔ̃ yã kũ nɔgbɛ̃ pìi kɛ̀ o a dɔngu yãi.

Yudasi bona Yesu kpɛ

(Mat 26:14-16; Luk 22:3-6)

10Abire gbɛra gbɛ̃nɔn kuri awɛɛplanɔ do kũ òdi pinɛ Yudasi Isikariɔti gɛ̀ɛ sa'orikinɔ kĩnaa de à Yesu kpáḿma. 11Kũ ò a yã mà, akũ ń pɔ kɛ̀ nna, akũ ò lɛ́ sɛ̀nɛ kũ oni ɔgɔ kpáa. Akũ àtɛn zɛ́ wɛtɛ à Yesu kpáḿma.

Vĩnla pɔ́ble kɛkɛnaa

(Mat 26:17-25; Luk 22:7-14, 21-23; Yuh 13:21-30)

12Burodi Futɛnasari dikpɛgɔrɔ káaku zĩ kũ òdi Vĩnla sãnɛ bɔ̀rɔɔ kùtu kpá, Yesu ìbanɔ a là ò pìnɛ: Mán ń ye ò gɛ́ kɛkɛnnɛ ǹ Vĩnla pɔ́ blenn? 13Yesu gbɛ̃nɔn pla zĩ̀ a ìbanɔ tɛ́ à pìńnɛ: À gɛ́ wɛ̃tɛ gũn. Gɔ̃gbɛ̃ ke ni daálɛ à í sɛna kũ loo. À tɛ́i 14ari ɔn kũ ani gɛ̃n. À o ɔn pì bedenɛ, dannɛri pì mán a kipaki kunn, gu kũ áni Vĩnla pɔ́ blen kũ a ìbanɔo? 15Ani kpɛ́ musu zɔ̃kɔ̃ kũ ò kɛ̀kɛ mɔárɛ. À pɔ́bleyã kɛkɛwɛrɛ gwe. 16Yesu ìbaa pìnɔ dà zɛ́n, ò gɛ̃̀ wɛ̃tɛ pìi gũn, akũ ò lè lákũ à òńnɛ nà. Akũ ò Vĩnla pɔ́bleyã kɛ̀kɛ gwe.

17Kũ ɔkɔsi kɛ̀, akũ Yesu gɛ̀ɛ gwe kũ a gbɛ̃nɔn kuri awɛɛpla pìnɔ. 18Kũ ò gɛngɛsɛkɛna òtɛn pɔ́ ble, akũ à pì: Yãpuran matɛn oárɛ, á gbɛ̃ mɛ̀n do kũ ótɛn pɔ́ ble lɛɛlɛ ni ma kpáḿma. 19Ń nɛ̀sɛɛ yàka, akũ òtɛni a la dodo: Asa makũroo? 20Akũ à pìńnɛ: Á gbɛ̃nɔn kuri awɛɛplanɔ do kũ ótɛn pɔ́ ble ta gũn lɛɛlɛmɛ. 21Bisãsiri Nɛ́ ni kpágui lákũ a kɛ̃na a yã musu nà, ama waiyoo gbɛ̃ kũ ani Bisãsiri Nɛ́ kpáḿma pìi. Ani kɛ sã̀na adenɛ tó odi a i yãro.

Dikiri pɔ́ble

(Mat 26:26-30; Luk 22:14-20; 1Kɔ 11:23-25)

22Kũ òtɛn pɔ́ ble, Yesu burodii sɛ̀ à arubarikaa dàn, akũ à lìkɔ̃rɛ à kpà a ìbanɔa à pì: À sí, ma mɛ̀ɛn dí. 23Akũ à toko sɛ̀ à arubarikaa dàn à kpàḿma, akũ ò mì ń pínki. 24Akũ à pìńnɛ: Ma arun yɛ̀, Luda bàka kunna kũ gbɛ̃ dasinɔ aru ũ kũ ani bɔtɛma. 25Yãpuran matɛn oárɛ, mani geepi'i mi gĩa doro ari kpata kũ à bò Luda kĩnaa gɛ́ boo gupuraa, gbasa mà a dufu mi sà. 26Kũ ò lɛ̀ɛ sì, akũ ò bɔ̀tɛ ò gɛ̀ɛ Kùkpɛ sĩ̀sĩgɛrɛɛi.

Yesu gĩnakɛ à dɔ̃ yã kũ Pita ni kɛ

(Mat 26:31-35; Luk 22:31-34; Yuh 13:36-38)

27Akũ Yesu pìńnɛ: Á pínki áni fuma, zaakũ ò kɛ̃̀ Luda yãn ò pì: Mani sãdãri lɛ́, sãnɔ ni fãkɔ̃a. 28Ama ma vunaa gbɛra mani doárɛ arɛ gɛna Galili. 29Akũ Pita pìnɛ: Bee tó ò fù ń pínki, mani furo. 30Akũ Yesu pìnɛ: Yãpuran matɛn onnɛ, gwãaniala ari ko gɔ̃ gɛ́ lɛ́ zu gɛ̃̀n pla, ĩni ledi kpámai gɛ̃̀n aakɔ̃. 31Akũ Pita pì mámmam: Bee tó mani sù mà ga kũnwo, mani ledi kpányĩ zikiro. Akũ ò ò lɛ se ń pínki.

Yesu aduakɛna zaa Gɛtɛsɛmani

(Mat 26:36-46; Luk 22:39-46)

32Ò kà gu kũ òdi pi Gɛtɛsɛmani, akũ Yesu pì a ìbanɔnɛ: À vutɛ la ari mà gɛ́ adua kɛ. 33À Pita kũ Yamisio kũ Yuhanao sɛ̀ à gɛ̀ɛ kũńwo. Pɔsira a kũ̀ a nɛ̀sɛyɔkɔ sì. 34Akũ à pìńnɛ: Ma pɔ sira kũ̀ manamana ari ga lɛ́i. À zɛ la à ibɛ̃nɛ kɛ. 35Kũ à gɛ̀ɛ arɛ fíti, akũ à kùtɛ zĩtɛ à adua kɛ̀ tó ani sí kɛ, gɔrɔ zakaa pì gɛ̃tɛala. 36À pì: Baa, ma De, pɔ́ sĩnda pínki dì sí kɛnnɛ. Ǹ toko'i dí síma, ama adi kɛ yã kũ má yeinlo, sé kũ ń yeii. 37Akũ à ɛ̀ra à sù à a ìbanɔ lè, òtɛn i o. Akũ à pì Pitanɛ: Simɔ, ntɛni i on yá? Ńdi fɔ̃ n ibɛ̃nɛ kɛ̀ bee awa doroo? 38À ibɛ̃nɛ kɛ àgɔ̃ adua kɛ de àsun fu yɔ̃ogwanaaaro yãi. Nini yei, ama mɛ̀ busɛ. 39À ɛ̀ra à gɛ̀ɛ adua kɛ, akũ à yã dokɔ̃nɔ pìi ò dɔ. 40Kũ à ɛ̀ra à sù à ń lé, òtɛn i o, zaakũ òtɛn idekũ dɛdɛ. Ò dɔ̃ deran oni yã onɛ nàro. 41A suna gɛ̃̀n aakɔ̃deo à pìńnɛ: Átɛn i o átɛn kámma bo ari teran yá? À mɔ̀ lɛ. Gɔrɔ kà sà. À gwa, ò Bisãsiri Nɛ́ kpà durunnakɛrinɔa. 42À futɛ ò gɛ́. Gbɛ̃ kũ à ma kpaḿma pì tɛn su fá.

Yesu kũnaa

(Mat 26:47-56; Luk 22:47-53; Yuh 18:3-12)

43Kũ à kpɛ́ àtɛn yã pì o, akũ Yudasi a ìba gbɛ̃nɔn kuri awɛɛplanɔ doke sù kũ pario, ò fɛ̃nɛdanɔ kũkũna kũ gònɔ. Ò bò sa'orikinɔ kũ ludayãdannɛrinɔ kũ gbɛ̃ zɔ̃kɔ̃nɔ kĩnaa. 44Bonkpɛde pì sɔ̃ à sèedaa òńnɛ à pì: Gbɛ̃ kũ mani lɛ́ pɛ́a, àkũn dí. À a kũ gbãna à tá kãao. 45Akũ à mìi pɛ̀ Yesua gɔ̃̀nɔ à pìnɛ: Rabi! Akũ à lɛ́ pɛ̀a. 46Akũ ò ɔ pɛ̀tɛ Yesua ò a kũ̀ gíngin. 47Akũ gbɛ̃ kũ ò zɛna gwenɔ doke a fɛ̃nɛda wòto à sa'oriki zĩ̀ri ke lɛ̀o à a sã gò. 48Akũ Yesu pìńnɛ: Kpãni wɛ́dewɛn ma ũ kũ a su à ma kũ kũ fɛ̃nɛdanɔ kũ gònɔo yá? 49Madìgɔ̃ kú kãáo Luda ɔnn lákũ gu dìgɔ̃ dɔ nà, madìgɔ̃ yã daárɛ, ádi ma kũro. Ama sé yã kũ ò kɛ̃̀ Luda yãn papa. 50Akũ a ìbanɔ bàa lɛ̀ ń pínki ò a tòn.

51Kɛfɛnna ke tɛ́i à pɔ́ke danaro, bizatarun à kùala. Kũ ò a kũ̀, 52akũ à bò ń ɔĩ à a biza tòńnɛ gwe à bàa sì à tà punsi.

Yuda gbãnadenɔ yãpatɛkɛna kũ Yesuo

(Mat 26:57-68; Luk 22:54-55, 63-71; Yuh 18:13-14, 19-24)

53Akũ ò gɛ̀ɛ kũ Yesuo sa'oriki zɔ̃kɔ̃ bɛa. Sa'orikinɔ kũ gbɛ̃ zɔ̃kɔ̃nɔ kũ ludayãdannɛrinɔ kàkara gwe ń pínki. 54Pita tɛ́ a kpɛ zã̀ dire ari à gɛ̀ɛ à gɛ̃̀ sa'oriki zɔ̃kɔ̃ bɛ ɔnn. À vùtɛ gwe àtɛn tɛ́ kpákpa kũ dogarinɔ lɛɛlɛ. 55Sa'orikinɔ kũ Yuda yãkpatɛkɛrinɔ ń pínki tɛn sèeda wɛtɛ Yesui ò a dɛ, akũ odi a lero. 56Ò ɛ́kɛyã dìdia dasi, ama ń yãke dí kɔ̃ sɛ́ro. 57Akũ gbɛ̃kenɔ fùtɛ ò ɛ́kɛyã dìdia ò pì: 58O mà à pì áni Luda kpɛ́ kũ bisãsiri bò wí áni a pãnde bo gɔrɔ aakɔ̃ dagura kũ bisãsiri dí boro. 59Bee kũ abireo ń yã dí kɔ̃ sɛ́ro. 60Akũ sa'oriki zɔ̃kɔ̃ɔ fùtɛ à zɛ̀ ń arɛ à Yesu gbɛ̀ka: Ń yãke vĩ ǹ weḿmaroo? Yã kũ òtɛn didimma dí de deraa? 61Yesu yĩtɛ kpɛ̃n adi yãke wearo, akũ sa'oriki zɔ̃kɔ̃ɔ pìi ɛ̀ra à a gbɛ̀ka: Mɔkɔ̃n Arumasihu, Luda arubarikade Nɛ́ ũ yá? 62Akũ Yesu pì: Makũmɛ a ũ. Áni Bisãsiri Nɛ́ e vutɛna Gbãnasĩndapinkide ɔplai, akũsɔ̃ áni a suna e ludambɛ lukun. 63Akũ sa'oriki zɔ̃kɔ̃ɔ pì a utanɔ gà à kɛ̃̀ à pì: À kɛ̀ dera ótɛn sèedade pãnde kenɔ wɛtɛ dɔɔ? 64A mà lákũ à dɔkɛ̀ kũ Ludao nà. Yã kpaten a zɛo teraa? Akũ ò yã dàala ń pínki ò pì ò a dɛ. 65Akũ gbɛ̃kenɔ fùtɛ ò lɛ́'i kàa. Akũ ò pɔ́ yĩ̀nɛ a ãnnwa, òtɛni a lɛ́lɛ kũ okũo òtɛn pinɛ: Ǹ annabikɛyã o ǹ gbɛ̃ kũ à n lɛ o. Akũ dogarinɔ a kũ̀ ò a sãn kɛ̀kɛ.

Pita ledikpana Yesui

(Mat 26:69-75; Luk 22:56-62; Yuh 18:15-18, 25-27)

66Pita kú ɔnn zĩtɛ, akũ sa'oriki zɔ̃kɔ̃ɔ zɔ̀nɔkparenɔ doke sù gwe. 67Kũ à Pita è àtɛn tɛ́ kpákpa, akũ à wɛ́ dìa à pìnɛ: Mɔkɔ̃n sɔ̃ ndìgɔ̃ kú lɛɛlɛ kũ Yesu Nazɛrao. 68Akũ à ledi kpà à pì: Má a dɔ̃ro, mádi yã kũ ntɛni o dɔ̀rɔ dɔ̃ro. Akũ à fùtɛ à gɛ̃̀ gãnun. 69Kũ zɔ̀nɔkpare pì a è gwe dɔ, akũ à ò gbɛ̃ kũ ò zɛna gwenɔnɛ à pì: Ń gbɛ̃ mɛ̀n don dí. 70Akũ Pita ledi kpà dɔ. Kũ à kɛ̀ saa fíti, gbɛ̃ kũ ò zɛna gwenɔ pì Pitanɛ: Yãpuramɛ ń gbɛ̃ domɛ n ũ, zaakũ Galili gbɛ̃mɛ n ũ. 71Akũ Pita fùtɛ à a zĩda kà à la dà à pì: Má gbɛ̃ kũ átɛni a yã o pì dɔ̃ro. 72Zaa gwe gɔ̃̀nɔ ko lɛ́ gɛ̃̀n plade zù, akũ yã kũ Yesu òo dɔ̀ Pitan, kũ à pì, ari ko gɔ̃ gɛ́ lɛ́ zu gɛ̃̀n pla, ani ledi kpáai gɛ̃̀n aakɔ̃. Akũ à nà ɔ́ɔdɔnaaa.

Currently Selected:

MAAKU 14: BB2005

Highlight

Copy