MAAKU 13

Yurusalɛmu yakana kũ andunialakagɔrɔ sèedanɔ

(Mat 24:1-22; Luk 21:5-24)

1Lákũ Yesu tɛn bo Luda ɔnn nà, a ìbanɔ doke pìnɛ: Dannɛri, ǹ gwa lákũ ò kpɛ́ mana dí takanɔ bò nà kũ gbɛ̀ mana dí takanɔ. 2Akũ Yesu pìnɛ: N kpɛ́ zɔ̃kɔ̃ dínɔ è pínki yá? Gbɛ̀ ke kú gu dí kũ oni tó dikɔ̃aro, oni gboro pínkimɛ.

3Yesu vutɛna Kùkpɛ sĩ̀sĩgɛrɛɛi arɛdɔkɔ̃ana kũ Luda ɔnnwo, akũ Pita kũ Yamisio kũ Yuhanao kũ Anduruo a gbɛ̀ka gusarɛ ò pì: 4Ǹ owɛrɛ, bɔrɛn yã dínɔ ni kɛɛ? Bɔ́ mɛ́ anigɔ̃ de a pínki kɛgɔrɔ sèeda ũu? 5Akũ Yesu pìńnɛ: À laakari kɛ, àsun tó ò á sãtɛro. 6Oni su dasi kũ ma tɔ́o, onigɔ̃ pi Arumasihumɛ ń ũ oni gbɛ̃nɔ sãtɛ dasi. 7Tó a zĩ̀nɔ baaruu mà kũ a òpiio, àsun bídi kɛro. Sé abirekũnɔ kɛ, ama andunia lakana kpɛ́. 8Buri kũ burio ni futɛkɔ̃i, lɛmɛ dɔ bùsu kũ bùsuuo. Zĩtɛ yĩgãyĩgãna nigɔ̃ kú gukenɔn kũ nàao. Yã dínɔmɛ nɔ̀wãwã naana ũ.

9À laakari kɛ. Oni á kũkũ ò á na yãkpatɛkɛrinɔnɛ ń ɔĩ, oni á gbɛ̃gbɛ̃ aduakɛkpɛnɔ gũn. Oni á zɛ bùsu gbɛ̃ zɔ̃kɔ̃nɔ kũ kínanɔ arɛ ma yãi, de àgɔ̃ deńnɛ ma sèedadenɔ ũ. 10Sé ò ma baaru nna waazi kɛ buri pínki ma gĩa. 11Tó ò gɛ̀ɛ kãáo yãkpatɛkɛkia, àsun gĩnakɛ à bídi kɛ yã kũ áni oaro. Yã kũ Luda dàárɛ á lɛ́n gɔrɔ kũ̀a à o, zaakũ ákɔ̃nɔ mɛ́ áni yã oro, Luda Ninimɛ. 12Vĩ̀ni kũ dakũnanɔ ni kɔ̃ kpáḿma ò dɛ. Denɔ ni bo ń nɛ́nɔ kpɛ. Nɛ́nɔ ni bo ń denɔ kũ ń danɔ kpɛ ò ń dɛ. 13Gbɛ̃ sĩnda pínki ni zãágu ma yãi, ama gbɛ̃ kũ à zɛna gbãna ari a gɔrɔ lɛ́a ni surabana le.

14Tó a tɛ̃̀ guyakari è gu kũ à de àgɔ̃ kunlo, kyókɛri gɔ̃ dɔ̃, gbɛ̃ kũ ò kú Yudeanɔ bàa sí ò mì pɛ́ kpinɔa. 15Gbɛ̃ kũ à kú a kpɛ́ musu sún kipa à gɛ̃ kpɛ́ gũn à pɔ́ke sɛ́ à booro. 16Gbɛ̃ kũ à kú bura sún ɛra bɛ à a uta sɛ́ro. 17Waiyoo nɔ̀sindarenɔ kũ nɛ́randenɔ gɔrɔ birea. 18À adua kɛ de yã pì sún kɛ bunsirɛ gɔrɔro, 19zaakũ wɛ́tãmma nigɔ̃ kun gɔrɔ pìnɔa. Zaa gɔrɔ kũ Luda andunia kɛ̀ ari gbãra a taka dí kɛro, ani sɔ̃ kɛ zikiro. 20Tó Dikiri dí gɔrɔ pìnɔ lagoro, de gbɛ̃ke ni boro. Ama à gɔrɔ pìnɔ làgo a gbɛ̃ kũ à ń sɛ́nɔ yãimɛ.

Bisãsiri Nɛ́ sunaa

(Mat 24:23-44; Luk 21:25-38)

21Gɔrɔ birea tó gbɛ̃ke pìárɛ, à Arumasihu gwa la kesɔ̃ à Arumasihu gwa zã̀ dire, àsun síro. 22Zaakũ Arumasihu ɛ́kɛnɔ kũ annabi ɛ́kɛnɔ ni su ò sèedanɔ kũ daboyãnɔ kɛ, de ò gbɛ̃ kũ Luda ń sɛ́nɔ sãtɛo, tó ani sí kɛ. 23À laakari kɛ. Ma gĩnakɛ ma yã pínki òárɛ zaa káaku kɔ̀.

24Gɔrɔ pìnɔ wɛ́tãmmanaa gbɛra ifãntɛ̃ ni sira kũ, mɔvura ni í kɛro, 25susunɛnɔ ni woro ludambɛ, gbãna kũ ò kú musunɔ ni yĩgã, 26gbasa ò Bisãsiri Nɛ́ suna e ludambɛ lukun kũ gbãna zɔ̃kɔ̃ɔo kũ gakurio. 27Ani a malaikanɔ zĩ andunia kusuru siikɔ̃ gũn, de ò gbɛ̃ kũ Luda ń sɛ́nɔ kakara zaa andunia lɛ́ díkũ kũ a lɛ́ direkũo.

28À yã dada kaka lía. Tó a ɔnɛnɔ í kpàkpa àtɛn lá bɔ̀tɔ kú, á dɔ̃ kũ guwãnagɔrɔ kà kãni. 29Lɛmɛ sɔ̃, tó a è yã pìnɔ tɛn kɛ, àgɔ̃ dɔ̃ kũ a sunaa kà kãni, à kú kpɛ́lɛlɛa. 30Yãpuran matɛn oárɛ gɔrɔ dí gbɛ̃nɔ ni gɛ̃tɛro ari yã pìnɔ gɛ́ kɛo pínki. 31Musu kũ zĩtɛo ni gɛ̃tɛ, ama ma yãnɔn gɛ̃tɛna vĩro. 32Gbɛ̃ke a gɔrɔ ke a gɔrɔ zaka dɔ̃ro, bee malaika kũ ò kú musunɔ ke Luda Nɛ́, sé De Luda.

33À laakari kɛ, á wɛ́ gɔ̃ dɔ, zaakũ á dɔ̃ gɔrɔ kũ ani suro. 34A de lán gbɛ̃ kũ àtɛn gɛ́ wɛ̃tɛa bà. À a bɛ tò a zĩkɛrinɔnɛ baadi kũ a zĩo, akũ à pì a gudãkpãriinɛ á wɛ́ gɔ̃ dɔ. 35Ákɔ̃nɔ sɔ̃, á dɔ̃ gɔrɔ kũ bede ni suro, ɔkɔsin yá, lizãndon yá, kolɛzuon yá, ke gudɔo. A yã mɛ́ à tò á wɛ́ gɔ̃ dɔ, 36de àsun su kãnto à á le átɛn i oro yãi. 37Yã kũ matɛn oárɛ matɛn o gbɛ̃ sĩnda pínkinɛmɛ, à wɛ́ gɔ̃ dɔ.

Currently Selected:

MAAKU 13: BB2005

Highlight

Copy