LUKU 6

Kámmabogɔrɔ yã

(Mat 12:1-14; Maa 2:23-3:6)

1Kámmabogɔrɔ zĩ kea Yesu tɛn pã buranɔla, akũ a ìbanɔ pɔ́blewɛ wòro ò sùkã ń ɔn, òtɛn só. 2Akũ Farisi kenɔ pìńnɛ: Bɔ́yãi átɛn yã kũ à de òdi kɛ kámmabogɔrɔ zĩro kɛɛ? 3Yesu wèḿma à pì: Ádi a kyó kɛ a è lákũ Dauda kũ a gbɛ̃nɔ kɛ̀ nà gɔrɔ kũ nà tɛni ń dɛroo? 4À gɛ̃̀ Luda ɔnn, à burodi kũ ò kàtɛ Ludanɛɛ sɛ̀ à sò, à kpà a gbɛ̃nɔa, burodi kũ gbɛ̃ke a sona zɛ́ vĩro, sé sa'orinɔ. 5Akũ Yesu pìńnɛ: Bisãsiri Nɛ́ mɛ́ à iko vĩ kámmabogɔrɔa.

6Kámmabogɔrɔ pãnde zĩ dɔ Yesu gɛ̃̀ aduakɛkpɛn, àtɛn yã dańnɛ. Gɔ̃gbɛ̃ ke kú gwe, a ɔpla íbana. 7Ludayãdannɛrinɔ kũ Farisinɔ tɛn Yesu tàasi ká, tó ani a werekɔ̃a kámmabogɔrɔ zĩ, de ò yã le ò dia. 8À ń laasun dɔ̃̀, akũ à pì gbɛ̃ kũ a ɔ íbanaa pìinɛ: Ǹ futɛ ǹ zɛ zàa gũn. Kũ à fùtɛ à zɛ̀ gwe, 9akũ Yesu pìńnɛ: Matɛni á lámɛ. À zɛ́ vĩ ò yã mana kɛ kámmabogɔrɔ zĩ yá, ke a vãni? Ò gbɛ̃ mì sín yá, ke ò a dɛmɛ? 10Yesu ń gwá à lìkańyĩ, akũ à pì gɔ̃gbɛ̃ pìinɛ: Ǹ n ɔ pìi poro. Kũ à pòro, akũ a ɔ kɛ̀ a gbɛ̀n. 11Farisinɔ pɔ fɛ̃̀ manamana, akũ ò lɛ́ kpàkũsũ Yesui, deran oni kɛnɛ nà.

Zĩ̀ri gbɛ̃nɔn kuri awɛɛplanɔ ditɛnaa

(Mat 10:1-4; Maa 3:13-19)

12Gɔrɔ birea Yesu bò à gɛ̀ɛ adua kɛ sĩ̀sĩgɛrɛɛi, akũ à wɛ́ kɛ̀ Ludaa gwãani ari gu gɛ̀ɛ dɔo. 13Kũ gu dɔ̀, akũ à a ìbanɔ sìsiai, à gbɛ̃nɔn kuri awɛɛplanɔ bò ń tɛ́, à ń dítɛ zĩ̀rinɔ ũ. 14Gbɛ̃ pìnɔ tɔ́n dí: Simɔ kũ à tɔ́ kpànɛ Pita, a dakũna Anduru, Yamisi, Yuhana, Filipi, Batɔlɔmiu, 15Matiu, Tomasi, Alafeu nɛ́ Yamisi, Simɔ kũ òdi pinɛ Kokaride, 16Yamisi nɛ́ Yudasi kũ Yudasi Isikariɔti kũ à gɔ̃̀ bonkpɛde ũo.

Yesu yãdannɛna Galili

(Mat 4:23-25)

17Yesu kìpa kũńwo, à zɛ̀ gusaraa, gu kũ a ìba kparanɔ kũ gbɛ̃ pario kún. Ò bò Yurusalɛmu kũ Yudea bùsuuo pínki kũ ísiralɛ wɛ̃tɛ kũ ò kú Taya kũ Sidɔ̃o sarɛnɔ. 18Ò sù a yã ma, de à ń werekɔ̃a kũ ń gyãnɔ dɔ. Gbɛ̃ kũ tãna tɛn wari dɔḿmanɔ aafiaa lè dɔ. 19Gbɛ̃ sĩnda pínki tɛn wɛtɛ à ɔ naa, zaakũ gbãna tɛn bo a gũn, àtɛn gbɛ̃ sĩnda pínki werekɔ̃amɛ.

Arubarikadenɔmɛ Yesu ìbanɔ ũ

(Mat 5:1-12)

20Akũ à wɛ́ sɛ̀ à a ìbanɔ gwà à pì:

Arubarikadenɔmɛ ákɔ̃nɔ takasidenɔ ũ,

zaakũ kpata kũ à bò Luda kĩnaa de á pɔ́ ũ.

21Arubarikadenɔmɛ ákɔ̃nɔ kũ nà tɛni á dɛ teranɔ ũ,

zaakũ áni kã.

Arubarikadenɔmɛ ákɔ̃nɔ kũ átɛn ɔ́ɔ dɔ teranɔ ũ,

zaakũ áni yáa dɔ.

22Arubarikadenɔmɛ á ũ,

tó ò zã̀águ, tó ò gìái, tó ò á sɔ̃sɔ̃,

tó ò á tɔ́ vãni sìsi Bisãsiri Nɛ́ yãi.

23Gɔrɔ kũ yã birenɔ á lé, à pɔnna kɛ à vĩvĩ kũ pɔnnao, zaakũ á láada zɔ̃kɔ̃ ludambɛ. Lɛn ń dizinɔ kɛ̀ annabinɔnɛ lɛ.

24Waiyoo ákɔ̃nɔ ɔgɔdenɔ,

a gĩnakɛ a á mɛ̀nnamanaa è kɔ̀.

25Waiyoo ákɔ̃nɔ kũ á kãna teranɔ,

nà ni á dɛ.

Waiyoo ákɔ̃nɔ kũ átɛn yáa dɔ teranɔ,

áni wɛ̃nda kɛ à ɔ́ɔ dɔ.

26Waiyoo ákɔ̃nɔ,

tó gbɛ̃ sĩnda pínki tɛni á tɔ́ nna sí,

zaakũ lɛn ń dizinɔ kɛ̀ annabi ɛ́kɛdenɔnɛ lɛ.

Yena ibɛrɛɛi

(Mat 5:38-48)

27Matɛn o ákɔ̃nɔ kũ átɛni ma yã manɔnɛ, àgɔ̃ ye á ibɛrɛnɔi, à a mana kɛ gbɛ̃ kũ ò zã̀águnɔnɛ. 28À sa mana o gbɛ̃ kũ òdi sa vãni oárɛnɔnɛ. À adua kɛ gbɛ̃ kũ òdi wari dɔáwanɔnɛ. 29Tó gbɛ̃ n sãn kɛ̀ n gasu doa, ǹ a do dɔnɛ dɔ. Tó gbɛ̃ n uta zɔ̃kɔ̃ɔ sìmma, ǹsun gínɛ kũ n utanɛoro. 30Tó gbɛ̃ pɔ́ wɛ́ kɛ̀mma, ǹ kpáa. Tó gbɛ̃ n pɔ́ sìmma, ǹsun gbɛkaaro. 31À kɛ gbɛ̃nɔnɛ lákũ á ye ò kɛárɛ nà. 32Tó gbɛ̃ kũ ò yeáinɔn á yeńyĩ, bɔ́ sáabun à vĩárɛɛ? Bee kifirinɔ dìgɔ̃ ye gbɛ̃ kũ ò yeńyĩnɔi se. 33Tó gbɛ̃ kũ òdi a mana kɛárɛnɔn adì a mana kɛńnɛ, bɔ́ sáabun à vĩárɛɛ? Bee kifirinɔ dì kɛ lɛ se. 34Tó gbɛ̃ kũ á wɛ́ dɔ à pɔ́ leḿmanɔn adì pɔ́ sãkãńnɛ, bɔ́ sáabun à vĩárɛɛ? Zaakũ kifirinɔ dì pɔ́ sãkãkɔ̃nɛ, de ò le ò a gɛ̃nɛ sí yãimɛ. 35Àgɔ̃ ye á ibɛrɛnɔi, à a mana kɛńnɛ. À pɔ́ sãkãńnɛ wɛ́dɔisari, áni láada zɔ̃kɔ̃ le, ánigɔ̃ de Luda Musude nɛ́nɔ ũ, zaakũ àdi a mana kɛ guturunɔnɛ kũ gbɛ̃ vãninɔo. 36Àgɔ̃ wɛ̃nda vĩ lákũ á De wɛ̃nda vĩ nà.

Kɔ̃ taari'enaa

(Mat 7:1-6)

37Ásun gbɛ̃ taari ero, Luda ni á taari e sero. Ásun yã vutɛ gbɛ̃aro, Luda ni yã vutɛáwaro. À sùru kɛ kũ gbɛ̃nɔ, Luda ni sùru kɛ kãáo. 38À gbɛ̃ gba pɔ́, Luda ni á gba. Ani zaka mana kũ à gbɛ̃̀gbɛ̃ à wɛ̃̀ à pà yɛ́rɛrɛ káárɛ á uta lɛ́n. Zaakũ zaka kũ ndì yɔ̃ońnɛ Luda ni yɔ̃onnɛ se.

39Akũ à yã lɛ̀kɔ̃ańnɛ à pì: Vĩ̀na ni fɔ̃ à gò kũ vĩ̀naanɛ yá? Ń pla ń pínki ni si wɛ̀ɛnloo? 40Ìbaa dìgɔ̃ de a dànnɛrilaro. Gbɛ̃ kũ à yã dàda papana de lán a dànnɛrii bàmɛ. 41Bɔ́yãi ntɛn sɛ̃̀buru kũ à da n gbɛ̃dake wɛ́n e, akũsɔ̃ ńdi lí kũ à da n wɛ́n yã daroo? 42Mɔkɔ̃n kũ ńdi límukutu kũ à da n wɛ́n ero, ĩni kɛ dera ǹ o n gbɛ̃dakenɛ, à tó ǹ sɛ̃̀buru kũ à da a wɛ́n bonɛɛ? Manafikide! Ǹ límukutu kũ à da n wɛ́n bo gĩa, gbasa ǹ gu e swáswa, de ǹ le ǹ sɛ̃̀buru kũ à kú n gbɛ̃dake wɛ́n bonɛ.

Gbɛ̃ dɔ̃na a yãkɛnaa

(Mat 7:16-20; 12:33-36)

43Lí mana dì nɛ́ vãni iro, lí vãni dì nɛ́ mana iro. 44Òdi lí sĩnda pínki dɔ̃ a nɛ́amɛ. Òdi kaka bo lɛ̀ líaro, òdi geepi le lɛ̀karaaro. 45Gbɛ̃ mana dì a mana bo a mana kũ à katɛna a gũmmmɛ. Gbɛ̃ vãni sɔ̃ àdi a vãni bo a vãni kũ à katɛna a gũmmmɛ. Zaakũ yã kũ à kɔ̃̀ swɛ̃̀ɛ gũnn lɛ́ dì o.

Kpɛ́bori gbɛ̃nɔn planɔ

(Mat 7:24-27)

46Bɔ́ yã mɛ́ à tò adìgɔ̃ ma sísi Dikiri, Dikiri, akũ adì yã kũ ma ò kɛroo? 47Gbɛ̃ kũ à sù ma kĩnaa, à ma yã mà akũ à zĩ kɛ̀a, mani mɔárɛ lákũ ade de nà. 48À de lán ɛ̃bori kũ à wɛ̀ɛ yɔ̃̀ zã̀zã, à ɛ̃ pɛ̀tɛ gbɛ̀ɛa bàmɛ. Kũ swa pà, í dàgula à kà kpɛ́ pìii, adi yĩgãro, kũ ò bò mana yãi. 49Gbɛ̃ kũ à ma yã mà akũsɔ̃ adi zĩ kɛaro de lán ɛ̃bori kũ à ɛ̃ pɛ̀tɛ zĩtɛ pã wɛ̀ɛyɔ̃naa sari bàmɛ. Kũ swa'i kài, akũ à kɔ̀tɛ bìtim gɔ̃̀nɔ. Kpɛ́ pìi yakanaa kɛ̀ zɔ̃kɔ̃.

Currently Selected:

LUKU 6: BB2005

Highlight

Copy