LUKU 5

Yesu ìba káakunɔ sisinaa

(Mat 4:18-22; Maa 1:16-20)

1Zĩkea Yesu zɛna Gɛnɛsarɛti sɛ̀bɛɛ bara, akũ gbɛ̃nɔ kàkarai dasi de ò Luda yã ma yãi, òtɛn nakaraa. 2Akũ à gó'itɛ è katɛna bara mɛ̀n pla, sɔrɔkɔnɔ bɔ̀tɛn òtɛni ń táarunɔ pípi. 3Akũ à gɛ̃̀ gó pìnɔ do gũn kũ à de Simɔ pɔ́ ũ, à wɛ́ kɛ̀a à a yĩpa fíti, à go baraa fíti. Akũ à vùtɛ gó pìi gũn, à yã dà gbɛ̃nɔnɛ.

4Kũ à yã ò à làka, akũ à pì Simɔnɛ: Ǹ gɛ́ kũ góo í lòkoto kpa, à birigi fã á kpɔ̀ kũ. 5Simɔ wèa à pì: Dannɛri, o zĩ kɛ̀ ari gu gɛ̀ɛ à dɔ̀o, ódi pɔ́ke kũro, ama lákũ n ò nà, mani fã. 6Kũ ò kɛ̀ lɛ, ò kpɔ̀ɔ kàkara yɔ̃nkɔyɔ̃nkɔ ari ń biriginɔ ye ò kɛ̃kɛ̃. 7Akũ ò ɔ kɛ̀ yáku ń gbɛ̃dake kũ ò kú gó pì do gũnnɔnɛ, ò su ò kpáńyĩ. Kũ ò sù, ò kpɔ̀ɔ kà gó mɛ̀n pla pìnɔ pà ari ò ye ò kpátɛ. 8Kũ Simɔ Pita è lɛ, à kùtɛ Yesu gbá sarɛ à pì: Ǹ go ma sarɛ Dikiri, zaakũ durunnakɛrin ma ũ. 9Simɔ bídi kɛ̀ kũ gbɛ̃ kũ ò kú lɛɛlɛnɔ ń pínki kpɔ̀ dasi kũ ò kũ̀u pì yãi. 10Lɛmɛ dɔ Yamisi kũ Yuhanao, Zebedi nɛ́ kũ ò de kɔ̃ gbɛ̃nna ũ kũ Simɔo bídi kɛ̀ se. Akũ Yesu pì Simɔnɛ: Ǹsun tó vĩna n kũro. Zaa gbãra bisãsirin ĩnigɔ̃ wɛtɛ. 11Kũ ò kà kũ ń góo bara, akũ ò pɔ́ sĩnda pínki tòn ò tɛ̀i.

Kusu werekɔ̃anaa

(Mat 8:1-4; Maa 1:40-45)

12Zĩkea Yesu kú wɛ̃tɛ ke gũn, akũ gɔ̃gbɛ̃ kũ kusu dàala sù. Kũ à Yesu è, à wùtɛ a kùaa, à wɛ́ kɛ̀a à pì: Dikiri, tó ń yei, ĩni fɔ̃ ǹ ma werekɔ̃a swáswa. 13Akũ Yesu ɔ bò à nàa à pì: Má yei, ǹ gɔ̃ swáswa. Zaa gwe gɔ̃̀nɔ a kusu làka. 14Akũ Yesu pìnɛ: Ǹsun o gbɛ̃ke maro. Ǹ gɛ́ ǹ n zĩda mɔ sa'oriinɛ, ǹ sa'opɔ kũ Musa dìtɛ kpá n werekɔ̃ana sèeda ũ gbɛ̃nɔnɛ.

15Yesu baaruu dàgula de yãla. Gbɛ̃nɔ dìgɔ̃ kakara dasi ò a yã ma, de à ń werekɔ̃a kũ ń gyãnɔ dɔ. 16Akũ Yesu dìgɔ̃ bo ń tɛ́ àgɔ̃ gɛ́ adua kɛ gusarɛ.

Kɔ̃̀nɔde werekɔ̃anaa

(Mat 9:1-8; Maa 2:1-12)

17Zĩkea Yesu tɛn yã dańnɛ. Farisi kenɔ kũ ludayãdannɛri kenɔ vutɛna gwe. Ò bò Galili kũ Yudea wɛ̃tɛnɔ gũn pínki kũ Yurusalɛmuo. Luda gbãna kú kãao, akũ àtɛn gyãrenɔ werekɔ̃a. 18Akũ gbɛ̃kenɔ sù, ò kɔ̃̀nɔde sɛna kũ wútɛbɔɔo, òtɛn zɛ́ wɛtɛ ò gɛ̃ kãao ò a ditɛ Yesu arɛ. 19Kũ odi gɛ̃ki ero pari yãi, akũ ò dìdi kãao kpɛ́ musu, ò kpɛ́ fɔ̃̀, akũ ò a kìpa kũ a wútɛbɔɔo zàa gũn Yesu arɛ. 20Kũ Yesu è ò a náani vĩ, à pì: Ma gbɛ̃, n durunnanɔ kɛ̃̀mma. 21Ludayãdannɛrinɔ kũ Farisi pìnɔ ò ń nɛ̀sɛɛ gũn: Dín gbɛ̃ kũ àtɛn dɔkɛ kũ Ludao dí ũu? Dí mɛ́ ani fɔ̃ à durunna kɛ̃ḿma, tó adi kɛ Luda ado baasiroo? 22Yesu ń laasun dɔ̃̀, akũ à ń lá à pì: Bɔ́yãi átɛn laasun bire taka lɛ́ á nɛ̀sɛɛ gũnn? 23Tó ma pì a durunnanɔ kɛ̃̀a, ke tó ma pì à futɛ à táa o, a kpate mɛ́ à aragaa? 24Ma ò lɛ de àgɔ̃ dɔ̃ kũ Bisãsiri Nɛ́ durunnakɛ̃mmana iko vĩ zĩtɛ lamɛ. Akũ à pì kɔ̃̀nɔde pìinɛ: Ma ònnɛ, ǹ futɛ ǹ n wútɛbɔ sɛ́ ǹ tá bɛ. 25Gwe gɔ̃̀nɔ à fùtɛ à zɛ̀ ń wára, à a wútɛbɔɔ pìi sɛ̀ à tà bɛ, àtɛn Luda sáabu kpá. 26Gbɛ̃ sĩnda pínki lɛ́ àtɛ, akũ ò Luda tɔ́ bɔ̀. Vĩna gũn ò pì: O daboyã è gbãra.

Levi sisinaa

(Mat 9:9-13; Maa 2:13-17)

27Abire gbɛra Yesu bò, akũ à bɛ'ɔgɔsiri kũ òdi pinɛ Levi è vutɛna a bɛ'ɔgɔsikin. À pìnɛ: Ǹ mɔ́ ǹ tɛ́mai. 28Akũ à fùtɛ, à pɔ́ sĩnda pínki tòn à tɛ̀i.

29Akũ à pɔ́ble zɔ̃kɔ̃ɔ kɛ̀ a bɛa à Yesu sìsia, bɛ'ɔgɔsirinɔ kũ gbɛ̃ pãndenɔ tɛn pɔ́ ble kũńwo dasi. 30Akũ Farisinɔ kũ ń ludayãdannɛrinɔ yãkete kà a ìbanɔi ò pì: Bɔ́yãi átɛn pɔ́ ble, átɛn í mi kũ bɛ'ɔgɔsirinɔ kũ kifirinɔoo? 31Akũ Yesu wèḿma à pì: Gbɛ̃ kũ à aafia vĩ bàka kú kũ likita yãoro, sé gyãre. 32Mádi su gbɛ̃ mananɔ sísi ò ń nɛ̀sɛ litɛro, sé kifirinɔ.

Lɛ́yĩna yã

(Mat 9:14-17; Maa 2:18-22)

33Akũ ò pìnɛ: Yahaya ìbanɔ dìgɔ̃ lɛ́ yĩ, ògɔ̃ adua kɛ baala'i. Lɛmɛ kũ Farisi ìbanɔ dɔ. Ama n gbɛ̃nɔ dìgɔ̃ pɔ́ ble òdigɔ̃ í mi. 34Akũ Yesu wèḿma à pì: Áni fɔ̃ à pi nɔsɛri gbɛ̃nɔ lɛ́ yĩ gɔrɔ kũ à kú kũńwo yá? 35A gɔrɔ ni su kũ oni nɔsɛrii pì bo ń tɛ́. Zĩ pìian oni lɛ́ yĩ sà. 36Yesu yã lɛ̀kɔ̃ańnɛ dɔ à pì: Gbɛ̃ke dì uta dufu li ò dì a zĩlaro. Tó ò kɛ̀ lɛ, uta dufu ni yakamɛ, a zĩ ni kɔ̃ sɛ́ kũ uta dufu nambataoro. 37Òdi sèwɛ̃ dufu ká tùru zĩ gũnlo. Tó ò kɛ̀ lɛ, wɛ̃ dufu pì ni tùru pũtãmɛ, ani kɔ́tɛ, tùru ni yaka. 38Oi, òdi sèwɛ̃ dufu ká tùru dufu gũmmɛ. 39Gbɛ̃ kũ à kɔ̃ dɔ̃̀ kũ wɛ̃ zĩ minaao dì a dufu sáabu kpáro, àdi pi a zĩ mɛ́ à nna.

Currently Selected:

LUKU 5: BB2005

Highlight

Copy