LUKU 13

Nɛ̀sɛlitɛna ke ga

1Gɔrɔ birea gbɛ̃kenɔ sù ò Galili gbɛ̃ kũ Pilati ń dɛdɛ à ń aru yã̀katɛ kũ ń sa'obɔ aruonɔ yã ò Yesunɛ. 2Akũ Yesu pìńnɛ: Kũ Galili gbɛ̃ pìnɔ ga de lɛ, átɛn da ń durunna de Galili gbɛ̃ kparanɔ pɔ́lan yá? 3Oi! Matɛn oárɛ, tó ádi nɛ̀sɛ litɛro, á pínki ni ga lán ń bàmɛ. 4Gbɛ̃nɔn baro plansari kũ Siloamu kpɛ́didikɔ̃anaa gbòro à sìḿma ò gàganɔ sɔ̃, átɛn da ń taari de gbɛ̃ kpara kũ ò kú Yurusalɛmunɔ pɔ́lan yá? 5Oi! Matɛn oárɛ, tó ádi nɛ̀sɛ litɛro, á pínki áni ga lán ń bàmɛ.

6Akũ à yã dí lɛ̀kɔ̃ańnɛ à pì: Gbɛ̃ke mɛ́ à kaka lí bà a swadakoo gũn, akũ à gɛ̀ɛ a nɛ́ wɛtɛ adi ero. 7Akũ à pì a zĩkɛriinɛ: Ǹ gwa, a wɛ̃̀ aakɔ̃den dí, kũ madì su nɛ́ wɛtɛ kaka lí pìia mádi ero. Ǹ a zɔ̃, óni tó à gu sí pãn yá? 8Akũ zĩkɛrii pìi pìnɛ: Baa, ǹ tó ari ziki dɔ. Mani gu bi mà likai mà taaki kánɛ. 9Ani gí nɛ́ i zikiro. Tó adi nɛ́ iro sà, mani a zɔ̃ mà nɛ.

Nɔgbɛ̃ kɔ̃̀nɔde werekɔ̃anaa

10Kámmabogɔrɔ zĩ Yesu tɛn yã dańnɛ aduakɛkpɛn. 11Nɔgbɛ̃ ke kú gwe, tãna a kɔ̃̀nɔ kù à kà wɛ̃̀ baro plansari. Àdigɔ̃ kokonamɛ, àdi fɔ̃ à a zĩda poro bee fítiro. 12Kũ Yesu a è, akũ à a sìsi à pì: Nɔgbɛ̃, n kɔ̃̀nɔkɛ gòmma. 13Akũ à ɔ nàa. Zaa gwe gɔ̃̀nɔ à pòro, akũ à Luda sáabu kpà.

14Akũ aduakɛkpɛ gbɛ̃ zɔ̃kɔ̃ pɔ fɛ̃̀, kũ Yesu a wèrekɔ̃a kámmabogɔrɔ zĩ yãi, akũ à fùtɛ à pì gbɛ̃nɔnɛ: Gɔrɔ suddo mɛ́ à kun kũ òdi zĩ kɛn. Àgɔ̃ su ò á werekɔ̃a gɔrɔ abirenɔa, ama kámmabogɔrɔ zĩ baasi. 15Akũ Dikiri wèa à pì: Manafikidenɔ! Kámmabogɔrɔ zĩ á baadi dì a zù ke zaaki poro a bàdɔkia à gɛ́ í kpáaroo? 16Ibrahĩ buri nɔgbɛ̃ díkĩna sɔ̃, Setan a yĩ̀ wɛ̃̀ baro plansarimɛ. A bàa pìi poronaa kámmabogɔrɔ zĩ zɛ́ vĩroo? 17Kũ à ò lɛ, akũ wé'i a ibɛrɛnɔ kũ̀ ń pínki, ama gbɛ̃nɔ pɔ kɛ̀ nna daboyã kũ àtɛn kɛnɔa pínki.

Yãlɛkɔ̃ana kũ musadi wɛ́o

(Mat 13:31-32; Maa 4:30-32)

18Akũ Yesu pì: Bɔ́n kpata kũ à bò Luda kĩnaa bòkɔ̃aoo? Bɔ́n mani kpákũsũoo? 19À de lán musadi wɛ́ bà, akũ gbɛ̃ sɛ̀ à tɔ̃̀ a karaa gũn. Kũ à bùtɛ, à kɛ̀ lí ũ, akũ bãnɔ sù ò dìdi a gã̀nɔa.

Yãlɛkɔ̃ana kũ lùbɛnɛɛo

(Mat 13:33)

20Akũ à pì dɔ: Bɔ́n mani kpata kũ à bò Luda kĩnaa kpákũsũoo? 21À de lán lùbɛnɛ kũ nɔgbɛ̃ sɛ̀ à kà flawa zaka lɛ́ aakɔ̃ gũn, à yã̀katɛ pínki bà.

Zɛ́lɛ kpakoto

(Mat 7:13-14, 21-23)

22Gɔrɔ kũ Yesu tɛn gɛ́ Yurusalɛmu, àtɛn gɛ̃ wɛ̃tɛnɔ kũ lakutunɔla, àtɛn yã dańnɛ, 23akũ ò a là ò pì: Baa, ase gbɛ̃ kũ oni surabana lenɔn dasiroo? Akũ Yesu pì gbɛ̃nɔnɛ: 24À kokari kɛ à gɛ̃ zɛ́lɛ kpakoto gũn. Matɛn oárɛ, gbɛ̃nɔ ni wɛtɛ ò gɛ̃n dasi, ama oni fɔ̃ro. 25Tó bede fùtɛ à zɛ́ tàta à làka, tó a gɔ̃ bàai, akũ átɛn gbà lɛ́, átɛn pi: Baa, ǹ zɛ́ wɛ̃wɛrɛ, ani oárɛ, á á dɔ̃ gukearo. 26Abire gbɛra tó a pìnɛ à pɔ́ blè kãáo, à í mì kãáo, à yã dàńnɛ á bɛ gãnulɛa, 27ani oárɛ á á dɔ̃ gukearo. À goala á yãvãnikɛrinɔ á pínki.

28Tó a Ibrahĩ kũ Isaakuo kũ Yakubuo kũ annabinɔ è pínki kpata kũ à bò Luda kĩnaa gũn, akũ ò á zú bàai, gwen áni ɔ́ɔ dɔn, à ɔ di á mìia. 29Gbɛ̃nɔ ni bo ifãboki kpa kũ ifãlɛtɛ kpao kũ gugbãnduruo kũ gɛ̀nɔmidɔkio, oni su pɔ́ ble kpata kũ à bò Luda kĩnaa gũn. 30Lɛn gbɛ̃ kpɛdenɔ nigɔ̃ gbɛ̃ káakunɔ ũ lɛ, gbɛ̃ káakunɔ nigɔ̃ gbɛ̃ kpɛdenɔ ũ.

Yurusalɛmu yã

(Mat 23:37-39)

31Gɔrɔ birea gɔ̃̀nɔ Farisi kenɔ sù Yesu kĩnaa ò pìnɛ: Ǹ futɛ gu dín, zaakũ Hɛrɔdu ye à n dɛmɛ. 32Akũ à pìńnɛ: À gɛ́ o flɛ̃ pìinɛ, matɛn tãnanɔ goḿma, matɛn gyãrenɔ werekɔ̃a gbãra kũ ziao, a gɔrɔ aakɔ̃de zĩ sɔ̃ mani ma zĩ papa. 33Bee kũ abireo séto mà gɛ́ arɛ gbãra kũ ziao kũ ziandoo, zaakũ adi kũ annabi ga gukearo, sé Yurusalɛmu. 34Yurusalɛmudenɔ, Yurusalɛmudenɔ! Adì annabinɔ dɛdɛ, adì gbɛ̃ kũ Luda ń zĩáwanɔ pápa kũ gbɛ̀ɛo, à ń dɛdɛ. Madìgɔ̃ ye mà á kakaramai gɛ̃̀n baaakɔ̃, lákũ ko dì dɛ̀mbɛrɛ kú a nɛ́nɔla nàmɛ, ama adì weiro. 35Luda ni á kpɛ́ tóárɛ bɛzĩ ũmɛ sà. Matɛn oárɛ, áni ma e doro ari à pi, arubarikaden gbɛ̃ kũ àtɛn su kũ Dikiri tɔ́o ũ.

Currently Selected:

LUKU 13: BB2005

Highlight

Copy