LUKU 12

Laakarikɛna Farisinɔ manafikii

(Mat 10:26-27)

1Gɔrɔ birea gbɛ̃nɔ kàkarai, ò ń lɛ́ dɔ̃ro, ari òtɛn gɛ̀sɛ pɛ́tɛpɛtɛkɔ̃a, akũ à yã ò a ìbanɔnɛ gĩa à pì: À laakari kɛ Farisinɔ lùbɛnɛɛi. Àkũmɛ ń manafiki ũ. 2Pɔ́ke kun utɛna kũ ani bo gupuraaro. Asiriyã ke kun kũ oni gí dɔ̃iro. 3Lɛmɛ dɔ yã kũ a ò gusiran, oni ma gupuraa, asiriyã kũ a ò kɔ̃ sãn kpɛ́ tú, oni a kpàkpa kɛ gãnu arɛ.

Zɛna kũ Yesuo gbɛ̃nɔ arɛ

(Mat 10:19-20; 28-33; 12:32)

4Ma gbɛ̃nnanɔ, matɛn oárɛ, gbɛ̃ kũ oni mɛ̀ kakatɛ a gbɛra oni fɔ̃ ò yãke kɛárɛ doronɔ, àsun vĩna kɛńnɛro. 5Mani gbɛ̃ kũ à de à vĩna kɛnɛ oárɛ. À vĩna kɛ Ludanɛ kũ à gbãna vĩ à á zu tɛ́ gũn mɛ̀kaatɛnaa gbɛra. Ee, matɛn oárɛ, à vĩna kɛnɛ. 6Òdi bãntoro mɛ̀n sɔɔro yía kɔbɔ plaroo? Ama bee ń ke yã dì sã Ludanlo. 7Bee á mìkãnɔ, à a lɛ́ dɔ̃. Ásun vĩna kɛro, á bɛ̀ɛrɛ de bãntoro dasinɔla.

8Matɛn oárɛ, gbɛ̃ kũ à zɛ̀ kũmao gbɛ̃nɔ arɛ, Bisãsiri Nɛ́ ni zɛ kãao Luda malaikanɔ arɛ. 9Gbɛ̃ kũ à ledi kpàmai gbɛ̃nɔ arɛ sɔ̃, mani ledi kpái Luda malaikanɔ arɛ. 10Tó gbɛ̃ Bisãsiri Nɛ́ vãni bò, Luda ni a kɛ̃. Ama tó gbɛ̃ Luda Nini tɔ́ vãni sì, ani kɛ̃nɛro. 11Tó òtɛn gɛ́ kãáo yãkpatɛkɛkia aduakɛkpɛn ke kínanɔ kũ gbãnadenɔ arɛ, àsun á zĩda bona damu kɛro ke yã kũ áni o, 12zaakũ Luda Nini mɛ́ ani yã kũ à de à o daárɛ zĩ birea.

Ɔgɔde

(Mat 6:19-34)

13Zàa gũn gbɛ̃ke pì Yesunɛ: Dannɛri, ǹ o ma vĩ̀ninɛ à ma baka kpáma ó túbi gũn. 14Akũ à wèa à pì: Ma gbɛ̃, dí mɛ́ à ma ditɛ á yãkpatɛkɛri ke á yãgɔ̃gɔ̃ri ũu? 15Akũ à pì gbɛ̃nɔnɛ: Àgɔ̃ á zĩda kũna dɔ̃. À laakari kɛ pɔ́ sĩnda pínki aniapãsĩkɛnaai, zaakũ aruzɛkɛ bi bisãsiri wɛ̃̀ndinlo, bee tó à fɔ̃̀ àgɔ̃ didikɔ̃a dia.

16Akũ à yã lɛ̀kɔ̃ańnɛ à pì: Ɔgɔde mɛ́ à kun a bura pɔ́ble kɛ̀nɛ manamana, 17akũ à laasun lɛ̀ à pì: Bɔ́n mani kɛɛ? Má pɔ́wɛkaki vĩro. 18Akũ à pì: Yã kũ mani kɛn dí: Mani ma pɔ́katɛkinɔ gboro, mani a zɔ̃kɔ̃nɔ bo, mani ma pɔ́wɛ kán pínki kũ ma aruzɛkɛnɔ. 19Mani pi ma zĩdanɛ: Gbɛ̃, n gĩnakɛ ń pɔ́ mana vĩ zɔ̃kɔ̃, kũ ani ká kũnwo wɛ̃̀ ũgbangbaa? Ǹ kámma bo, ǹ pɔ ble, ǹ í mi, ǹ pɔnna kɛ. 20Akũ Luda pìnɛ: Yɔ̃nkɔ, gwãaniala mani n wɛ̃̀ndi gbɛkamma. Soru kũ n kɛ̀ ni gɔ̃ dí pɔ́ ũmɛɛ? 21Lɛmɛ gbɛ̃ kũ à aruzɛkɛ tɔ̃̀kɔ̃ai, ama à de ɔgɔde ũ Ludanɛro yã de lɛ.

Ludanaanikɛnaa

(Mat 6:19-21, 25-34)

22Akũ à pì a ìbanɔnɛ: Abire yãi matɛn oárɛ, àsun á wɛ̃̀ndi damu à pi bɔ́n óni blero, àsun á mɛ̀ damu kɛ à pi bɔ́n óni daro. 23Wɛ̃̀ndi de pɔ́blela. Mɛ̀ de pɔ́kasala. 24À kãakãannanɔ gwa. Òdi pɔ́ tɔ̃ro, òdi pɔ́ kɛ̃ro, ò dɔ̃̀ ke gbàsɔ vĩro, bee kũ abireo Luda dì ń gwa. Á bɛ̀ɛrɛ vĩ manamana de bãnɔla fá! 25Á tɛ́, dí mɛ́ ani fɔ̃ à a wɛ̃̀ndi gbã̀na kara, bee gɔrɔ do, a damukɛnaa gũnn? 26Tó áni yã fíti dí fɔ̃ro, bɔ́yãi átɛn yã kparanɔ damu kɛɛ? 27À lávunɔ gwa sɛ̃̀n lákũ ò de nà. Òdi zĩ kɛro, òdi buu tãro, ama matɛn oárɛ bee Sulemanu kũ a aruzɛkɛo, adi uta da a mana kà ń ke ũro. 28Sɛ̃̀la kũ à kun gbãra ani tɛ́ kũ zia, lákũ Luda dì pɔ́ nai lɛ nà, oni ákɔ̃nɔ ludanaanikĩanadenɔ pɔ́ o dɔ yá? 29Ásun tó pɔ́ kũ áni ble ke pɔ́ kũ áni mi yã doárɛ arɛro. Ásun a damu kɛro. 30Andunia dí burinɔn pɔ́ pìnɔ pínki yã dì dɔńnɛ arɛ, á De sɔ̃ à dɔ̃ kũ pɔ́ pìnɔ kɔ̃ sì kãáo. 31À tó kpata kũ à bò a kĩnaa yã doárɛ arɛ, ani pɔ́ pìnɔ karaárɛ. 32Ma kpàsa fíti gbɛ̃nɔ, àsun vĩna kɛro, zaakũ á De pɔyenyĩnaamɛ à á kpá kpataa pìn. 33À pɔ́ kũ á vĩnɔ yá, à takasidenɔ gba a ɔgɔ. À ɔgɔsɔ̃nɔ kũ àdi zĩ kũro zɔ̃, ludambɛ aruzɛkɛ kũ àdi lákaro káki ũ, kũ kpãni dì nairo, kɔ̀kɔ sɔ̃ àdi a yakaro. 34Zaakũ gu kũ á aruzɛkɛ kún, gwen á laakari nigɔ̃ kun se.

Zĩkɛri náanide laakaride

(Mat 24:45-51)

35Àgɔ̃ kú soru gũn, à tó á fitila gɔ̃ nana. 36Àgɔ̃ de lán gbɛ̃ kũ òtɛni ń dikiri suna dã à su kũ nɔsɛ pɔnnakɛnaao bà, de gɔrɔ kũ à sù à gbàa lɛ̀, oni zɛ́ wɛ̃nɛ gɔ̃̀nɔ. 37Arubarikadenɔn zĩkɛri kũ ń dikiri ni ń le bɛ̃nɛ a sugɔrɔanɔ ũ. Yãpuran matɛn oárɛ, dikirii pì ni a pɔ́nɔ kɛkɛ à yĩ, ani ń vutɛ, ani pɔ́ble kakarańnɛ. 38Bee tó à sù lizãndo ke kɔnkɔkɔnkɔ, tó à ń lé lɛ, arubarikadenɔmɛ á ũ. 39Àgɔ̃ yã dí dɔ̃. Tó bede gɔrɔ zaka kũ kpãni ni suawa dɔ̃̀ yã, de ani tó à a kpɛ́ fɔ̃ro. 40Ákɔ̃nɔ sɔ̃, àgɔ̃ kú kũ soruo, zaakũ Bisãsiri Nɛ́ ni su gɔrɔ zaka kũ á wɛ́ dɔiro.

41Pita pì: Dikiri, ó yãin n yã pìi lɛ̀kɔ̃a yá, ke gbɛ̃ sĩnda pínki yãimɛ? 42Dikiri pì: Dín bɛgwari náanide laakaride kũ a dikiri dì a zĩkɛrinɔ nanɛ a ɔĩ, à pɔ́ble kpáḿma a gɔrɔa ũu? 43Arubarikadenɔn zĩkɛri kũ a dikiri a lè, àtɛn kɛ lɛ a sugɔrɔa ũ. 44Yãpuran matɛn oárɛ, ani a aruzɛkɛ sĩnda pínki nanɛ a ɔĩmɛ. 45Ama tó zĩkɛrii pìi pì a nɛ̀sɛɛ gũn, a dikiri suna tɛn gì kɛ sɔ̃, akũ à nà a zĩkɛri dakenɔ gbɛ̃gbɛ̃naaa, gɔ̃gbɛ̃nɔ kũ nɔgbɛ̃nɔ, àtɛn sãnkara pɔ́ ble, àtɛn wɛ̃dɛ kɛ, 46a dikiri ni su gɔrɔ kũ a wɛ́ dɔiroamɛ, gɔrɔ zaka kũ à dɔ̃roa, ani a zɔ̃zɔ̃kɔ̃rɛ à a baka da kũ kifirinɔ.

47Zĩkɛri kũ à a dikiri pɔyenyĩna dɔ̃, akũ adi soru kɛ à a pɔyeinaa kɛ̀ro, oni a gbɛ̃ búgubugu. 48Zĩkɛri kũ à a dikiri pɔyenyĩna dɔ̃ro, akũ à yã kũ à de ò a gbɛ̃ kɛ̀ sɔ̃, oni a gbɛ̃ fítimɛ. Gbɛ̃ kũ Luda a gbà zɔ̃kɔ̃ Luda ni wɛtɛa zɔ̃kɔ̃. Gbɛ̃ kũ Luda pɔ́ nànɛ a ɔĩ zɔ̃kɔ̃, ani gbɛkaa deńla.

Kɛ̃kɛ̃kɔ̃ana Yesu yãi

(Mat 10:34-36)

49Tɛ́n ma su na anduniaa, mádi gii tɛ́ pì gɔ̃ kũ se teraro. 50Má wɛ́tãmma vĩ kũ mani gɛ̃n. Má kú laasun zɔ̃kɔ̃ɔ gũn ari à gɛ́ lákao. 51Átɛn da ma su de gbɛ̃nɔ gɔ̃ nna kũ kɔ̃o andunia gũnn yá? Oi! Matɛn oárɛ, kɛ̃kɛ̃kɔ̃ana yãin ma su. 52Zaa tera ɔn kũ gbɛ̃nɔn sɔɔronɔn kún, oni kɔ̃ kpaatɛtɛ. Gbɛ̃nɔn aakɔ̃nɔ ni bo gbɛ̃nɔn planɔ kpɛ, gbɛ̃nɔn planɔ ni bo gbɛ̃nɔn aakɔ̃nɔ kpɛ. 53De ni bo a nɛ́gɔ̃gbɛ̃ kpɛ, nɛ́gɔ̃gbɛ̃ ni bo a de kpɛ. Da ni bo a nɛ́nɔgbɛ̃ kpɛ, nɛ́nɔgbɛ̃ ni bo a da kpɛ. Zã da ni bo nɔzãre kpɛ, nɔzãre ni bo a zã da kpɛ.

Gɔrɔ díkĩna yáasi dɔ̃naa

(Mat 6:2-3)

54Yesu pì gbɛ̃nɔnɛ: Tó a è legũ tɛn sisi ifãlɛtɛ kpa, áni pi gɔ̃̀nɔ, legũ ni ma, akũ àdi kɛ lɛ. 55Tó a è ĩa tɛn bo gɛ̀nɔmidɔki kpa, áni pi, gu ni wã, akũsɔ̃ àdi wã. 56Manafikidenɔ! Á zĩtɛ kũ musuo wɛ́ dɔ̃kɔ̃i, akũ á gɔrɔ dí yáasi dɔ̃ sɔ̃ro bi?

Gaafara wɛtɛnaa

(Mat 5:25-26)

57Bɔ́yãi á yãkɛna a zɛ́a dɔ̃ á zĩdaaroo? 58Tó n ibɛrɛ tɛn gɛ́ kũnwo yãkpatɛkɛkia, ǹ kokari kɛ de à gaafara kɛnnɛ zaa zɛ́n, de àsun n gátɛ à gɛ́ kũnwo yãkpatɛkɛri kĩnaaro yãi. Tó ńdi kɛ lɛro, yãkpatɛkɛrii pì ni n kpá dogariia, dogari ni n da kpɛ́siran. 59Matɛn onnɛ, ĩni bo gwero ari ǹ gɛ́ fĩna boo pínki. Bee kɔbɔ ni gɔ̃ tɛ́nyĩro.

Currently Selected:

LUKU 12: BB2005

Highlight

Copy