YUHANA 8

Nɔgbɛ̃ kũ ò kũ̀ zinakɛnaa gũn

1Yesu gɛ̀ɛ Kùkpɛ sĩ̀sĩgɛrɛɛi. 2Kũ gu dɔ̀ gɔ̃̀nɔ, à ɛ̀ra à gɛ̀ɛ Luda ɔnn. Gbɛ̃ sĩnda pínki sù a kĩnaa, akũ à vùtɛ àtɛn yã dańnɛ. 3Akũ ludayãdannɛrinɔ kũ Farisinɔ sù a kĩnaa kũ nɔgbɛ̃ kũ ò kũ̀ zinakɛnaa gũn, ò a zɛ̀ zàa gũn 4ò pì Yesunɛ: Dannɛri, ò nɔgbɛ̃ díkĩna kũ̀ kũ gɔ̃poseo wɛdewɛ. 5Ó doka gũn Musa dìtɛ ò nɔgbɛ̃ dí taka pápa kũ gbɛ̀ɛo ò a dɛmɛ. N è dera sɔ̃ɔ? 6Ò abirekũ ò de ò a yɔ̃ ò gwa ò le ò yã daala yãimɛ. Akũ Yesu nàtɛ àtɛn ɔgbɛ kɛ̃ zĩtɛa. 7Kũ ò kpɛ́ òtɛni a lala, akũ à a mìi sɛ̀ lei à pìńnɛ: Á gbɛ̃ kũ adi durunna kɛ zikiro a pá kũ gbɛ̀ɛo káaku. 8Akũ à ɛ̀ra à nàtɛ àtɛn ɔgbɛ kɛ̃ zĩtɛa dɔ. 9Kũ ò mà lɛ, akũ ò fã̀kɔ̃a dodo sɛna zaa gbɛ̃ zɔ̃kɔ̃nɔa. Akũ ò Yesu tò ado kũ nɔgbɛ̃ pìio. 10Akũ à ɛ̀ra à a mìi sɛ̀ lei à pìnɛ: Nɔgbɛ̃, ò tà máa? Odi yã danla doroo? 11Nɔgbɛ̃ pìi wèa à pì: Baa, ń gbɛ̃ke kú la doro. Akũ Yesu pìnɛ: Makũ se, mani yã danlaro. Ǹ gɛ́. Zaa gbãra ǹsun durunna kɛ doro.

Yesumɛ gupura ũ andunianɛ

12Akũ Yesu yã ò gbɛ̃nɔnɛ dɔ à pì: Makũmɛ gupura ũ andunianɛ, gbɛ̃ kũ à tɛ́mai nigɔ̃ kú gusiran doro, gupura kũ àdi ń ká wɛ̃̀ndiian ade nigɔ̃ vĩ.

13Akũ Farisinɔ pìnɛ: Ń de n zĩda sèedade ũ, n yã náani vĩro. 14Akũ Yesu wèḿma à pì: Bee tó matɛni ma zĩda yã o, ma yã náani vĩ, zaakũ má dɔ̃ gu kũ ma bon kũ gu kũ matɛn tánwo. Ákɔ̃nɔ sɔ̃, á gu kũ ma bon kũ gu kũ matɛn tánwo dɔ̃ro. 15Átɛni ma taari e bisãsirikɛmmɛ. Mádi gbɛ̃ke taari e sɔ̃ro. 16Tó ma gbɛ̃ taari è sɔ̃, taari'enaa pìi nigɔ̃ náani vĩ, zaakũ má kú madoro, ma De kũ à ma zĩ kú kũmao. 17À kú á doka takadan ò pì, sèedade gbɛ̃nɔn planɔ yã mɛ́ à náani vĩ. 18Makũmɛ ma zĩda sèedade ũ. Ma De kũ à ma zĩ bi ma sèedademɛ dɔ.

19Akũ ò a là ò pì: N de kú máa? Yesu wèḿma à pì: Á ma dɔ̃ro, akũsɔ̃ á ma De dɔ̃ro. Tó a ma dɔ̃, de a ma De dɔ̃. 20Yesu yã bire ò ɔgɔdakia, gɔrɔ kũ àtɛn yã dańnɛ Luda ɔn gũmmɛ. Odi a kũro, zaakũ a gɔrɔ dí papa kɔ̀ro.

Áni fɔ̃ à gɛ́ gu kũ matɛn tánlo

21Akũ Yesu pìńnɛ dɔ: Matɛn tá, áni ma wɛtɛ, ama áni ga á durunna gũmmɛ. Áni fɔ̃ à gɛ́ gu kũ matɛn tánlo. 22Akũ gbãnade pìnɔ pì: À pì óni fɔ̃ ò gɛ́ gu kũ átɛn tánlo. Ani a zĩda dɛn yá? 23Akũ Yesu pìńnɛ: Zĩtɛ la gbɛ̃nɔn á ũ, musu gbɛ̃n ma ũ. Andunia díkĩna gbɛ̃nɔn á ũ, andunia díkĩna gbɛ̃n ma ũro. 24Abire yãin ma pìárɛ áni ga á durunna gũmmɛ. Tó ádi sí kũ makũmɛ gbɛ̃ kũ má de a ũ ũro, áni ga á durunna gũmmɛ.

25Akũ ò a là ò pì: Dímɛ n ũu? Yesu wèḿma à pì: Gbɛ̃ kũ ma òárɛ zaa káakun ma ũ. 26Má yã vĩ dasi mà o á musu mà yã daoála. Gbɛ̃ kũ à ma zĩ bi yãpurademɛ, yã kũ ma mà a kĩnaan madì o andunianɛ.

27Odi dɔ̃ kũ De Ludan à tɛ́aro, 28akũ Yesu pìńnɛ: Tó a Bisãsiri Nɛ́ sɛ̀ a dɔ̀ musu, gbasa à dɔ̃ kũ makũmɛ gbɛ̃ kũ má de a ũ ũ. Madì yãke kɛ kũ ma zĩdaoro, yã kũ ma De dàmɛnɛn madì o. 29Gbɛ̃ kũ à ma zĩ kú kũmao, adi ma tó madoro, zaakũ madìgɔ̃ yã kũ àdi káagu kɛ gɔrɔ sĩnda pínki. 30Gɔrɔ kũ Yesu tɛn yã pìnɔ o, ò a náani kɛ̀ dasi.

Zĩdadenɔ kũ zɔ̀nɔ

31Akũ Yesu pì Yuda gbãnade kũ ò a yã sìnɔnɛ: Tó á ma yã kũna, ánigɔ̃ de ma ìbanɔ ũ yãpura. 32Ánigɔ̃ yãpura dɔ̃, yãpura pì ni tó à gɔ̃ á zĩda vĩ.

33Akũ ò pìnɛ: Ibrahĩ burin ó ũ, ódi zɔ̀ ble gbɛ̃kenɛ zikiro. Akũ ntɛn pi óni gɔ̃ ó zĩda vĩ yá? 34Yesu wèḿma à pì: Yãpuran matɛn oárɛ, gbɛ̃ kũ àdi durunna kɛ bi durunna zɔ̀ɔmɛ. 35Zɔ̀ kun ɔn gbɛ̃ ũ gɔrɔ sĩnda pínkiro, ɔn nɛ́ mɛ́ à ɔn gbɛ̃ ũ gɔrɔ sĩnda pínki. 36Tó Luda Nɛ́ á bo zɔ̀blenan, áni gɔ̃ á zĩda vĩ yãpura. 37Má dɔ̃ kũ Ibrahĩ burin á ũ, ama átɛni ma wɛtɛ à ma dɛ kũ ma yã kú á nɛ̀sɛɛ gũnlo yãi. 38Yã kũ ma è ma De kĩnaan matɛn o, yã kũ a mà á de kĩnaan átɛn kɛ.

39Akũ ò pìnɛ: Ibrahĩmɛ ó de ũ. Akũ Yesu pìńnɛ: Tó Ibrahĩ nɛ́nɔn á ũ, de a Ibrahĩ dà sɛ̀tɛ. 40Tera sà átɛn wɛtɛ à ma dɛ, makũ kũ ma yãpura kũ ma mà Luda kĩnaa òárɛ. Ibrahĩ dí yã bire taka kɛro. 41Átɛni á de yãkɛna kɛmɛ. Akũ ò pìnɛ: Nɔ yìgisaride nɛ́nɔn ó ũro. De mɛ̀n don ó vĩ, àkũmɛ Luda ũ. 42Yesu pìńnɛ: Tó á den Luda ũ, de á yemai, zaakũ Luda kĩnaan ma bon ma su. Mádi su kũ ma zĩdaoro, àkũ mɛ́ à ma zĩ. 43À kɛ̀ dera ádi ma yã dɔ̀rɔ dɔ̃roo? Kũ adì fɔ̃ à ma yã dɔ̀rɔ dɔ̃ro yãimɛ. 44Á de Ibilisi pɔ́n á ũ, a pɔyeinaan á ye à kɛ. Gbɛ̃dɛriin a ũ zaa káaku, àdi zɛ kũ yãpuraoro, kũ yãpura kú a nɛ̀sɛɛ gũnlo yãi. Tó à ɛ́kɛ tò, a zĩda dàan gwe, zaakũ ɛ́kɛden a ũ, ɛ́kɛ mìimɛ. 45Makũ sɔ̃, madì yãpura o. Abire yãi adì ma yã síro. 46Á tɛ́, dí mɛ́ ani pi ma durunna kɛ̀ɛ? Kũ yãpuran matɛn o, à kɛ̀ dera átɛni ma yã síroo? 47Gbɛ̃ kũ à de Luda pɔ́ ũ dì yã kũ Luda tɛn o mamɛ. Á de Luda pɔ́ ũro, abire yãin adì we ma yãiro.

Yesu dena Ibrahĩla

48Akũ gbãnade pìnɔ pìnɛ: Samaria gbɛ̃mɛ n ũ! Ń tãna vĩmɛ! Ke yãpuranlo? 49Akũ Yesu pì: Má tãna vĩro. Madì bɛ̀ɛrɛ li ma Denɛ, ama adì ma kpe bo. 50Madì wɛtɛ mà a zĩda tɔ́ boro, gbɛ̃ke mɛ́ àdi wɛtɛmɛnɛ, àkũmɛ yãgɔ̃gɔ̃ri ũ. 51Yãpuran matɛn oárɛ, gbɛ̃ kũ àdi dɔ ma yãi ni ga zikiro.

52Akũ gbãnade pìnɔ pìnɛ: Ó dɔ̃ sà kũ ń tãna vĩ. Ibrahĩ gà kũ annabinɔ pínki, akũ ntɛn pi gbɛ̃ kũ àdi dɔ n yãi ni ga zikiro yá? 53Ń de ó dizi Ibrahĩ kũ à gàlan yá? Annabinɔ gàga dɔ. Dín ntɛni n zĩda sɛ́ a ũu? 54Akũ Yesu pì: Tó matɛni ma zĩda tɔ́ bomɛ, abirekũ bɛ̀ɛrɛ vĩro. Ma De kũ átɛn pi à de á Luda ũ, àkũ mɛ́ àdi ma tɔ́ bo. 55Á a dɔ̃ro, ama má a dɔ̃. Tó ma pì má a dɔ̃ro, manigɔ̃ de ɛ́kɛde ũ lán á bàmɛ. Má a dɔ̃, akũ má a yã kũna. 56Á dizi káaku Ibrahĩ pɔnna kɛ̀ ma gɔrɔ ena yã musu. À è, akũ a pɔ kɛ̀ nna.

57Akũ gbãnade pìnɔ pìnɛ: Ńdi ká wɛ̃̀ bupla akuri kɔ̀ro, akũ n Ibrahĩ è yá? 58Yesu pìńnɛ: Yãpuran matɛn oárɛ, de odi Ibrahĩ i kɔ̀ro, má kun. 59Akũ ò gbɛ̀ɛ sɛ̀tɛ de ò a pápao. Akũ a a zĩda ùtɛ à bò Luda ɔnn.

Currently Selected:

YUHANA 8: BB2005

Highlight

Copy