YUHANA 9

Gɔ̃gbɛ̃ kũ ò ì vĩ̀na ũ werekɔ̃anaa

1Kũ Yesu tɛn kure, à gɔ̃gbɛ̃ kũ ò ì vĩ̀na ũ è. 2Akũ a ìbanɔ a là ò pì: Rabi, dí durunna yãin ò gbɛ̃ pìi ì vĩ̀na ũu? A zĩda pɔ́ yãin yá, ke a de kũ a dao pɔ́mɛ? 3Yesu wèḿma à pì: Adi kɛ àpii ke a de kũ a dao durunna yãinlo. De ò Luda yãkɛna ea yãimɛ. 4Séde ò gbɛ̃ kũ à ma zĩ zĩ kɛ zaa gupuraa. Gusira tɛn su kũ gbɛ̃ke ni zĩ ke le à kɛ doro. 5Gɔrɔ kũ má kú andunia gũn, má de gupura ũ andunianɛ.

6Kũ à ò lɛ, à lɛ́'i tò zĩtɛ, akũ à yã̀katɛ à màma a wɛ́nɔa. 7À pìnɛ: Ǹ gɛ́ ǹ ãn pípi Siloamu í gũn. Tɔ́ pìi pì, í gbarɛna. Akũ à gɛ̀ɛ à ãnn pìpi, akũ à sù kũ wɛ́o wɛ̃na. 8A fárandidenɔ kũ gbɛ̃ kũ ò a dɔ̃ barakɛri ũnɔ pì: Gbɛ̃ kũ àdigɔ̃ bara kɛ vutɛnaa pìin gweroo? 9Gbɛ̃kenɔ pì: Àkũmɛ. Gbɛ̃kenɔ pì: Oi, ade bòkɔ̃aomɛ. Gɔ̃gbɛ̃ pìi pì: Makũmɛ! 10Akũ ò a là ò pì: À kɛ̀ dera n wɛ́ wɛ̃̀ɛ? 11À wèḿma à pì: Gbɛ̃ kũ òdi pinɛ Yesu mɛ́ à bùsuu yã̀katɛ à màma ma wɛ́a, à pì mà gɛ́ ãn pípi Siloamu í gũn. Kũ ma gɛ ma ãnn pìpi, akũ ma gu è. 12Akũ ò a là ò pì: Àpi kú máa? À pì: Má dɔ̃ro.

Farisinɔ yãlalana gbɛ̃ kũ à de vĩ̀na ũ yãa

13Akũ ò gɛ̀ɛ Farisinɔ kĩnaa kũ gbɛ̃ kũ à de vĩ̀na ũ yã pìio. 14Akũsɔ̃ kámmabogɔrɔ zĩn Yesu bùsuu yã̀katɛ à a wɛ́ wɛ̃̀onɛ. 15Akũ Farisinɔ a là dɔ: Deran n kɛ̀ nà n gu èe? À wèḿma à pì: À bɔkɔtɔ mà ma wɛ́amɛ. Kũ ma pìpi, akũ ma gu è. 16Akũ Farisi kenɔ pì: Gbɛ̃ pì dí bo Luda kĩnaanlo, zaakũ àdi kámmabogɔrɔ zĩ yã daro. Ń gbɛ̃kenɔ pì: Durunnakɛri ni fɔ̃ à daboyã birenɔ taka kɛ yá? Akũ ò kɛ̃̀kɛ̃kɔ̃a. 17Akũ ò a là dɔ: Mɔkɔ̃n sɔ̃, gbɛ̃ kũ à n wɛ́ wɛ̃̀nnɛ, ntɛni a yã da deramɛɛ? À pì: Annabiimɛ. 18Bee kũ abireo gbãnadenɔ dí sí kũ vĩ̀naan a ũ gbasa a wɛ́ wɛ̃̀ro, akũ ò gɛ̀ɛ ò a de kũ a daoo sìsi. 19Ò ń lá ò pì: Á nɛ́n dí yá? A a ì vĩ̀na ũn yá? À kɛ̀ dera àtɛn gu e sàa? 20Akũ a de kũ a dao wèḿma ò pì: Ó dɔ̃ kũ ó nɛ́mɛ. O a ì vĩ̀na ũmɛ. 21Ama lákũ à kɛ̀ nà àtɛn gu e sà, ke gbɛ̃ kũ à a wɛ́ wɛ̃̀nɛ, ó dɔ̃ro. À a la gwe. Gbɛ̃ ɔ̃ndɔ̃naamɛ, ani fɔ̃ à a zĩda yã o. 22A de kũ a dao ò lɛ, kũ òtɛn vĩna kɛ gbãnadenɔnɛ yãimɛ. Zaakũ ò zɛ̀o kũ gbɛ̃ kũ à pì Yesu bi Arumasihumɛ, ò aduakɛkpɛ zɛ́ zɔ̃nɛ. 23Abire yãin a de kũ a daoo pì, gbɛ̃ ɔ̃ndɔ̃naamɛ, ò a la.

24Gbɛ̃ kũ à de vĩ̀na ũ yã pì sísina gɛ̃̀n plade gũnn ò pìnɛ: Ǹ yãpura o Luda yãi. Ó dɔ̃ kũ gɔ̃gbɛ̃ pì bi durunnakɛriimɛ. 25Akũ à pì: Tó durunnakɛriimɛ, má dɔ̃ro. Yã mɛ̀n don má dɔ̃. Vĩ̀naan ma ũ yã, akũ matɛn gu e sà. 26Akũ ò a là ò pì: Bɔ́n à kɛ̀nnɛɛ? Deran à kɛ̀ nà à n wɛ́ wɛ̃̀nnɛɛ? 27À wèḿma à pì: Ma òárɛ kɔ̀, ádi sã kpáro. Bɔ́ á ye à ma dɔɔ? Á ye à gɔ̃ a ìbanɔ ũ sen yá? 28Akũ ò zuka kài ò pì: Mɔkɔ̃mmɛ ń de a ìba ũ gwe! Ókɔ̃nɔ sɔ̃ Musa ìbanɔn ó ũ. 29Ó dɔ̃ kũ Luda yã ò kũ Musao. Àkũ sɔ̃, ó dɔ̃ gu kũ à bònlo. 30Akũ gɔ̃gbɛ̃ pìi pìńnɛ: À yãbonsarɛ ma gwe! À ma wɛ́ wɛ̃̀mɛnɛ, akũ á dɔ̃ gu kũ à bònlo yá? 31Ó dɔ̃ kũ Luda dì sã kpá durunnakɛrinɔ yãiro, àdi sã kpá a yãmari kũ òdi a pɔyenyĩna kɛnɔ yãimɛ. 32Zaa lákũ Luda andunia kàtɛ nà, odi ma gbɛ̃ke gbɛ̃ kũ wà a ì vĩ̀na ũ wɛ́ wɛ̃̀nɛ zikiro. 33Tó adi kɛ gbɛ̃ pìi bò Luda kĩnaaro, ani fɔ̃ à pɔ́ke kɛro. 34Akũ ò pìnɛ: Ò n i durunna gũn mámmammɛ, akũ ntɛn yã dawɛrɛ yá? Akũ ò pɛ̀a.

Ludadɔ̃nasari bi vĩ̀nakũnaamɛ

35Yesu mà kũ ò pɛ̀a. Kũ à a lè, à a là à pì: Ntɛn Bisãsiri Nɛ́ náani kɛ yá? 36Gɔ̃gbɛ̃ pìi wèa à pì: Mare, dín a ũ de mà le mà a náani kɛɛ? 37Yesu pìnɛ: N a è, àkũ mɛ́ àtɛn yã o kũnwo. 38Akũ gɔ̃gbɛ̃ pìi pìnɛ: Dikiri, matɛni n náani kɛ. Akũ à donyĩ kɛ̀nɛ. 39Akũ Yesu pì: Gbɛ̃nɔ kɛ̃kɛ̃kɔ̃ana yãin ma su andunia gũn la, de wɛ́siradenɔ wɛ́ kɛ̃, wɛ́kɛ̃rinɔ gɔ̃ wɛ́siradenɔ ũ.

40Farisi kenɔ kú gwe. Kũ ò yã pìi mà, ò pìnɛ: Ókɔ̃nɔ, vĩ̀nanɔn ó ũ se yá? 41Akũ Yesu pìńnɛ: Tó vĩ̀nanɔn á ũ, de á durunna vĩro. Ama kũ átɛn pi á wɛ́ kɛ̃na yãi, á durunna kpɛ́ kú kãáomɛ.

Currently Selected:

YUHANA 9: BB2005

Highlight

Copy