NAANAA 44

Andurufu toko dana asasan

1Yusufu pì a bɛgwariinɛ: Ǹ pɔ́blewɛ káka gbɛ̃ pìnɔnɛ ń asasanɔ pa lákũ oni fɔ̃ ò sɛ́ nà. Ǹ baadi ɔgɔ danɛ a asasa lɛ́n 2ǹ ma andurufu toko sɛ́ ǹ da ń dakũna asasan kũ a pɔ́blewɛ ɔgɔo. Akũ à kɛ̀ lákũ Yusufu ònɛ nà. 3Kũ gu dɔ̀ gɔ̃̀nɔ, ò ń gbárɛ kũ ń zaakinɔ. 4Ari ògɔ̃ gɛ́ ká zã̀, akũ Yusufu pì a bɛgwariinɛ: Ǹ futɛ ǹ pɛ́tɛńyĩ. Tó n ń lé, ǹ ń la ǹ pi bɔ́ yã mɛ́ à tò ò fĩnaa bòmɛnɛ kũ a vãnio a mana gɛ̃nɛ ũu? 5Bɔ́ yã mɛ́ à tò ò ma toko kũ madì í mio mà màso kɛoo sɛ̀ kpãnii? Ǹ ońnɛ kũ ò yã vãni kɛ̀.

6Kũ à ń lé, à yã pìi òńnɛ, 7akũ ò wèa ò pì: Mare, à kɛ̀ dera n ò lɛɛ? Kúku! Ókɔ̃nɔ n zɔ̀blerinɔ, odì yã bire taka kɛro. 8Ɔgɔ kũ o lè yã ó asasanɔ lɛ́ gũn, ódi ɛra o suonnɛ bona zaa Kanaaroo? Óni fɔ̃ ò andurufu ke wura sɛ́ kpãni n dikiri bɛa yá? 9Mare, ó gbɛ̃ kũ n lè a kĩnaa, ade gà, ó pínki óni gɔ̃ n zɔ̀nɔ ũ. 10À pì: Tɔ̀, à kɛ lákũ a ò nà. Gbɛ̃ kũ ò lè a kĩnaa ni gɔ̃ ma zɔ̀ ũmɛ, á gbɛ̃ kparanɔ ni gɔ̃ taari sari. 11Akũ ń baadi a asasa kìpa à pòro gɔ̃̀nɔ. 12Akũ bɛgwarii pì ń asasanɔ gwàgwa. À nà ń vĩ̀ni pɔ́a ari à gɛ̀ɛ à kào ń dakũna pɔ́a, akũ à toko pìi lè Biliaminu pɔ́ gũn. 13Ò ń utanɔ gà ò kɛ̃̀kɛ̃, akũ ń baadi a aso yĩ̀ a zaakinɛ ò ɛ̀ra ò gɛ̃̀ wɛ̃tɛ gũn. 14Kũ Yuda kũ a gbɛ̃nɔ kà Yusufu bɛa, ò a lè gwe, akũ ò kùtɛ a arɛ zĩtɛ. 15À pìńnɛ: Bɔ́yãin a kɛ̀ lɛɛ? Á dɔ̃ kũ ma taka dì màso kɛroo? 16Yuda wèa à pì: Dikiri, óni pinnɛ deramɛɛ? À yãke ona vĩro. Óni kɛ dera ò ó zĩda bo yãnn? Luda mɛ́ à bò ó taaria. Dikiri, o gɔ̃ n zɔ̀nɔ ũ dí, ókɔ̃nɔ kũ gbɛ̃ kũ ò toko pìi lè a kĩnaao. 17Akũ Yusufu pì: Kai! Mani fɔ̃ mà abire kɛro. Gbɛ̃ kũ ò toko pìi lèa mɛ́ ani gɔ̃ ma zɔ̀ ũ, á gbɛ̃ kparanɔ áni ɛra à tá á de kĩnaa aafia.

Yuda wɛ́kɛna Yusufua Biliaminunɛ

18Akũ Yuda nài à pì: N yã nna dikiri! Ǹ tó makũ n zɔ̀bleri mà yã onnɛ. Ǹsun pɔ fɛ̃mairo dikiri, zaakũ ń sára kũ Firi'aunaomɛ. 19Dikiri, n ó lá yã tó ó de vĩ ke dakũna. 20Akũ o pì ó de zĩ kũ̀, akũsɔ̃ ó dakũna kun dɔ, ó de a ì a zĩkũnaa gũmmɛ. Nɛ́ pìi vĩ̀ni dadokɔ̃nɔde gà, àkũ mɛ́ à gɔ̃̀ ado, akũ ó de pì yei manamana. 21N ò ókɔ̃nɔ n zɔ̀blerinɔnɛ ò a sɛ́ ò su kãaonnɛ de ǹ wɛ́ sialɛ. 22Dikiri, o pìnnɛ nɛ́ pì ni fɔ̃ à a de tóro. Tó à a tò, de pì ni gamɛ. 23Akũ n pìwɛrɛ, tó ódi su kũ ó dakũna pìioro, óni wɛ́ sikɔ̃lɛro. 24Kũ o ta ó de kĩnaa, o n yã ònɛ. 25Akũ ó de pìi pì ò ɛra ò gɛ́ pɔ́blewɛ lú fíti dɔ. 26O pì, tó adi kɛ ó dakũna kú kũoo baasiro, óni fɔ̃ ò gɛ́ro, zaakũ tó à kú kũooro, óni wɛ́ sikɔ̃lɛro. 27Akũ ó de pìwɛrɛ, ó dɔ̃ kũ a nanɔ nɛ́ ì mɛ̀n pla. 28Kũ a do bò a bɛa, adi a e doro ari gbãra. À pì nɔ̀bɔ pãsĩ mɛ́ à a sò. 29À pì tó o nɛ́ bire sìawa, akũ yã vãni a lè, lákũ a zĩ kũ̀ nà, óni tó à tá miran kũ pɔsiraomɛ. 30Tera sà, tó ma ta ma de kĩnaa, akũ a nɛ́ pì kú kũooro, ani gamɛ, zaakũ a pɔ kúamɛ. 31Tó ó de dí nɛ́ pì e ó tɛ́ro, ani tá miran a zĩkũnaa gũn kũ pɔsiraomɛ. 32Ma a zĩda kpà ma dea nɛ́ pìi gɛ̃nɛ ũmɛ, ma pì tó mádi sunɛ kãaoro, mani gɔ̃ a taaride ũ ari ma wɛ̃̀ndi lɛ́n. 33Dikiri, n yã nna! Ǹ tó mà gɔ̃ n zɔ̀ ũ nɛ́ pìi gɛ̃nɛ ũ de à tá kũ a vĩ̀ninɔ. 34Tó adi kɛ kũ nɛ́ pìioro, mani fɔ̃ mà tá ma de kĩnaaro. Ǹsun tó mà yã vãni kũ ani ma de le ero.

Currently Selected:

NAANAA 44: BB2005

Highlight

Copy