NAANAA 43

Yusufu vĩ̀ninɔ ɛra ò gɛna Misila kũ Biliaminuo

1Nà pãsĩ kũ̀ Kanaanɔ bùsun. 2Kũ ò pɔ́blewɛ kũ ò bòo Misila blè ò làka, ń de pìńnɛ: À ɛra à gɛ́ pɔ́blewɛ lú fíti dɔ. 3Akũ Yuda pìnɛ: Gɔ̃gbɛ̃ pìi òwɛrɛ sãnsãmmɛ à pì, tó ó dakũna kú kũooro, óni wɛ́ sikɔ̃lɛro. 4Tó ĩni we ó dakũna gɛ́ kũoo, óni gɛ́ ò pɔ́blewɛ lúnnɛ. 5Tó ńdi we sɔ̃ro, óni gɛ́ro, zaakũ gbɛ̃ pìi òwɛrɛ, tó ó dakũna kú kũooro, óni wɛ́ sikɔ̃lɛro. 6Akũ Isaraila pì: Bɔ́ yã mɛ́ à tò a wari dɔ̀ma, kũ a ò gbɛ̃ pìinɛ á dakũna vĩi? 7Ò wèa ò pì: Àkũ mɛ́ à yã gbɛ̀kawá kũ ó bedenɔ yão à pì: Á de kun ari tera yá? Á dakũna vĩ yá? Yã birenɔ musun o wea. Ó dɔ̃ yã ani pi ò su kũ ó dakũnaon yá? 8Akũ Yuda pì a denɛ: Ǹ tó nɛ́ pì gɛ́ kũmao. Óni futɛ ò gɛ́ gɔ̃̀nɔmɛ, de ókɔ̃nɔ kũ mɔkɔ̃nwo kũ ó nɛ́nɔ òsun gagaro yãi, ónigɔ̃ kun aafia. 9À gɔ̃̀ ma yã ũmɛ. Ma a zĩda wɛ̃̀ndii dìtɛ a pɔ́ gɛ̃nɛ ũ. Tó mádi su kãaonnɛ aafiaro, ma gɔ̃ n taaride ũmɛ. 10Tó ódi sika kɛ yãro, de o gɛ kũ gɛ̃̀n pladeo o su. 11Akũ ń de pìńnɛ: Tó lɛmɛ, à yã díkĩna kɛ. À ó bùsu pɔ́ mananɔ sɛ́tɛ à ká á asasanɔ gũn à gɛ́ à gɔ̃gbɛ̃ pì gba. À lí'ɔ ɛzɛ sɛ́ fíti kũ zɔ́'io fíti kũ do pɔ́nɔ kũ lí'ɔ gbĩ nnannao kũ gɔ̀rɔɔo kũ sĩo. 12À gɛ́ kũ ɔgɔo lɛu pla à ɔgɔ kũ ò dàárɛ á asasanɔ gũn ɛrańnɛ. Ke ò sã̀tɛn yá, á dɔ̃ro. 13À á dakũna sɛ́ à ɛra à gɛ́ gɔ̃gbɛ̃ pì kĩnaa. 14Luda Gbãnasĩndapinkide tó gbɛ̃ pì á wɛ̃nda gwa à á gbɛ̃ndo kũ Biliaminuo gbarɛ ò su kãáo. Makũ sɔ̃, tó Luda ma nɛ́nɔ sìmamɛ, à sìman gwe.

15Ò pɔ́ kũ oni gɛ́ ò a gba pìnɔ sɛ̀tɛ kũ ɔgɔo lɛu pla kũ Biliaminuo ò fùtɛ ò gɛ̀ɛ Misila, akũ ò gɛ̀ɛ Yusufu kĩnaa. 16Kũ Yusufu Biliaminu è ń tɛ́, à pì a bɛgwariinɛ: Ǹ gɛ́ kũ gbɛ̃ birenɔ ma bɛa. Ǹ nɔ̀bɔ dɛ ǹ kɛkɛ, zaakũ gbɛ̃ pìnɔ ni pɔ́ ble kũmao fãnantɛ̃aramɛ. 17Bɛgwarii pì yã kũ Yusufu dànɛɛ kɛ̀ à gɛ̀ɛ kũńwo a bɛa. 18Kũ òtɛn gɛ́ kũńwo Yusufu bɛa lɛ, vĩna ń kũ ò pì: Ɔgɔ kũ ò dà ó asasanɔ gũn yã mɛ́ à tò òtɛn su kũoo la. Ò ye ò lɛ́tɛwá ò gbãna mɔwɛrɛ ò ó kũkũ zɔ̀nɔ ũ ò ó zaakinɔ sɛ́tɛmɛ. 19Kũ ò kà Yusufu bɛ kpɛ́lɛlɛa, ò nà a bɛgwarii pìii ò pì: 20Mare, n yã nna! O su ò pɔ́blewɛ lú la yã káaku. 21Kũ o ka gu kũ óni in, o ó asasanɔ pòro, akũ ó baadi a ɔgɔ lè a asasa lɛ́n papana. Akũ o su kũ ɔgɔ pìio ó ɔĩ. 22O su kũ ɔgɔ pãndeo de ò pɔ́ble pãnde lúo. Ó dɔ̃ gbɛ̃ kũ à ɔgɔ pìi dà ó asasanɔ gũnlo. 23Bɛgwarii pìi pì: Àsun damu kɛro, àsun vĩna kɛro. Á Luda, á de Luda mɛ́ à ɔgɔ pìi dàárɛ á asasanɔ gũn. Á ɔgɔ ma ki lè. Akũ à Simɛɔ bòńnɛ. 24Bɛgwarii pìi gɛ̃̀ kũńwo Yusufu ɔnn, à í kpàḿma ò zú oo, akũ à sɛ̃̀ɛ kpà ń zaakinɔa. 25Akũ ò pɔ́ kũ oni Yusufu gba pì yã kɛ̀kɛ ari àgɔ̃ gɛ́ su fãnantɛ̃, zaakũ ò mà oni pɔ́ ble a bɛamɛ.

26Kũ Yusufu sù bɛ, ò a gbà pɔ́ kũ ò sùoo pìnɔ ò wùtɛ zĩtɛ a arɛ. 27À ń aafiaa gbɛ̀ka, akũ à pì: Á de zĩkũna kũ a a yã òo pì gbãna yá? À kú kũ wɛ̃̀ndiio yá? 28Ò wèa ò pì: Ó de n zɔ̀bleri gbãna à kun ari tera. Akũ ò kùtɛnɛ ò arɛ pɛ̀tɛ zĩtɛ. 29Yusufu wɛ́ sɛ̀ à a dakũna dadokɔ̃nɔde Biliaminu gwà à pì: Á dakũna kũ a a yã òmɛnɛ pìin dí yá? Akũ à pì Biliaminunɛ: Luda arubarika dangu. 30Kũ à a dakũna gwà, a pɔ kɛ̀ nna zɔ̃kɔ̃ à ye à ɔ́ɔ dɔ, akũ à gɛ̃̀ kpɛ́nɛn likalika à ɔ́ɔ dɔ̀ gwe. 31Kũ à ãnn pìpi, akũ à bò à a zĩda kũ̀ à pì ò su kũ pɔ́bleo.

32Ò pɔ́ble dìtɛnɛ ado, ń pɔ́ sɔ̃ adona, Misila kũ ò kú kãaonɔ pɔ́ adona dɔ, zaakũ Misilanɔ dì pɔ́ ble kũ Eberunɔro òdi kakara kũńworo. 33Ò ń vútɛvutɛ a arɛ ń sárakɛa, zaa dauduua ari ń gbɛ̃ kpɛdea, akũ ò lɛ́ àtɛ ò kɔ̃ gwàgwa. 34Akũ ò pɔ́ble kũ à kú Yusufu arɛ kpàatɛtɛńnɛ. Biliaminu pɔ́ zɔ̃kɔ̃ de gbɛ̃ kparanɔ pɔ́la lɛu sɔɔro. Akũ ò pɔ́ blè ò í mì kũ Yusufuo ari ò kã̀.

Currently Selected:

NAANAA 43: BB2005

Highlight

Copy