NAANAA 42

Yusufu vĩ̀ninɔ suna pɔ́blewɛ lú Misila

1Kũ Yakubu mà pɔ́blewɛ kú Misila, à pì a nɛ́nɔnɛ: Ánigɔ̃ kátɛ la pã yá? 2Ma mà pɔ́blewɛ kú Misila. À gɛ́ lúwɛrɛ gwe, de òsun garo, ògɔ̃ kun aafia yãi. 3Akũ Yusufu vĩ̀ni gbɛ̃nɔn kurinɔ gɛ̀ɛ Misila pɔ́blewɛ lú. 4Yakubu dí Yusufu dakũna Biliaminu zĩ kũńworo, zaakũ à pì: Òdigɔ̃ dɔ̃ro tó yã vãni ni a le. 5Akũ Isaraila nɛ́ pìnɔ gɛ̀ɛ pɔ́blewɛ lú kũ gbɛ̃ pãndenɔ, zaakũ nàa pìi kà Kanaanɔ bùsun dɔ.

6Yusufu mɛ́ à bùsuu pì gbɛ̃ zɔ̃kɔ̃ ũ. Àkũ mɛ́ àdi pɔ́blewɛ yía gbɛ̃ sĩnda pínkia. Akũ a vĩ̀ninɔ sù ò kùtɛnɛ ò ń arɛ pɛ̀tɛ zĩtɛ. 7Kũ à a vĩ̀ninɔ è, à ń dɔ̃, akũ à a zĩda kɛ̀ńnɛ nibɔ ũ. Akũ à yã òńnɛ pãsĩpãsĩ à ń lá à pì: A bo máa? Ò wèa ò pì: O bo Kanaanɔ bùsun o su pɔ́blewɛ lúmɛ. 8Yusufu a vĩ̀ninɔ dɔ̃̀, ama odi a dɔ̃ro. 9Nana kũ à ò yã ń yã musu dɔ̀agu, akũ à pìńnɛ: Gu'asirigwarinɔn á ũ, a su ó bùsu kĩaki gwamɛ. 10Ò wèa ò pì: Oi dikiri! N zɔ̀blerinɔn ó ũ, o su pɔ́blewɛ lúmɛ. 11Dedokɔ̃nɔdenɔmɛ ó ũ ó pínki. Náanidenɔmɛ ó ũ. Ókɔ̃nɔ n zɔ̀blerinɔ, gu'asirigwarinɔmɛ ó ũro. 12Akũ à pìńnɛ: Ɛ́kɛmɛ! A su ó bùsu asiri dɔ̃mɛ. 13Ò pì: Ókɔ̃nɔ n zɔ̀blerinɔ, dedokɔ̃nɔdenɔmɛ ó ũ, ó gbɛ̃nɔn kuri awɛɛplamɛ. Kanaanɔ bùsu gbɛ̃nɔmɛ ó ũ. Ó dakũna gɔ̃̀ bɛ kũ ó deo, ó gbɛ̃ do kunlo. 14Akũ Yusufu pìńnɛ: Lákũ ma òárɛ nà, gu'asirigwarinɔmɛ á ũ. 15Yã kũ ani tó mà á yãpura dɔ̃n dí. Kũ Firi'auna kunnaao áni bɔtɛ laro, séto á dakũna pìi sù la baasiro. 16À á gbɛ̃ do zĩ à á dakũna sɛ́, á gbɛ̃ kparanɔ ni gɔ̃ kpɛ́siran la, mani dɔ̃ tó á yã yãpuramɛ. Tó lɛnlo, kũ Firi'auna kunnaao gu'asirigwarinɔn á ũ. 17Akũ à ń ká kpɛ́n ari gɔrɔ aakɔ̃. 18A gɔrɔ aakɔ̃de zĩ à pìńnɛ: Má Luda vĩna vĩ. À yã kũ mani oárɛ kɛ áni bo aafia. 19Tó náanidenɔmɛ á ũ, à á gbɛ̃ do tó da kpɛ́n la, á gbɛ̃ kparanɔ ni tá kũ pɔ́blewɛo á bede nàdɛrinɔnɛ, 20áni ɛra à sumɛnɛ kũ á dakũna pìio, mani dɔ̃ kũ á yã yãpuramɛ, oni á dɛdɛ doro. Akũ ò wèi lɛ.

21Ò pìkɔ̃nɛ: Yãpuramɛ taaridenɔn ó ũ yã kũ o kɛ̀ ó dakũnanɛ yã yãi. O è gɔrɔ kũ àtɛn kútɛ kɛwɛrɛ, à kɛ̀ wɛ̃nda, akũ ódi a yã maro. Abire yãin yã dí ó lé. 22Akũ Rubɛni pìńnɛ: Kũ ma òárɛ àsun yãke kɛ nɛ́ pìinɛro, ádi ma yã maro. A aru fĩnan Luda tɛn bowá dí. 23Ò dɔ̃ Yusufu tɛn maro, zaakũ kũ àtɛn yã ońnɛ, òtɛn litɛńnɛmɛ. 24Akũ à gò ń kĩnaa à gɛ̀ɛ à ɔ́ɔ dɔ̀. Kũ à sù, à yã òńnɛ, akũ à Simɛɔ bò ń gũn à a yĩ̀ ń wára. 25Yusufu pì ò pɔ́blewɛ káńnɛ ń asasanɔ pa ò ń baadi ɔgɔ danɛ a pɔ́n ò zɛ́ kusuna kɛńnɛ. Kũ ò kɛ̀ńnɛ lɛ, 26ò ń pɔ́blewɛnɔ dì ń zaakinɔnɛ, akũ ò dà zɛ́n.

27Kũ ò kà gu kũ òtɛn in, kũ ń gbɛ̃ do a asasa pòro de à pɔ́ kpá a zaakia, akũ à a ɔgɔ è a asasa lɛ́n. 28Akũ à pì a gbɛ̃nɔnɛ: À ma asasa gũn gwa, ò ma ɔgɔ sùkpamɛnɛ! Akũ swɛ̃̀ɛ kɛ̃̀ńgu, ò pìkɔ̃nɛ kũ lukanaao: Bɔ́ yãn Luda kɛ̀wɛrɛ lɛɛ? 29Kũ ò kà ń de Yakubu kĩnaa Kanaanɔ bùsun, ò yã kũ à ń lé bàbanɛ pínki ò pì: 30Bùsu gbɛ̃ zɔ̃kɔ̃ɔ pì yã òwɛrɛ pãsĩpãsĩ, a ó dítɛ gu'asirigwarinɔ ũ. 31O pìnɛ náanidenɔmɛ ó ũ, gu'asirigwarinɔmɛ ó ũro. 32Dedokɔ̃nɔdenɔmɛ ó ũ, ó gbɛ̃nɔn kuri awɛɛplamɛ, ó gbɛ̃ do kunlo, ó dakũna gɔ̃̀ Kanaanɔ bùsun kũ ó deo. 33Akũ bùsu gbɛ̃ zɔ̃kɔ̃ɔ pìi pìwɛrɛ yã kũ ani tó á ó dɔ̃ náanidenɔ ũn dí. À pì ò ó gbɛ̃ do tó kãao, ò pɔ́blewɛ sɛ́ ò táo ó bede nàdɛrinɔnɛ, 34ò ɛra ò suárɛ kũ ó dakũnao, áni dɔ̃ sà kũ gu'asirigwarinɔmɛ ó ũro, náanidenɔmɛ ó ũ, áni ó gbɛ̃ndo kpáwá, óni laga tá bùsuu pìn.

35Kũ òtɛn pɔ́blewɛ bɔtɛ ń asasanɔ gũn, ń baadi a ɔgɔsɔ̃nɔnɔ è a pɔ́ gũn. Kũ ò ń ɔgɔnɔ è lɛ, vĩna ń kũ ń pínki kũ ń deo. 36Akũ ń de pìńnɛ: Á ye mà gɔ̃ nɛ́ sarin yá? Yusufu kunlo, Simɛɔ kunlo, akũ á ye à Biliaminu síma dɔ yá? Yã sĩnda pínki tɛn bomɛnɛ vãnimɛ. 37Akũ Rubɛni pì a denɛ: Tó mádi su kãaonnɛro, ǹ ma nɛ́gɔ̃gbɛ̃ planɔ dɛdɛ. Ǹ a kpáma, mani su kãaonnɛ. 38Akũ Yakubu pì: Ma nɛ́ ni gɛ́ kãáoro, zaakũ a vĩ̀ni dadokɔ̃nɔde gà, àkũ à gɔ̃̀ ado. Ma zĩ kũ̀. Tó yãke a lè tá kũ átɛn o gũn, ani tó mà tá miran kũ pɔsiraomɛ.

Currently Selected:

NAANAA 42: BB2005

Highlight

Copy