NAANAA 33

Yakubu wɛ́sina Isaulɛ

1Kũ Yakubu wɛ́ sɛ̀, à è Isau tɛn su kũ gbɛ̃nɔn wàa planɔ. À a nɛ́nɔ kpàatɛtɛ Leanɛ kũ Rahilao kũ nɔgbɛ̃ zĩkɛri mɛ̀n planɔ. 2Akũ à nɔgbɛ̃ zĩkɛrii pìnɔ gbàrɛ ò do arɛ kũ ń nɛ́nɔ. Abire gbɛra Lea kũ a nɛ́nɔ, akũ Rahila kũ Yusufuo tɛ́ ń kpɛ. 3À dòńnɛ arɛ à kùtɛ zĩtɛ gɛ̃̀n suppla ari à gɛ̀ɛ à kào a vĩ̀ni pì kĩnaa. 4Akũ Isau bàa lɛ̀ à sù à dàalɛ à mlɛ̃̀a à ɔ dà a gã̀n à lɛ́ pɛ̀a, akũ ò ɔ́ɔ dɔ̀. 5Isau wɛ́ sɛ̀ à nɔgbɛ̃nɔ è kũ nɛ́nɔ, akũ à pì: Dínɔ mɛ́ ò kú kũnwo laa? Yakubu wèa à pì: Nɛ́ kũ Luda ma gbanɔmɛ. 6Akũ nɔgbɛ̃ zĩkɛrii pìnɔ nàńyĩ kũ ń nɛ́nɔ ò kùtɛ. 7Akũ Lea kũ a nɛ́nɔ nàńyĩ dɔ ò kùtɛ. Abire gbɛra Yusufu kũ Rahilao nàńyĩ ò kùtɛ. 8Isau pì: Pɔ́ kũ ma dańlɛ dínɔ de deramɛɛ? Yakubu wèa à pì: De mà n pɔnna le yãimɛ. 9Isau pì: Ma gbɛ̃, ma pɔ́nɔ mɔ̀ma, ǹgɔ̃ n pɔ́nɔ kũna. 10Akũ Yakubu pì: Oi! N yã nna! Tó ma n pɔnna lè, ǹ ma gba sí, zaakũ ó wɛ́sikɔ̃lɛnaa kɛ̀mɛnɛ lán wɛ́sikɔ̃lɛna kũ Ludaoo bàmɛ, akũ n gbãnakɛ kpàmai. 11Ǹ gba kũ ma suonnɛ sí, zaakũ Luda arubarikaa dàmagu, pɔ́ke dí kĩamaro. Lɛmɛ à nàkaraa lɛ, akũ à sì.

12Akũ Isau pì: Ò da zɛ́n ò tá. Mani gɛ́ kũnwo. 13Akũ à wèa à pì: Ma dikiri, ń dɔ̃ kũ nɛ́nɔn gbãna vĩro, akũ má sã kũ zùnɛ bɔ̀rɔnɔ vĩ. Tó o tá gbãna ò gɔrɔ do, pɔ́kãdenɔ ni gaga pínkimɛ. 14Ǹ domɛnɛ arɛ ma dikiri, makũ n zɔ̀bleri manigɔ̃ tɛ́ pɔ́nɔ kpɛ kũ nɛ́nɔ busɛbusɛ ari mà su mà n le Sei. 15Isau pì: Mani ma gbɛ̃kenɔ tó kũnwo. Yakubu pì: À kɛ̀ dera ĩni kɛ lɛ dɔɔ? Ǹ tó mà n pɔnna le dikiri. 16Zĩ kũ̀an Isau dà Sei zɛ́n. 17Akũ Yakubu gɛ̀ɛ Suko. À bɛ bò gwe, akũ à lá kutanɔ dɔ̀ pɔ́nɔnɛ. A yã mɛ́ à tò, ò tɔ́ kpà gu pìinɛ Suko.

18Kũ Yakubu sù kũ Mɛsɔpɔtamiao, à kà wɛ̃tɛ kũ òdi pinɛ Sɛkɛmu, Kanaanɔ bùsun aafia, akũ à bùraa kàtɛ wɛ̃tɛ pìi sarɛ. 19À a bùrakũki lù Sɛkɛmu de Amɔ nɛ́nɔa andurufu basɔɔro. 20Gwen à sa'oki bòn, à tɔ́ kpànɛ Luda Isarailanɔ Luda.

Currently Selected:

NAANAA 33: BB2005

Highlight

Copy