NAANAA 32

Yakubu gbɛ̃nɔ zĩna Isaua

1Yakubu dà zɛ́n, akũ Luda malaikanɔ dàalɛ. 2Kũ à ń é, à pì: Luda bùraan dí. Akũ à tɔ́ kpà gu pìinɛ Manaimu. 3À zĩ̀rinɔ zĩ̀ a arɛ a vĩ̀ni Isaua Sei bùsu kũ ò pi dɔ Ɛdɔmu bùsun. 4À pì a zĩ̀rinɔnɛ: À gɛ́ à o ma dikiri Isaunɛ a zɔ̀bleri Yakubu gɔrɔ pla kɛ̀ Labã bɛa àtɛn su sà. 5À onɛ má zùnɔ vĩ kũ zaakinɔ kũ sãnɔ kũ blènɔ kũ gɔ̃gbɛ̃ zĩkɛrinɔ kũ nɔgbɛ̃ zĩkɛrinɔo. Makũ mɛ́ ma á zĩ à onɛ de ma a pɔnna le.

6Kũ zĩ̀rinɔ ɛ̀ra ò sù Yakubu kĩnaa, ò pì: O gɛ n vĩ̀ni kĩnaa, àtɛn su à danlɛ kũ gbɛ̃nɔn wàa planɔ. 7Vĩna Yakubu kũ̀ àtɛn bídi kɛ manamana, akũ à gbɛ̃ kũ ò kú kãaonɔ kpàatɛ lɛu pla kũ sãnɔ kũ blènɔ kũ zùnɔ kũ lakuminɔo à pì: 8Tó Isau sù à sì a lɛu doa, a lɛu do kũ à gɔ̃̀ ni bo. 9Akũ à adua kɛ̀ à pì: Dikiri, ma dizi Ibrahĩ kũ ma de Isaakuoo Luda, n òmɛnɛ mà su ma bùsun ma danɛnɔ kĩnaa, ĩni arubarika damagu. 10N gbɛ̃kɛ kũ náani yãoo kɛ̀mɛnɛ manamana, ma bɛ̀ɛrɛ dí káro. Gɔrɔ kũ ma bikũ Yodaa, gò mɛ́ à na ma ɔĩ ado. Tera sà ma su kũ aruzɛkɛ lɛu pla díkĩnanɔ. 11Ma wɛ́ kɛ̀mma ǹ ma sí ma vĩ̀nia, zaakũ matɛn vĩna kɛnɛ kũ ani sí ó tɛ́ à nɔgbɛ̃nɔ kũ nɛ́nɔ dɛdɛ yãi. 12Mɔkɔ̃n sɔ̃, n pì ĩni arubarika damagu ĩni ma buri kara lán ísiralɛ bùsu'atɛ̃ bà oni fɔ̃ ń naroro ń dasi yãi.

13Gwen Yakubu ìn. Pɔ́ kũ à plɛ̀plɛ à a vĩ̀ni gbanɔn dí: 14Blèda mɛ̀n wàa do, a kofĩni mɛ̀n baro, sãda mɛ̀n wàa do, a karo mɛ̀n baro, 15lakumida mɛ̀n baraakuri kũ ń nɛ́ bɔ̀rɔnɔ, zùda mɛ̀n bupla, a sà mɛ̀n kuri, zaakida mɛ̀n baro, a sà mɛ̀n kuri. 16À ń ná a zĩkɛrinɔnɛ ń ɔĩ buri kũ burio, akũ à pìńnɛ: Àgɔ̃ tɛ́ ma arɛ à kpango da á dagura gã̀ kũ gã̀ao. 17À pì gbɛ̃ káakunɛ: Tó ma vĩ̀ni dànlɛ à n la à pì: Dímɛ n dikiri ũu? Ntɛn gɛ́ mámɛɛ? Dí mɛ́ à pɔ́ kũ ntɛn dã dínɔ vĩi? 18Ǹ onɛ a zɔ̀bleri Yakubu pɔ́mɛ, pɔ́ kũ à a dikirii gbà à kpã̀zãnɛnɔn gwe, àpii tɛn su kpɛ. 19A yã dokɔ̃nɔ pìi ò gbɛ̃ pladenɛ kũ gbɛ̃ aakɔ̃deo kũ pɔ́dãrinɔ ń pínki à pì: Tó a da Isaulɛ, à onɛ lɛ. 20À onɛ a zɔ̀bleri Yakubu tɛn su kpɛ. Zaakũ à laasun lɛ̀ à pì: Mani a laakari kpátɛ kũ pɔ́ kũ ma kpà arɛ dínɔ, óni wɛ́ sikɔ̃lɛ. Ani gí gbãnakɛ kpámai sà yá? 21Gba pìnɔ dònɛ arɛ, akũ à gɔ̃̀ bùran gwãani kũ̀a à ì gwe.

Yakubu ɔsikana kũ Ludao

22À fùtɛ gwãani à a nɔ mɛ̀n planɔ sɛ̀tɛ kũ a nɔgbɛ̃ zĩkɛri mɛ̀n planɔ kũ a nɛ́gɔ̃gbɛ̃ gbɛ̃nɔn kuri awɛɛdonɔ, akũ à bikũ̀ kũńwo Yaboku bikũkia. 23Kũ à bikũ̀ kũńwo, akũ à pɔ́ kũ à vĩnɔ sɛ̀tɛ à bikũ̀o pínki. 24Yakubu gɔ̃̀ ado, akũ gɔ̃gbɛ̃ ke sù àtɛn ɔsi ká kãao ari gu kà dɔna. 25Kũ gɔ̃gbɛ̃ pìi è áni fɔ̃ à a nɛ́ro, à a lɛ̀ a gisipɛkɛrɛkia, akũ a gisi bòkũn ɔsikanaa pìi gũn. 26Gɔ̃gbɛ̃ pìi pì: Ǹ ma gbarɛ, zaakũ gu tɛn dɔ. Akũ Yakubu pìnɛ: Tó adi kɛ ǹ arubarika damagu baasiro, mani n gbarɛro. 27Gɔ̃gbɛ̃ pì a là à pì: N tɔ́n deraa? À wèa à pì: Ma tɔ́n Yakubu. 28Akũ à pì: Oni pinnɛ Yakubu doro, séde Isaraila, zaakũ n ɔsi kà kũ Ludao kũ bisãsirinɔ, akũ n ɔsi nɛ̀. 29Yakubu pìnɛ: Ǹ n tɔ́ omɛnɛ se. A wèa à pì: Bɔ́yãi ntɛni ma tɔ́ gbɛkaa? Akũ à arubarikaa dàn gwe. 30Yakubu tɔ́ kpà gu pìinɛ Pɛniɛli, zaakũ à pì: O wɛ́ sìkɔ̃lɛ kũ Ludao, akũ mádi garo. 31À bò Pɛniɛli ifãntɛ̃bona àtɛn tɔ̃ɔtɛ a gisi wãwã yãi. 32A yã mɛ́ à tò ari gbãra Isarailanɔ dì nɔ̀bɔ tugisi sóro, kũ Luda Yakubu lɛ̀ a tugisia yãi.

Currently Selected:

NAANAA 32: BB2005

Highlight

Copy