NAANAA 30

1Kũ Rahila è átɛn nɛ́ i kũ Yakubuoro, à gɔ̃ba kpà kũ a vĩ̀nio. Akũ à pì Yakubunɛ: Ǹ nɔ̀ dɔmagu. Tó mádi e sɔ̃ro, mani gamɛ. 2Yakubu pɔ fɛ̃̀i à pì: Makũmɛ Luda ũ kũ à n tɛ̃ nɛ́ yá? 3Akũ Rahila pì: Ma zĩkɛri Bilan dí. Ǹ gɛ́ i kãao à nɛ́nɔ imɛnɛ, mani buri le se a gãi. 4Akũ à a zĩkɛri Bila kpàa nɔ ũ. Yakubu wùtɛ kãao, 5akũ à nɔ̀ɔ sì à nɛ́ ì gɔ̃gbɛ̃ ũ. 6Akũ Rahila pì: Luda tò yã bò kũmao nna à ma yã mà à ma gba nɛ́gɔ̃gbɛ̃. Akũ à tɔ́ kpànɛ Dã. 7Rahila zĩkɛrii pìi ɛ̀ra à nɔ̀ɔ sì à nɛ́ ì gɔ̃gbɛ̃ ũ dɔ, 8akũ Rahila pì: Ma ɔsi zɔ̃kɔ̃ɔ kà kũ ma vĩ̀nio ma ɔsi nɛ̀. Akũ à tɔ́ kpànɛ Nafatali.

9Kũ Lea è a nɛ́'i zɛ̀, akũ à a zĩkɛri Zilipa kpà Yakubua nɔ ũ dɔ. 10Akũ Lea zĩkɛrii pì nɛ́ ì gɔ̃gbɛ̃ ũ kũ Yakubuo. 11Akũ Lea pì: Mìnnamɛ. Akũ à tɔ́ kpànɛ Gada. 12Akũ Lea zĩkɛrii pì nɛ́ ì gɔ̃gbɛ̃ ũ dɔ kũ Yakubuo. 13Akũ Lea pì: Ma pɔ kɛ̀ nna, zaakũ nɔgbɛ̃nɔ ni pi pɔnnaden ma ũ. Akũ à tɔ́ kpànɛ Asa.

14Rubɛni bò ésekɛ̃gɔrɔa à yenyĩ ɛzɛ è sɛ̃̀n, akũ à bòbo à sùo a da Leanɛ. Akũ Rahila pìnɛ: Ǹ n nɛ́ yenyĩ ɛzɛ pì dãmɛnɛ. 15Lea pìnɛ: Kũ n ma gɔ̃ sìma, abire dí mɔ́mmaro, akũ ń ye ǹ ma nɛ́ yenyĩ ɛzɛ sí dɔ yá? Rahila pì: Tó n kpàma, mɔkɔ̃mmɛ ĩni i kãao gbãra.

16Kũ Yakubu tɛn su kũ burao ɔkɔsi, Lea bò à gɛ̀ɛ à dàalɛ à pì: Makũmɛ mani wutɛ kũnwo gbãra, zaakũ ma n sãkã ma nɛ́ yenyĩ ɛzɛ yãimɛ. Akũ à ì kãao gwãani birea. 17Luda Lea wɛ́kɛ sì, akũ à nɔ̀ɔ sì à Sãani ì kũ Yakubuo. 18Akũ Lea pì: Luda láada kpàma, kũ ma a zĩkɛrii kpà ma zãa yãi. Akũ à tɔ́ kpànɛ Isaka. 19Lea ɛ̀ra à nɔ̀ɔ sì dɔ à Tori ì, 20akũ à pì: Luda gba mana dàmɛnɛ. Adikĩna sà ma zã ni ma kpe ta, zaakũ ma nɛ́gɔ̃gbɛ̃nɔ ì kãao mɛ̀n suddo. Akũ à tɔ́ kpànɛ Zɛbuluni. 21Kũ à kɛ̀ saa à nɛ́nɔgbɛ̃ ì, akũ à tɔ́ kpànɛ Dina.

22Akũ Rahila yã dɔ̀ Ludan à a wɛ́kɛ sì, akũ à kɛ̀ nɛ́rande ũ. 23À nɔ̀ɔ sì à nɛ́gɔ̃gbɛ̃ ì, akũ à pì: Luda wé'i bòmɛnɛ. 24Akũ à tɔ́ kpànɛ Yusufu à pì: Dikiri ɛra à nɛ́gɔ̃gbɛ̃ pãnde karamɛnɛ dɔ.

Yakubu pɔ́nɔ dãna Labãnɛ

25Kũ Rahila Yusufu ì, Yakubu pì Labãnɛ: Ǹ ma gbarɛ mà tá ma bùsun. 26Ma zĩ kɛ̀nnɛ ma nɔnɔ kũ ma nɛ́nɔ yãi. Ǹ ń kpáma mà tá, zaakũ ń dɔ̃ lákũ ma zĩ kɛ̀nnɛ nà. 27Akũ Labã pìnɛ: Tó ma n pɔnna lè, ǹ gɔ̃ kũmao la. Ma màsoo kɛ̀ ma è Dikiri arubarikaa kɛ̀magu n yãi. 28Ǹ n làada omɛnɛ, mani kpámma. 29Yakubu pìnɛ: Ń dɔ̃ lákũ ma zĩ kɛ̀nnɛ nà. Ń dɔ̃ lákũ n pɔ́kãdenɔ kɛ̀ ma ɔĩ nà, 30zaakũ a fíti kũ ń vĩ zaade mádi suro kàra manamana. Dikiri arubarikaa dàngu gu kũ ma gɛn n bɛa pínki. Bɔrɛn mani ma zĩda bɛ zĩ kɛ sɔ̃ɔ? 31Labã à là à pì: Bɔ́n mani fĩna boonnɛɛ? Yakubu wèa à pì: Ǹsun pɔ́ke kpámaro, ama ǹ yã dí kɛmɛnɛ, manigɔ̃ n pɔ́nɔ dãnnɛ. 32Ǹ tó mà gɛ̃ n pɔ́nɔ tɛ́ gbãra mà sã bakibakinɔ kũ a totontotonnɔ plɛplɛ ma làada ũ kũ sãnɛ bɔ̀rɔ siranɔ kũ blè bakibakinɔ kũ a totontotonnɔo. 33Tó n ma làadaa gwà gɛna gɔrɔ arɛ, ĩni dɔ̃ tó má yãpura vĩ. Blè kũ à kun bakibakiro akũ à totontotonlo, ke sãnɛ bɔ̀rɔ kũ à siraro, ɛ̃hɛ̃ ma kpãni òmɛ. 34Labã pì: Tɔ̀! Àgɔ̃ de lákũ n ò nà. 35Zĩ kũ̀a Labã a blèkofĩni bakibakinɔ sɛ̀ kũ a wãnzãndenɔ kũ blèda totontotonnɔ kũ a bakibakinɔ, pɔ́ kũ ò pura vĩnɔ pínki kũ sãnɛ bɔ̀rɔ siranɔ pínki, à ń ná a nɛ́gɔ̃gbɛ̃nɔnɛ ń ɔĩ. 36Akũ à zàaa bò ń dagura kũ Yakubuo lán gɔrɔ aakɔ̃ tá bà, akũ Yakubu tɛn Labã pɔ kparanɔ dã.

37Yakubu lí buri aakɔ̃ gã̀ búsunɔ zɔ̃̀zɔ̃ à ń wãnzãn kpàkpa à ń wãnzãn kɛ̀ púu. 38Akũ à lí kũ à ń wãnzãn kɛ̀aa pìnɔ pɛ̀tɛpɛtɛ pɔ́nɔ gó ímibɔnɔ gũn, pɔ́ kũ òtɛn su í minɔ wɛ́n, zaakũ gwen òdi kpákpa on. 39Tó ò kpákpa ò lí pìnɔ sarɛ, akũ òdigɔ̃ nɛ́ wãnzãndenɔ i kũ a totontotonnɔ kũ a bakibakinɔo. 40Yakubu dì pɔ́nɛ pìnɔ plɛplɛ adona àdi a wãnzãndenɔ kũ a siranɔ ká Labã pɔ́nɔ gũn. Lɛmɛ à a zĩda kpàsaa bò lɛ, adi ká Labã pɔ́nɔ gũnlo. 41Tó pɔ́buri mananɔ fùtɛ kũ kpákpa'onaao, Yakubu dì lí pìnɔ pɛ́tɛpɛtɛ pɔ́nɔ arɛ gó ímibɔɔ pìnɔ gũn, de ò kpákpa o ń sarɛ. 42Tó pɔ ginanɔmɛ sɔ̃, àdi lí pɛ́tɛpɛtɛńnɛro. Lɛn pɔ ginanɔ gɔ̃̀ Labã pɔ́ ũ lɛ, akũ pɔ́buri mananɔ gɔ̃̀ Yakubu pɔ́ ũ. 43Akũ Yakubu aruzɛkɛ dìgɔ̃ kara manamana, a pɔ́nɔ dasi kũ̀ kũ nɔgbɛ̃ zĩkɛrinɔ kũ gɔ̃gbɛ̃ zĩkɛrinɔ kũ lakuminɔ kũ zaakinɔo.

Currently Selected:

NAANAA 30: BB2005

Highlight

Copy