NAANAA 29

Yakubu kana Labã bɛa

1Yakubu ɛ̀ra à dà zɛ́n à gɛ̀ɛ ifãbokikpadenɔ bùsun. 2Kũ à kà gwe, à lɔ̀gɔɔ è sɛ̃̀n sã kpàsa lɛu aakɔ̃ katɛna a sarɛ, zaakũ lɔ̀gɔɔ pì ín òdi kpáḿma. Gbɛ̀ zɔ̃kɔ̃ ta lɔ̀gɔɔ pìlɛ. 3Tó kpàsaa pìnɔ kàkara gwe pínki, akũ òdi gbɛ̀ɛ pì go lɔ̀gɔɔ pì lɛ́a, ò í kpáḿma, akũ òdi ɛra ò gbɛ̀ɛ pì tarɛ a gbɛ̀n. 4Akũ Yakubu sãdãrinɔ là à pì: Gbɛ̃nɔ, a bo mámɛɛ? Ò wèa ò pì: O bo Aranamɛ. 5Akũ à ń lá à pì: Á Nao daikore Labã dɔ̃ yá? Ò wèa ò pì: Ó a dɔ̃. 6Akũ à ń lá à pì: À aafia yá? Ò pì: À aafia. Ǹ a nɛ́ Rahila gwa, àtɛn su kũ sãnɔ zã̀ dire. 7Akũ Yakubu pì: Ifãntɛ̃ kpɛ́ gbãna, sãnɔ tágɔrɔ dí ká kɔ̀ro. À í kpáḿma à gɛ́ ń dã. 8Akũ ò pì: Óni fɔ̃ro. Tó adi kɛ sã kpàsanɔ kàkara pínki baasiro, òdi gbɛ̀ go lɔ̀gɔɔ pì lɛ́a ò í kpáḿmaro.

9Kũ àtɛn yã ońnɛ lɛ, Rahila sù kũ a de sãnɔ, zaakũ sãdãriimɛ a ũ. 10Kũ Yakubu a disɛ̃ Labã nɛ́nɔgbɛ̃ Rahila è kũ a de sãnɔ, à nà lɔ̀gɔɔi à gbɛ̀ɛ gò lɔ̀gɔɔ pì lɛ́a, akũ à í kpà a disɛ̃ sãnɔa. 11Akũ à lɛ́ pɛ̀ Rahilaa à pɔnna ɔ́ɔ dɔ̀. 12Akũ à ònɛ kũ a de danɛ Rɛbɛka nɛ́n a ũ. Akũ Rahila bàa lɛ̀ à gɛ̀ɛ à ò a denɛ. 13Kũ Labã a dãre nɛ́ Yakubu baaruu mà, à bàa lɛ̀ à gɛ̀ɛ daalɛ. Kũ à kà, akũ à kùsia à lɛ́ pɛ̀a à tà kãao a bɛa. Akũ Yakubu yã kũ ò kɛ̀nɔ ònɛ pínki. 14Akũ Labã pìnɛ: Ma arumɛ n ũ yãpura.

Yakubu Lea kũ Rahilao sɛnaa

Yakubu kɛ̀ Labã bɛa mɔ do, 15akũ Labã pìnɛ: Kũ ń de ma danɛ ũ yãin ĩni zĩ kɛmɛnɛ pã yá? Dera mani fĩna bonnɛ nà ǹ omɛnɛ. 16Labã sɔ̃ à nɛ́nɔgbɛ̃nɔ vĩ gbɛ̃nɔn pla. Yɔ̃ɔ tɔ́n Lea, Bãna sɔ̃ Rahila. 17Lea wɛ́ busana, Rahila sɔ̃ nɔkpare manamɛ, akũ a kakana mana. 18Yakubu ye Rahilai, akũ à pì Labãnɛ: Mani zĩ kɛnnɛ wɛ̃̀ suppla n nɛ́ bãnade Rahila yãi. 19Labã pì: À sã̀na mà a kpámma de mà a kpá gbɛ̃ pãndeala. Ǹgɔ̃ kú ma bɛa la.

20Akũ Yakubu zĩ kɛ̀nɛ wɛ̃̀ suppla Rahila yãi, ase à kɛ̀nɛ lán gɔrɔ pla bàmɛ kũ à yei yãi. 21Akũ à pì Labãnɛ: Kũ ma zĩgɔrɔ pàpa, ǹ ma nɔ kpáma mà sɛ́. 22Akũ Labã gwedenɔ kàkara ń pínki à nɔsɛpɔble kɛ̀ńnɛ. 23Kũ ɔkɔsi kɛ̀, akũ à a nɛ́ Lea sɛ̀ à kpàa, akũ Yakubu wùtɛ kãao. 24Labã a nɔgbɛ̃ zĩkɛri Zilipa kpà Leanɛ zĩkɛri ũ. 25Kũ gu dɔ̀ Yakubu è Leamɛ, akũ à pì Labãnɛ: Bɔ́yãi n kɛ̀mɛnɛ lɛɛ? Rahila yãin ma zĩ kɛ̀nnɛroo? Bɔ́ mɛ́ à tò n ma kɛkɛɛ? 26Labã pì: Ó kĩnaa òdi Bãna kpá gɔ̃a Yɔ̃ɔ ãro. 27Ǹ azuma do kɛ kũ gbɛ̃ dio gĩa, mani a gbɛ̃ndo kpámma zĩ kũ ĩni ɛra ǹ kɛmɛnɛ wɛ̃̀ suppla pãnde pɔ́ ũ. 28Yakubu wè à azuma do pìi kɛ̀ kũ Leao, akũ Labã a nɛ́ Rahila kpàa nɔ ũ. 29Labã a nɔgbɛ̃ zĩkɛri Bila kpà Rahilaa zĩkɛri ũ. 30Yakubu wùtɛ kũ Rahilao sɔ̃, akũ à yei de Leala. Akũ à ɛ̀ra à zĩ kɛ̀ Labãnɛ ari wɛ̃̀ suppla dɔ.

Yakubu nɛ́nɔ

31Dikiri è Yakubu ye Leairo, akũ à a kɛ̀ nɛ́rande ũ, Rahila sɔ̃ paramɛ. 32Lea nɔ̀ɔ sì à nɛ́ ì gɔ̃gbɛ̃ ũ, akũ à tɔ́ kpànɛ Rubɛni, zaakũ à pì: Dikiri ma warikɛnaa gwà. Ma zã nigɔ̃ yemai sà. 33Kũ à nɔ̀ɔ sì dɔ, à nɛ́ ì gɔ̃gbɛ̃ ũ, akũ à pì: Dikiri mà ma zã yemairo, akũ à ɛ̀ra à nɛ́ díkĩna kpàma dɔ. Akũ à tɔ́ kpànɛ Simɛɔ. 34Kũ à ɛ̀ra à nɔ̀ɔ sì dɔ, à nɛ́ ì gɔ̃gbɛ̃ ũ à pì: Adikĩna sà ma zã ni ma ditɛki ero, zaakũ ma nɛ́gɔ̃gbɛ̃ ì kãao mɛ̀n aakɔ̃. Akũ à tɔ́ kpànɛ Levi. 35À ɛ̀ra à nɔ̀ɔ sì dɔ à nɛ́ ì gɔ̃gbɛ̃ ũ à pì: Adikĩna sà ma Dikiri sáabu kpà, akũ à tɔ́ kpànɛ Yuda. Akũ a nɛ́'i zɛ̀.

Currently Selected:

NAANAA 29: BB2005

Highlight

Copy