NAANAA 15

Luda bàka kunna kũ Abramuo

1Abire gbɛra Dikiri yã ò Abramunɛ wɛ́gupu'enaa gũn à pì:

Abramu! Ǹsun vĩna kɛro.

Makũmɛ n sɛ̃gbako ũ,

n láada nigɔ̃ zɔ̃kɔ̃ manamana.

2Akũ Abramu pì: Dikiri Luda, bɔ́n ĩni ma gbaa? Má nɛ́ vĩro. Damasuku gbɛ̃ Ɛliɛza mɛ́ anigɔ̃ de ma bɛ túbibleri ũ. 3Kũ ńdi ma gba nɛ́ro, ma bɛ zĩkɛri pì mɛ́ anigɔ̃ de ma túbibleri ũ. 4Akũ Dikiri pìnɛ: Àpi mɛ́ anigɔ̃ de n túbibleri ũro. Nɛ́ kũ ani bo n wóplɛn mɛ́ anigɔ̃ de n túbibleri ũ. 5Akũ à bò kãao bàai à pì: Ǹ musu gwa ǹ susunɛnɔ naro, tó ĩni fɔ̃. Lɛmɛ n burinɔ nigɔ̃ de lɛ. 6À Dikiri náani kɛ̀, akũ Dikiri tò yã bò kãao nna a náani kũ à kɛ̀ yãi. 7À pìnɛ dɔ: Dikirimɛ ma ũ, makũ mɛ́ ma n bo Uru, Kaladia bùsun, de mà bùsu díkĩna kpámma yãi. 8Akũ Abramu pì: Dikiri Luda, deran manigɔ̃ dɔ̃ kũ anigɔ̃ de ma pɔ́ ũu? 9À wèa à pì: Ǹ zùnunu wɛ̃̀ aakɔ̃ sɛ́ kũ blè wɛ̃̀ aakɔ̃o kũ sãkaro wɛ̃̀ aakɔ̃o kũ potɛ̃nɛtɛ̃nnao kũ lukulukuuo. 10Akũ à pɔ́ pìnɔ sɛ̀ à sùo pínki à pàrapara à gògokɔ̃a, akũ à kàtɛ à ń arɛ dɔ̀dɔkɔ̃a, ama adi bãnɔ parapararo. 11Kũ yumburukunɔ sù ò dìdi nɔ̀bɔɔ pìnɔa, akũ Abramu pɛ̀ḿma.

12Kũ ifãntɛ̃ tɛn gɛ̃ kpɛ́n, i zɔ̃kɔ̃ Abramu kũ̀, akũ gusira zɔ̃kɔ̃ vĩnade dàala. 13Akũ Dikiri pìnɛ: Ǹgɔ̃ dɔ̃ kũ n burinɔ nigɔ̃ nibɔ ble bùsu kũ à de ń pɔ́ ũro gũn, onigɔ̃ zɔ̀ ble gwe, onigɔ̃ wɛ́ tãḿma ari wɛ̃̀ wàa pla. 14Ama mani wari dɔ buri kũ òtɛn zɔ̀ bleńnɛa, n burinɔ ni bɔtɛ kũ aruzɛkɛ zɔ̃kɔ̃ɔo. 15Mɔkɔ̃n sɔ̃, ĩnigɔ̃ aafiamɛ ari ǹ gɛ́ zĩ kũo, gbasa ǹ ká n dizinɔla oni n vĩ. 16N nasionɔ mɛ́ oni ɛra ò su la, zaakũ Amɔrinɔ durunna dí papa kɔ̀ro.

17Kũ ifãntɛ̃ gɛ̃̀ kpɛ́n, gu sì, akũ Abramu è kĩni kũ àtɛn túsukpɛ bo kũ sɛ̃̀tɛo tɛn gɛ̃ nɔ̀bɔ kũ à pàrapara pìnɔ dagura. 18Zĩ birea Dikiri pì a bàka nigɔ̃ kú kũ Abramuo à pì: Mani bùsu díkĩna kpá n burinɔa zaa Misila bùsu lɛ́zɛki swai ari swada kũ òdi pi Yuflati, 19bùsu kũ Keninɔn kun kũ Kenizinɔ kũ Kadamɔnunɔ 20kũ Itinɔ kũ Pɛrizinɔ kũ Rɛfaimunɔ 21kũ Amɔrinɔ kũ Kanaanɔ kũ Gigasinɔ kũ Yebusinɔo.

Currently Selected:

NAANAA 15: BB2005

Highlight

Copy