NAANAA 14

Lutu surabanaa

1Zĩkea Babilɔnia bùsu kína Amarafɛli kũ Ɛlasa bùsu kína Ariɔkio kũ Elamu bùsu kína Kɛdɔlaomɛɛo kũ Goimu bùsu kína Tidalao 2tɛn zĩ̀ ká kũ Sɔdɔmu kína Bɛrao kũ Gɔmɔra kína Bisao kũ Adama kína Sinabuo kũ Zeboimu kína Sɛmɛbao kũ Bɛla kũ òdi pi tera Zoa kínao. 3Kína gbɛ̃nɔn sɔɔro pìnɔ kɔ̃ kàkara ń pínki Sidimu guvutɛn. Àkũmɛ Sɛ̀bɛ Wiside ũ tera. 4Wɛ̃̀ kuri awɛɛpla dagura òdigɔ̃ táfe bo Kɛdɔlaomanɛ. A wɛ̃̀ kuri awɛɛ'aakɔ̃de gũnn ò gì bonɛi. 5A wɛ̃̀ gɛ̃ro donsaride gũnn Kɛdɔlaoma kũ kína kũ ò kú kãaonɔ sù ò zĩ̀i blè Rɛfaimunɔa zaa Asɛtɛro Kanaimu, ò zĩ̀i blè Zuzinɔa zaa Hamu, ò zĩ̀i blè Ɛminɔa zaa Save Kiriataimu, 6ò zĩ̀i blè Orinɔa ń kpi kũ òdi pi Seia ari à gɛ̀ɛ pɛ́ Ɛli Parana gbárannaa. 7Akũ ò ɛ̀ra ò sù Ɛmisipa. Àkũ òdi pi tera Kadɛsi. Ò zĩ̀i blè Amalɛki bùsuua pínki kũ Amɔri buri kũ ò kú Azazɔ̃ Tamanɔa dɔ.

8Akũ Sɔdɔmu kína kũ Gɔmɔra kínao kũ Adama kínao kũ Zeboimu kínao kũ Bɛla kũ òdi pi tera Zoa kínao fùtɛ ò gɛ̀ɛ ò zĩ̀ ká kũńwo Sidimu guvutɛn. 9Òtɛn zĩ̀ ká kũ Elamu bùsu kínao kũ Goimu bùsu kínao kũ Babilɔnia bùsu kínao kũ Ɛlasa bùsu kínao. Kína gbɛ̃nɔn siikɔ̃ pìnɔ tɛn zĩ̀ ká kũ kína gbɛ̃nɔn sɔɔronɔ. 10Sidimu guvutɛ ɔ̀da wɛ̀ɛ vĩ dasi. Kũ Sɔdɔmu kína kũ Gɔmɔra kínao tɛn bàa lɛ́, akũ ò sì a gũn, akũ ń gbɛ̃ kparanɔ bàa lɛ̀ ò gɛ̀ɛ gusĩsĩden. 11Zĩ̀blerinɔ Sɔdɔmu kũ Gɔmɔrao aruzɛkɛnɔ kũ ń pɔ́blenɔ sɛ̀tɛ pínki ò tào. 12Gɔrɔ kũ̀a Abramu vĩ̀ni nɛ́ Lutu kú Sɔdɔmu, akũ ò a kũ̀ ò tà kãao kũ a aruzɛkɛnɔ.

13Akũ gbɛ̃ kũ à bò ń ɔĩ gɛ̀ɛ à ò Eberu buri Abramunɛ zaa Mamare gbiri línɔ sarɛ. Mamare kũ a dakũnanɔ Ɛsɛkɔlu kũ Anɛo bi Amɔri burinɔmɛ, ò de kɔ̃ gbɛ̃ ũ kũ Abramuo. 14Kũ Abramu mà ò a danɛ kũ̀ ò tà kãao, akũ à a bɛ zĩ̀karinɔ sɛ̀tɛ gbɛ̃nɔn wàa do kpɛ́ basuddo plansari à pɛ̀tɛ kína pìnɔi, akũ à ń lé Dã. 15Akũ à a gbɛ̃nɔ kpàatɛtɛ, akũ ò sìńgu gwãani. Ò zĩ̀i blèḿma ò pɛ̀ḿma ari Oba, Damasuku gugbãnduru kpa. 16À ɛ̀ra à sù kũ aruzɛkɛ pìnɔ pínki kũ a vĩ̀ni nɛ́ Lutuo kũ a aruzɛkɛnɔ. À sù kũ nɔgbɛ̃nɔo kũ gbɛ̃ pãndenɔ dɔ.

17Kũ Abramu zĩ̀i blè Kɛdɔlaomaa kũ kína kũ ò kú kãaonɔ àtɛn su, akũ Sɔdɔmu kína bò à dàalɛ Save Guvutɛ kũ òdi pi tera Kína Guvutɛn. 18Akũ Salɛmu kína Mɛlɛkizɛdɛki sù kũ burodiio kũ sèwɛ̃o. Àpi bi Luda Musude gbàgbariimɛ. 19Akũ à sa mana ò Abramunɛ à pì:

Luda Musude musu kũ zĩtɛo Kɛ̀ri

arubarika da Abramun.

20Arubarikaden Luda Musude

kũ à n ibɛrɛnɔ nànnɛ n ɔĩ ũ.

Akũ Abramu aruzɛkɛ kũ àtɛn sunɔ pínki kuride kpàa. 21Sɔdɔmu kína pì Abramunɛ: Ǹ ma gbɛ̃nɔ kpáma ǹgɔ̃ aruzɛkɛ kũna n pɔ́ ũ. 22Akũ Abramu pìnɛ: Ma sì kũ Dikiri Luda Musude musu kũ zĩtɛo Kɛ̀riio, 23mani n pɔ́ke sɛ́ro, bee kyateyĩba, de ǹsun pi n ma kɛ aruzɛkɛde ũro yãi. 24Mani pɔ́ke sɛ́ro, sé pɔ́ble kũ ma gbɛ̃nɔ blèe baasiro. Ama Anɛ kũ Ɛsɛkɔluo kũ Mamare kũ ò gɛ̀ɛ kũmaonɔ, ǹ tó ò ń baka sɛ́.

Currently Selected:

NAANAA 14: BB2005

Highlight

Copy