ZĨRINƆ 26

Pɔlu a zĩda yã bɔkɔtɛna kína Agaripa arɛ

1Akũ Agaripa pì Pɔlunɛ: Ń zɛ́ vĩ ǹ n yã o. Akũ Pɔlu ɔ sɛ̀ à a zĩda yã bɔ̀kɔtɛ à pì: 2Kí Agaripa, ma è ma mìnna kɛ̀, kũ ma lè matɛni ma zĩda yã bɔkɔtɛ n arɛ gbãra taari kũ Yudanɔ dìma pínki yã musu. 3Atɛ̃nsa kũ ń Yudanɔ futɛokarayã dɔ̃ pínki kũ ń yãketenɔ. Abire yãi ma wɛ́ kɛ̀mma ǹ ma yã dí mamɛnɛ. 4Yudanɔ ma kunna dɔ̃ zaa ma nɛ́ fíti zĩ naana zaa ma bùsun ari Yurusalɛmu. 5Ò ma dɔ̃ à gìi kɛ̀. Tó ò yei, oni fɔ̃ ò o kũ má kú ó donyĩrinɔ gã̀ kũ à gbãna kũ Luda yão kũ òdi pi Farisinɔ tɛ́. 6Tera sà òtɛn yãkpatɛ kɛ kũmao kũ ma wɛ́ dɔ lɛ́ kũ Luda sɛ̀ ó dizinɔnɛɛi yãi. 7Ó buri mɛ̀n kuri awɛɛplanɔ dìgɔ̃ do Ludai fãnantɛ̃ kũ gwãanio wɛ́dɔna lɛ́sɛna dokɔ̃nɔ pìii. Kí, tãmaa pì yãin Yudanɔ fùtɛmai. 8Bɔ́yãin Luda gɛ̀nɔ vunaa kɛ̀árɛ yãzɛsari ũ sɛ́ɛ?

9Makũ sɔ̃ yã, ma zɛo kũ yã kũ ani bo Yesu Nazɛra kpɛ pínkin manigɔ̃ kɛ. 10Lɛn ma kɛ̀ lɛ Yurusalɛmu. Sa'orikinɔ ma gba zɛ́, akũ ma Luda gbɛ̃nɔ kà kpɛ́siran dasi. Tó òtɛni ń dɛdɛ sɔ̃, ma lɛ́ dìgɔ̃ kú a gũmmɛ. 11Madìgɔ̃ gɛ́ aduakɛkpɛ kũ aduakɛkpɛo gɛ̃̀n baaakɔ̃, màgɔ̃ wɛ́ tãḿma mà gã naḿma de ò ledi kpá Yesui. Ma pɔ fɛ̃nańyĩ, akũ madì gɛ́ wari dɔḿma ari buri pãnde wɛ̃tɛnɔa.

Pɔlu a Yesu zɛ́ sɛna yã'onaa

(Zĩr 9:1-19; 22:6-16)

12Abire yãi matɛn gɛ́ Damasuku kũ doka kũ sa'orikinɔ ma gbarɛooo. 13Kína, kũ má tɛ́ zɛ́n kũ ifãntɛ̃o di mìdangura, ma gupura è à bò ludambɛ à damala kũ ma gbɛ̃nɔ, à pãsĩ de ifãntɛ̃la. 14O lɛtɛ zĩtɛ ó pínki, akũ ma kòtoo mà ò òmɛnɛ kũ Eberu yão ò pì: Solu, Solu, à kɛ̀ dera ntɛn wɛ́ tãmaa? Lɛ̀zɔ̃na kũ gbáo kyate sari tɛn wari dɔmma fá! 15Ma pì: Dímɛ n ũu, Dikiri? Akũ Dikiri pì: Makũmɛ Yesu kũ ntɛn wɛ́ tãa ũ. 16Ǹ futɛ ǹ zɛ. Ma bo ma summa de mà n sɛ́ ma zĩkɛri ũmɛ, ǹgɔ̃ de yã kũ n è kũ yã kũ mani mɔnnɛoo sèedade ũ. 17Mani n sura ba Yudanɔ ɔĩ kũ buri pãndenɔ. Mani n zĩḿma 18de ǹ ń wɛ́ kɛ̃ńnɛ, ò kpɛ li gusiranɛ ò arɛ dɔ gupuraa, ò bo Setan gbãnan ò gɛ̃ Luda pɔ́n, de ń durunnanɔ le à kɛ̃ḿma, ń baka gɔ̃ kú kũ Luda gbɛ̃nɔ ma náanikɛna yãi.

Pɔlu zĩkɛna Yesunɛ

19Kí Agaripa, àkũ mɛ́ à tò mádi gí ludambɛ gbɛ̃ kũ à bò à sùma yãiro. 20Ma waazi kɛ̀ Damasuku gĩa kũ Yurusalɛmuo, akũ ma kɛ̀ Yudea bùsu gu sĩnda pínkia kũ buri pãndenɔ kĩnaao. Ma òńnɛ ò nɛ̀sɛ litɛ ò arɛ dɔ Ludaa, ò yã kũ ani tó ò dɔ̃ kũ ò nɛ̀sɛɛ lìtɛ kɛ. 21Abire yãin Yudanɔ ma kũ Luda ɔnn, ò ye ò ma dɛ. 22Luda kpányĩn má kunwo ari kũ a gbãrao, akũ má zɛna a sèedade ũ nɛ́ fíti gbɛ̃ zɔ̃kɔ̃nɔnɛ ń pínki. Madì yã pãnde oro, sé yã kũ annabinɔ kũ Musao ò à kɛ baasiro. 23Ò pì Arumasihu ni wari le, àkũ mɛ́ ani futɛ bona gan káaku à gupura yã o Yudanɔnɛ kũ buri pãndenɔ.

24Kũ Pɔlu tɛni a zĩda yã bɔkɔtɛ lɛ, Fɛsutu wiki dɔ̀a à pì: Ĩa kàmman yá Pɔlu? N dɔ̃na zɔ̃kɔ̃ mɛ́ àtɛni n mì litɛ. 25Akũ Pɔlu pì: Ĩa dí kámaro, gbɛ̃ bɛ̀ɛrɛde Fɛsutu. Yãzɛden matɛn o, akũsɔ̃ yãpuramɛ. 26Kí, lákũ ń yã birenɔ dɔ̃ nà mani fɔ̃ mà yã onnɛ súsu vĩna sari. Má dɔ̃ kũ a ke dí kɛ n mì kpɛro, zaakũ yã pì bi gukpado yãnlo. 27Kí Agaripa, n yã kũ annabinɔ òo sì yá? Má dɔ̃ kũ n sì. 28Akũ Agaripa pì Pɔlunɛ: Gɔrɔ fíti dí lɛ́n ntɛn da ĩni fɔ̃ ǹ ma litɛ mà gɔ̃ Yesude ũn yá? 29Pɔlu pì: Bee tera ke gìkɛna má yei, tó Luda wè. Adi kɛ ndonlo, kũ gbɛ̃ kũ òtɛni ma yã ma gbãranɔ ń pínki, ò gɔ̃ lákũ má de nà mɔ̀kakɔ̃ana dínɔ baasi. 30Akũ kína pì kũ bùsu gbɛ̃ zɔ̃kɔ̃ɔo kũ Benisio fùtɛ kũ gbɛ̃ kũ ò kakarana gwenɔ. 31Kũ ò bɔ̀tɛ, òtɛn o'okɔ̃nɛ: Gbɛ̃ pì dí yã kũ à kà ò a dɛ ke ò a da kpɛ́siran kɛro. 32Akũ Agaripa pì Fɛsutunɛ: Tó gbɛ̃ pì dí zɛ kũ gɛna Siza kĩnaao yãro, de óni fɔ̃ ò a gbarɛ.

Currently Selected:

ZĨRINƆ 26: BB2005

Highlight

Copy