ZĨRINƆ 17

Pɔlu kunna Tɛsalonika

1Ò bɔ̀tɛ kũ Amfipɔlio kũ Apɔlɔniao, akũ ò kà Tɛsalonika, gu kũ Yudanɔ aduakɛkpɛ kún. 2Akũ Pɔlu gɛ̃̀ aduakɛkpɛn lákũ àdigɔ̃ kɛ nà, à waazi kɛ̀ńnɛ yã kũ à kɛ̃na Luda yãn musu kámmabogɔrɔ aakɔ̃. 3Àtɛn bɔkɔtɛńnɛ lákũ à kɔ̃ sɛ̀o Arumasihu wɛ́tãmma le nà à futɛ bona gan à pì: Yesu kũ matɛni a yã oárɛ mɛ́ à Arumasihu pì ũ. 4Ń gbɛ̃kenɔ yã pì zɛ́ è, akũ ò nà Pɔlu kũ Silasiooa. Lɛn Giriki donyĩrinɔ nàḿma lɛ dasi se ari kũ nɔgbɛ̃ kũ ò tɔ́ bònɔ dasi dɔ.

5Akũ Yudanɔ nɛ̀sɛgɔ̃baa kpà kũńwo, ò kurepãpã'orinɔ kàkara ò dasi kũ̀, akũ ò wɛ̃tɛ wã̀. Ò gɛ̀ɛ ò lìka Yasɔ̃ bɛi, òtɛn Pɔlu kũ Silasio wɛtɛ de ò ń kũ ò bo kũńwo gupuraa. 6Kũ odi ń lero, ò Yasɔ̃ kũ Yesude pãndenɔ gàtɛ ò bò kũńwo wɛ̃tɛ gbãnadenɔ kĩnaa, òtɛn wiki lɛ́ òtɛn pi: Gbɛ̃ pìnɔ bi andunia gudɛrinɔmɛ. Ò sù la, 7akũ Yasɔ̃ ń dítɛ a bɛa. Gbɛ̃ pìnɔ tɛn pã Siza dokanɛ ń pínki, òdi pi kína pãnde kun òdi pinɛ Yesu. 8Yã pìi zɔ̃̀ gbɛ̃nɔ pɔa kũ wɛ̃tɛ gbãnadenɔ. 9Akũ ò ɔgɔ sì Yasɔ̃a kũ a gbɛ̃ kparanɔ ò ń gbárɛ.

Pɔlu kunna Bɛrea

10Gwãani birea gɔ̃̀nɔ Yesudenɔ Pɔlu kũ Silasio gbàrɛ Bɛrea. Kũ ò kà gwe, akũ ò gɛ̃̀ Yudanɔ aduakɛkpɛn. 11Gbɛ̃ birenɔ nɛ̀sɛ mana de Tɛsalonikadenɔ pɔ́la ò Luda yã sì ɔplapla. Lákũ gu dìgɔ̃ dɔ nà òdigɔ̃ Luda yã gwagwa de ò dɔ̃ tó Pɔlu yã pìnɔn yãpura vĩ. 12Ń gbɛ̃nɔ Dikiri náani kɛ̀ dasidasi kũ Giriki nɔgbɛ̃ bɛ̀ɛrɛdenɔ kũ Giriki gɔ̃gbɛ̃nɔo dasidasi dɔ. 13Kũ Tɛsalonika Yudanɔ mà Pɔlu tɛn Luda yã waazi kɛ Bɛrea dɔ, akũ ò sù gwe ò yãkete dà gbɛ̃nɔ tɛ́ ò ń pɔ fùtɛ. 14Akũ Yesudenɔ Pɔlu gbàrɛ gɔ̃̀nɔ ísira kpa, ama Silasi kũ Timɔtio gɔ̃̀ gwe. 15Gbɛ̃ kũ ò gɛ̀ɛ zɛ Pɔlunɛnɔ gɛ̀ɛ kãao Atɛni, akũ ò ɛ̀ra ò tà Silasi kũ Timɔtio kĩnaa kũ Pɔlu lɛ́gbɛɛo, à pì ò mɔ́ ò a le likalika.

Pɔlu kunna Atɛni

16Kũ Pɔlu tɛni ń dã Atɛni, a pɔ yàka kũ à è tãna di wɛ̃tɛ pìi gũn yãi. 17Akũ à waazi kɛ̀ Yudanɔnɛ kũ buri pãnde donyĩrinɔ aduakɛkpɛn kũ gbɛ̃ kũ àdigɔ̃ ń le ɛtɛ gũnnɔ lákũ gu dìgɔ̃ dɔ nà. 18Pɔlu tɛn yã lɛkɔ̃a kũ yãwaaripari kũ òdi ń sísi Ɛpikurenɔ kũ Sotoikinɔ. Akũ ń gbɛ̃kenɔ pì: Bɔ́ yãn titimako dí tɛn bɔtɛɛ? Gbɛ̃kenɔ pì: Ótɛn da tãna dufunɔ yã kpàkpan àtɛn kɛ. Ò ò lɛ kũ àtɛn Yesu yã kũ a vuna ganwo baaru nna kpańnɛ yãimɛ. 19Akũ ò Pɔlu sɛ̀ ò gɛ̀ɛ kãao gbɛ̃ zɔ̃kɔ̃nɔ kĩnaa Areopagu ò pì: Ĩni yã dufu kũ ndì dańnɛ owɛrɛroo? 20O yãbonsarɛ mà n lɛ́n, ó ye ò a bɔkɔtɛna dɔ̃. 21Atɛnidenɔ pínki kũ nibɔ kũ ò kú gwenɔ dìgɔ̃ ye yã pãndeiro, séde yã dufu mana kũ a wàaripanaao.

22Akũ Pɔlu fùtɛ à zɛ̀ Areopagude pìnɔ tɛ́ à pì: Atɛnidenɔ, ma è á mìnatɛna tãnanɔnɛ kokari vĩ manamana yã sĩnda pínki gũn. 23Kũ matɛn kure á wɛ̃tɛ gũn, matɛn pɔ́ kũ adì donyĩ kɛńnɛnɔ tàasi ká, akũ ma sa'oki ke è, ò pɔ́ kɛ̃̀a ò pì: Luda kũ ó dɔ̃ro pɔ́. Luda kũ á a dɔ̃ro átɛn donyĩ kɛnɛ baaruun matɛn kpáárɛ. 24Luda andunia kɛ̀ kũ pɔ́ kũ ò kú a gũnnɔ pínki. Àkũmɛ musu kũ zĩtɛo Dikiri ũ, àdigɔ̃ kú kpɛ́ kũ bisãsirinɔ bònɛnɔ gũnlo. 25A bàka kú kũ bisãsiri ɔdamma keoro. Àkũ mɛ́ àdi wɛ̃̀ndi kũ we'oo kpá gbɛ̃ sĩnda pínkia kũ pɔ́ sĩnda pínkio. 26À buri sĩnda pínki bò gbɛ̃ mɛ̀n do kĩnaamɛ, akũ ò kú andunia kusuru siikɔ̃ pínkia. A gĩnakɛ à gɔrɔ dìtɛditɛ buri pínkinɛ kũ gu kũ onigɔ̃ kunwa lɛ́o. 27À ń kɛ́ de ògɔ̃ a wɛtɛ ò ɔ mátɛmatɛ ari ò gɛ́ boa. Bee kũ abireo à zã̀ kũ ó gbɛ̃keoro. 28Zaakũ àkũ mɛ́ àdi tó ògɔ̃ wɛ̃̀ndi vĩ ò fɔ̃ ò ó mɛ̀ sɛ́ ògɔ̃ kún. Lákũ á kɛrɛ kenɔ ò nà: A burinɔn ó ũ se. 29Lákũ Luda burinɔn ó ũ nà, òsungɔ̃ da Luda de lán tãna bàro kũ bisãsiri kɛ̀ kũ wuraao ke andurufu ke gbɛ̀ɛ kũ à a ɔzĩ kɛ̀a a laasunnwa. 30Luda mìkpɛrɛ zù ó wɛ́siragɔrɔ yãnɛ, ama àtɛn yã ditɛ gbɛ̃nɔa gu sĩnda pínkia tera de ò nɛ̀sɛ litɛ. 31Zaakũ à gɔrɔ dìtɛ kũ gbɛ̃ kũ à a sɛ̀ yãkpatɛ kɛ kũ anduniao a zɛ́a. À gbɛ̃ kũ à a sɛ̀ɛ pìi vù gan sèeda ũ gbɛ̃ sĩnda pínkinɛ.

32Kũ ò gɛ̀nɔ vuna yã pìi mà, ń gbɛ̃kenɔ a fobò, ama ń gbɛ̃kenɔ pì: Óni n yã pì ma zĩkea dɔ. 33Akũ Pɔlu bò ń kĩnaa. 34Gbɛ̃kenɔ nàa, akũ ò Yesu náani kɛ̀. Areopagu gbɛ̃ kũ òdi pinɛ Diɔnisiu kú ń tɛ́ kũ nɔgbɛ̃ kũ òdi pinɛ Damario kũ gbɛ̃kenɔ dɔ.

Currently Selected:

ZĨRINƆ 17: BB2005

Highlight

Copy