ZĨRINƆ 16

Pɔlu wɛ̃tɛgɛna kũ Timɔtio kũ Silasio

1Pɔlu kà Dɛbi kũ Lisitirao. Gwen Yesude ke kun a tɔ́n Timɔti. A da bi Yuda Yesudemɛ, a de sɔ̃ bi Girikimɛ. 2A tɔ́ nna Yesude kũ ò kú Lisitira kũ Ikɔniuonɔ kĩnaa. 3Pɔlu ye à gɛ́ kãao, akũ a tɔ̃̀ɔ zɔ̃̀nɛ Yuda kũ ò kú wɛ̃tɛ pìnɔ gũnnɔ yãi, zaakũ ń pínki dɔ̃ kũ a de bi Girikimɛ. 4Wɛ̃tɛ kũ ò gɛ̀ɛn pínki, ò yã kũ zĩ̀rinɔ kũ gbɛ̃ zɔ̃kɔ̃nɔ dìtɛ Yurusalɛmu ò sɔsi gbɛ̃nɔnɛ ògɔ̃ kũna. 5Akũ òtɛn gbãna kũ ń ludanaanikɛnaa gũn òtɛn dasi kũ lákũ gu dìgɔ̃ dɔ nà.

Pɔlu wɛ́gupu'ena Toroasi

6Luda Nini gìńnɛ ò gɛ́ Luda yã o Asia bùsun, akũ ò gɛ̃̀tɛ Firigia kũ Galatia bùsunɔola. 7Kũ ò kà Misia bùsu lɛ́n, ò ye ò gɛ̃ Bitinia bùsun, akũ Yesu Nini dí weńnɛro. 8Kũ ò gɛ̃̀tɛ Misia bùsula, akũ ò kà Toroasi. 9Gwãani Pɔlu Masedonia bùsu gbɛ̃ke è zɛna wɛ́gupu'enaa gũn, àtɛn kútɛ kɛnɛ à pì: Ǹ bikũ ǹ su ó kĩnaa Masedonia ǹ kpawái. 10Kũ à wɛ́gupu è lɛ, akũ o Masedonia soru kɛ̀ gɔ̃̀nɔ, zaakũ o dɔ̃̀ sà kũ Luda mɛ́ àtɛni ó sísi ò gɛ́ baaru nna kpáńnɛ.

Lidia Yesu zɛ́ sɛnaa

11Akũ o gɛ̃ gó'itɛn Toroasi o mìi pɛ̀ Samɔtarasia. Kũ gu dɔ̀ o ka Nɛapɔli. 12Bona gwe o gɛ Filipi. Àkũmɛ Masedonia bùsu kpado pì wɛ́ra ũ, kũ Romudenɔn vĩ. Akũ o gɔrɔ pla kɛ̀ wɛ̃tɛ pìi gũn. 13Kámmabogɔrɔ zĩ o bo wɛ̃tɛ kpɛ o gɛ swa sarɛ, gu kũ o mà aduakɛki kunwa. Akũ o vutɛ o yã ò nɔgbɛ̃ kũ ò kakarana gwenɔnɛ. 14Nɔgbɛ̃ ke kú gwe òdi pinɛ Lidia. Tiatira gbɛ̃mɛ, biza wɛ́ tɛ̃ra búgu yìariimɛ, akũsɔ̃ Luda donyĩriimɛ. Àtɛn yã kũ Pɔlu tɛn o ma, akũ Dikiri a swɛ̃̀ɛ wɛ̃̀nɛ à yã pìi sì. 15À da'itɛ kɛ̀ kũ a bɛdenɔ, akũ à wɛ́ kɛ̀wá à pì: Tó a ma Dikiri náanikɛnaa sì, à mɔ́ à kipa ma bɛa. Akũ o a yãze è.

Pɔlu kũ Silasio dana kpɛ́siran Filipi

16Zĩkea kũ ótɛn gɛ́ aduakɛkia, o dakarɛ kũ zɔ̀nɔgbɛ̃ kũ à mlɛ̃̀ tãna vĩo. A dikirinɔ dì ɔgɔ le manamana a ziayã'onnɛnaa musu. 17Akũ à bò à tɛ́wái, ókɔ̃nɔ kũ Pɔluo, àtɛn wiki lɛ́ à pì: Gbɛ̃ dínɔ bi Luda Musude zɔ̀blerinɔmɛ, òtɛn surabana zɛ́ kpàkpa kɛárɛ. 18Àdigɔ̃ kɛ lɛ lán gu dìgɔ̃ dɔ nà, akũ Pɔlu kpàsa kãao. À lìtɛ à pì tãna pìinɛ: Ma ònnɛ kũ Yesu Kirisi tɔ́o ǹ goa. Akũ à gòa gɔ̃̀nɔ.

19Kũ a dikirinɔ dɔ̃ ń àrelena a yã musu wɛ́dɔinaa làka, akũ ò Pɔlu kũ Silasioo kũ̀ ò ń gátɛ ò gɛ̀ɛ kũńwo gbãnadenɔ kĩnaa ɛtɛ gũn. 20Ò gɛ̀ɛ kũńwo yãkpatɛkɛrinɔ kĩnaa ò pì: Gbɛ̃ dínɔ bi Yudanɔmɛ, òtɛni ó wɛ̃tɛ yakawɛrɛ. 21Futɛokarayã kũ ókɔ̃nɔ Romudenɔ doka gìi ò sí ke ò kɛn òtɛn dańnɛ. 22Pari fùtɛńyĩ, akũ yãkpatɛkɛri pìnɔ pì ò ń pɔ́nɔ boḿma ò ń lɛ́lɛ gòoo. 23Kũ ò gbɛ̃na mana kɛ̀ńnɛ, akũ ò ń dá kpɛ́siran ò pì kpɛ́ pìi dãkpãriinɛ à ń dãkpã manamana. 24Kũ ò ònɛ lɛ, akũ à ń dá kpɛ́ tú à ń gbánɔ yĩ̀ lía gíngin.

25Lizãndo gũn Pɔlu kũ Silasio tɛn adua kɛ òtɛn lɛ̀ sí Ludanɛ, gbɛ̃ kparanɔ tɛn sã kpá ń yãi. 26Kãnto zĩtɛ yĩ̀gãyĩgã kũ gbãnao ari kpɛ́ pìi gbĩ̀nɔ kɛ̀ gìri. Gwe gɔ̃̀nɔ a gbànɔ wɛ̃̀wɛ̃ pínki, akũ purusunanɔ mɔ̀kakɔ̃ananɔ bɔ̀tɛḿma pínki. 27Kũ kpɛ́ dãkpãrii pìi vù, à gbànɔ è wɛ̃wɛ̃na pínki, akũ à a fɛ̃nɛda wòto à ye à a zĩda dɛ, zaakũ àtɛn da purusunanɔ bàa sìmɛ. 28Akũ Pɔlu pũ̀tã kũ kòto gbãnao à pì: Ǹsun n zĩda kari boro. Ó kú la ó pínki. 29Kpɛ́ dãkpãrii pìi pì ò mɔ́ fitilaao, akũ à sì ń tɛ́ kũ bàao à kùtɛ Pɔlu kũ Silasio arɛ àtɛn lukaluka. 30À bò kũńwo bàai, akũ à pì: Marenɔ, deran mani kɛ mà surabana lee? 31Ò pìnɛ: Ǹ Dikiri Yesu náani kɛ ĩni surabana le, mɔkɔ̃n kũ n bedenɔ á pínki. 32Akũ ò Dikiri yã ònɛ kũ a bedenɔ ń pínki. 33Lizãndo kũ̀a kpɛ́ dãkpãrii pì ń sɛ́ à gɛ̀ɛ à ń bɔ̀nɔ pìpińnɛ, akũ à da'itɛ kɛ̀ gɔ̃̀nɔ kũ a gbɛ̃nɔ ń pínki. 34Akũ à gɛ̃̀ kũńwo a bɛa à pɔ́ble kɛ̀ńnɛ. Àpii kũ a bedenɔ, ń pɔ kɛ̀ nna manamana kũ ò Luda náani kɛ̀ yãi.

35Kũ gu dɔ̀, yãkpatɛkɛrinɔ dogarinɔ zĩ̀ ò gɛ́ onɛ à gbɛ̃ pìnɔ gbarɛ. 36Akũ kpɛ́ dãkpãrii pìi pì Pɔlunɛ: Yãkpatɛkɛrinɔ gbɛ̃nɔ zĩ̀ma de mà á gbarɛ. À bɔtɛ à tá aafia. 37Akũ Pɔlu pì dogarii pìnɔnɛ: Ò ó gbɛ̃ gbɛ̃nɔ wára yãkpatɛkɛna kũoo sari ò ó dá kpɛ́siran, ókɔ̃nɔ kũ Romudenɔn ó ũ. Tera sà ò ye ò ó bɔtɛ asiri gũn yá? O'o! Oi! Séde ò su ò ó bɔtɛ ń zĩda. 38Dogarii pìnɔ yã pì gbã̀ yãkpatɛkɛrinɔnɛ. Kũ ò mà Romudenɔmɛ ń ũ, akũ vĩna ń kũ. 39Akũ ò sù ò kútɛ kɛ̀ńnɛ ò ń bɔ́tɛ kpɛ́siran, akũ ò wɛ́ kɛ̀ḿma ò bońnɛ ń wɛ̃tɛ gũn. 40Kũ ò bɔ̀tɛ kpɛ́siran, ò gɛ̀ɛ Lidia bɛa. Ò Yesudenɔ lè gwe, akũ ò ń nɛ̀sɛ yĩda kũńnɛ ò dà zɛ́n.

Currently Selected:

ZĨRINƆ 16: BB2005

Highlight

Copy