ZĨRINƆ 15

Yãgɔ̃gɔ̃na Yurusalɛmu

1Gbɛ̃kenɔ bò Yudea ò sù Antiɔku, akũ ò yã dà Yesudenɔnɛ ò pì: Tó ádi tɔ̃̀ zɔ̃ lákũ Musa dìtɛ nàro, áni surabana lero. 2Pɔlu kũ Baanabao zuka kàńyĩ ò lɛ́kpakɔ̃a kɛ̀ kũńwo manamana yã pìi musu. Akũ Yesudenɔ zɛ̀o Pɔlu kũ Baanabao kũ ń gbɛ̃kenɔ gɛ́ Yurusalɛmu de ò yã pì gɔ̃gɔ̃ kũ zĩ̀rinɔ kũ gbɛ̃ zɔ̃kɔ̃nɔ. 3Ò gɛ̀ɛ ò zɛ̀ńnɛ, akũ ò bɔ̀tɛ Fenisia kũ Samariao bùsu kpao. Ò buri pãndenɔ nɛ̀sɛlitɛna yã bàba ń gbɛ̃nɔnɛ gwe, akũ ń pɔ kɛ̀ nna manamana. 4Kũ ò kà Yurusalɛmu, sɔsi gbɛ̃nɔ kũ zĩ̀rinɔ kũ gbɛ̃ zɔ̃kɔ̃nɔ gbãnakɛ kpàńyĩ, akũ ò yã kũ Luda kɛ̀ńnɛ pínki baaruu kpàńnɛ. 5Akũ Farisi Yesude kenɔ fùtɛ ò pì: Séde buri pãndenɔ tɔ̃̀ zɔ̃, ò ońnɛ ògɔ̃ Musa doka kũna. 6Akũ zĩ̀rinɔ kũ gbɛ̃ zɔ̃kɔ̃nɔ kɔ̃ kàkara òtɛn yã pì gwa. 7Kũ yãgɔ̃gɔ̃naa gbã̀na kũ̀, Pita fùtɛ à pìńnɛ: Ma gbɛ̃nɔ, á dɔ̃ kũ Luda ma ditɛ á tɛ́ à gìi kɛ̀, de buri pãndenɔ Yesu baaru nna ma ma lɛ́n ò a náani kɛ. 8Luda gbɛ̃ sĩnda pínki nɛ̀sɛ dɔ̃, akũ à ń gbá a Nini ń sinaa sèeda ũ lákũ à ó gbá nà. 9Luda dí ń ditɛ dodo kũ ókɔ̃nɔro. À ń nɛ̀sɛɛ pìpińnɛ kũ ò Yesu náani kɛ̀ yãi. 10Bɔ́ yã mɛ́ à tò átɛn Luda lɛ́ átɛn gwa teraa? Aso kũ ó dizinɔ fùa ò sɛ́ kũ ókɔ̃nɔn á ye à dińnɛ yá? 11Lɛnlo! Ó sì kũ óni surabana le Dikiri Yesu gbɛ̃kɛ yãi lán mɔ́kɔ̃nɔ bà se.

12Gbɛ̃nɔ kɛ̀ kítikiti ń pínki, akũ ò sã kpà Baanaba kũ Pɔluooi, òtɛn sèedanɔ kũ daboyã kũ Luda kɛ̀ ń gãi buri pãndenɔ tɛ́nɔ ońnɛ. 13Kũ ò yã ò ò làka, Yamisi fùtɛ à yã ò à pì: Ma gbɛ̃nɔ, à ma yã ma. 14Simɔ ò lákũ Luda wɛ́ pã̀ buri pãndenɔla káaku nà à gbɛ̃nɔ sɛ̀ ń tɛ́ a pɔ́ ũ. 15Annabinɔ yãnɔ kɔ̃ sɛ̀ kũ abireo, zaakũ ò pì:

16Abire gbɛra mani ɛra mà su mà Dauda bɛzĩ bo,

mani a guforo kɛkɛ mà tata mà a futɛ,

17de bisãsiri kparanɔ ma ki wɛtɛ,

buri pãnde gbɛ̃ kũ ma tɔ́ kúḿma pìnɔ ń pínki.

Dikiri kũ àtɛn yã pì kɛ mɛ́ à ò,

18àkũ mɛ́ à tò ò yã pì dɔ̃ zaa káaku.

19A yã mɛ́ à tò ma è à mana ò yã kũ à zĩ'ũ ditɛ buri pãnde kũ òtɛn arɛ dɔ Ludaanɔnɛro. 20Ò takada kɛ̃ńnɛ ò mì kɛ̃ tãna pɔ́blea kũ pãpãkɛnaao kũ nɔ̀bɔ kùtukpanasario kũ aruo. 21Zaakũ à gìi kɛ̀ kũ òdigɔ̃ Musa takada kyó kɛ aduakɛkpɛnɔ gũn kámmabogɔrɔ zĩ pínki òdigɔ̃ a doka waazi kɛ wɛ̃tɛ kũ wɛ̃tɛo.

Gbɛ̃nɔ zĩna buri pãnde Yesudenɔa

22Akũ zĩ̀rinɔ kũ gbɛ̃ zɔ̃kɔ̃nɔ kũ sɔsi gbɛ̃nɔ pínki zɛ̀o ò gbɛ̃nɔ bo ń tɛ́ ò ń zĩ Antiɔku kũ Pɔluo kũ Baanabao. Akũ ò ń arɛde kenɔ bò, Yudasi kũ òdi pinɛ Baasaba kũ Silasio. 23Ò ń zĩ kũ takadao, yã kũ ò kɛ̃̀ a gũnn dí:

Ókɔ̃nɔ zĩ̀rinɔ kũ gbɛ̃ zɔ̃kɔ̃nɔ o fɔ kpà ákɔ̃nɔ ó gbɛ̃ kũ ò de buri pãnde ũnɔa zaa Antiɔku kũ Siria bùsuuo kũ Silisia bùsuuo. 24O mà ó gbɛ̃kenɔ gɛ̀ɛ á kĩnaa ó lɛ́ sari, ò á nɛ̀sɛɛ yàkaárɛ ò á dá bídin ń yã'onaa gũn. 25Akũ o lɛ́dokɔ̃nɔ kɛ̀ o zɛo kũ ò gbɛ̃nɔ bo ò ń zĩáwa kũ ó gbɛ̃ yenyĩdenɔ Baanaba kũ Pɔlu 26kũ ò gì ń wɛ̃̀ndiii ó Dikiri Yesu Kirisi tɔ́bona yãiio. 27A yã mɛ́ à tò ótɛn Yudasi kũ Silasio zĩáwa, de ò yã kũ o kɛ̃̀ takadan oárɛ kũ lɛ́o. 28Zaakũ Luda Nini kũ ókɔ̃nɔ o zɛo òsun aso ke diárɛro, séde pɔ́ kũ à zɛ́ vĩ díkĩnanɔ. 29À mì kɛ̃ nɔ̀bɔ kũ ò sa òo tãnaaa kũ aruo kũ nɔ̀bɔ kùtukpanasario kũ pãpãkɛnaao. À mana à mì kɛ̃ adinɔa. Ò kɔ̃ e aafia!

30Akũ ò ń gbárɛ ò gɛ̀ɛ Antiɔku. Ò sɔsi gbɛ̃nɔ kàkara ń pínki, akũ ò takada pìi kpàḿma. 31Kũ ò a kyó kɛ̀, akũ ń pɔ kɛ̀ nna manamana kũ nɛ̀sɛyĩdakũna yã pìio. 32Yudasi kũ Silasio bi annabinɔmɛ, akũ ò lɛ́ dà ń gbɛ̃ pìnɔa manamana ò ń gbá gbãna. 33Kũ ò gɔrɔ pla kɛ̀ gwe, Yesudenɔ lɛ́ zàḿma, akũ ò tà ń zĩ̀rinɔ kĩnaa aafia. 34-35Pɔlu kũ Baanabao gɔ̃̀ Antiɔku. Kũ gbɛ̃ dasi pãndenɔ ò Dikiri yã dàńnɛ, ò baaru nna kpàńnɛ.

Pɔlu kũ Baanabao kɛ̃kɔ̃anaa

36Gɔrɔ pla gbɛra Pɔlu pì Baanabanɛ: Ò ɛra ò gɛ́ ó gbɛ̃nɔ gwa wɛ̃tɛ kũ o Dikiri yã waazi kɛ̀n yãnɔ gũn, ògɔ̃ dɔ̃ lákũ ò kun nà. 37Baanaba ye à Yuhana Maaku sɛ́ à gɛ́ kũńwo, 38akũ Pɔlu tɛn da à mana ò gbɛ̃ kũ à kɛ̃̀ḿma Pamfilia à gì tɛ́ńyĩ ń zĩ gũn sɛ́ doro. 39Kũ odi kɔ̃ yã maro, akũ ò kɛ̃̀kɔ̃a. Baanaba Maaku sɛ̀ ò gɛ̃̀ gó'itɛn ò gɛ̀ɛ Sipiru. 40Akũ Pɔlu Silasi sɛ̀. Yesudenɔ ń ná Dikirinɛ a ɔĩ de à gbɛ̃kɛ kɛńnɛ, akũ ò dà zɛ́n, 41ò gɛ̃̀tɛ Siria kũ Silisiaola ò sɔsi gbɛ̃nɔ gbà gbãna.

Currently Selected:

ZĨRINƆ 15: BB2005

Highlight

Copy