1 KƆRINTIDENƆ 3

Zĩkɛna Ludanɛ

1Ma gbɛ̃nɔ, mádi fɔ̃ mà yã òárɛ lákũ madì o gbɛ̃ kũ Luda Nini dońnɛ arɛnɔnɛ bàro, akũ ma òárɛ lán andunia gbɛ̃nɔ bà, zaakũ nɛ́kpãntɛ̃nɔn á ũ Kirisi gũn. 2Vĩn ma kpàáwa, adi kɛ pɔ́ lomadenlo, zaakũ ádi ká kɔ̀ro. Bee kũ terao ádi káro, 3zaakũ dàdenɔn á ũ ari tera. Lákũ á zãkɔ̃gu nà, akũsɔ̃ á yãkete vĩ, dàdenɔn á ũroo? Á dà mɛ́ à doárɛ arɛ. 4Kũ á gbɛ̃ke pì a zɛ kũ Pɔluo, akũ gbɛ̃ pãnde pì a zɛ kũ Apoloo, á kú kũ á dàaon gweroo? 5Dín Apolo ũu? Dín Pɔlu ũu? Zĩkɛrinɔn ó ũ, akũ a Kirisi náani kɛ̀ ó gãi. Ó baadi tɛn zĩ kũ Dikiri dànɛ kɛmɛ. 6Ma pɔ́ tɔ̃̀, Apolo í kànɛ, akũ Luda tò à gbã̀. 7Lɛmɛ pɔ́tɔ̃ri kũ íkariio de pɔ́ke ũro, sé Luda kũ àdi tó à gbã. 8Pɔ́tɔ̃ri kũ íkariio lɛɛlɛmɛ. Ń baadi ni a àre le a zĩ lɛ́mmɛ. 9Luda zĩkɛri dakenɔn ó ũ. Luda búgbɛɛn á ũ, Luda kpɛ́n á ũ.

10Gba kũ Luda kɛ̀mɛnɛ mɛ́ à tò ma ɛ̃ pɛ̀tɛ lán ɛ̃bori gonide bà, akũ gbɛ̃ pãnde sù àtɛn kpɛ́ pì bo. Baadi laakari kɛ a kpɛ́bonaaa, 11zaakũ gbɛ̃ke ni fɔ̃ à ɛ̃ ke pɛ́tɛ doro, sé ɛ̃ kũ à pɛtɛna Yesu Kirisi ũ baasiro. 12Tó gbɛ̃ kpɛ́ pìi dɔ̀ kũ wuraao ke andurufu ke gbɛ̀ bɛ̀ɛrɛde ke tó à dɔ̀ kũ lío ke lá ke sɛ̃̀ɛ, 13baadi zĩ yãpura ni bo gupuraa. Oni e yãkpatɛkɛgɔrɔ zĩ, zaakũ gu ni dɔ kũ tɛ́omɛ, oni baadi zĩ taka gwa tɛ́ pìi gũn. 14Tó gbɛ̃ zĩ kũ à kɛ̀ɛ bò tɛ́n aafia, ade ni àre le. 15Tó gbɛ̃ zĩ tɛ́ kũ̀, ani kisira le, ade ni bo ɔkori lákũ òdi bo tɛ́n nà.

16Á dɔ̃ kũ Luda kpɛ́n á ũ, Luda Nini kú á gũnloo? 17Tó gbɛ̃ Luda kpɛ́ pìi yàka, Luda ni ade kakatɛ, zaakũ kpɛ́ pì kunna adonamɛ, akũsɔ̃ ákɔ̃nɔmɛ kpɛ́ pì ũ.

18Gbɛ̃ke sún a zĩda sãtɛro. Tó á gbɛ̃ke tɛni a zĩda ditɛ andunia díkĩna ɔ̃ndɔ̃ri ũ, à gɔ̃ńnɛ mìsaride ũ de à le à ɔ̃ndɔ̃ kũ. 19Zaakũ andunia díkĩna ɔ̃ndɔ̃ de Ludanɛ mìsariyã ũmɛ. À kɛ̃na Luda yãn ò pì: Àdi ɔ̃ndɔ̃rinɔ kũ ń wɛ́zɛ̃ gũn. 20À kɛ̃na dɔ: Dikiri dɔ̃ kũ ɔ̃ndɔ̃rinɔ laasun pã. 21Abire yãi gbɛ̃ke sún ĩa dã bisãsiri yã musuro. Pɔ́ sĩnda pínki bi á pɔ́mɛ: 22Pɔlu, Apolo, Pita, andunia, wɛ̃̀ndii, ga, tera pɔ́nɔ, zia pɔ́nɔn yá, ń pínki bi á pɔ́mɛ. 23Ákɔ̃nɔ sɔ̃, Kirisi pɔ́n á ũ, Kirisi sɔ̃ bi Luda pɔ́mɛ.

Currently Selected:

1 KƆRINTIDENƆ 3: BB2005

Highlight

Copy