1 KƆRINTIDENƆ 2

Kirisi kũ a gana lía yão

1Ma gbɛ̃nɔ, kũ ma su á kĩnaa, ma su Luda yã kpàkpa kɛárɛmɛ, adi kɛ ma su ɔ̃ndɔ̃ gbãna ke lɛ́nna kɛárɛnlo. 2Ma zɛo kũ mani yãke oárɛro, séde Yesu Kirisi yã baasiro, atɛ̃nsa a gana lía yã. 3Ma suna á kĩnaa gũn ma su kũ swɛ̃̀vĩnaao kũ vĩnao kũ lukalukanaao. 4Ma waazikɛnaa gũn matɛn yã o kũ lɛ́nnao ke kũ ɔ̃ndɔ̃oro. Ma ò kũ Luda Nini gbãna mɔárɛnaaomɛ, 5de á ludanaanikɛna sún bo bisãsiri ɔ̃ndɔ̃ gũnlo, sé Luda gbãna gũn.

Ɔ̃ndɔ̃ kũ Luda Nini dì dańnɛ

6Bee kũ abireo odì ɔ̃ndɔ̃yã o gbɛ̃ kàsaranɔnɛ. Adi kɛ andunia tera díkĩna ɔ̃ndɔ̃ ke a gbãnade kũ ń gbãna tɛn lákanɔ pɔ́nlo. 7Luda ɔ̃ndɔ̃n ótɛni o, a pɔyenyĩna kũ à utɛna yã pìi. À gĩnakɛ à dìtɛ ó gakuri lena yãi zaade adi andunia kátɛro. 8Andunia tera díkĩna gbãnade ke ɔ̃ndɔ̃ pì dɔ̃ro. Tó ò dɔ̃mɛ yã, de odi Dikiri gakuride pá líaro. 9Lákũ à kɛ̃na Luda yãn nà ò pì:

Pɔ́ kũ wɛ́ dí ero, akũsɔ̃ sã dí maro,

a laasun dí gɛ̃ gbɛ̃ke swɛ̃̀ɛ gũnlo,

àkũ Luda a soru kɛ̀ gbɛ̃ kũ ò yeinɔnɛ.

10Luda mɔ̀wɛrɛ kũ a Nini gbãnao, zaakũ a Nini pì yã sĩnda pínki tàasikana, bee kũ Luda asiri zɔ̃kɔ̃nɔ.

11Gbɛ̃ke a dake nɛ̀sɛgũnyã dɔ̃ro, tó adi kɛ a nini kũ à kú a gũn baasiro. Lɛmɛ dɔ gbɛ̃ke Luda nɛ̀sɛgũnyã dɔ̃ro, tó adi kɛ Luda pì Nini baasiro. 12Andunia dí ninin o lèro, Nini kũ à bò Luda kĩnaan o lè, de ò gba kũ Luda dàwɛrɛ dɔ̃. 13Yã kũ ótɛni on gwe, adi kɛ yã kũ bisãsiri ɔ̃ndɔ̃ dì dańnɛnlo, yã kũ Luda Nini dì dańnɛmɛ. Lɛn odì Luda Nini yã bɔkɔtɛ gbɛ̃ kũ ò Luda Nini vĩnɔnɛ lɛ. 14Andunia gbɛ̃ dì Luda Nini yãnɔ síro, zaakũ à denɛ mìsariyã ũmɛ. Ani fɔ̃ à a mì dɔ̃ sero, zaakũ Luda Nini pì gbãnan òdi a yãzɛ dɔ̃o. 15Gbɛ̃ kũ Luda Nini dì donɛ arɛ dì yã sĩnda pínki zɛ́ dɔ̃, gbɛ̃ke sɔ̃ à zɛ́ vĩ à a vãni boro. 16À kɛ̃na Luda yãn ò pì: Dí mɛ́ à Dikiri nɛ̀sɛ dɔ̃ gbasa à lɛ́ daaa? Ama ókɔ̃nɔ ó Kirisi nɛ̀sɛ vĩ.

Currently Selected:

1 KƆRINTIDENƆ 2: BB2005

Highlight

Copy