1 KƆRINTIDENƆ 1

Pɔlu fɔkpana Kɔrintidenɔa

1Makũ Pɔlu kũ Luda ma sisi à ma sɛ lákũ à yei nà, ma gɔ̃ Kirisi Yesu zĩ̀ri ũ. Makũ kũ ó gbɛ̃ndo Sɔsɔtɛnɛo, 2ókɔ̃nɔ mɛ́ o takada dí kɛ̃̀ sɔsi gbɛ̃ kũ ò kú Kɔrintinɔnɛ. Luda á sísi a gbɛ̃nɔ ũ, á kunna adona Kirisi Yesu gũn lɛɛlɛ kũ gbɛ̃ kũ òdigɔ̃ ó Dikiri Yesu Kirisi pì sísi gu sĩnda pínki gũnnɔo, ókɔ̃nɔ kũ ó Dikiri dokɔ̃nɔnɔ. 3Luda ó De kũ Dikiri Yesu Kirisio gbɛ̃kɛ kɛárɛ, à á gba aafia.

4Madìgɔ̃ Luda sáabu kɛ gɔrɔ sĩnda pínki á yã musu gbɛ̃kɛ kũ à kɛ̀árɛ á kunna Kirisi Yesu gũn yãi. 5Kunna a gũn pɔ́ sĩnda pínki kàraárɛ, yã'ona sĩnda pínki kũ dɔ̃na sĩnda pínkio, 6zaakũ ó Kirisi yã'onaárɛ zĩni pɛ̀tɛ á gũn, 7akũ Luda Nini gba ke dí kĩaáwaro, gɔrɔ kũ á wɛ́ dɔ ó Dikiri Yesu Kirisi a zĩda mɔnaai. 8Ó Dikiri Yesu Kirisi ni tó à zɛ gbãna ari gɔrɔ lɛ́ ká, de àgɔ̃ kun taari sari a sugɔrɔ zĩ. 9Luda náani vĩ. Àkũ mɛ́ à á sísi, a gɔ̃ kɔ̃ gbɛ̃ ũ kũ a Nɛ́ Yesu Kirisi ó Dikirio.

Kɔrinti Yesudenɔ kɛ̃kɛ̃kɔ̃anaa

10Ma gbɛ̃nɔ, ma naárɛ ó Dikiri Yesu Kirisii, àgɔ̃ lɛ́dokɔ̃nɔ vĩ kũ kɔ̃o á pínki, de kɛ̃kɛ̃kɔ̃ana le à láka á tɛ́, à kɔ̃ kũ kũ laasun dokɔ̃nɔo kũ nɛ̀sɛ mɛ̀n doo. 11Ma gbɛ̃nɔ, ma mà Koloe bedenɔ lɛ́i kũ yãkete kú á tɛ́. 12Lákũ ma mà nàn dí: Á gbɛ̃kenɔ pì, ò zɛ̀ kũ Pɔluo. Gbɛ̃kenɔ pì, ò zɛ̀ kũ Apoloo. Gbɛ̃kenɔ pì, ò zɛ̀ kũ Pitao. Gbɛ̃kenɔ pì dɔ, ò zɛ̀ kũ Kirisio. 13Kirisi kɛ̃kɛ̃kɔ̃anan yá? Ò Pɔlu pà lía á yãin yá? A da'itɛ kɛ̀ kũ Pɔlu tɔ́on yá? 14Ma Luda sáabu kɛ̀, kũ mádi á gbɛ̃ke da'itɛ kɛro, séde Kirisipu kũ Gayusio baasiro. 15Lákũ à de lɛ nà gbɛ̃ke ni le à o a da'itɛ kɛ̀, a gɔ̃ ma ìba ũro. 16Ee, ma Sɛtɛfana bedenɔ da'itɛ kɛ̀ dɔ. Abire baasiro, tó ma gbɛ̃ pãnde da'itɛ kɛ̀, adi dɔmagu doro. 17Kirisi dí ma zĩ gbɛ̃ da'itɛkɛna yãiro, séde a baaru nna kpanaa. Adi kɛ kũ yãdɔ̃naonlo, de a gana lía sún kɛ pãro yãimɛ.

Kirisi bi Luda ɔ̃ndɔ̃ kũ a gbãnaomɛ

18Kirisi gana lía bi mìsariyãmɛ gbɛ̃ kũ òtɛn sãtɛnɔnɛ. Ókɔ̃nɔ kũ Luda tɛni ó sura banɔ sɔ̃, à dewɛrɛ a gbãna ũ. 19À kɛ̃na Luda yãn ò pì:

Mani ɔ̃ndɔ̃rinɔ ɔ̃ndɔ̃ mì dɛ,

mani wɛ́zɛ̃rinɔ wɛ́zɛ̃ kɛ pã.

20Ɔ̃ndɔ̃ri kú mámɛɛ? Takadadɔ̃ri kú mámɛɛ? Andunia tera díkĩna yãpinkidɔ̃ri kú mámɛɛ? Luda dí andunia ɔ̃ndɔ̃ ditɛ mìsariyã ũroo? 21Luda ɔ̃ndɔ̃ gũn, adi tó andunia gbɛ̃nɔ a dɔ̃ kũ ń zĩda ɔ̃ndɔ̃oro. À kɛ̀nɛ à gbɛ̃ kũ òtɛni a náani kɛnɔ sura ba waazi kũ ò dìtɛ mìsariyã ũ pìi gãi. 22Yudanɔ ye dabodaboyãi, Girikinɔ dì ɔ̃ndɔ̃ wɛtɛ. 23Ókɔ̃nɔ sɔ̃, Kirisi gana lía kpàkpan ótɛn kɛ, akũ àdi tó Yudanɔ kpágula, buri pãndenɔ dì pi mìsariyãmɛ, 24ama gbɛ̃ kũ Luda ń sísi à ń sɛ́nɔ, Yudanɔ kũ Girikinɔ ń pínki, Kirisi deńnɛ Luda gbãna kũ a ɔ̃ndɔ̃o ũ. 25Luda mìsarikɛ pì de bisãsiri ɔ̃ndɔ̃la. Luda gbãnasarikɛ pì de bisãsiri gbãnala.

26Ma gbɛ̃nɔ, à gwa lákũ á de nà gɔrɔ kũ Luda á sísi. Dakenɔ kĩnaa á daside ɔ̃ndɔ̃ro, á paride gbãnade ũro, á paride kínɛ ũro. 27Luda gbɛ̃ kũ ò de andunia mìsaride ũnɔ sɛ̀ de à wé'i dao ɔ̃ndɔ̃rinɔa. À gbɛ̃ kũ ò de andunia gbãnasaride ũnɔ sɛ̀ de à wé'i da gbãnadenɔa. 28À gbɛ̃ kũ andunia ń dítɛ kpɛdenɔ ũ, kũ òdi ń ń gya bo akũsɔ̃ ń yã dìgɔ̃ kunlonɔ sɛ̀ de à gbɛ̃ kũ ń yã dìgɔ̃ kunnɔ kɛ kpɛdenɔ ũ, 29de gbɛ̃ke sún le à ĩa dã Luda arɛro. 30Ákɔ̃nɔ sɔ̃, Luda tò á kú Kirisi Yesu gũn, akũ à gɔ̃̀ ó ɔ̃ndɔ̃ ũ. Kunna Kirisi pìi gũn Luda tò yã bò kũoo nna, ó kunna adona, akũsɔ̃ à ó sura bà. 31À yã mɛ́ à tò lákũ à kɛ̃na Luda yãn nà, tó gbɛ̃ ye à ĩa dã, à dã Dikiri yã musu.

Currently Selected:

1 KƆRINTIDENƆ 1: BB2005

Highlight

Copy