Filipfuɛ Mun 3

Sran kpa yolɛ sakpa Nyanmiɛn nyrun'n

1N niaan mun, min ndɛ'n i atabo'n yɛ: sran wunmuan bɔ amun nin e Min'n ti'n ti'n, man amun klun jɔ. Ndɛ nga n klɛ blɛli amun laa'n, kɛ n ´klɛ blɛ amun ekun'n, ɔ ti-man min afɛ, yɛ sɛ n yo sɔ man amun-ɔn ɔ ti kpa.

2An `sasa amún wun be bɔ be ti kɛ alua sa bɔ be yo sa tɛtɛ'n, bɔ be wla klɛn bé kplo'n su ngbɛn'n be lika. 3E yɛ e wla klɛn kpa nin-ɔn, afin e su Nyanmiɛn i Wawɛ'n i fanngan nun, e fa Krist-Jésus di é nuan, e fa-man é wla gua-man e wafa nga e ti'n su.

4Sanngɛ sɛ n waan n ´fa ń wla gua n wafa nga n ti'n su'n, n kwla yo. Sɛ sran wie'm be bu i kɛ be kwla fa bé wla gua be wafa nga be ti su'n, n liɛ'n i sin-ɔn. 5Kɛ be wuli min bɔ n dili le mɔcuɛ'n yɛ be wlali n klɛn-ɔn. N fin Izraɛl nvle'n nun, n fin Bɛnzamɛn osu'n nun, n ti Ebre klonglonglo. Sɛ ɔ ti Zuif'm be mmla'n i su falɛ'n, n ti i nun Farizifuɛ. 6Nyanmiɛn ndɛ'n lo min kpa ti yɛ n kleli asɔnunfuɛ'm be yalɛ nin-ɔn. Sɛ mmla'n i su falɛ'n kwla yo sran sran kpa'n, wuun be kwla saci-man min wun kaan sa, 7sanngɛ like nga laa m bu i kɛ ɔ ti n like kpa'n, siɛn'n Krist ti'n, m bu-mɛn i like fi kun. 8-9Nanwlɛ, kɛ m bu min Min Krist-Jésus i silɛ bɔ n si i'n like kpa sakpa'n ti, ɔ man m bu-man like'n wie fi like. I ti m'an yaci like'n kwlaa kɛ ɔ ´yo nan Krist a yo n like kpa nan min nin i y'a kaci sran wunmuan'n ti, yɛ m bu like'n kwlaa kɛ wla sa. Sran kpa bɔ n ti'n, ɔ fin-man m bɔbɔ min nzuɛn'n nun mmla'n i sufalɛ'n ti, sanngɛ ɔ fin Krist su bɔ n lafi'n. Sran kpa yolɛ sɔ'n fin Nyanmiɛn i su bɔ be lafi'n ti. 10Min akunndan kpa'n yɛlɛ kɛ man n si Krist nin i kwlalɛ b'ɔ man ɔ cɛnnin'n, nan nyrɛnnɛn ng'ɔ wunnin i'n n `wun wie lele sɛ n wu'n man n yo kɛ i sa, 11nan n `lafi su kɛ n kusu n ´cɛn wie.

Man e wanndi ju e juwlɛ

12Nán kɛ kɛ n ´kɛn i yɛ'n m'an nyɛn i kwlaa sɔ nin-ɔn, ɔ nin bɔ n ´se kɛ m'an yo sran kpa a guɛ i ti nin i bo-ɔ, sanngɛ m mian min nyin nan n ´nyan like nga kɛ Krist-Jésus trali min'n ɔ sieli kɛ n ´nyɛn i'n. 13Aniaan mun, m bu-man min wun kɛ m'an wie i ngba nyan, sanngɛ sa kun nga n jin su kɛ n ´yo'n yɛlɛ kɛ man ń wla fi like ng'ɔ o min sin'n nan n ´tinndin man n sa to like ng'ɔ o min nyrun lɔ'n. 14Ɔ man m mian mín nyin nan n ´ju juwlɛ nga be sieli'n nun nan n ´nyan like nga Nyanmiɛn flɛ e kɛ e ´nyɛn i nyanmiɛn su lɔ'n sran wunmuan bɔ e nin Krist-Jésus y'a yo'n ti.

15I sɔ'n ti'n, man e kwlaa nga y'a yo sran'n, e bu akunndan sɔ'n wie, sanngɛ sɛ amun nun wie mun amun akunndan'n ti ngunmin-ngunmin'n, Nyanmiɛn wa yi sa sɔ'n nglo kle amun. 16Lika kwlaa nga y'a ju'n, kannzɛ ɔ ti sɛ, man ajalɛ kunngba nga e fa boli i bo'n, e `fa wɔ.

17Aniaan mun, an `nian n liɛ'n su. Y'a yo a kle amun, ɔ man an `nian be nga be yo like nga e kleli amun'n be liɛ'n su yo. 18Sran kpanngban kpa be o lɛ bɔ bé sa nga be yo be'n kle kɛ Krist i waka'n su b'ɔ wuli'n be bu-mɛn i like fi. N kɛn i sɔfuɛ'm be ndɛ kleli amun laa lele, kɛ n ´kan kle amun ekun yɛ'n, n lɛ sunlɛ. 19Be agualiɛ yɛlɛ be mlinlɛ, be Nyanmiɛn'n yɛlɛ be ku'n. Like nga sran yo-ɔ ɔ guɛ i nyin ase'n yɛ be fa di bé nuan-an. Mɛn'n nun ninnge'n yɛ ɔ lo be-ɔ. 20E liɛ'n, e ti nyanmiɛn su lɔ ba mun, e minndɛ e Defuɛ'n bɔ yɛlɛ e Min Jésus-Krist b'ɔ ´fin lɔ ba'n. 21Ɔ wa fa e wunnɛn b'ɔ ti-man like fi'n ɔ ´yo man ɔ ´kaci kɛ i wunnɛn b'ɔ fa ɔli lika ng'ɔ lɛ nyrun lɔ nun'n sa. I kwlalɛ b'ɔ fa sie like'n kwlaa'n yɛ ɔ ´fa kaci i-ɔ.

Currently Selected:

Filipfuɛ Mun 3: BB98

Highlight

Copy