Ima̍aki 3

Iji̍sɔ̄ɔsi nyiya ɔngrɔ̄ɔ nīi kwa̍ābɔ̄ oko̍ōku̍ ma̍

(Ima̍tiyu 12:9-14; Ilu̍uku 6:6-11)

1Iji̍sɔ̄ɔsi gba̍a ku̍chē ga u̍nu̍ ogrēeyī ɔla̍ā. Ɔngrɔ̄ɔ ɔkwa̍ābɔ̄ oko̍ōku̍ ɔha̍ hɔ̄ abɔ̍ɔ. 2Āchɛ ɛha̍ gblāa abɔ̍ɔ yɛ ē deyīrɛ Iji̍sɔ̄ɔsi grigrigri, ɔha̍ni̍ o̍ ē nyiya ɔngrɔ̄ɔ ɔla̍ā la Ɔ̄chī Ɔmyɛ̍nyɛ̍ ɔla̍ā, hɛ̄ɛbɛ nīi e̍ ē jɔ̍ɔkɔ ku̍ ɔ̄ lɛlā abi̍ ɔyɔ̍ɔ̄ya̍. 3Iji̍sɔ̄ɔsi ka grāa ɔngrɔ̄ɔ ɔkwa̍ābɔ̄ oko̍ōku̍ ɔla̍ā hīka ɔ̍lɔ ge̍ bīyɛchɛ wā ge̍ rɛ ma̍ la iyārɛ̄ɛpa gɛ e̍ē!

4Iji̍sɔ̄ɔsi che āchɛ ɛla̍ā ikpo̍ bɛ̍ɛ̄nɛ̄ hīka, “Oji̍ nīi Lihɔ yī alɔ ma̍ chɛ̄ ka ɔ̄chɛ ɔ̍lɔ ge̍ ya̍ la Ɔ̄chī Ɔmyɛ̍nyɛ̍ ma̍/? Ɔya̍ ɔ̄chɛ lɛhi, kɛ̄ɛ ɔya̍ ɔ̄chɛ u̍hu̍? Ɔhɛ̍ ɔhɔ̄leyī yī ɔ̄chɛ ta̍, kɛ̄ɛ ode ɔhɔ̄leyī yī ɔ̄chɛ chāajɛ?”

Aa̍ wa̍a̍ hīdīdū. 5Iji̍sɔ̄ɔsi pīyeyī kpa̍ta̍ ma̍ wā wa̍a̍ ma̍, ɔtū ngurangura ya̍ ɔ̄. O̍ chī mlɛ̍ha̍ de wa̍ wu̍chē yī ūkpɔ̄tū yī wā nīi de ngmu̍wɔ̍hu̍ nīi e̍ i̍ chikpo̍ ge̍ē po̍ ni̍ ma̍. O̍ da ɔngrɔ̄ɔ ɔla̍ā ka ɔ̍lɔ ge̍ nā abɔ̄ yī ɔ̍lɔ ɔla̍ā kpaa. O̍ nā abɔ̄ kpaa ma̍, abɔ̄ ɔla̍ā de lɛ cha̍cha̍ i̍ngɔ̍ɔ ke̍e̍.

6Āchɛ yī Ifa̍rasīi ɛla̍ā wā ge̍ bīyɛchɛ pīya; aa̍ ba̍la Āchɛ yī Ihɛ̍rɔ̄ɔdi gāa ge̍ miya tū Iji̍sɔ̄ɔsi wa̍a̍ lɔkɔ nīi e̍ ge̍ē de ɔ̍ ē ngmo̍ ma̍.

A̍du yī oko̍o yī li̍hu yī Iga̍līli

7Iji̍sɔ̄ɔsi ba̍la a̍chi̍kpo̍ yī nū wā ge̍ ku̍ pīya hī ɛbɛ ɔla̍ā ga Li̍hu yī Iga̍līli bɛ̍ɛ̄nɛ̄. Āchɛ lyɛ̄mɛ̄ kpɛ̍ɛji nīi ku ɔ̍ la u̍tu ma̍. Āchɛ ɛha̍ bū la ajɛ yī Iga̍līli; ɛha̍ bū la ajɛ yī Ijudi̍ya; 8ɛha̍ bū la ipwo̍gra yī Ijɛru̍sālɛm; ɛha̍ bū la ajɛ yī Idumi̍ya; ɛha̍ bū la ajɛ yī oe̍ ɔla̍nū yī Ɔkpa̍ yī Ijɔ̍dan. Āchɛ ɛha̍ bū la ajɛ yī ɔta̍kakatū yī ipwo̍gra yī Ita̍ya ba̍la Isa̍yi̍dɔn. Yɛ̄mɛ̄ yī āchɛ nūma̍ wa̍a̍ wā dikpo̍ba̍ Iji̍sɔ̄ɔsi wu̍chē lɔkɔ nīi e̍ po̍ ohu yī lɛlā wa̍a̍ nīi o̍ yɛ ē ya̍ ma̍. 9Āchɛ ɛla̍ā lyɛ̄mɛ̄ kpɛ̍ɛji. Wu̍chē yī ɔla̍ā, Iji̍sɔ̄ɔsi ka de a̍chi̍kpo̍ yī nū ka ɛ̍lɛ ge̍ tu̍ wɔwu̍ lɔ̄lā abɔ̍ɔ de anu̍, hɛ̄ɛbɛ nīi e̍ ge̍ e̍e tu̍ ɔ̄ pra̍ ni̍. 10Wu̍chē oji̍ nɛ, o̍ nyiya āchɛ yɛ̄mɛ̄mɛ̄ mɛ̍; aliyē oko̍ōku̍ chī e̍e yɛ abɔ̍ɔ ē pɔ̍ɔ̄pɛ̍ wā ge̍ē da ē ba̍ ɔ̄, hɛ̄ɛbɛ ge̍ē de abɔ̄ gwō ɔ̄. 11Yɛ̄grāa ɔha̍lɔha̍ nīi yapri̍ija ɔdwɔ̄bi̍ ge̍ ma̍ ɔ̄ ji mɛ̍, e̍ ē ngma̍ ē ta̍gbo la ajɛ ē de ɔ̍. E̍ ē to̍ohwe̍e hīka, “Awɔ - Ɔyi̍ yī Ɔwɔ nɛ oo!”

12Iji̍sɔ̄ɔsi chī ka ē tāa yapri̍ija ɔdwɔ̄bi̍ ɛla̍ā pɛtɛpɛtɛ ka ɛ̍lɛ ge̍ e̍e koko̍o yī ɔ̄chɛ nīi anɔ̍lɔ wɛ ma̍ ni̍.

Alɛrɔ̄ āchɛ igwo̍lɛpa nīi Iji̍sɔ̄ɔsi hōhu ma̍

(Ima̍tiyu 10:1-4; Ilu̍uku 6:12-16)

13Bɛ̍ɛ̄nɛ̄, Iji̍sɔ̄ɔsi wā ge̍ pīya ga ichō yī u̍kpo̍chi ɔha̍. O̍ de āchɛ nīi o̍ chikpo̍ ma̍ hɛ̄ra̍ dikpo̍ba̍ iyī nū. E̍ gāa dikpo̍ba̍ ɔ̄ ma̍, 14o̍ hu āchɛ igwo̍lɛpa nīi ge̍ē hɔ̄ tāa anu̍, nīi o̍ ge̍ē tū wā ɛrɔ̄ ge̍ē ka ɛrɔ̄ yī nū ma̍. 15O̍ de wɔhu̍ de wa̍ nīi e̍ ge̍ē nū yapri̍ija ɔdwɔ̄bi̍ ē hī āchɛ ē mɛ.

16Āchɛ igwo̍lɛpa nīi o̍ hu ma̍ hɔ̄ ma̍ a̍nɛ: Ɔha̍ re̍ka Isa̍yi̍mɔ̄ɔn. Iji̍sɔ̄ɔsi de ɔ̍ re̍ka Ipi̍ta. 17Ɛha̍ re̍ka Ije̍mēehi ba̍la Ijɔ̍ɔn. Aɛ̍nɛ̍ nɛ, ayi̍ yī Ijɛ̍bɛ̄di nɛ. Riyī nīi Iji̍sɔ̄ɔsi ma tū wā ma̍ re̍ka, “Ibowa̍nɛ̍jɛ̄si.” Ochi̍chi̍ yī ɔla̍ā re̍ka, “Angrɔ̄ɔ yī Yakpla̍.” 18Ɛha̍ re̍ka A̍ndru, ba̍la Ifi̍līipu, ba̍la Ibato̍lōmiyu, ba̍la Ima̍tiyu, ba̍la Itɔ̍mɔ̄ɔsi, ba̍la Ije̍mēehi nīi - ɔyi̍ yī Alife̍yūsi ma̍, ba̍la Itadi̍yūsi, ba̍la Isa̍yi̍mɔ̄ɔn Ɔngma̍lo̍gra. 19Ɔha̍ re̍ka Iju̍dasi Isikɛ̍rīyɔti, anu̍ chɔ̄ɔwɛ tū Iji̍sɔ̄ɔsi a̍nɛ.

Iji̍sɔ̄ɔsi ba̍la Ibɛ̍sɛ̄buli

(Ima̍tiyu 12:22-32; Ilu̍uku 11:14-23; 12:10)

20Iji̍sɔ̄ɔsi wā ge̍ pīya ga wɔlɛ̍ bɛ̍ɛ̄nɛ̄. Āchɛ gba̍a pɛ̍ kpɛ̍ɛji wā ge̍ grēeyī abɔ̍ɔ, kpɛ̍ɛ nīi Iji̍sɔ̄ɔsi ba̍la a̍chi̍kpo̍ yī nū i̍ lɛ yɛ̄grāa ore̍ ojōre̍ ni̍. 21Aɛ̍nɛ̍ yī Iji̍sɔ̄ɔsi po̍ i̍ngɔ̍ɔ ma̍, e̍ pīya yɛ gāa ge̍ē wu̍ ɔ̄ ta̍. Wu̍chē oji̍ nɛ, e̍ yɛ ē ka hīka ɔ̍lɔ de gbyɛ̍lɛ̍ mɛ̍.

22Āchɛ ongū Lihɔ yī Iju̍u ɛha̍ nīi bū la Ijɛru̍sālɛm ma̍ yɛ ē ka hīka, Ibɛ̍sɛ̄buli ɔlɛhu̍ yī yapri̍ija ɔdwɔ̄bi̍ ɔ̍lɔ ku Iji̍sɔ̄ɔsi a̍nɛ. Bū la wɔhu̍ yī ɔlɛhu̍ yī yapri̍ija ɔ̍lɔma̍ nīi ɔ̍lɔ ē nū yapri̍ija ɔdwɔ̄bi̍ mɛ a̍nɛ.

23Iji̍sɔ̄ɔsi de ɛra̍ hī āchɛ ɛla̍ā wa̍a̍ bɛ̍ɛ̄nɛ̄, kɛlā de wa̍ la wɔ̄chīije hīka, “Kana̍ nīi Isa̍tan ge̍ē nū Isa̍tan ē mɛ ma̍/? 24Ɔcha ūkpo̍he ge̍ de iyī nū yi̍ya, kplɛ̍wu̍ tāa iyī nū ma̍, o̍ ge̍ē yarɛ ē mɛ we̍? 25Kɛ̄ɛ u̍kpu̍fi̍ye̍ ūkpo̍he ge̍ de iyī nū yi̍ya, kplɛ̍wu̍ tāa iyī nū ma̍, o̍ ē yarɛ ē mɛ we̍? 26I̍ngi̍ngɔ̍ɔ nīi Isa̍tan ɔchwɔ̄lɛ̍ yī yapri̍ija ɔdwɔ̄bi̍ ge̍ nyɔ̄ lɛwu̍ la okpo̍ tāa iyī nū, de iyī nū yi̍ya nīi o̍ i̍ ge̍ē yarɛ ē mɛ ni̍ a̍nɛ. Ode iyī nū chāajɛ hɔ̄ aa̍ a̍nɛ.

27“Ɔ̄chɔ̄chɛ i̍ ē chɛ̄ ga u̍nu̍ yī ɔla̍ga̍ba̍ ge̍ē kpo̍ āɛ̄jā yī nū wɔhu̍-wɔhu̍ ē mɛ ni̍, ɔ̍chi̍kpa̍kpa̍ ɔlɔjā ku̍ ɔ̄ wā orī o̍bū. Yɛ̄grāa ɔla̍ā o̍bū nīi o̍ ge̍ē kpo̍ āɛ̄jā yī nū bɛ̍ɛ̄nɛ̄ a̍nɛ.

28“Lēchi̍-lēchi̍, n ge̍ē koko̍o ē de ala̍! Lɛlā ɔdwɔ̄bi̍ wa̍a̍ nīi ɔ̄chɛ ē ya̍ ma̍, Ɔwɔ ge̍ē de ē kɔ̄ mɛ, gala lɛlā abi̍ ɔka ku̍ ɔ̄chɛ ita yī ɔha̍lɔha̍ wa̍a̍. 29Ɔ̄chɛ nīi ge̍ chī kɛlā abi̍ ku̍ Uhu Ɔnɛ̄ɛhɛhi yī Ɔwɔ, ɔlɔjā i̍ ge̍ē lɛ ɔkɔ̄kɔ̄ ge̍ē gbo̍ ni̍. Lɛlā ɔdwɔ̄bi̍ yī nū ge̍ē de ē ji la abɔ̄ yī nū ku yɛ̄grāa i̍mɔ̄mɛni̍.” 30Wu̍chē lɔkɔ nīi e̍ ka hīka ɔ̍lɔ ku̍ yapri̍ija ɔdwɔ̄bi̍ ma̍ - ohu̍ nīi Iji̍sɔ̄ɔsi ka i̍ngɔ̍ɔ a̍nɛ.

Aɛ̍nɛ̍ anāngrɔ̄ɔ yī Iji̍sɔ̄ɔsi ba̍la ɛ̍nɛ̍ yī nū

(Ima̍tiyu 12:46-50; Ilu̍uku 8:19-21)

31Aɛ̍nɛ̍ anāngrɔ̄ɔ yī Iji̍sɔ̄ɔsi ba̍la ɛ̍nɛ̍ yī nū gbajɛ wā abɔ̍ɔ bɛ̍ɛ̄nɛ̄. E̍ de jī rɛ abɔ̍ɔ la yɛchɛ, tɛ̄rɔ̄ ge̍ chikpo̍ yī nū. 32Āchɛ ha̍du tū Iji̍sɔ̄ɔsi gblāa abɔ̍ɔ. E̍ koko̍o de ɔ̍ bɛ̍ɛ̄nɛ̄ hīka, “Ma̍ ko̍ō, Ādā! Ɛ̍nɛ̍ yī wɔ ba̍la aɛ̍nɛ̍ yī wɔ gblāa abɔ̍ɔ la yɛchɛ ē chikpo̍ yī wɔ.”

33Iji̍sɔ̄ɔsi hīya aa̍ ɔkɔ hīka, “Ānyɛ u̍tu re̍ka ɛ̍nɛ̍ yī u ba̍la aɛ̍nɛ̍ yī u ma̍/?” 34O̍ jiyeyī kaka ma̍ āchɛ nīi ha̍du tū ɔ̄ ma̍ wa̍a̍, koko̍o de wa̍ bɛ̍ɛ̄nɛ̄ hīka, “Ala̍ ma̍ gɛ ko̍ō! Ɛ̍nɛ̍ yī u ba̍la aɛ̍nɛ̍ yī u gblāa ma̍ i̍ngɛ̍ɛ̄nɛ̄ a̍nɛ. 35Ɔ̄chɛ nīi ē yɛ̍ɛ̄lā nīi Ɔwɔ chikpo̍ ma̍, ɔlɔjā re̍ka ɔɔ̍nɛ̍ yī u ɔnɔ̄ngrɔ̄ɔ a̍nɛ; anu̍ re̍ka ɔɔ̍nɛ̍ yī u ɔnɔ̄nyā a̍nɛ; anu̍ chī re̍ka ɛ̍nɛ̍ yī u a̍nɛ.”

Currently Selected:

Ima̍aki 3: YBASR

Highlight

Copy