Ima̍aki 2

Iji̍sɔ̄ɔsi nyiya ɔngrɔ̄ɔ ɔgbā ngunungunu ɔha̍

(Ima̍tiyu 9:1-8; Ilu̍uku 5:17-26)

1Ɔ̄chī ɛha̍ pi̍nyɛ̍ ɔpɔ̄ɔpɛ̄, Iji̍sɔ̄ɔsi gba̍a ku̍chē ga ipwo̍gra yī Ikapa̍num, Āchɛ wa̍a̍ de po̍ ɔpɔ̄ɔpɛ̄ hīka ɔ̍lɔ hɔ̄ abɔ̍ɔ la wɔlɛ̍ mɛ̍. 2E̍ pɛ̍ kpɛ̍ɛ wā ge̍ grēeyī la u̍nu̍ ɔpɔ̄ɔpɛ̄. E̍ lyɛ̄mɛ̄ kpɛ̍ɛ nīi ɛbɛbɛ i̍ kɔ̄ lā la u̍nu̍ gɛ ni̍; ɛbɛbɛ i̍ kɔ̄ lā la oko̍prīinu o̍bo̍bū ni̍. Iji̍sɔ̄ɔsi kū abɔ̍ɔ ē ka ɛrɔ̄ yī Ɔwɔ ē de wa̍ bɛ̍ɛ̄nɛ̄. 3Yɛ̄grāa ɔla̍ā pi̍i̍, āchɛ ɛha̍ wā abɔ̍ɔ, bī ɔngrɔ̄ɔ ɔgbā ngunungunu ɔha̍ wā ge̍ē de Iji̍sɔ̄ɔsi. Āchɛ ɛnɛ bī ɔngrɔ̄ɔ ɔla̍ā a̍nɛ. 4Āchɛ de yɛ̍ɛ̄mɛ̄mɛ̄ ɔ̄kɔ̄kū ma̍, e̍ i̍ ma̍ ɛbɛ bī ɔ̄ tu̍ bla̍a Iji̍sɔ̄ɔsi ni̍. Wu̍chē yī ɔla̍ā, e̍ gāa ge̍ hɛ̍ linu ɔla̍ā lɛpa̍ riyi̍ yī ɛbɛ nīi Iji̍sɔ̄ɔsi rɛ ma̍. E̍ de ɔ̄ hɛ̍ hwō ma̍, e̍ bī ɔngrɔ̄ɔ ɔla̍ā la wɔdu̍ du̍mɔ̍ ga ajɛ. 5Iji̍sɔ̄ɔsi ma̍ ɔtū nīi āchɛ ɛla̍ā de che ɔ̍ ma̍, wu̍chē yī ɔla̍ā, o̍ da ɔngrɔ̄ɔ ɔgbā ngunungunu ɔla̍ā hīka, “Ɔyi̍ yī u! N de lɛlā ɔdwɔ̄bi̍ yī wɔ kɔ̄ de wɔ ke̍e̍ mɛ̍!”

6Āchɛ ongū Lihɔ yī Iju̍u ɛha̍ gblāa abɔ̍ɔ. Ɔnyɔnyɛ yɛ ē ka ɛri̍ya̍ yī ūkpɔ̄tū yī nū bɛ̍ɛ̄nɛ̄ hīka, 7“U̍ū! Kana̍ nīi ɔngrɔ̄ɔ nūma̍ ē kɛlā i̍ngɔ̍ɔ ma̍/? O̍ ē bī Ɔwɔ ē ya̍! Ɔ̄nyɛ ē de lɛlā ɔdwɔ̄bi̍ kɔ̄ mɛ, ɔ̍chi̍kpa̍kpa̍ Ɔwɔ lōri̍īnū?”

8Iji̍sɔ̄ɔsi je̍ ɔjā nīi e̍ yɛ ē ka la ūkpɔ̄tū ma̍ ɔpɔ̄ɔpɛ̄. O̍ da wa̍ hīka, “Wu̍chē oji̍ nīi ala̍ ē gbɛri̍ya̍ yī lɛlā oli̍ngɔ̍ɔ la ūkpɔ̄tū yī ala̍ ma̍/? 9Ɔna̍ hɛ̍ kpɛ̍ɛ la ɔka de ɔngrɔ̄ɔ okwi̍īyē nūma̍ ma̍? ‘N de lɛlā ɔdwɔ̄bi̍ yī wɔ kɔ̄ de wɔ’, kɛ̄ɛ ɔka hīka, ‘Nīichō! Nāa ɔjā ɔgbwɔlā yī wɔ, nīi a ā yɛɛ.’ 10N ge̍ē ya̍ hɛ̄ɛbɛ nīi ala̍ ge̍ē jo̍ōkū hīka, Ɔyi̍ yī Ɔngrɔ̄ɔ lwɔhu̍ amu la ajɛ ge̍ē de lɛlā ɔdwɔ̄bi̍ ē kɔ̄ mɛ.” Bɛ̍ɛ̄nɛ̄ Iji̍sɔ̄ɔsi da ɔngrɔ̄ɔ ɔgbā ngunungunu ɔla̍ā hīka, 11“N ā koko̍o de wɔ! Nīichō! Nāa ɔjā ɔgbwɔlā yī wɔ, nīi a ā pīya yī wɔlɛ̍!”

12Ɔpɔ̄ɔpɛ̄, ɔngrɔ̄ɔ ɔla̍ā nīichō yarɛ la eyī yī wā wa̍a̍. O̍ nāa ɔjā ɔgbwɔlā yī nū, pīya ngla̍ ɔpɔ̄ɔpɛ̄. Āchɛ wa̍a̍ de kpo̍ hɛ̍ɛgbɛgba gblāa abɔ̍ɔ. E̍ kā Ɔwɔ ɔkɔ̄kā ka ɔ̍lɔ ge̍ fi̍yɛ! Aɛ̍lɛ i̍ ma̍ lɛlā oli̍ngɛ̍ɛ̄nɛ̄ je̍ ni̍ oo!

Iji̍sɔ̄ɔsi hī Ili̍fāyi ɛra̍

(Ima̍tiyu 9:9-13; Ilu̍uku 5:27-32)

13Iji̍sɔ̄ɔsi gba̍a ku̍chē pīya ga oko̍o yī Li̍hu yī Iga̍līli. Āchɛ lyɛ̄mɛ̄ kpɛ̍ɛ nīi wā dikpo̍ba̍ ɔ̄ ma̍. O̍ ngū wā lɛlā abɔ̍ɔ. 14O̍ yɛ ga iyɔ̄bū ma̍, o̍ ma̍ ɔ̄chɛ ɔnāa okpo yī i̍kpa̍da̍ ɔha̍ nīi re̍ka Ili̍fāyi nīi - ɔyi̍ yī Alife̍yūsi ma̍. O̍ hɔ̄ abɔ̍ɔ la ɛbɛ yī u̍ku̍rɔ̍ yī nū. Iji̍sɔ̄ɔsi ka grāa anu̍ hīka, “Ku u la u̍tu.” Ili̍fāyi nīichō ɔpɔ̄ɔpɛ̄, pīya ku Iji̍sɔ̄ɔsi.

15Yɛ̄grāa ɔha̍ pi̍nyɛ̍ ɔpɔ̄ɔpɛ̄, Iji̍sɔ̄ɔsi gāa ge̍ hɔ̄ abɔ̍ɔ ē re̍ ɔjā la wɔlɛ̍ yī Ili̍fāyi. Ali̍kpa̍da̍ ba̍la a̍kpla āchɛ yɛ̄mɛ̄mɛ̄ pɛ̍ ku ɔ̍ la u̍tu. E̍ kū ojōre̍ tāa anu̍ ba̍la a̍chi̍kpo̍ yī nū. 16Āchɛ ongū Lihɔ yī Iju̍u ba̍la Āchɛ yī Ifa̍rasīi ma̍ Iji̍sɔ̄ɔsi nīi o̍ yɛ ē tābɔ̄ yī ojōre̍ tāa a̍kpla āchɛ ba̍la ali̍kpa̍da̍ ma̍, e̍ che a̍chi̍kpo̍ yī nū ikpo̍ hīka, “Oji̍ ya̍ nīi abā yī ala̍ ē tābɔ̄ yī ojōre̍ tāa a̍kpla āchɛ ba̍la ali̍kpa̍da̍ ji ma̍/?”

17Iji̍sɔ̄ɔsi de po̍ ɔpɔ̄ɔpɛ̄. O̍ hīya aa̍ ɔkɔ hīka, “Ɔ̄chɛ nīi lɛ cha̍cha̍ ma̍ gba̍a ē chikpo̍ yī olobo̍chi̍? Je̍ka ɔ̄chɛ nīi kwi̍īyē ma̍ ē chikpo̍ yī olobo̍chi̍ a̍nɛ? N wā ge̍ē hī āchɛ ɔdwɔ̄bi̍ ɛra̍ nīi e̍ ge̍ē pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍. N i̍ wā de āchɛ ɛnɛ̄ɛhɛhi ni̍.”

Lɛlā yī lɛmiyɛ ɔchɔ̄chā

(Ima̍tiyu 9:14-17; Ilu̍uku 5:33-39)

18Yɛ̄grāa ɔha̍, a̍chi̍kpo̍ yī Ijɔ̍ɔn Ohuyenyi ba̍la iyī Āchɛ Ifa̍rasīi yɛ ē ku̍ iyī wā chlɛ̄ɛmiyɛ. Āchɛ ɛha̍ wā bɛ̍ɛ̄nɛ̄ ge̍ che Iji̍sɔ̄ɔsi ikpo̍ hīka, “A̍chi̍kpo̍ yī Ijɔ̍ɔn ba̍la iyī Āchɛ yī Ifa̍rasīi ma̍ ē chlɛ̄ɛmiyɛ. Oji̍ - ohu̍ nīi a̍chi̍kpo̍ yī wɔ ma̍ i̍ ē ya̍ i̍ngɔ̍ɔ ni̍ ma̍/?”

19Iji̍sɔ̄ɔsi hīya aa̍ ɔkɔ hīka, “Ala̍ gbɛri̍ya̍ ka āchɛ nīi - ɛ̍lɛ ga wɔga yī ɔnyā ma̍ ɛ̍lɛ ē chlɛ̄ɛmiyɛ? Ehe̍e! Ɔbɔ̍ɔ̄ngrɛ̄ba̍ e̍e hɔ̄ abɔ̍ɔ we̍ ma̍, e̍ i̍ ge̍ē ya̍ i̍ngɔ̍ɔ ni̍. 20Yɛ̄grāa ɔha̍ hɔ̄ abɔ̍ɔ nīi e̍ ge̍ē de ɔbɔ̍ɔ̄ngrɛ̄ba̍ ē nāa ma̍; olo̍ ɔla̍ā o̍bū nīi e̍ ge̍ē ku̍ iyī wā chlɛ̄ɛmiyɛ a̍nɛ.

21“Ɔ̄chɔ̄chɛ i̍ ē de wāā yī ɔ̄pa̍ onīpīpɛ̄ gɔ̍ tū okūāru̍ ni̍. A ge̍ ya̍ i̍ngɔ̍ɔ, onīpīpɛ̄ ge̍ē de ɔnɛ̄chɛ̄ ɔla̍ā hi̍ya. O̍ ge̍ē ya̍ nīi okūāru̍ ɔla̍ā ē hi̍ya ē gāa iyɔ̄bū iyɔ̄bū. 22I̍ngi̍ngɔ̍ɔ nīi ɔ̄chɔ̄chɛ i̍ ē de ɛ̍mwɔ̄ onīpīpɛ̄ tū la agbɔtū yī wɔkpa̍ ɔnɛ̄chɛ̄ ni̍ a̍nɛ. Ɔ̄chɛ ge̍ ya̍ i̍ngɔ̍ɔ, ɛ̍mwɔ̄ ɔla̍ā ge̍ē de agbɔtū yī wɔkpa̍ ɔla̍ā yi̍ya. O̍ re̍ka ɛ̍mwɔ̄ ɔla̍ā gala agbɔtū agbɔtū chāajɛ. Ɛ̍mwɔ̄ onīpīpɛ̄ ngma̍ la agbɔtū yī wɔkpa̍ onīpīpɛ̄.”

Lɛlā yī Ɔ̄chī Ɔmyɛ̍nyɛ̍

(Ima̍tiyu 12:1-8; Ilu̍uku 6:1-5)

23I̍chi̍chɛ ɔha̍ la Ɔ̄chī Ɔmyɛ̍nyɛ̍, Iji̍sɔ̄ɔsi yɛ ē gɔpɛ̄ yī nū gala yɛrɔ̄ yī igu ɔha̍ nīi re̍ka iwi̍iti ma̍. A̍chi̍kpo̍ yī nū yɛ ē pīya abɔ̄ chē ahu̍ yī igu ē re̍. 24Wu̍chē yī ɔla̍ā, Āchɛ yī Ifa̍rasīi ɛha̍ da Iji̍sɔ̄ɔsi hīka, “Oji̍ nīi a̍chi̍kpo̍ yī wɔ yɛ aa̍ ē yɛ̍ɛ̄lā nīi Lihɔ yī alɔ ka ɔ̄chɛ ɔ̍lɔ - ge̍ e̍e ya̍ la Ɔ̄chī Ɔmyɛ̍nyɛ̍ ni̍ ma̍/?”

25Iji̍sɔ̄ɔsi hīya aa̍ ɔkɔ hīka, “O̍ re̍ka ala̍ i̍ ma̍ īpū po̍ lɔkɔ nīi Ide̍bīidi ya̍ yɛ̄grāa nīi lɛlā bī ɔ̄ obōbī ma̍ je̍ ni̍? Ide̍bīidi ba̍la āchɛ nīi yɛ tāa anu̍ ma̍ de kpo̍ ku̍ lɛmiyɛ. 26Ide̍bīidi chɛ̄ ga u̍nu̍ yī Ɔwɔ ge̍ re̍ ibrɛ̍ɛdi nīi e̍ de kwɔbɔ̄ de Ɔwɔ gblāa abɔ̍ɔ ma̍. Yɛ̄grāa ɔla̍ā nīi Abi̍yāta re̍ka A̍dā Aligbe a̍nɛ. Ɔ̄chɛ ji i̍ ē re̍ ibrɛ̍ɛdi nūma̍ ni̍, ɔ̍chi̍kpa̍kpa̍ aligbe yī Ɔwɔ. Lihɔ nɛ. Ide̍bīidi ma̍ chī re̍, gba̍a nōnuni̍ de de āchɛ nīi yɛ tāa anu̍ ma̍ nīi ē re̍.”

27Iji̍sɔ̄ɔsi de chlɛhu̍ bɛ̍ɛ̄nɛ̄ hīka, “Ɔwɔ ya̍ ɔ̄chī Ɔmyɛ̍nyɛ̍ de ɔ̄chɛ̄ɛchɛ; o̍ i̍ ya̍ ɔ̄chɛ̄ɛchɛ de Ɔ̄chī Ɔmyɛ̍nyɛ̍ ni̍. 28Ɔyi̍ yī Ɔngrɔ̄ɔ chī u̍tu - Ādādā yī Ɔ̄chī Ɔmyɛ̍nyɛ̍ i̍ngi̍ngɔ̍ɔ nɛ.”

Currently Selected:

Ima̍aki 2: YBASR

Highlight

Copy