Ilu̍uku 4

Ɔngūwɛ̄gā tu̍ Iji̍sɔ̄ɔsi tū

(Ima̍tiyu 4:1-11; Ima̍aki 1:12-13)

1Iji̍sɔ̄ɔsi cha bū la Ɔkpa̍ yī Ijɔ̍dan ma̍, Uhu Ɔnɛ̄ɛhɛhi yī Ɔwɔ mu ɔ̍ ibi̍īyē omōmu. Uhu yī Ɔwɔ bī ɔ̄ pīya ga lipu̍ a̍chi̍ chukuru. 2Ɔngūwɛ̄gā tu̍ ɔ̄ tū abɔ̍ɔ lipu̍ yī ɔ̄chī ohu ɛpa ɔla̍ā. Yɛ̄grāa ɔla̍ā wa̍a̍, o̍ i̍ de oko̍o tū ɔjɔ̄jā ni̍. Lɛmiyɛ wā ge̍ ya̍ ɔ̄ la okwi̍ihi yī ɔla̍ā bɛ̍ɛ̄nɛ̄.

3Ɔngūwɛ̄gā da Iji̍sɔ̄ɔsi bɛ̍ɛ̄nɛ̄ hīka, “A ge̍ - Ɔyi̍ yī Ɔwɔ, ɔ̍lɔma̍ ka nīi lɛchɔ̄ nūma̍ ge̍ de pīya ojōre̍ we̍ e̍ē!”

4Iji̍sɔ̄ɔsi hīya anu̍ ɔkɔ hīka, “Ma̍ ko̍ō, Īpū yī Ɔwɔ ka hīka ɔ̄chɛ ɔ̍lɔ i̍ hɔ̄leyī bū la ojōre̍-ojōre̍ ke̍e̍ ni̍.”

5Ɔngūwɛ̄gā wā ge̍ bī ɔ̄ ga ɛbɛ olichīichō ɔha̍ nīi o̍ ge̍ ma̍ ɔcha yɛchɛ wa̍a̍ ugbo̍he ma̍. 6O̍ ka de Iji̍sɔ̄ɔsi bɛ̍ɛ̄nɛ̄ hīka, “N ge̍ē de wɔhu̍ yī ɛbɛ obōbī ba̍la wɔdu yī ɛcha nūma̍ wa̍a̍ de wɔ. Wu̍chē oji̍ nɛ, ami nīi e̍ de ɔjā nūma̍ wa̍a̍ tū u la abɔ̄ a̍nɛ. N lwɔhu̍ ge̍ē de ē kɔ̄ de ɔ̄chaha̍-ɔ̄chaha̍ nīi hi um ɔtū ma̍. 7O̍ lɛ i̍ngɔ̍ɔ ma̍, a ge̍ pu̍ kpɛ̍ɛ̍ ya̍ otūlichō de u, n ge̍ē de ē de wɔ.”

8Iji̍sɔ̄ɔsi hīya anu̍ ɔkɔ hīka, “Īpū yī Ɔwɔ ka hīka ko̍ō! ‘Ādā nīi - Ɔwɔ yī ala̍ ma̍ nīi ala̍ ge̍ē ya̍ otūlichō de ɔ̍ a̍nɛ. Anu̍ lōri̍īnū nīi ala̍ chī ge̍ē hɔ̍chɛ̍ yī nū a̍nɛ.’ ”

9Ɔngūwɛ̄gā gba̍a bī Iji̍sɔ̄ɔsi pīya ga Ijɛru̍sālɛm ge̍ che la ogō yī wɔlɛ̍ olichīichō yī u̍nu̍ yī Ɔwɔ. O̍ da Iji̍sɔ̄ɔsi hīka, “A ge̍ - Ɔyi̍ yī Ɔwɔ, ɔ̍lɔma̍ wi̍bi bū ma̍ ga ajɛ we̍ e̍ē! 10Wu̍chē oji̍ nɛ, Īpū yī Ɔwɔ ka hīka Ɔwɔ ɔ̍lɔ ge̍ē ka nīi ayɛ̍ɛ̄chɛ̄rɔ̄ yī ɔ̍lɔ ge̍ē deyīrɛ aa̍lɔ. 11Ɛ̍lɛ ge̍ē ku̍ aa̍lɔ ke̍e̍ ē bī gāa ichō, hɛ̄ɛbɛ nīi aa̍lɔ i̍ ē bī ikpo̍ ge̍ē dra̍ lɛchɔ̄ ni̍.”

12Iji̍sɔ̄ɔsi hīya Ɔngūwɛ̄gā ɔkɔ hīka, “Īpū yī Ɔwɔ ka hīka ko̍ō, ‘Ādā Nīi - Ɔwɔ yī ala̍ ma̍, ala̍ e̍e tu̍ ɔ̄ tū ni̍.’ ”

13Ɔngūwɛ̄gā kwɛ̍ɛjī la otu̍ Iji̍sɔ̄ɔsi tū i̍ngɔ̍ɔ wa̍a̍ ma̍, o̍ wā ge̍ pi̍ye̍mā hī ɔ̄ o̍bū bɛ̍ɛ̄nɛ̄.

Iji̍sɔ̄ɔsi wu̍tu yī u̍ku̍rɔ̍ yī nū la Iga̍līli

(Ima̍tiyu 4:12-17; Ima̍aki 1:14-15)

14Iji̍sɔ̄ɔsi wā ge̍ cha ga Iga̍līli bɛ̍ɛ̄nɛ̄. Wɔhu̍ yī Uhu yī Ɔwɔ hɔ̄ abɔ̍ɔ ba̍la anu̍. Ohu yī Iji̍sɔ̄ɔsi mīyanya ga ɛbɛha̍-ɛbɛha̍ wa̍a̍ abɔ̍ɔ la ajɛ ɔla̍ā. 15O̍ ngū āchɛ lɛlā abɔ̍ɔ la u̍nu̍ ogrēeyī yī wā. Āchɛ wa̍a̍ kā ɔ̄ ɔkɔ̄kā kpɛ̍ɛji.

Alina̍jārɛ̄ɛti ta̍ Iji̍sɔ̄ɔsi

(Ima̍tiyu 13:53-58; Ima̍aki 6:1-6)

16Iji̍sɔ̄ɔsi wā ge̍ pīya ga Ina̍jārɛ̄ɛti la ɛbɛ nīi o̍ hɔ̄ jɛ̄ ɔngrɔ̄ɔ ma̍ bɛ̍ɛ̄nɛ̄. Ɔ̄chī Ɔmyɛ̍nyɛ̍, o̍ ga u̍nu̍ ogrēeyī yī wā lɔkɔ nīi o̍ ē ya̍ ogbo̍gbe̍ ma̍. O̍ nīichō yarɛ bɛ̍ɛ̄nɛ̄ ge̍ē ka Īpū yī Ɔwɔ. 17E̍ nāa īpū nīi Ayisa̍ya ɔ̄chɛ ɔkɛrɔ̄ yī Ɔwɔ ta̍ ma̍ grāa anu̍. O̍ de īpū ɔla̍ā nīi e̍ ē hā ɔ̄ ɔhɔ̄hā ma̍ lwāa wa̍a̍ ge̍ hɛ̍ta̍ la lɛlā ɔla̍ā nīi Ɔwɔ ka gala oko̍o yī Ayisa̍ya ma̍:

18“Uhu yī Ādā ɔlɔjā che um amu.

Wu̍chē oji̍ nɛ, o̍ hu um ohōhu ke̍e̍,

hɛ̄ɛbɛ nīi n ge̍ē kā Wɔ̄kā Ɔlwɔnyɛ yī nū de alyeklo̍.

O̍ de u tɛ̄rɔ̄,

hɛ̄ɛbɛ nīi n ge̍ē koko̍o ē de āchɛ nīi e̍ de wa̍ ku̍ pīya afiyɛ ma̍ hīka Ādā yɛ abɔ̍ɔ ge̍ē de wa̍ hīya lɛfiyɛ mɛ̍;

hɛ̄ɛbɛ nīi n ge̍ē ya̍ nīi epriyī de ē myɛ̍ma̍ ke̍e̍;

hɛ̄ɛbɛ nīi n ge̍ē de āchɛ nīi e̍ yɛ ē ya̍ wā ichi̍ ji ma̍ ē hɛ̍ta̍ ke̍e̍;

19hɛ̄ɛbɛ nīi n ge̍ē koko̍o yī olo̍ nīi Ādā ge̍ē de āchɛ yī nū hɛ̍ta̍ ma̍.”

20Iji̍sɔ̄ɔsi de īpū ɔla̍ā gū bɛ̍ɛ̄nɛ̄; o̍ nā abɔ̄ kpaa la anu̍ grāa ɔ̄chɛ ɔha̍ nīi rɛ abɔ̍ɔ ma̍. O̍ pīya hyāhɔ̄ bɛ̍ɛ̄nɛ̄. Āchɛ nīi grēeyī gblāa abɔ̍ɔ ma̍ kpo̍ eyī kɔ̍ ɔ̄ bāa ɔjɛjɛ ma̍. 21Iji̍sɔ̄ɔsi ku̍ la lɛlā ɔkɔ̄ka de wa̍ bɛ̍ɛ̄nɛ̄ hīka, “Je̍ka aa̍ ala̍ po̍ lɔkɔ nīi Īpū yī Ɔwɔ ka ma̍ mɛ̍! Lɛlā ɔla̍ā de ya̍ i̍chɛ hɔ̄ ma̍ a̍nɛ.”

22Āchɛ ɛla̍ā wa̍a̍ kā ɔ̄ ɔkɔ̄kā lēchi̍ lēchi̍. O̍ de ya̍ wā lɛbɛ̍bi̍, wu̍chē yī lɛlā ɔnɛ̄ɛhɛhi nīi ē bū la oko̍o yī Iji̍sɔ̄ɔsi ma̍. E̍ chikpo̍ bɛ̍ɛ̄nɛ̄ hīka, je̍ka ɔ̍lɔ - ɔyi̍ yī Ijo̍sɛ̄ɛfu a̍nɛ?

23Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “N jo̍ōkū wa̍a̍ hīka wɔ̄chīije nīi ala̍ yɛ aa̍ ē ge̍ē cha um ma̍ re̍ka, ‘Olobo̍chi̍, nyiya iyī awɔ ɔlɔjā gɛ!’ Ɔha̍ nīi ala̍ ge̍ē gba̍a ē ka ma̍ re̍ka, ‘Lɛlā ɔla̍ā nīi alɔ po̍ ohu ka aɔ̍lɔ ya̍ la Ikapa̍num ma̍, de ya̍ amu la wɔlɛ̍ yī awɔ ɔlɔjā we̍ e̍ē!’ 24Lēchi̍-lēchi̍, n koko̍o de ala̍! Ɔ̄chɛ ɔkɛrɔ̄ yī Ɔwɔ i̍ lɛ otūlichō la ipwo̍gra yī anu̍ ɔlɔjā ni̍. 25Ala̍ ma̍ gɛ! I̍chɔ̍lɔ yɛ̄grāa yī Ɛla̍yi̍ja bɛ̍ɛ? Je̍ka aa̍ anyōkū dɔ̄da gblāa amu la ajɛ yī I̍sɛ̄rɛli! Yɛ̄grāa ɔla̍ā nīi riwō i̍ hā ni̍ gbajɛ lipu̍ yī lɛ̍yi̍ ɛta̍ chrɛ̄rɛ̄ ma̍, lɛmiyɛ ya̍ dwɔ̄bi̍-dwɔ̄bi̍ la ajɛ ɔla̍ā wa̍a̍. 26Ɔwɔ de Ɛla̍yi̍ja tɛ̄rɔ̄ hu ɔnyā ɔha̍ amu la ajɛ yī I̍sɛ̄rɛli kɛ̄ɛ? Je̍ka aa̍ ɔnyā ɔha̍ nīi hɔ̄ la ipwo̍gra yī Isarɛ̍fāta la ajɛ yī Isa̍yi̍dɔn ma̍ nīi Ɔwɔ tū Ɛla̍yi̍ja ɛrɔ̄ hu wɔ lōri̍īnū nū a̍nɛ! 27Yɛ̄grāa yī Ɛla̍yi̍sha titi bɛ̍ɛ? Je̍ka aa̍ alimada dɔ̄da gblāa amu la ajɛ yī I̍sɛ̄rɛli! Ɛla̍yi̍sha nyiya ɔ̄nyɛ lipu̍ yī wā? Je̍ka ɔngrɔ̄ɔ yī Isi̍riya ɔha̍ nīi re̍ka Ina̍māan ma̍ nīi o̍ de ɔ̍ nyiya lōri̍īnū a̍nɛ!”

28Āchɛ yī u̍nu̍ ogrēeyī ɔla̍ā wa̍a̍ de kpo̍ ya̍ ɔtū ngurangura nīi e̍ plɛ̍ɛ̄lā nūma̍ ma̍. 29E̍ nyɔ̄ wuru ɔpɔ̄ɔpɛ̄ ge̍ pi Iji̍sɔ̄ɔsi ngmɛ̍ɛchɛ hī ipwo̍gra ɔla̍ā ga ikō. Ipwo̍gra ɔla̍ā che la u̍kpo̍chi ɔnɔ̄kɔ̄kū ma̍, e̍ bī Iji̍sɔ̄ɔsi wa̍a̍ ga ɛbɛ olichīichō ɔha̍. E̍ chikpo̍ ge̍ tu̍ ɔ̄ ta̍tū ga ɛbɛ ɔhlāatū ɔha̍ nīi lɛ ngɔ̄nɔ̄ngɔ̄nɔ̄ ma̍. 30Iji̍sɔ̄ɔsi wu̍ ɛyɛ ta̍ gala ɔprɛ̍ɛpa yī wā cho̍cho̍cho̍ pīya.

Ɔngrɔ̄ɔ nīi ku̍ yapri̍ija ɔdwɔ̄bi̍ ma̍

(Ima̍aki 1:21-28)

31Iji̍sɔ̄ɔsi wā ge̍ pīya ga ipwo̍gra yī Ikapa̍num abɔ̍ɔ la ajɛ yī Iga̍līli bɛ̍ɛ̄nɛ̄. O̍ ngū āchɛ lɛlā abɔ̍ɔ la Ɔ̄chī Ɔmyɛ̍nyɛ̍. 32Ɔpɔ̄pū nīi o̍ bī ngū wā lɛlā ma̍ lɛ wā lɛbɛ̍bi̍ kpɛ̍ɛji. Wu̍chē oji̍ nɛ, o̍ ngū lɛlā bāa ɔjā nīi o̍ nāa wɔhu̍ yī lɛlā ongōngū ma̍. 33Ɔngrɔ̄ɔ ɔha̍ hɔ̄ abɔ̍ɔ la u̍nu̍ ogrēeyī ɔla̍ā ku̍ yapri̍ija ɔdwɔ̄bi̍ gba̍a̍. Ɔngrɔ̄ɔ ɔla̍ā to̍ohwe̍e bɛ̍ɛ̄nɛ̄ hīka, 34“Wōōwe̍e! Iji̍sɔ̄ɔsi yī Ina̍jārɛ̄ɛti! Oji̍ nīi a chikpo̍ ge̍ē ya̍ la alɔ ma̍ ēēe! Re̍ka a wā ge̍ē de alɔ ē chāajɛ? Lēchi̍, n je̍ ɔ̄chɛ nīi a wɛ ma̍! Awɔ - ɔlɛrɔ̄ ɔnɛ̄ɛhɛhi yī Ɔwɔ nɛ!”

35Iji̍sɔ̄ɔsi ka tāa yapri̍ija ɔla̍ā ɔpɔ̄ɔpɛ̄ hīka, “Chi̍i̍! Cho̍cho̍ la ojiya nīi a ā bīyɛchɛ hī ɔngrɔ̄ɔ ɔla̍ā!” Yapri̍ija ɔla̍ā wu̍ ɔngrɔ̄ɔ ɔla̍ā mla̍ajɛ abɔ̍ɔ la iyɔ̄bū yī āchɛ, o̍bū ngmɛ̍ɛchɛ hī ɔ̄ ibi̍īyē ke̍e̍. O̍ i̍ ya̍ ɔ̄ ɔjɔ̄jā ni̍.

36Āchɛ wa̍a̍ de kpo̍ hɛ̍ɛgbɛgba gblāa abɔ̍ɔ. E̍ gblāa abɔ̍ɔ ē da ɔ̍nyīnū bɛ̍ɛ̄nɛ̄ hīka, “Onūma̍ - ita yī lɛlā ɔlɛkana̍ hɔ̄ ma̍ ma̍/? Ɔngrɔ̄ɔ nūma̍ lwɔhu̍ ē ka ē ta̍ yapri̍ija ɔdwɔ̄bi̍ ka ɛ̍lɛ ge̍ ngmɛ̍ɛchɛ, e̍ chī pɔ̍ɔkɔ yī nū i̍ngɔ̍ɔ ke̍e̍, ngmɛ̍ɛchɛ? Fi̍yɛ!” 37Bū la ɛbɛ ɔla̍ā, ohu yī Iji̍sɔ̄ɔsi mīyanya ga ɛbɛha̍-ɛbɛha̍ wa̍a̍ la ajɛ ɔla̍ā.

Iji̍sɔ̄ɔsi nyiya āchɛ yɛ̄mɛ̄mɛ̄

(Ima̍tiyu 8:14-17; Ima̍aki 1:29-34)

38Iji̍sɔ̄ɔsi nīichō pīya hī u̍nu̍ ogrēeyī ɔla̍ā bɛ̍ɛ̄nɛ̄ ga wɔlɛ̍ yī Isa̍yi̍mɔ̄ɔn. Ɛ̍nɛ̍ ɔlwɔlɛ̍ yī Isa̍yi̍mɔ̄ɔn ku̍ ibi̍īyē ɔla̍ kpɛ̍ɛji gbo abɔ̍ɔ. E̍ ra̍ābɔ̄ de Iji̍sɔ̄ɔsi wu̍chē yī nū. 39O̍ gāa ge̍ rɛ abɔ̍ɔ ba̍la u̍bwɔ̍ yī ɔnyā ɔla̍ā, ka tāa iyē oko̍ōku̍ ɔla̍ā; o̍ de hīya anu̍ ɔpɔ̄ɔpɛ̄. Ɔnyā ɔla̍ā nyɔ̄ gbru ɔpɔ̄ɔpɛ̄ ge̍ kū abɔ̍ɔ ē chrāa aa̍ ɛrɔ̄.

40Yɛnɔ wā ge̍ bi̍ ma̍, āchɛ nīi lɛ āchɛ okwi̍īyē ita yī ɔha̍lɔha̍ wa̍a̍ ma̍ kpo̍ wa̍ bī wā ge̍ de Iji̍sɔ̄ɔsi. O̍ de abɔ̄ che wa̍ lɛhu̍ lūkpō-lūkpō wa̍a̍, de wa̍ nyiya cha̍cha̍. 41Yapri̍ija ɔdwɔ̄bi̍ titi ngmɛ̍ɛchɛ hī āchɛ yɛ̄mɛ̄mɛ̄. Yapri̍ija ɛla̍ā ē tɔ̍ɔna ē tū Iji̍sɔ̄ɔsi hīka, “Awɔ - Ɔyi̍ yī Ɔwɔ nɛ oo!”

Iji̍sɔ̄ɔsi ē ka ē tāa aa̍, chɛ̄ nīi e̍ ē wu̍ la oko̍o ni̍. Wu̍chē oji̍ nɛ, e̍ jo̍ōkū tū ɔ̄ hīka ɔ̍lɔ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ a̍nɛ.

Iji̍sɔ̄ɔsi ngū āchɛ lɛlā la u̍nu̍ ogrēeyī

(Ima̍aki 1:35-39)

42La eyī ɔnyɔ̄nyā yī nū, Iji̍sɔ̄ɔsi bīyɛchɛ hī ipwo̍gra ɔla̍ā ga ikō la ɛbɛ ɔlɛcho̍cho̍ ɔha̍ lōri̍īnū. Āchɛ kū la ɔgāla̍ ɔ̄ mɛ̍! E̍ wā ge̍ ma̍ ɔ̄ ma̍, e̍ i̍ chikpo̍ ka ɔ̍lɔ ge̍ pīya hī ajɛ yī aa̍ ni̍. 43Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ala̍ ma̍ ko̍ō! N ge̍ē kā Wɔ̄kā Ɔlwɔnyɛ yī Ɔchwɔ̄lɛ̍ Oro̍ōre̍ yī Ɔwɔ nūma̍ la ipwo̍gra ehēhī i̍ngi̍ngɔ̍ɔ. Wu̍chē oji̍ nɛ, i̍ngɔ̍ɔ - ohu̍ nīi Ɔwɔ de u tɛ̄rɔ̄ a̍nɛ.”

44Wu̍chē yī ɔla̍ā, o̍ pīya ge̍ kɛlā de āchɛ la u̍nu̍ ogrēeyī yɛ̄mɛ̄mɛ̄ abɔ̍ɔ la ajɛ Ijudi̍ya wa̍a̍ bɛ̍ɛ̄nɛ̄.

Currently Selected:

Ilu̍uku 4: YBASR

Highlight

Copy