Ilu̍uku 3

Ɛrɔ̄ yī Ɔwɔ nīi Ijɔ̍ɔn Ohuyenyi ka ma̍

(Ima̍tiyu 3:1-12; Ima̍aki 1:1-8; Ijɔ̍ɔn 1:19-28)

1Yɛ̄grāa ɔla̍ā re̍ka lɛ̍yi̍ omigwɛ̍ɛrwɔ̄ yī ɔchwɔ̄lɛ̍ oro̍ōre̍ yī Itayi̍bi̍rīyɔsi Ɔchwɔ̄lɛ̍ Ɔnɔ̄kɔ̄kū yī ajɛ yī Iro̍om mɔri̍mɔri̍ a̍nɛ. Ipɔ̍ntīyɔsi Ipa̍yi̍lēeti re̍ka ɔ̄chɛ odeyīrɛ ajɛ yī Ijudi̍ya a̍nɛ. Ihɛ̍rɔ̄ɔdi Ipwɔ̍ɔ̄lɛ̍ ē deyīrɛ ajɛ yī Iga̍līli a̍nɛ. Ɔɔ̍nɛ̍ yī Ihɛ̍rɔ̄ɔdi nīi re̍ka Ifi̍līipu ma̍ ē deyīrɛ ajɛ yī Ituri̍ya ba̍la Itirakona̍yītɔ̄ɔsi. Ilisa̍nīyasi ē deyīrɛ ajɛ yī A̍bīlīin. 2A̍nāasi ba̍la Ike̍yāfasi re̍ka A̍dā Aligbe yī Iju̍u yɛ̄grāa ɔla̍ā a̍nɛ. Yɛ̄grāa ɔla̍ā nīi Ɔwɔ kɛlā de Ijɔ̍ɔn ɔyi̍ yī Ijakara̍ya abɔ̍ɔ lipu̍ a̍chi̍ chukuru a̍nɛ. 3Wu̍chē yī ɔla̍ā, Ijɔ̍ɔn pīya gāa ge̍ ka ɛrɔ̄ yī Ɔwɔ de āchɛ nīi hɔ̄ la ɔcha wa̍a̍ la ɔta̍kakatū yī Ɔkpa̍ yī Ijɔ̍dan ma̍. O̍ ka de wa̍ ka ɛ̍lɛ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ nīi ɛ̍lɛ ge̍ hu yenyi. Ma̍a Ɔwɔ ɔ̍lɔ ge̍ē de lɛlā ɔdwɔ̄bi̍ yī ɛ̍lɛ ē kɔ̄ de ɛ̍lɛ. 4Ɔla̍ā lɛ lɔkɔ nīi Ayisa̍ya ɔ̄chɛ ɔkɛrɔ̄ yī Ɔwɔ mwɔ̍ɔmu tū la īpū yī nū ma̍:

“Ɔ̄chɛ ɔha̍ yɛ abɔ̍ɔ ē tɔ̍ɔna lipu̍ a̍chi̍ chukuru hīka,

‘Ala̍ ā gbla̍a ɔpɔ̄pū yī Ādā lɔ̄lā de ɔ̍!

Ala̍ ā gbla̍a ɔgu yī nū kpakpakpa de ɔ̍!

5Ɛbɛ ɔlɛ ngɔ̄nɔ̄ngɔ̄nɔ̄ wa̍a̍, e̍ ge̍ de ɔ̍ gū.

U̍kpo̍chi ba̍la yɛwu, e̍ ge̍ de ɔ̍ chiya tū trɛ̍lɛ̍lɛ̍.

Ɛbɛ ɔlɛ kɔ̍nɔ̄kɔnɔ̄, e̍ ge̍ ya̍ nīi o̍ ge̍ lɛ dedede.

Ɔpɔ̄pū ɔlɛ ku̍raku̍ra, e̍ ge̍ ya̍ nīi o̍ ge̍ lɛ tɛri̍tɛri̍.

6Āchɛ̄ɛchɛ wa̍a̍ ge̍ē ma̍ ɔhɛ̍ta̍ nīi Ɔwɔ de ma̍.’ ”

7Āchɛ ē pɛ̍ kpɛ̍ɛji ē gāa nīi Ijɔ̍ɔn ē hu wā yenyi. Ijɔ̍ɔn ē da wa̍ hīka, “Ala̍ wɔma yī ogbiji nīi gblāa ma̍ ma̍! Ɔ̄nyɛ koko̍o de ala̍ ka ala̍ ɔ̍lɔ ge̍ē hɛ̍ga ē hī ichi̍ ɔnɔ̄kɔ̄kū ɔla̍ā nīi Ɔwɔ ge̍ē de nīi yɛ ma̍ yewā ma̍? 8Ɔ̍lɔma̍, ala̍ ā yɛ̍ɛ̄lā nīi ge̍ē chabɔ̄ hīka ala̍ ɔ̍lɔ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ma̍ gɛ! Ala̍ e̍e gblāa abɔ̍ɔ ji ka de iyī ala̍ hīka, ‘Je̍ka A̍brahāam - a̍dā yī ala̍ nɛ’ ni̍! Lēchi̍, n ā koko̍o de ala̍! Ɔwɔ lwɔhu̍ ge̍ē kpo̍ achɔ̄ ɔlamu nūma̍ ē de wa̍ pīya ayi̍ yī A̍brahāam ē mɛ! 9U̍ma̍ama, e̍ de lɛgɔ̄ ku ɔchi̍ amu la ɛgba mɛ̍! Ɔchi̍ nīi i̍ ge̍ wā īkpō ɛnɛ̄ɛhɛhi ni̍, e̍ ge̍ē de ɔ̍ hɛ̍ tāajɛ; e̍ kpo̍ ɔ̄ tū ɔla̍!”

10Āchɛ che ɔ̍ ikpo̍ bɛ̍ɛ̄nɛ̄ ka aɛ̍lɛ chī ge̍ē ya̍ kana̍ ma̍?

11Ijɔ̍ɔn koko̍o de wa̍ hīka, “Ɔ̄chɛ nīi ge̍ lɛ aru̍ ɛpa, o̍ ge̍ de ɔha̍ kɔ̄ de ɔ̄chɛ nīi i̍ lɛ ɔha̍lɔha̍ ni̍ ma̍. Ɔ̄chɛ nīi ge̍ lɛ ojōre̍, o̍ ge̍ ya̍ i̍ngi̍ngɔ̍ɔ.”

12Ali̍kpa̍da̍ ɛha̍ titi wā ge̍ē hu yenyi. E̍ che Ijɔ̍ɔn ikpo̍ ka aɛ̍lɛ chī ge̍ē ya̍ kana̍ ma̍, ādā?

13O̍ koko̍o de wa̍ ka ɛ̍lɛ ge̍ e̍e nāa okpo gla onīi ɛ̍lɛ ge̍ē da ma̍ ta̍ ni̍.

14Icho̍ojiya ɛha̍ titi che ɔ̍ ikpo̍ ka aɛ̍lɛ chī ge̍ē ya̍ kana̍ ma̍?

Ijɔ̍ɔn koko̍o de wa̍ ka ɛ̍lɛ ge̍ e̍e nu̍ āchɛ okpo wɔhu̍-wɔhu̍ kɛ̄ɛ warīmɛ̄ ba̍ āchɛ ni̍. Okpo nīi ɛ̍lɛ ē kla̍ ɛ̍lɛ ure̍ ma̍ ɔ̍lɔ ge̍ jɛ̄ ɛ̍lɛ eyī.

15Āchɛ wa̍a̍ yɛ ē deyīche, yɛ ē gbɛri̍ya̍ yī nū la ūkpɔ̄tū ka Ijɔ̍ɔn ɔ̍lɔ ka̍a - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu a̍nɛ oo! 16Wu̍chē yī ɔla̍ā, Ijɔ̍ɔn koko̍o de wa̍ wa̍a̍ hīka, “Ami ē hu ala̍ yenyi la yenyi ɔlamu. Ɔ̄chɛ ɔha̍ nīi yɛ amu yewā la okwi̍ihi yī u ma̍ ga um ɔgɔ̄ga pɛtɛpɛtɛ. N i̍ ngma̍ lɛbɛ owīyōrī hī wɔkpa̍ ochelikpo̍ yī nū ɔbɔbɔ ni̍. Anu̍ ma̍ ge̍ hu ala̍ yenyi la Uhu Ɔnɛ̄ɛhɛhi yī Ɔwɔ ba̍la ɔla̍. 17Anu̍ bī wɔ̍a̍ ɔwɔjā yī nū abɔ̍ɔ la abɔ̄. O̍ ge̍ē de igu yī nū wu gblɛ̍ɛgblɛ̍ɛgblɛ̍ɛ, ē kpo̍ ɔ̄ tū la yākwɔ̄ yī nū. A̍chra̍ yī nū, o̍ ge̍ē kpo̍ ɔ̄ chīyētū la ɔla̍ nīi i̍ ē nyo̍ōnyi̍ ni̍ ma̍.”

18Ɔpɔ̄pū nūma̍ ba̍la ɔpɔ̄pū ɛha̍ yɛ̄mɛ̄mɛ̄ nīi Ijɔ̍ɔn ē bī kā Wɔ̄kā Ɔlwɔnyɛ yī Ɔwɔ ē mla āchɛ ɔtū a̍nɛ. 19Ijɔ̍ɔn ka alābi̍ tāa Ihɛ̍rɔ̄ɔdi ipwɔ̍ɔ̄lɛ̍ wu̍chē yī Ihɛrɔ̍dīyasi. Ihɛrɔ̍dīyasi - ɔnyā yī ɔɔ̍nɛ̍ yī Ihɛ̍rɔ̄ɔdi ipwɔ̍ɔ̄lɛ̍ nɛ; Ihɛ̍rɔ̄ɔdi chī de ɔ̍ wu̍. Ijɔ̍ɔn gba̍a ka tāa anu̍ wu̍chē yī lɛlā abi̍ yī nū ɛha̍. 20Bū la ɛbɛ ɔla̍ā, Ihɛ̍rɔ̄ɔdi gba̍a wā ge̍ yɛ̍ɛ̄lā abi̍ ga iyɔ̄bū iyɔ̄bū. O̍ de Ijɔ̍ɔn ku̍ tū la igbakɔbɔ.

Yenyi ohōhu yī Iji̍sɔ̄ɔsi

(Ima̍tiyu 3:13-17; Ima̍aki 1:9-11)

21Āchɛ ehēhī hu yenyi wa̍a̍ ma̍, Iji̍sɔ̄ɔsi titi gāa ge̍ hu yenyi i̍ngi̍ngɔ̍ɔ. O̍ yɛ ē jɔhā ma̍, akpɔ̍ɔwɔ lwāa tɔ̍ɔ̄ta̍ hwōō ɔpɔ̄ɔpɛ̄. 22Uhu Ɔnɛ̄ɛhɛhi yī Ɔwɔ wā dikpo̍ba̍ ɔ̄ tībi̍īyē bāa libɔkpa̍ ma̍, wā ge̍ che ɔ̍ lɛhu̍. Ɔkɔlɛ̄lā ɔha̍ bū abɔ̍ɔ la ichō ka hīka,

“Awɔ - Ɔyi̍ otōtū yī u gba̍a̍ nɛ.

N lɛ ɔwɔ̄wīyā kpɛ̍ɛji ba̍la awɔ.”

Ɔ̍kɔ̄kū ɔgbɔɔgba yī Iji̍sɔ̄ɔsi

(Ima̍tiyu 1:1-17)

23Iji̍sɔ̄ɔsi re̍ lɛ̍yi̍ gbajɛ la ohu che igwo̍ o̍bū nīi o̍ wu̍tu yī u̍ku̍rɔ̍ yī nū a̍nɛ. Lɔkɔ nīi āchɛ gbɛri̍ya̍ ma̍, Iji̍sɔ̄ɔsi re̍ka ɔyi̍ yī Ijo̍sɛ̄ɛfu nīi - ɔyi̍ yī Ihɛ̍li ma̍; 24nīi - ɔyi̍ yī Ima̍tāati nīi - ɔyi̍ yī Ili̍fāyi nīi - ɔyi̍ Imɛ̍lɛ̄ki nīi - ɔyi̍ yī Ija̍nayi nīi - ɔyi̍ yī Ijo̍sɛ̄ɛfu ma̍; 25nīi - ɔyi̍ yī Imatata̍yāsi nīi - ɔyi̍ yī A̍mɔ̄ɔsi nīi - ɔyi̍ yī Ine̍hum nīi - ɔyi̍ yī Ɛsīli nīi - ɔyi̍ yī Ina̍gāyi ma̍; 26nīi - ɔyi̍ yī Ima̍ati nīi - ɔyi̍ Imatata̍yāsi nīi - ɔyi̍ yī Isɛ̍mɛ̄yin nīi - ɔyi̍ yī Ijo̍sɛ̄ɛki nīi - ɔyi̍ yī Ijɔ̍da; 27nīi - ɔyi̍ yī Ijoha̍na nīi - ɔyi̍ yī Irɛ̍sa nīi - ɔyi̍ yī Ijɛru̍bābɛli nīi - ɔyi̍ yī Isi̍tīyɛ̄ɛli nīi - ɔyi̍ yī Inɛ̍ri ma̍; 28nīi - ɔyi̍ yī Imɛ̍lɛ̄ki nīi - ɔyi̍ yī A̍di nīi - ɔyi̍ yī Ikɔ̍sam nīi - ɔyi̍ yī Ɛli̍mādam nīi - ɔyi̍ yī Ɛ̍ɛ ma̍; 29nīi - ɔyi̍ yī Ijo̍shua nīi - ɔyi̍ yī Ɛli̍yɛ̄sa nīi - ɔyi̍ yī Ijo̍rim nīi - ɔyi̍ yī Ima̍tāati nīi - ɔyi̍ yī Ili̍fāyi ma̍; 30nīi - ɔyi̍ yī Isi̍mīyɔn nīi - ɔyi̍ yī Iju̍da nīi - ɔyi̍ yī Ijo̍sɛ̄ɛfu nīi - ɔyi̍ yī Ijo̍nam nīi - ɔyi̍ yī Ɛli̍yākim ma̍; 31nīi - ɔyi̍ yī Imɛ̍liya nīi - ɔyi̍ yī Imɛ̍na nīi - ɔyi̍ yī Imata̍ta nīi - ɔyi̍ yī Ina̍tan nīi - ɔyi̍ yī Ide̍bīidi ma̍; 32nīi - ɔyi̍ yī Ije̍si nīi - ɔyi̍ yī O̍bɛ̄ɛdi nīi - ɔyi̍ yī Ibo̍wāasi nīi - ɔyi̍ yī Isa̍līmɔ̄ɔn nīi - ɔyi̍ yī Ina̍sɔ̄ɔn ma̍; 33nīi - ɔyi̍ yī Ami̍nādāabu nīi - ɔyi̍ yī A̍dīmin nīi ɔyi̍ yī A̍ni nīi - ɔyi̍ yī Ihɛ̍jrɔ̄ɔn nīi - ɔyi̍ yī Ipɛ̍rɛ̄ɛsi nīi - ɔyi̍ yī Iju̍da ma̍, 34nīi - ɔyi̍ yī Ije̍kɔ̄ɔpu nīi - ɔyi̍ yī A̍yi̍sāaki nīi - ɔyi̍ yī A̍brahāam nīi - ɔyi̍ yī Itɛ̍ra nīi - ɔyi̍ yī Ina̍hɔ ma̍; 35nīi - ɔyi̍ yī Isɛ̍rūugi nīi - ɔyi̍ yī Iru̍u nīi - ɔyi̍ yī Ipɛ̍lɛ̄ɛgi nīi - ɔyi̍ yī Ɛ̍ba nīi - ɔyi̍ yī Ishi̍la ma̍; 36nīi - ɔyi̍ yī Ike̍nan nīi - ɔyi̍ yī Afa̍sāadi nīi - ɔyi̍ yī Ishɛ̍ɛm nīi - ɔyi̍ yī Ino̍a nīi - ɔyi̍ yī Ila̍mɛ̄ɛki ma̍; 37nīi - ɔyi̍ yī Imɛtu̍sɛ̄la nīi - ɔyi̍ yī Ɛ̍nɔ̄ɔki nīi - ɔyi̍ yī Ija̍rɛ̄ɛdi nīi - ɔyi̍ yī Imaha̍lālīli nīi - ɔyi̍ yī Ike̍nan ma̍; 38nīi - ɔyi̍ yī Ɛ̍nɔ̄ɔshi nīi - ɔyi̍ yī Isɛ̍ɛti nīi - ɔyi̍ yī A̍dāam nīi re̍ka ɔyi̍ yī Ɔwɔ ma̍ a̍nɛ.

Currently Selected:

Ilu̍uku 3: YBASR

Highlight

Copy