Ima̍aki 14

E̍ miya ge̍ē de Iji̍sɔ̄ɔsi ē ngmo̍

(Ima̍tiyu 26:1-5; Ilu̍uku 22:1-2; Ijɔ̍ɔn 11:45-53)

1O̍ wā ge̍ de hī ɔ̄chī ɛpa nīi ɔwɔ̄wīyā ɔnɔ̄kɔ̄kū ɛha̍ ge̍ē kū; Ɔwɔ̄wīyā yī Owu̍lā ba̍la Ɔwɔ̄wīyā Nīi Ojōre̍ yī Nū I̍ Tū Ɔjā Obī Ibrɛ̍ɛdi Nōnū Ni̍ Ma̍. Alɛhu̍ aligbe ba̍la āchɛ ongū Lihɔ yī Iju̍u yɛ ē gāla̍ ɔpɔ̄pū ge̍ ku̍ Iji̍sɔ̄ɔsi ge̍ē ngmo̍ nīi āchɛ i̍ ē jo̍ōkū ni̍. 2E̍ yɛ ē ka hīka aɛ̍lɛ i̍ ge̍ē ku̍ ɔ̍lɔ la yɛ̄grāa yī ɔwɔ̄wīyā ɔla̍ā ni̍, nɛ̄ni̍ ɛbɛ ɔ̍lɔ ge̍ē ti̍ya ē tū.

Ɔnyā ɔha̍ de yanɔ̄ chīyēkla̍ Iji̍sɔ̄ɔsi

(Ima̍tiyu 26:6-13; Ijɔ̍ɔn 12:1-8)

3Iji̍sɔ̄ɔsi hɔ̄ abɔ̍ɔ la Ibɛ̍tāni la wɔlɛ̍ yī Isa̍yi̍mɔ̄ɔn nīi - olimada ma̍. O̍ yɛ ē re̍ ojōre̍ ma̍, ɔnyā ɔha̍ wā abɔ̍ɔ. Ɔnyā ɔla̍ā bī yanɔ̄ la agbɔtū onīchi̍chɛ̍ ɔha̍ nīi e̍ ya̍ la achɔ̄ ita ɔha̍ nīi re̍ka alaba̍si̍ta ma̍. Yanɔ̄ oni̍pī kwɛ̍kwɛ̍ nīi re̍ka Ina̍adi ma̍ nɛ. O̍ lwɔ̍la̍ kpɛ̍ɛji. O̍ de ɔjā yī yanɔ̄ ɔla̍ā chiya, de yanɔ̄ yī nū chīyēkla̍ Iji̍sɔ̄ɔsi lɛhu̍ wa̍a̍. 4Āchɛ ɛha̍ nīi gblāa abɔ̍ɔ ma̍ de kpo̍ wɔ̍ɔ̄tū. E̍ ka de iyī wā bɛ̍ɛ̄nɛ̄ hīka, ɔkana̍ ɔ̍lɔ u̍tu hɔ̄ ma̍ nīi ɔ̍lɔ ē de yanɔ̄ nūma̍ bīya i̍ngɔ̍ɔ ji ma̍/? 5Yanɔ̄ nīi ɛ̍lɛ ge̍ de nāa ra̍ nīi - ɔ̍lɔ ge̍ē gbo ina̍ra ohu igwɛ̍ɛrwɔ̄ nīi ɛ̍lɛ ē de okpo ɔla̍ā kɔ̄ de alyeklo̍ ma̍? E̍ gblāa abɔ̍ɔ ē ka ē tāa ɔnyā ɔla̍ā ɛbɛ̍bɛ̍-ɛbɛ̍bɛ̍.

6Iji̍sɔ̄ɔsi ka de wa̍ bɛ̍ɛ̄nɛ̄ hīka, “Oji̍ nīi ala̍ ē ya̍ ɔnyā nūma̍ lɛfiyɛ ma̍/? Ala̍ ā pi̍ye̍mā hī ɔ̄. Lɛlā nīi o̍ ya̍ hɔ̄ ma̍ ma̍ - lɛlā ɔnɛ̄ɛhɛhi yī u nɛ. 7Alyeklo̍ ma̍ hɔ̄ amu ba̍la ala̍ myɛ̄grāa-myɛ̄grāa. Yɛ̄grāa ɔha̍lɔha̍ nīi o̍ ge̍ rīya ala̍, ala̍ ge̍ē lɛ̍ɛhi ē tāa aa̍ ē mɛ. Ami ma̍ i̍ ge̍ē hɔ̄ amu ba̍la ala̍ i̍ngɔ̍ɔ myɛ̄grāa-myɛ̄grāa ni̍. 8Ɔnyā nūma̍ de ɔjā nīi o̍ ge̍ē ya̍ mɛ ma̍ ya̍ mɛ̍. O̍ de yanɔ̄ kla̍ okū yī u, de ɔ̍ gbla̍a lɔ̄lā gbo̍ ɔ̄chī onyōnyi ke̍e̍ mɛ̍. 9Lēchi̍-lēchi̍, n ā koko̍o de ala̍! Ɛbɛha̍-ɛbɛha̍ lipu̍ yɛchɛ wa̍a̍ nīi e̍ ge̍ē bī Wɔ̄kā Ɔlwɔnyɛ yī Ɔwɔ ge̍ē ka ma̍, e̍ ge̍ē kɛlā ku̍ lɛlā yī ɔnyā nūma̍ ē bla ē tū ɔ̄.”

Iju̍dasi chɔ̄ɔwɛ tū abā yī nū

(Ima̍tiyu 26:14-16; Ilu̍uku 22:3-6)

10Ɔ̄chɛ ūkpo̍he lipu̍ yī a̍chi̍kpo̍ yī nū āchɛ igwo̍lɛpa, nīi re̍ka Iju̍dasi Isikɛ̍rīyɔti ma̍ pīya dikpo̍ba̍ alɛhu̍ aligbe gāa ge̍ē chɔ̄ɔwɛ nīi e̍ ge̍ē de Iji̍sɔ̄ɔsi ē ku̍. 11E̍ lɛ ɔwɔ̄wīyā kpɛ̍ɛji nīi e̍ po̍ i̍ngɔ̍ɔ ma̍. E̍ chrōoko̍o yī okpo ɔha̍ la odōde de ɔ̍. Bū la ɛbɛ ɔla̍ā, Iju̍dasi yɛ ē gāla̍ ɔpɔ̄pū nīi o̍ ge̍ē chɔ̄ɔwɛ, hɛ̄ɛbɛ nīi e̍ ē ku̍ Iji̍sɔ̄ɔsi bɛ̍ɛ̄nɛ̄.

Iji̍sɔ̄ɔsi re̍ ojōre̍ yī Ɔwɔ̄wīyā yī Owu̍lā ba̍la a̍chi̍kpo̍ yī nū

(Ima̍tiyu 26:17-25; Ilu̍uku 22:7-14; Ijɔ̍ɔn 13:21-30)

12I̍chi̍chɛ ɔla̍ā re̍ka ɔ̄chī ɔrāarāa yī Ɔwɔ̄wīyā Ɔla̍ā Nīi Ojōre̍ yī Nū I̍ Tū Ɔjā Obī Ibrɛ̍ɛdi Nōnū Ni̍ a̍nɛ. Yɛ̄grāa ɔla̍ā nīi e̍ ē ngmo̍ anyīyɛrɔ̄ yī Ɔwɔ̄wīyā yī Owu̍lā a̍nɛ. A̍chi̍kpo̍ yī Iji̍sɔ̄ɔsi che ɔ̍ ikpo̍ bɛ̍ɛ̄nɛ̄ hīka, “Aba̍ nīi a chikpo̍ nīi alɔ ge̍ē ya̍ ojōre̍ yī Ɔwɔ̄wīyā yī Owu̍lā nūma̍ lā tīgbē yī wɔ ma̍?”

13O̍ wā ge̍ de a̍chi̍kpo̍ yī nū āchɛ ɛpa tɛ̄rɔ̄ bɛ̍ɛ̄nɛ̄, ka de wa̍ hīka, “Ala̍ ā yɛ i̍ngɔ̍ɔ ga ipwɔ̍ɔ̄lɛ̍. Ɔngrɔ̄ɔ ɔha̍ nīi bī yɛ̄hī yī yenyi ma̍ ge̍ē yɛ wā ge̍ē ku̍ ala̍. Ala̍ ā de ku ɔngrɔ̄ɔ ɔla̍ā gāa. 14Wɔlɛ̍ nīi o̍ ge̍ chɛ̄ gāa ma̍, ala̍ ā gāa. Ala̍ ā ka de a̍dāwɔ̄lɛ̍ ɔla̍ā hīka, ‘Ɔngūlɛ̄lā ka hīka lipu̍ yī u̍nu̍ yī anu̍ ɔ̍lɔ kɔ̍ɔ̄, ɛbɛ nīi anu̍ ba̍la a̍chi̍kpo̍ yī anu̍ ɔ̍lɔ ge̍ē gblāa ē re̍ ojōre̍ yī Ɔwɔ̄wīyā yī Owu̍lā nūma̍ ma̍?’ 15A̍dāwɔ̄lɛ̍ ɔla̍ā ge̍ē chabɔ̄ yī lipu̍ ɔlɛkpu̍u̍ ɔha̍ ē hu̍ ala̍ abɔ̍ɔ la u̍nu̍ ichō ɔha̍. E̍ de ɔ̍ gbɔ̍ɔ̄gbla̍a lɔ̄lā abɔ̍ɔ mɛ̍. Ala̍ ā ya̍ ojōre̍ lā abɔ̍ɔ tīgbē yī alɔ bɛ̍ɛ̄nɛ̄.”

16A̍chi̍kpo̍ yī nū ɛla̍ā wā ge̍ pīya ga ipwɔ̍ɔ̄lɛ̍ bɛ̍ɛ̄nɛ̄. E̍ ma̍ ɔjāha̍-ɔjāha̍ i̍ngɔ̍ɔ ke̍e̍ lɔkɔ nīi Iji̍sɔ̄ɔsi ka de wa̍ ma̍. E̍ de ojōre̍ yī Ɔwɔ̄wīyā Owu̍lā ɔla̍ā ya̍ bɛ̍ɛ̄nɛ̄.

17Ɔ̄nɛ̄ wā ge̍ de gbo ma̍, anu̍ ba̍la a̍chi̍kpo̍ yī nū āchɛ igwo̍lɛpa ɛla̍ā wā ge̍ pīya gānyɔ̄. 18E̍ gblāa abɔ̍ɔ la okpōkōlō yɛ ē re̍ ojōre̍; Iji̍sɔ̄ɔsi da wa̍ hīka, “Lēchi̍-lēchi̍, n ā koko̍o de ala̍! Ɔ̄chɛ ɔha̍ amu lipu̍ yī ala̍ nūma̍ ge̍ē chɔ̄ɔwɛ ē tū u. Ɔlɔjā hɔ̄ amu ē re̍ ojōre̍ ba̍la ami.”

19Ūkpɔ̄tū ti̍ya a̍chi̍kpo̍ yī nū tū ɔlamu-ɔlamu. Ɔnyɔnyɛ yɛ ē chikpo̍ bɛ̍ɛ̄nɛ̄ hīka, “Ami nɛ?”

20Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Ɔ̄chɛ ɔha̍ lipu̍ yī ala̍ āchɛ igwo̍lɛpa, onīi yɛ ma̍ ē de ibrɛ̍ɛdi ku ɔrɔ̄ la u̍kpu̍ūhā ūkpo̍he ba̍la ami ma̍ nɛ. 21Ɔyi̍ yī Ɔngrɔ̄ɔ ma̍ ge̍ē pīyēku̍ lɔkɔ nīi Īpū yī Ɔwɔ ka ku̍ ɔ̄ ma̍. I̍īyo̍ de ɔ̄chɛ ɔla̍ā nīi ge̍ē chɔ̄ɔwɛ ē tū Ɔyi̍ yī Ɔngrɔ̄ɔ ma̍! E̍ i̍ ge̍ ma ɔlɔjā ni̍ nɛ, o̍ ge̍ hwɔhi fi̍yɛ̍ de ɔlɔjā.”

Ojōre̍ nīi Ādā Iji̍sɔ̄ɔsi de ma̍

(Ima̍tiyu 26:26-30; Ilu̍uku 22:15-20; 1 Alikɔ̍rīnti 11:23-25)

22E̍ gblāa yɛ ē re̍ ojōre̍ ma̍, Iji̍sɔ̄ɔsi nāa Ibrɛ̍ɛdi bī la abɔ̄. O̍ jɔhā, da Ɔwɔ o̍be ma̍, o̍ de ɔ̍ hɛ̍ wa̍a̍. O̍ de nāa de a̍chi̍kpo̍ yī nū, koko̍o de wa̍ hīka, “Ala̍ ā nāa re̍, ma̍a ibi̍īyē yī u hɔ̄ ma̍ a̍nɛ.”

23O̍ gba̍a nāa ɔgba̍galā yī ɛ̍mwɔ̄ bī la abɔ̄. O̍ da Ɔwɔ o̍be bɛ̍ɛ̄nɛ̄ ma̍, o̍ nāa grāa aa̍ nīi e̍ gwa̍ wa̍a̍. 24O̍ koko̍o de wa̍ bɛ̍ɛ̄nɛ̄ hīka, “Yeyī yī u nīi n hu de āchɛ wa̍a̍ ma̍ hɔ̄ ma̍ a̍nɛ. Yeyī yī u nīi hu nīi yɛka ɔgwɔ̍ɔ̄gwa̍ yī Ɔwɔ ba̍la āchɛ̄ɛchɛ de lwɔhu̍ brii ma̍ nɛ. 25Lēchi̍-lēchi̍, n ā koko̍o de ala̍! N i̍ ge̍ē gwa̍ ɛ̍mwɔ̄ nīi e̍ ya̍ la yenyi yī īkpɔ̄ɔ̄chi̍ ma̍ gɛ ni̍, kpɛɛ gbo̍ ɔ̄chī ɔla̍ā nīi n ge̍ē gwa̍ ɛ̍mwɔ̄ onīpīpɛ̄ abɔ̍ɔ la ɛbɛ yī Ɔchwɔ̄lɛ̍ Oro̍ōre̍ yī Ɔwɔ ma̍.”

26E̍ wā ge̍ gwe̍ejē kā Ɔwɔ ɔkɔ̄kā kwɛ̍ɛjī ma̍, e̍ bīyɛchɛ pīya ga Yɛwu yī O̍līifu.

Iji̍sɔ̄ɔsi ka Ipi̍ta ɔ̍lɔ ge̍ē ta̍ahu̍ yī anu̍

(Ima̍tiyu 26:31-35; Ilu̍uku 22:31-34; Ijɔ̍ɔn 13:36-38)

27Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ala̍ wa̍a̍ chī ge̍ē gwɛ̍ɛnya ē hī u we̍. Wu̍chē oji̍ nɛ, Īpū yī Ɔwɔ ka hīka,

“ ‘N ge̍ē de ɔ̄chɛ odeyīrɛ anyīyɛrɔ̄ ē ngmo̍ ma̍,

anyīyɛrɔ̄ ɛla̍ā wa̍a̍ chī ge̍ē mīyanya.’

28N ge̍ hye̍ēyī la okū mɛ̍, n ge̍ē yɔbū de ala̍ gāa Iga̍līli.”

29Ipi̍ta ka de ɔ̍ bɛ̍ɛ̄nɛ̄ hīka, “Ādā, āchɛ ehēhī ge̍ tɔ̍ɔ̄ta̍ wɔ, ami ma̍ i̍ ge̍ē ya̍ i̍ngɔ̍ɔ ni̍!”

30Iji̍sɔ̄ɔsi koko̍o de Ipi̍ta bɛ̍ɛ̄nɛ̄ hīka, “Lēchi̍-lēchi̍, n ā koko̍o de wɔ! O̍bū nīi ugū ge̍ē tɛ̄ra̍ igbɛpa i̍chɛ la otu̍, awɔ pi̍i̍ ge̍ē ta̍ahu̍ igbɛta̍ ka aɔ̍lɔ i̍ je̍ amɔ̍lɔ ni̍!”

31Ipi̍ta ka lēchi̍ lēchi̍ de ɔ̍ hīka, “E̍ ge̍ yɛ ge̍ē dōde u ngmo̍ ba̍la awɔ, n i̍ ge̍ē ka hīka n i̍ je̍ wɔ ni̍ ge̍ē gbo̍ ni̍!” Aa̍ āchɛ ehēhī titi ka i̍ngi̍ngɔ̍ɔ.

Iji̍sɔ̄ɔsi jɔhā la Igɛsɛ̍māni

(Ima̍tiyu 26:36-46; Ilu̍uku 22:39-46)

32E̍ wā ge̍ pīya ga ɛbɛ ɔha̍ nīi re̍ka Igɛsɛ̍māni ma̍ bɛ̍ɛ̄nɛ̄. Iji̍sɔ̄ɔsi ka de a̍chi̍kpo̍ yī nū hīka, “Ala̍ ā hyāhɔ̄ amu u̍ma̍, ami ge̍ē gāa iyɔ̄bū ge̍ē jɔhā.”

33O̍ bī Ipi̍ta ba̍la Ije̍mēehi ba̍la Ijɔ̍ɔn ku iyī nū gānyɔ̄. Ūkpɔ̄tū ɔta̍āā ba̍la ūkpɔ̄tū ɔti̍yatū wā la anu̍ bɛ̍ɛ̄nɛ̄. 34O̍ koko̍o de wa̍ hīka, “Īlāanyī yɛ amu ē lā u kpɛ̍ɛji, bɔ̄ɔjā nīi o̍ ge̍ē ngmo̍ um ma̍. Ala̍ ā gblāa amu u̍ma̍ nīi ala̍ ge̍ deyīrɛ grigri.”

35O̍ yɛ ga iyɔ̄bū pi̍nyɛ̍ ma̍, o̍ ngma̍ ta̍gbo la ajɛ, jɔhā de Ɔwɔ hīka ɔ̍lɔ ge̍ yɛ ge̍ē ngmɛ̍rɛ̍ mɛ nɛ, akanya yī yɛ̄grāa ɔla̍ā ɔ̍lɔ ge̍ hɛ̍ anu̍ ga. 36O̍ ka hīka, “Ādā, A̍dā yī u be̍e! A ē ya̍ ɔjāha̍-ɔjāha̍ wa̍a̍ ē mɛ. De ɔgba̍galā yī ichi̍ nūma̍ nāa hī u gɛ! A ā chī ya̍ lɔkɔ nīi ami chikpo̍ pi̍i̍ ma̍ ni̍; ya̍ lɔkɔ nīi awɔ ɔlɔjā chikpo̍ ma̍.”

37O̍ ku̍chē wā ge̍ ma̍ a̍chi̍kpo̍ yī nū nīi ē gblāa abɔ̍ɔ ē gbwɔlā. O̍ da Ipi̍ta hīka, “Isa̍yi̍mɔ̄ɔn, a yɛ ē gbwɔlā? A i̍ hīyɛchɛ i̍ngɛ̍ɛ̄nɛ̄ yɛ̄grāa pi̍nyɛ̍ mɛ ni̍? 38Ala̍ ā deyīrɛ! Ala̍ ā jɔhā, hɛ̄ɛbɛ nīi ala̍ ge̍ e̍e ngma̍ ta̍tū la otu̍tū ni̍. Uhu ma̍ chikpo̍ i̍ngɔ̍ɔ, ibi̍īyē ɔlamu lɛ kwīkwī a̍nɛ.”

39Iji̍sɔ̄ɔsi gba̍a ku̍chē pīya ge̍ jɔhā de Ɔwɔ lɔkɔkɔ nīi o̍ ji o̍bū ma̍. 40O̍ gba̍a ku̍chē wā ge̍ ma̍ a̍chi̍kpo̍ yī nū nīi e̍ gblāa abɔ̍ɔ ē gbwɔlā. Wɔlā hɛ̍tū wā mikomiko wa̍a̍. E̍ i̍ je̍ ɔjā nīi e̍ ge̍ē hīya Iji̍sɔ̄ɔsi ɔkɔ ma̍ ē gɛ ni̍.

41Iji̍sɔ̄ɔsi gba̍a ku̍chē wā o̍mgbo̍mɛta̍ ge̍ de wa̍ hīka, “Re̍ka ala̍ e̍e gblāa amu ē gbwɔlā, ē myɛ̍nyɛ̍? O̍ hwɔhi mɛ̍! Yɛ̄grāa ɔ̍lɔma̍ gbajɛ mɛ̍. E̍ wa̍ābɔ̄ la Ɔyi̍ yī Ɔngrɔ̄ɔ tū āchɛ ɔdwɔ̄bi̍ la abɔ̄ mɛ̍. 42Ala̍ ā nīichō nīi alɔ ā pīya! Ma̍ ɔ̄chɛ nīi chɔ̄ɔwɛ tū u ma̍ nīi yɛ aa̍ kurɛkurɛ.”

E̍ de Iji̍sɔ̄ɔsi ku̍

(Ima̍tiyu 26:47-56; Ilu̍uku 22:47-53; Ijɔ̍ɔn 18:3-12)

43Ɔpɔ̄ɔpɛ̄, igbo̍ nīi Iji̍sɔ̄ɔsi yɛ aa̍ ē kɔ̄kɛlā ma̍, Iju̍dasi ku̍ ta̍ bū gbɛgbɛlɛ, Iju̍dasi ɔla̍ā nīi - ɔ̄chɛ ɔha̍ lipu̍ yī a̍chi̍kpo̍ yī nū āchɛ igwo̍lɛpa ma̍ nɛ. O̍ bī āchɛ yɛ̄mɛ̄mɛ̄ wā. Āchɛ ɛla̍ā bī a̍yā ba̍la ogblo̍. Alɛhu̍ aligbe ba̍la āchɛ ongū Lihɔ yī Iju̍u ba̍la ɛgabɔ̄ de āchɛ ɛla̍ā tɛ̄rɔ̄ a̍nɛ. 44Ɔlɔwɛ ɔlɔjā de lɛlā chabɔ̄ hu̍ wā lɔ̄lā mɛ̍ hīka, ɔ̄chɛ nīi anɔ̍lɔ ge̍ē da ɔ̍lɔ o̍be ē de oko̍o ē tū ɔ̍lɔ mɛ̍, ɔlɔjā - ɔ̍lɔ Iji̍sɔ̄ɔsi a̍nɛ. Ɛ̍lɛ ge̍ ku̍ ɔ̍lɔ nīi ɛ̍lɛ ge̍ deyīrɛ ɔ̍lɔ yɛ̍yɛ̍ bɛ̍ɛ̄nɛ̄.

45Iju̍dasi gbajɛ gāa ma̍, o̍ tɔ̍ɔ̄pɔ̄ɔpɛ̄ ga ɛbɛ yī Iji̍sɔ̄ɔsi. O̍ ka ɔ̍lɔ ge̍, “Ɔngūlɛ̄lā,” de oko̍o tū ɔ̄. 46Āchɛ ɛla̍ā kpakri la Iji̍sɔ̄ɔsi bɛ̍ɛ̄nɛ̄, de ɔ̍ ku̍. 47Ɔ̄chɛ ɔha̍ nīi rɛ abɔ̍ɔ la ajɛ ma̍ pi oge yī nū hi̍ya̍a̍ ɔpɔ̄ɔpɛ̄, de ɔ̍chɛ̍ yī A̍dā Aligbe kpo̍ wɔrɔ̄. 48Iji̍sɔ̄ɔsi da āchɛ ɛla̍ā bɛ̍ɛ̄nɛ̄ hīka, “Ala̍ bī a̍yā, bī ogblo̍ wā ge̍ē ku̍ u ji bɔ̄ɔjā nīi ala̍ yɛ gāa ge̍ē ku̍ obu̍ūwī. 49Myɛ̄grāa-myɛ̄grāa nīi n ē hɔ̄ abɔ̍ɔ ba̍la ala̍ la u̍nu̍ yī Ɔwɔ ē ngū āchɛ lɛlā ma̍ bɛ̍ɛ? Ala̍ ku̍ u yɛ̄grāa ɔla̍ā kɛ̄ɛ? Onūma̍ ya̍ hɛ̄ɛbɛ nīi lɛlā yī Īpū yī Ɔwɔ ge̍ē gɔ̄grāa.”

50A̍chi̍kpo̍ yī nū wa̍a̍ wa̍ābɔ̄ yī nū de gwɛ̍ɛnya hī ɔ̄.

51Oye̍kre̍biya ɔha̍ nīi ta̍ ābāchā ɔnɛ̄rɛ̍ɛ̄rɛ̍ ɔha̍ kla̍ ma̍ de ku Iji̍sɔ̄ɔsi la u̍tu. Āchɛ ɛha̍ kpakri la anu̍ titi ɔpɔ̄ɔpɛ̄; 52o̍ wa̍ābɔ̄ la ɔ̄pa̍ ɔta̍kla̍ yī nū ɔpɔ̄ɔpɛ̄, de gwɛ̍ɛnya la ibi̍īyē ɛwɛwa.

E̍ bī Iji̍sɔ̄ɔsi ga ipwɔ̍ɔ̄nū yī a̍dā aligbe

(Ima̍tiyu 26:57-68; Ilu̍uku 22:54-55, 63-71; Ijɔ̍ɔn 18:13-14, 19-24)

53E̍ de Iji̍sɔ̄ɔsi bī ga wɔlɛ̍ yī A̍dā Aligbe. Alɛhu̍ aligbe ba̍la ɛgabɔ̄ ba̍la āchɛ ongū Lihɔ yī Iju̍u grēeyī abɔ̍ɔ. 54Ipi̍ta de ku wā la u̍tu du̍mɔ̍-du̍mɔ̍ ge̍ chɛ̄ la iyɛ̍ɛchɛ yī ipwɔ̍ɔ̄nū yī A̍dā Aligbe. O̍ pīya hyāhɔ̄ abɔ̍ɔ tāa āchɛ ɔgbɛ̄ɛbɛ yɛ ē jɛ̄ ɔla̍. 55Alɛhu̍ aligbe ba̍la Ogrēeyī yī Alihiyo ɔla̍ā wa̍a̍ yɛ ē gāla̍ itɛ̍ɛhi̍yɛ̍ nīi ge̍ē kɛlā ɔdwɔ̄bi̍ ku̍ Iji̍sɔ̄ɔsi ma̍, hɛ̄ɛbɛ nīi e̍ ge̍ē de ɔ̍ ē ngmo̍; e̍ i̍ ma̍ ni̍. 56Āchɛ yɛ̄mɛ̄mɛ̄ wā ge̍ warīmɛ̄ ba̍ ɔ̄. Oko̍o yī lɛlā yī wā i̍ lɛ ūkpo̍he-ūkpo̍he mɛ ni̍.

57Āchɛ ɛha̍ nīichō yarɛ warīmɛ̄ ba̍ ɔ̄ hīka, 58“Alɔ po̍ nīi o̍ ka hīka, anɔ̍lɔ ge̍ē de u̍nu̍ yī Ɔwɔ nūma̍ nīi āchɛ̄ɛchɛ ɛ̍lɛ gwo̍ ma̍ ē gbo; lipu̍ yī ɔ̄chī ɛta̍, anɔ̍lɔ ge̍ē gwo̍ ɔha̍ nīi i̍ āchɛ̄ɛchɛ ɛ̍lɛ gwo̍ a̍ni̍ ma̍.” 59Lɛlā yī aa̍ enūma̍ i̍ gba̍a lɛ ūkpo̍he-ūkpo̍he ni̍ kpɔ̍.

60A̍dā Aligbe nīichō yarɛ lipu̍ yī āchɛ wa̍a̍ bɛ̍ɛ̄nɛ̄, che Iji̍sɔ̄ɔsi ikpo̍ hīka, “A i̍ lɛ ɔkɔ ɔhɔ̄hīya ɔha̍lɔha̍ ge̍ē hīya ni̍? Lɛlā nīi e̍ yɛ ma̍ ē ka ē ku̍ wɔ wa̍a̍ ma̍ bɛ̍ɛ?”

61Iji̍sɔ̄ɔsi hīdīdū; o̍ i̍ hīyɔkɔ ni̍. A̍dā Aligbe gba̍a che ɔ̍ ikpo̍ hīka, “Awɔ - Ɔhɔ̍ɔnyɛta̍ Nīi Ɔwɔ Hōhu, Ɔyi̍ yī Ɔwɔ Nīi Alɔ Ē To̍gbo̍ Ē De Ɔ̍ Ma̍ a̍nɛ?”

62Iji̍sɔ̄ɔsi hīya anu̍ ɔkɔ bɛ̍ɛ̄nɛ̄ hīka, “Ami nɛ. Ala̍ chī ge̍ē ma̍ Ɔyi̍ yī Ɔngrɔ̄ɔ nīi o̍ ge̍ē hyāhɔ̄ la abɔ̄ līre̍ yī Ɔwɔ nīi re̍ka Wɔhu̍ ma̍! Ala̍ chī ge̍ē ma̍ ɔ̄ nīi o̍ ge̍ē bū la akpɔ̍ɔwɔ yɛ ē wā ma̍!”

63Ɔpɔ̄ɔpɛ̄, A̍dā aligbe ku̍ iyī nū ɔjā otūlibi̍īyē hi̍ya. O̍ ka bɛ̍ɛ̄nɛ̄ hīka, “Alɔ ge̍ē gba̍a ē chikpo̍ yī itɛ̍ɛhi̍yɛ̍ ge̍ē ya̍ oji̍? 64Ala̍ wa̍a̍ chī plɛ̍ɛ̄lā ɔdwɔ̄bi̍ nīi o̍ ka ku̍ Ɔwɔ hɔ̄ aa̍ mɛ̍? Kɛ̄ɛ ala̍ ka̍a gbɛri̍ya̍ kana̍ oo!”

Āchɛ ɛla̍ā wa̍a̍ de lɛpɔ̄ ku̍ Iji̍sɔ̄ɔsi; ɛ̍lɛ ge̍ de ɔ̍lɔ ngmo̍.

65Āchɛ ɛha̍ kū la arɛ la ɔta̍kla̍ anu̍ ɔpɔ̄ɔpɛ̄. E̍ de ɔjā wā ɔ̄ la eyī. E̍ ē dra̍ anu̍ abɔ̄, da ɔ̍ hīka, “Mwɔ̍ɔmu we̍ e̍e, hīka a ge̍ē je̍ ɔ̄chɛ nīi lā wɔ abɔ̄ ma̍?” Āchɛ ɔgbɛ̄ɛbɛ kū abɔ̍ɔ ē lā ɔ̄ abɔ̄ i̍ngi̍ngi̍ngɔ̍ɔ.

Ipi̍ta ta̍ahu̍ yī Iji̍sɔ̄ɔsi

(Ima̍tiyu 26:69-75; Ilu̍uku 22:56-62; Ijɔ̍ɔn 18:15-18, 25-27)

66Ipi̍ta ma̍ hyāhɔ̄ amu la iyɛ̍ɛchɛ yī ipwɔ̍ɔ̄nū ɔla̍ā. Ɔyi̍ ɔnɔ̄nyā ɔha̍ nīi ē ya̍ u̍ku̍rɔ̍ de A̍dā Aligbe ma̍ wā abɔ̍ɔ bɛ̍ɛ̄nɛ̄. 67O̍ ma̍ Ipi̍ta nīi o̍ hɔ̄ abɔ̍ɔ ē jɛ̄ ɔla̍ ma̍, o̍ gbeyīchi̍i̍ ma̍ Ipi̍ta, da ɔ̍ hīka, “Je̍ka awɔ titi ē yɛ ba̍la Iji̍sɔ̄ɔsi yī Ina̍jārɛ̄ɛti?”

68Ipi̍ta ta̍ahu̍ ɔpɔ̄ɔpɛ̄: Anɔ̍lɔ i̍ jo̍ōkū ni̍. Anɔ̍lɔ i̍ je̍ ochi̍chi̍ yī ɔjā nīi ɔ̍lɔ yɛ aa̍ ka ma̍ ni̍. Ipi̍ta wā ge̍ ku̍ nīichō pīya ge̍ rɛ la oko̍no̍grīgba. Ugū tɛ̄ra̍ yɛ̄grāa ɔla̍ā ɔpɔ̄ɔpɛ̄.

69Ɔyi̍ ɔnɔ̄nyā ɔla̍ā gba̍a̍ ma̍ Ipi̍ta abɔ̍ɔ ma̍, o̍ kū abɔ̍ɔ ē koko̍o de āchɛ ɛha̍ nīi rɛ abɔ̍ɔ ma̍ hīka ɔngrɔ̄ɔ nūma̍ ɔ̍lɔ - ɔ̄chɛ ɔha̍ yī ɛ̍lɛ nɛ. 70Ipi̍ta gba̍a ta̍ahu̍ ɔpɔ̄ɔpɛ̄ ka ɔ̍lɔ i̍ anu̍ ni̍.

Yɛ̄grāa ɔha̍ pi̍nyɛ̍ ɔpɔ̄ɔpɛ̄, āchɛ nīi rɛ abɔ̍ɔ ma̍ gba̍a ka bɛ̍ɛ̄nɛ̄ hīka, “Ichɛ̄ɛhi nɛ. Awɔ - ɔ̄chɛ yī wā ɔha̍ nɛ. Wu̍chē oji̍ nɛ, awɔ - Oliga̍līli nɛ.”

71Ipi̍ta jɔhā tū iyī nū, gbo Ɔwɔ, gba̍a ta̍ahu̍ hīka, “Lēchi̍! N i̍ je̍ ɔ̄chɛ nīi ala̍ yɛ aa̍ ē kɛlā yī nū ma̍ ni̍!”

72Yɛ̄grāa ɔla̍ā ɔpɔ̄ɔpɛ̄, ugū tɛ̄ra̍ o̍mgbo̍mɛpa. Ipi̍ta bla lɛlā nīi Iji̍sɔ̄ɔsi da ɔ̍ ma̍ ɔpɔ̄ɔpɛ̄: “O̍bū nīi ugū ge̍ē tɛ̄ra̍ igbɛpa, a ge̍ē ta̍ahu̍ igbɛta̍ ka aɔ̍lɔ i̍ je̍ amɔ̍lɔ ni̍.” Ipi̍ta ta̍ kpu̍u la lɛgba.

Currently Selected:

Ima̍aki 14: YBASR

Highlight

Copy