Ima̍aki 15

E̍ bī Iji̍sɔ̄ɔsi ga ɛbɛ yī Ipa̍yi̍lēeti

(Ima̍tiyu 27:1-2, 11-14; Ilu̍uku 23:1-5; Ijɔ̍ɔn 18:28-38)

1Eyī de nyā ɔpɔ̄ɔpɛ̄ ma̍, alɛhu̍ aligbe, ba̍la ɛgabɔ̄ ba̍la āchɛ ongū Lihɔ yī Iju̍u ba̍la Ogrēeyī yī Alihiyo wa̍a̍ tu̍ grēeyī lɛ ɔmɔ̄miya. E̍ de agba̍ tū Iji̍sɔ̄ɔsi, bī ɔ̄ gāa ge̍ wa̍ābɔ̄ la anu̍ de Ipa̍yi̍lēeti. 2Ipa̍yi̍lēeti che Iji̍sɔ̄ɔsi ikpo̍ hīka, “Awɔ - Ɔchwɔ̄lɛ̍ yī Iju̍u ɔ̍lɔma̍ a̍nɛ?”

Iji̍sɔ̄ɔsi hīya anu̍ ɔkɔ hīka, “I̍ngɔ̍ɔ nīi a ka a̍nɛ.”

3Bɛ̍ɛ̄nɛ̄, alɛhu̍ aligbe wā ge̍ koko̍o yī lɛlā abi̍ yɛ̄mɛ̄mɛ̄ ku̍ Iji̍sɔ̄ɔsi. 4Ipa̍yi̍lēeti gba̍a che Iji̍sɔ̄ɔsi ikpo̍ hīka, “A i̍ lɛ ɔkɔ yī lɛlā ɔha̍lɔha̍ ge̍ē hīya ni̍? Okru̍utu yī lɛlā nūma̍ wa̍a̍ nīi e̍ ka ku̍ wɔ ma̍ bɛ̍ɛ?”

5Iji̍sɔ̄ɔsi i̍ chɛ̄ hīyɔkɔ yī lɛlɛ̄lā gɛ ni̍. O̍ de ya̍ Ipa̍yi̍lēeti lɛbɛ̍bi̍.

E̍ hɛ̍ Iji̍sɔ̄ɔsi ɔpīyaku̍

(Ima̍tiyu 27:15-26; Ilu̍uku 23:13-25; Ijɔ̍ɔn 18:39—19:16)

6Mlɛ̍yi̍mlɛ̍yi̍, yɛ̄grāa yī Ɔwɔ̄wīyā yī Owu̍lā, Ipa̍yi̍lēeti ē wu̍ oligbakɔbɔ ūkpo̍he ē bīyɛchɛ de wa̍. Ɔ̄chɛ nīi aa̍ ɛlɛjā ge̍ chikpo̍ ma̍ nīi o̍ ē tu̍ hī ɔ̄ de wa̍ a̍nɛ. 7Yɛ̄grāa ɔla̍ā, ɔngrɔ̄ɔ ɔha̍ nīi re̍ka Ibara̍bāsi ma̍ tū abɔ̍ɔ la igbakɔbɔ. Anu̍ ba̍la āchɛ ɛha̍ nīi ta̍tu̍tu̍ yī unu pīyeyīta̍ igɔ̍mɛ̄ɛti, de ɛbɛ ti̍yatū nīi e̍ ngmo̍ āchɛ ma̍ tū abɔ̍ɔ a̍nɛ. 8Āchɛ wa̍a̍ tu̍ ge̍ grēeyī ka Ipa̍yi̍lēeti ɔ̍lɔ ge̍ ya̍ de aa̍ lɔkɔ nīi ɔ̍lɔ ē ya̍ ogbo̍gbe̍ ma̍ gɛ. 9Ipa̍yi̍lēeti che wa̍ ikpo̍ hīka, “Ɔchwɔ̄lɛ̍ yī Iju̍u nīi ala̍ chikpo̍ nīi n ge̍ē wu̍ ɔ̄ ta̍ de ala̍ bɛ̍ɛ̄nɛ̄ a̍ni̍?” 10Ipa̍yi̍lēeti jo̍ōkū wa̍a̍ hīka uji nīi alɛhu̍ aligbe ɛ̍lɛ ē tū Iji̍sɔ̄ɔsi ma̍ - ohu̍ nīi ɛ̍lɛ ku̍ ɔ̍lɔ ge̍ de anu̍ a̍nɛ.

11Alɛhu̍ aligbe tu̍ āchɛ tū; ɛ̍lɛ ge̍ ka nīi Ipa̍yi̍lēeti ɔ̍lɔ ge̍ wu̍ Ibara̍bāsi bīyɛchɛ de ɛ̍lɛ. 12Ipa̍yi̍lēeti che wa̍ ikpo̍ hīka, “Bɛ̍ɛ̄nɛ̄ ma̍, oji̍ nīi ami chī ge̍ē ya̍ la ɔngrɔ̄ɔ nīi ala̍ ē hīka, ‘Ɔchwɔ̄lɛ̍ yī Iju̍u’ ma̍?”

13Aa̍ wa̍a̍ ka gbōō grāa anu̍ hīka, “De ɔ̍ gwōba̍ la ɔchi̍ ɔhrɛ̍ɛpa oo!”

14Ipa̍yi̍lēeti da wa̍ hīka, “Ohu̍ yī nū bɛ̍ɛ? Lɛlā abi̍ ɔna̍ nīi o̍ ya̍ ma̍?”

Āchɛ ɛla̍ā ya̍ ojiya ga iyɔ̄bū iyɔ̄bū bɛ̍ɛ̄nɛ̄ hīka, “De ɔ̍ gwōba̍ la ɔchi̍ ɔhrɛ̍ɛpa oo!”

15Ipa̍yi̍lēeti chikpo̍ ge̍ē ya̍ ɔnɛ̄ɛhɛhi yī āchɛ ɛla̍ā ma̍, o̍ wu̍ Ibara̍bāsi bīyɛchɛ de wa̍. O̍ ka nīi e̍ gwo̍ Iji̍sɔ̄ɔsi lijē la a̍grɛ̄chi̍. O̍ wa̍ābɔ̄ la anu̍ de wa̍ nīi e̍ ge̍ē bī ɔ̄ ge̍ē gwōba̍ la ɔchi̍ ɔhrɛ̍ɛpa bɛ̍ɛ̄nɛ̄.

Icho̍ojiya bī Iji̍sɔ̄ɔsi ya̍

(Ima̍tiyu 27:27-31; Ijɔ̍ɔn 19:2-3)

16Icho̍ojiya ɛla̍ā wā ge̍ bī Iji̍sɔ̄ɔsi pīya ga ipwɔ̍ɔ̄nū nīi re̍ka “Iprɛto̍riyum” ma̍. E̍ hī ribi yī icho̍ojiya ɔla̍ā ɛra̍ wa̍a̍ ge̍ grēeyī. 17E̍ de aru̍ ɔkwajɛ ɔnɔ̄ɔ̍ɔ̄a̍ ɔha̍ ru Iji̍sɔ̄ɔsi; de ɔjā ɔkla̍lɛhu̍ ɔha̍ nīi e̍ ya̍ la ijē ke̍e̍ ma̍ kla̍ anu̍ lɛhu̍. 18E̍ wā ge̍ de ɔ̍ o̍be bāa ɔchwɔ̄lɛ̍ ma̍ bɛ̍ɛ̄nɛ̄ hīka, “Gbo̍kɛkɛ Ādā, Ɔchwɔ̄lɛ̍ yī Iju̍u!” 19Bɛ̍ɛ̄nɛ̄ ma̍, e̍ ē grāa anu̍ a̍grɛ̄chi̍ lɛhu̍, ta̍ arɛ ē kla̍ anu̍. E̍ chī yɛ abɔ̍ɔ ē de ūnōowu tū ajɛ ē de ɔ̍ bɔ̄ɔjā nīi e̍ ē ya̍ otūlichō yī nū ma̍. 20E̍ bī Iji̍sɔ̄ɔsi ya̍ wa̍a̍ ma̍, e̍ de ɔ̍ aru̍ ɔkwajɛ ɔnɔ̄ɔ̍ɔ̄a̍ ɔla̍ā gbawu̍, chōo̍chē la iyī anu̍ ɔlɔjā ru ɔ̍. E̍ wu̍ ɔ̄ ta̍ bɛ̍ɛ̄nɛ̄, bī ɔ̄ pīya yɛ ge̍ē gwōba̍ la ɔchi̍ ɔhrɛ̍ɛpa.

E̍ de Iji̍sɔ̄ɔsi gwōba̍ la ɔchi̍ ɔhrɛ̍ɛpa

(Ima̍tiyu 27:32-44; Ilu̍uku 23:26-43; Ijɔ̍ɔn 19:17-27)

21E̍ yɛ wa̍a̍ ge̍ grāa ɔngrɔ̄ɔ ɔha̍ nīi bū la ikō yeēwā la ipwɔ̍ɔ̄lɛ̍ ma̍. O̍ re̍ka Isa̍yi̍mɔ̄ɔn Oyo̍olisayiri̍in, a̍dā yī Alɛsa̍nda ba̍la Iru̍fūusi. Icho̍ojiya ɛla̍ā ku̍ ɔngrɔ̄ɔ ɔla̍ā, nāa ɔchi̍ ɔhrɛ̍ɛpa yī Iji̍sɔ̄ɔsi che ɔ̍ wɔhu̍-wɔhu̍. 22E̍ bī Iji̍sɔ̄ɔsi wa̍a̍ ga ɛbɛ nīi re̍ka “Igo̍li̍gōta” ma̍. Ochi̍chi̍ yī ɔla̍ā re̍ka, “Ɛbɛ yī Īkplɛ̄hu̍ Āchɛ” 23E̍ de ɔchi̍ ɔlwɔnɔnɔ ɔha̍ nīi re̍ka ima̍a ma̍ tū ɛ̍mwɔ̄ de Iji̍sɔ̄ɔsi ka ɔ̍lɔ ge̍ gwa̍; o̍ i̍ chɛ̄ gwa̍ ni̍. 24E̍ ku̍ ɔ̄ gwōba̍ la ɔchi̍ ɔhrɛ̍ɛpa bɛ̍ɛ̄nɛ̄. E̍ de ɛjā otūlibi̍īyē yī nū kpo̍ kɔ̄ tāa iyī wā. E̍ ta̍ ɔjā ɔha̍ la ajɛ bāa ɛbā ma̍, hɛ̄ɛbɛ ge̍ē je̍ ɔjā nīi ɔnyɔnyɛ ge̍ē nāa ma̍ o̍bū. 25La oje arāanɛ yī ɔ̄chī nīi e̍ de Iji̍sɔ̄ɔsi gwōba̍ la ɔchi̍ ɔhrɛ̍ɛpa a̍nɛ. 26Lɛlā nīi e̍ ku̍ ɔ̄ wu̍chē yī nū ma̍, e̍ de ta̍ ba̍ abɔ̍ɔ la ɔchi̍ ɔhrɛ̍ɛpa hīka, “ƆCHWƆ̄LƐ̍ YĪ IJU̍U.” 27E̍ bī ebu̍ūwī āchɛ ɛpa ɛha̍ ge̍ gwōba̍ la ɔchi̍ abɔ̍ɔ bla̍a Iji̍sɔ̄ɔsi. Ɔha̍ ba̍ la wāā yī abɔ̄ līre̍; ɔha̍ ba̍ la abɔ̄ līfīyē. 28[Lɛlā nūma̍ ya̍ nīi Īpū yī Ɔwɔ ge̍ē gɔ̄grāa. O̍ ka hīka, “E̍ ka ɔ̍ tū la āchɛ ɔbīya lihɔ.”]

29Āchɛ ɛha̍ nīi yɛ ē ga la ogblo̍lo̍ ma̍ cha̍ ɔ̄ ɛcha̍. E̍ chɛ̄ lɛhɛ̍hu̍, da ɔ̍ hīka, “Ēē! A ka aɔ̍lɔ ge̍ē de u̍nu̍ yī Ɔwɔ ē gbo, ē gbla̍a ɔ̍lɔ ē gwo̍ lipu̍ yī ɔ̄chī ɛta̍ ē mɛ! 30Hɛ̍ iyī wɔ ta̍ gɛ, nīi a ā hrāajɛ hī ɔchi̍ ɔhrɛ̍ɛpa ɔla̍ā mɛ we̍ e̍ē!”

31Alɛhu̍ aligbe ba̍la āchɛ ongū Lihɔ yī Iju̍u titi yɛ ē bī ɔ̄ ya̍ la oko̍o ē de iyī wā hīka, “Ma̍ gɛ! Ɔngrɔ̄ɔ nūma̍ ē hɛ̍ āchɛ ē ta̍, o̍ i̍ chī hɛ̍ iyī nū ta̍ mɛ ni̍. 32Anu̍ nīi - Ɔhɔ̍ɔnyɛta̍ Nīi Ɔwɔ Hōhu, Ɔchwɔ̄lɛ̍ yī I̍sɛ̄rɛli ma̍; o̍ ge̍ hrāajɛ la ɔchi̍ ɔhrɛ̍ɛpa ɔla̍ā we̍ e̍ē, hɛ̄ɛbɛ nīi alɔ ā ma̍ ɔ̄, nīi alɔ ā chɛ̄ku ɔ̍.”

Āchɛ ɛpa ɛla̍ā nīi e̍ de wa̍ gwōba̍ abɔ̍ɔ bla̍a anu̍ ma̍ cha̍ ɔ̄ ɛcha̍ titi.

Ɔpīyaku̍ yī Iji̍sɔ̄ɔsi

(Ima̍tiyu 27:45-56; Ilu̍uku 23:44-49; Ijɔ̍ɔn 19:28-30)

33Yɛ̄grāa nīi yɛnɔ gbajɛ la yakpalɛ̄hu̍ ma̍, ɔcha yī ɛbɛ ɔla̍ā wa̍a̍ de dobū. O̍ lɛ i̍ngɔ̍ɔ kpɛɛ ge̍ ku oje ɛta̍ yī yɛnɔ. 34Yɛ̄grāa yī oje ɛta̍ ɔla̍ā, Iji̍sɔ̄ɔsi to̍ohwe̍e bɛ̍ɛ̄nɛ̄ hīka, “Ɛ̍loyi, Ɛ̍loyi, lɛma̍ sabakita̍ni.” Ochi̍chi̍ ɔla̍ā re̍ka, “Ɔwɔ yī u! Ɔwɔ yī u! Oji̍ - ohu̍ nīi a ku̍ pīya hī u ma̍/?”

35Āchɛ ɛha̍ nīi rɛ abɔ̍ɔ plɛ̍ɛ̄lā ɔla̍ā nīi Iji̍sɔ̄ɔsi ka ma̍ ka ɛ̍lɛ ge̍ po̍ gɛ! Ɔ̍lɔ yɛ abɔ̍ɔ ē hī Ɛla̍yi̍ja ɛra̍ ko̍ō! 36Ɔ̄chɛ ɔha̍ rɛ̄ɛnya bɛ̍ɛ̄nɛ̄ ge̍ de īpū yī owu̍ ru ɛ̍mwɔ̄ ɔha̍ nīi mɔ̍ɔ̄ma̍-mɔ̍ɔ̄ma̍ ma̍, de pla̍tū la u̍kpɔ̍chi̍, nā ɔ̄ kpaa grāa Iji̍sɔ̄ɔsi ka ɔ̍lɔ ge̍ pī gwa̍. Ɔ̄chɛ ɔ̍lɔma̍ ka hīka ɛ̍lɛ ge̍ ku̍ chi̍yɛ o̍bū! Aɛ̍lɛ ge̍ ma̍ gɛ e̍e ka Ɛla̍yi̍ja ɔ̍lɔ ge̍ē wā ge̍ē hrāa ɔ̍lɔ ajɛ?

37Iji̍sɔ̄ɔsi to̍ohwe̍e wɔhu̍-wɔhu̍ ɔpɔ̄ɔpɛ̄ hīyɔtū du̍mɔ̍.

38Ɔpɔ̄ɔpɛ̄, ɔ̄pa̍ nīi e̍ de hɛ̍ u̍kwee̍ yī u̍nu̍ yī Ɔwɔ ma̍ ku̍ ta̍āā bū la ichō ge̍ chɛ̄ ajɛ ke̍e̍. 39Ɔlɛhu̍ yī Icho̍ojiya ɔla̍ā rɛ abɔ̍ɔ ma̍ ɔ̄ nīi o̍ to̍ohwe̍e hīyɔtū ma̍. O̍ ka ɔ̍lɔ ge̍ lēchi̍, ɔngrɔ̄ɔ nūma̍ ɔ̍lɔ - Ɔyi̍ yī Ɔwɔ ichɛ̄ɛhi nɛ!

40Anyā ɛha̍ gblāa abɔ̍ɔ hwɛɛ ē myɛ̍ma̍ wā abɔ̍ɔ. Ɔha̍ yī wā re̍ka Imeri̍ Oyo̍olima̍gīdala, ɔha̍ re̍ka Isalo̍me; ɔha̍ gba̍a re̍ka Imeri̍, ɛ̍nɛ̍ yī Ije̍mēehi onīchi̍chɛ̍ ba̍la Ijo̍sisi. 41Anyā ɛla̍ā ē ku Iji̍sɔ̄ɔsi la u̍tu yɛ̄grāa nīi o̍ hɔ̄ la Iga̍līli ma̍ yɛ ē chrāa anu̍ ɛrɔ̄ a̍nɛ. Aa̍ ba̍la anyā ɛha̍ yɛ̄mɛ̄mɛ̄ nīi ku ɔ̍ wā la Ijɛru̍sālɛm ma̍ gblāa abɔ̍ɔ a̍nɛ.

Onyōnyi yī Iji̍sɔ̄ɔsi

(Ima̍tiyu 27:57-61; Ilu̍uku 23:50-56; Ijɔ̍ɔn 19:38-42)

42Ɔ̄nɛ̄ wā ge̍ de gbo bɛ̍ɛ̄nɛ̄. I̍chi̍chɛ ɔla̍ā re̍ka Ɔ̄chī Oti̍bi̍īyē Chɛ̄ a̍nɛ. Ɔ̄chī ɔla̍ā lā che Ɔ̄chī Ɔmyɛ̍nyɛ̍ a̍nɛ. 43Ɔngrɔ̄ɔ ɔha̍ nīi re̍ka Ijo̍sɛ̄ɛfu Ɔyɔ̍ɔlarīmati̍ya ma̍ gbajɛ wā bɛ̍ɛ̄nɛ̄. Olihiyo nɛ; āchɛ ē tū ɔ̄ la ichō kpɛ̍ɛji. Anu̍ titi yɛ ē de ɔtū che ge̍ē ma̍ ɔpiyɛ yī Ɔchwɔ̄lɛ̍ Oro̍ōre̍ yī Ɔwɔ. O̍ tu̍ ūkpɔ̄tū ku iyī nū, pīya dikpo̍ba̍ Ipa̍yi̍lēeti ka ɔ̍lɔ ge̍ tu̍ hī okū yī Iji̍sɔ̄ɔsi de anu̍. 44O̍ lɛ Ipa̍yi̍lēeti lɛbɛ̍bi̍ kpɛ̍ɛji nīi o̍ po̍ ka Iji̍sɔ̄ɔsi ɔ̍lɔ pīyaku̍ mɛ̍ ma̍. O̍ hī ɔlɛhu̍ yī icho̍ojiya ɔla̍ā ɛra̍ ge̍ che ɔ̍ ikpo̍ ka Iji̍sɔ̄ɔsi ɔ̍lɔ ku̍ gba̍agba̍a mɛ̍? 45Ipa̍yi̍lēeti de po̍ bū la oko̍o yī ɔlɛhu̍ icho̍ojiya ɔla̍ā ka Iji̍sɔ̄ɔsi ɔ̍lɔ pīyaku̍ mɛ̍ ma̍, o̍ ka Ijo̍sɛ̄ɛfu ɔ̍lɔ ge̍ nāa okū yī Iji̍sɔ̄ɔsi gɛ. 46Ijo̍sɛ̄ɛfu ra̍ ābāchā onīpīpɛ̄ bī gāa. O̍ de okū yī Iji̍sɔ̄ɔsi hrāa. O̍ de ābāchā ɔla̍ā mi̍ya anu̍ hwɔhi hwɔhi, de okū nāa ge̍ gbo la wɔ̄gɔ̄ yī u̍nwɔ̍wu̍ ɔha̍ nīi e̍ bu lɔ̄lā abɔ̍ɔ lipu̍ yī lɛchɔ̄ ma̍. O̍ wā ge̍ mi̍ya lɛchɔ̄ ɔnɔ̄kɔ̄kū ɔha̍ gū oko̍o yī wɔ̄gɔ̄ ɔla̍ā ke̍e̍. 47Imeri̍ Oyo̍olima̍gīdala ba̍la Imeri̍ nīi - ɛ̍nɛ̍ yī Ijo̍sisi ma̍ gblāa abɔ̍ɔ ē deyīrɛ ē gāa. E̍ je̍ ɛbɛ nīi e̍ de Iji̍sɔ̄ɔsi nyi ma̍.

Currently Selected:

Ima̍aki 15: YBASR

Highlight

Copy